Ko e Fatongia ʻo e Kau Palōfitá

ʻE lava ke tau ʻunu ʻo ofi ange kia Sīsū Kalaisi ʻi he fekumi ki ha tali ki heʻetau ngaahi fehuʻí kapau te tau fakaʻaongaʻi ʻa e ngaahi tefitoʻi moʻoni ʻoku falalaʻangá. ʻOku mahuʻinga ke maʻu ha mahino ki he founga hono maʻu ʻo e fakahaá ʻi he taimi ʻoku fekumi ai ki ha ngaahi talí. Vakai ki he tefito, “ʻIloʻi ko e Fakahaá ko ha Founga Ngāue Ia” ke vakaiʻi ha ngaahi tokoni lahi ange ki hono tali ʻo e ngaahi fehuʻí.

Vakai Fakalūkufuá

Talu mei he kuonga muʻá mo hono ui ʻe he ʻOtuá ha kau palōfita ke nau fakamoʻoni kia Sīsū Kalaisi mo malanga ʻaki ʻEne folofolá. ʻOku teuteuʻi, uiuiʻi, mo tataki ʻe he ʻOtuá ʻa e kau palōfitá ke fakahoko ʻEne ngaahi taumuʻa taʻengatá. ʻOku ʻi he folofolá ʻa e ngaahi akonaki ʻa e kau palōfita tokolahi, hangē ko Mōsese, ʻĪsaia, ʻIlaisiā, mo Nīfai. Naʻa nau takitaha lea ki he kakaí ʻi heʻenau lea fakafonuá, taimí, mo e feituʻú, ʻo fai ha fakahinohino fakalaumālie mo ha ngaahi fakatokanga taimi totonu.

ʻOku hokohoko atu hono ui ʻe he ʻOtuá ha kau palōfita ʻi hotau kuongá. Naʻe maʻu ʻe he Palōfita ko Siosefa Sāmitá ʻa e mafai mei he ʻOtuá ke fakahoko ʻa e ngaahi fuakava ʻo e ongoongoleleí mo e ngaahi ouau ʻo e lakanga fakataulaʻeikí mo fakafoki mai ʻa e Siasi ʻo Sīsū Kalaisí. Naʻá Ne maʻu foki ha fakahā ʻo fakamahinoʻi e ngaahi moʻoni mahuʻinga fekauʻaki mo e ʻOtuá mo ʻEne palani maʻa ʻEne fānaú. Kuo maʻu ʻe kinautolu ne nau fetongi ia ʻi he lakanga ko e Palesiteni ʻo e Siasí ʻa e mafai tatau ke maʻu ha fakahā ke tānaki atu ki he ʻilo ʻo e ongoongoleleí pea mo tataki ʻa e Siasí. Ko e tefitoʻi moʻoni ko ʻeni ʻo e hokohoko atu ʻo e maʻu fakahaá ko ha konga mahuʻinga ia ʻo e ongoongolelei kuo fakafoki maí.

ʻOku poupouʻi ʻe he Kāingalotu ʻo e Siasí ʻa e Palesiteni ʻo e Siasí, ko hono ongo tokoni ʻi he Kau Palesitenisī ʻUluakí mo e kau mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá ko ha kau palōfita, kau tangata kikite, mo e kau tangata maʻu fakahā. ʻOku fakahaaʻi ʻa e ngaahi akonaki ʻa e Siasí ʻe he leʻo uouangataha ʻo e kau palōfita moʻui ko ʻení. ʻOku fakahā mo fakatonuleaʻi ʻa e tokāteliné ʻe he Palesiteni ʻo e Siasí pea hikinimaʻi ʻe he Kau Palesitenisī ʻUluakí mo e Kōlomu ʻo e Toko Hongofulu Mā Uá ʻi he loto-taha, ʻo muimui ki he sīpinga naʻe ʻomi ʻi he Tokāteline mo e Ngaahi Fuakava 107:27–31.

Kuo ui ʻe he ʻEikí ha kau tangata fakamatelie ke hoko ko ʻEne kau palōfita. Hangē ko e fānau kotoa ʻa e ʻOtuá, ʻoku nau foua ha ngaahi faingataʻa ʻo e moʻui fakamatelié, ka ʻoku ngāue ʻa e ʻEikí ʻo fakafou ʻiate kinautolu ke fakahoko ʻEne ngāué. Kuó Ne fekau ki he Siasí ke nau tokanga ki heʻenau faleʻí “ʻi he kātaki mo e tui kotoa pē.” Kapau te tau fai ia, ʻokú Ne talaʻofa mai ke “fakamovetevetea atu … ʻa e ngaahi mālohi ʻo e fakapoʻulí ki muʻa ʻiate [kitautolu], pea pule ke ngalulululu ʻa e ngaahi langí koeʻuhi ko [ʻetau] leleí.”

Ngaahi fakahinohino fekauʻaki mo hono ako ʻo e ongoongoleleí:

“Kau Palōfitá”
“Ngaahi Kī ʻo e Lakanga Fakataulaʻeikí”

Ko e Tali ki Hoʻo Ngaahi Fehuʻí

Ko e hā e ʻuhinga ʻoku mahuʻinga ai ke u fakafanongo ki he kau palōfitá?

Naʻe fakafoki mai ʻe Sīsū Kalaisi Hono Siasí ʻi he ngaahi ʻaho fakaʻosí ke tokoni kiate Ia ʻi hono fakahoko ʻEne ngāue fakaofó: ʻOkú Ne finangalo ke akoʻi ʻa e ngaahi tāpuaki ʻo e fuakavá, fakafaingofuaʻi hono fakamolemoleʻi ʻo e angahalá, mo fai ha tokoni ʻi he ngaahi faingataʻá ki he fānau kotoa ʻa e ʻOtuá; fakatahaʻi ha māmani kuo māvahevahe ʻi Heʻene ngaahi akonakí mo e sīpingá; pea fakafehokotaki ʻa e ngaahi toʻu tangata kotoa pē ʻo e fāmili ʻo e tangatá ʻo fakafou ʻi he ngaahi ouau ʻo e fakamoʻuí mo e hakeakiʻí.

ʻOku uiuiʻi ʻe he ʻEikí ha kau palōfita pea foaki kiate kinautolu ʻa e mafai ke tataki ʻa e ngāué ni. ʻOkú ne ʻoange kiate kinautolu ha fakahā ke tokoni ke nau ʻiloʻi e meʻa ke fakamamafaʻí mo e founga ke ʻunuakiʻi ai e ngāue ʻa e ʻOtuá ki muʻá. Neongo ʻoku omi e kau palōfitá mei ha ngaahi puipuituʻa kehekehe pea kehekehe honau ngaahi talēnití mo e fakakaukaú, ka ʻoku nau fekumi ʻi he loto-fakatōkilalo mo maʻu e finangalo ʻo e ʻEikí ki Hono Siasí.

Ko e fekumi ki he mahino mo e fakapapauʻi ʻo e ngaahi uiuiʻi fakalangi ʻo e kau palōfitá ʻaki hono fakaʻaongaʻi faivelenga ʻenau ngaahi akonakí ko ha konga ia ʻo e tuʻunga fakaākongá. ʻE lava ke fiemaʻu ʻi he muimui ki he kau palōfitá ʻa e “kātakí mo e tuí” koeʻuhí he ʻoku ʻikai mahino maʻu pē kiate kitautolu ʻa e taumuʻa fakalangi ʻo e ngaahi fakahaá mo e ngaahi akonaki kuo fakahā ki ha palōfitá. Neongo ʻe ʻi ai haʻatau ngaahi fehuʻi, ka ʻoku kole mai ʻe he ʻEikí ke tau muimui ki he fakahinohino ʻa ʻEne kau tamaioʻeikí ʻi he tui ki Heʻene ʻilo haohaoá pea mo e mālohi ʻo ʻEne Fakaleleí.

ʻI heʻetau talangofua ki he ngaahi lea ʻa e kau palōfitá, ʻoku tau fakaafeʻi ai e Laumālie Māʻoniʻoní ki heʻetau moʻuí. ʻOku tau kau fakataha mo ha kau ākonga ʻo Sīsū Kalaisi ʻi he funga ʻo e māmaní kuo nau tukupā ke langa hake ʻa e puleʻanga ʻo e ʻOtuá ʻi he māmaní. ʻI heʻetau muimui ki he faleʻi fakaepalōfitá, ʻoku tau maʻu ai e ngaahi tāpuaki ʻo e mālohi fakalangí mo e melino taʻengata kuo talaʻofa kiate kinautolu ʻoku nau fakahoko mo tauhi e ngaahi fuakava ʻo e ongoongoleleí.

Te u maʻu fēfē ha fakamoʻoni ʻoku tataki ʻe he ʻEikí Hono Siasí ʻo fakafou ʻi he kau palōfitá?

ʻOku finangalo ʻa e ʻOtuá ke fakafanongo mo falala ʻEne fānaú ki Heʻene kau palōfitá. ʻI heʻetau fekumi ʻi he loto-moʻoní, te tau lava ʻo maʻu ha fakamoʻoni fakataautaha ʻokú Ne tataki Hono Siasí ʻi he ʻahó ni.

Te tau lava ʻo fakaʻaongaʻi e faleʻi ʻa e palōfita ko ʻAlamaá. Naʻá ne tapou ki he kau Sōlamí ke nau, “ʻAhiʻahiʻi ʻa ʻeku ngaahi leá, pea ngāue ʻaki ha kihiʻi konga siʻi ʻo e tuí, ʻio, kapau foki ʻoku ʻikai te mou lava ʻo fai ha meʻa lahi ange ʻi he holi pē ke tuí, tuku ʻa e holí ni ke ngāue ʻiate kimoutolu, kae ʻoua ke mou tui ʻi he anga te mou lava ai ʻo fakaʻatā ha potu ki ha konga ʻo ʻeku ngaahi leá.”

Naʻe toe fakamatalaʻi lahi ange ʻe ʻAlamā ʻo pehē: “Te tau fakatatau ʻa e folofolá ki ha tengaʻi ʻakau. Ko ʻeni, kapau te mou fakaʻatā ha potu, ke tō ai ha tenga ʻi homou lotó, vakai, kapau ko ha tenga moʻoni ia, pe ko ha tenga lelei,” pea ʻ“ikai te mou liʻaki ia ʻi hoʻomou taʻetuí, … ʻe kamata ia ke pupula ʻi homou lotó” pea te mou pehē “Kuo pau pē ko ha tenga lelei ʻeni, pe ʻoku lelei ʻa e folofolá, he ʻoku kamata ke langaki hake ʻe ia ʻa hoku laumālié; ʻio, ʻoku kamata ʻe ia ke fakamaama hoku ʻatamaí, ʻio, ʻoku fakaʻau ke melie ia kiate au.”

Hangē ko e akonaki ʻa ʻAlamaá, te tau lava ʻo ʻahiʻahiʻi e ngaahi lea ʻa e kau palōfitá. Hangē ko ʻení, ʻi he feituʻu ʻe lava aí, te tau lava ʻo fakaʻaongaʻi e faleʻi ʻa e palōfitá ke fokotuʻu maʻu pē ha taimi ke moihū ai ʻi he fale ʻo e ʻEikí. ʻI heʻetau fai iá, te tau lava ʻo sio ki he ngaahi tāpuaki naʻe talaʻofa mai ʻe he palōfitá. ʻOku fakamālohia ʻetau tui ki he ngaahi lea ʻa e kau palōfita moʻuí ʻi hono fakatokangaʻi ʻo e ngaahi tāpuaki ko ʻení.

Ko e tanumaki ko ia ʻo e tengaʻi ʻakaú ʻi heʻetau tuí ko ha ngāue ia ʻi he moʻuí kotoa, ka te tau lava ʻo kamata he ʻahó ni ke maʻu ha fakapapau fakalaumālie ki he kau palōfita moʻuí mo tokanga ki heʻenau faleʻí ʻi he faʻa kātaki mo e tui.

ʻOku taʻe-ha-mele nai ʻa e kau taki ʻo e Siasí?

Ko Sīsū Kalaisi pē naʻe moʻui haohaoá. ʻOku feinga ʻa e kau taki ʻo e Siasí ke moʻui angatonu pea ʻomi ʻa e kakaí kia Sīsū Kalaisi ʻo fakafou ʻi heʻenau ngaahi leá mo e tōʻongá, ka ʻoku nau moʻulaloa ki he vaivai ʻo e tangatá. ʻOku ʻikai ke haohaoa e kau taki ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Ka ʻoku ʻikai totonu ke ngalo ʻiate kitautolu honau fatongia mahuʻingá. ʻOku ui ʻe he ʻEikí ʻa e kau mēmipa ʻo e Kau Palesitenisī ʻUluaki mo e Kōlomu ʻo e Kau ʻAposetolo ʻe Toko Hongofulu Mā Uá ke nau hoko ko e “kau fakamoʻoni makehe ki he huafa ʻo Kalaisí” pea ke nau hoko ko ha kau palōfita, kau tangata kikite, mo ha kau tangata maʻu fakahā ʻi hotau kuongá. Hangē pē ko e kau palōfita ʻo e kuonga muʻá, ʻoku nau fefolofolai mo e ʻOtuá mo fakahā mai Hono finangaló. ʻOku nau maʻu ʻa e mafai fakalangi ke tataki ʻa e Siasí ʻi he fakahā, fakahoko e ngaahi ouau ʻo e ongoongoleleí, mo tataki e ngāue ʻa e ʻEikí ʻi he māmaní. ʻOku ʻikai ʻuhinga ʻeni ia ʻoku nau ʻiloʻi ʻa e meʻa kotoa pē. ʻOku nau ngāue ʻo fakatatau ki he maama kuo foaki ange ʻe he ʻEikí kiate kinautolú, fekumi ki ha ʻilo lahi ange ʻo fakafou ʻi he hokohoko atu ʻo e fakahaá, pea falala ki he mālohi fakaivia ʻoku nau maʻu ʻo fakafou ʻia Sīsū Kalaisi mo ʻEne Fakaleleí.

Kuo ngāue maʻu pē ʻa e ʻEikí ʻi he kau palōfita fakamatelié neongo honau vaivaí. Hangē ko e hola ʻa Siona mei hono ui ki Ninivé, ko e tuʻusi ʻe Pita e telinga ʻo e sōtiá, pe ko hono ʻave ʻe Siosefa Sāmita e ʻū lauʻi peesi mei he liliu ʻo e Tohi ʻa Molomoná kia Māteni Hālisí, ʻe lava ke fai ʻe he kau palōfitá he taimi ʻe niʻihi ha ngaahi fehalaaki. ʻI he ngaahi meʻa peheé, ʻoku fakatonutonu ʻe he ʻEikí ʻEne kau tamaioʻeikí, pea hili ʻenau fakatomalá, ʻokú Ne tāpuakiʻi kinautolu ke fakahoko ʻa e ngāue kuó Ne ui kinautolu ke nau faí.

ʻOku mahuʻinga ke manatuʻi e founga hono fokotuʻu ʻo e tokāteline ʻo e Siasí. ʻOku fakahā mo fakatonuleaʻi ʻa e tokāteliné ʻe he Palesiteni ʻo e Siasí pea hikinimaʻi ʻe he Kau Palesitenisī ʻUluakí mo e Kōlomu ʻo e Toko Hongofulu Mā Uá ʻi he loto-taha, ʻo muimui ki he sīpinga kuo ʻomi ʻi he Tokāteline mo e Ngaahi Fuakava 107:27–31. “ʻOku tokoni e fiemaʻu ko ʻeni ʻo e loto-tahá ke taʻofi e fakapalatahá mo e ngaahi ʻulungaanga fakatāutahá. ʻOkú ne fakapapauʻi ʻoku pule ʻa e ʻOtuá ʻo fakafou ʻi he Laumālié, kae ʻikai ko e tangatá ʻo fakafou ʻi he loto ʻo e tokolahí pe alēleá.” ʻE lava ke fakafofongaʻi ʻe ha akonaki ʻa ha taki fakafoʻituitui ʻo e Siasí “ha fakakaukau fakafoʻituitui naʻe fakakaukauʻi fakalelei, ka naʻe ʻikai ʻuhinga ia ke haʻisia fakakātoa ki ai ʻa e Siasí.”

ʻE lava ke tau takitaha maʻu ha fakapapau fakataautaha ʻo fakafou ʻi he Laumālie Māʻoniʻoní, ʻoku uiuiʻi ʻe he ʻOtuá ʻa e kau palōfitá pea ʻokú Ne tataki ʻEne ngāué ʻo fakafou ʻiate kinautolu.

ʻOku ʻuhinga nai ki he hā ʻa e ʻikai ke teitei takihalaʻi ʻe he palōfitá ʻa e Siasí?

Naʻe pehē ʻe Palesiteni Uilifooti Utalafi, “ʻE ʻikai tuku au ʻe he ʻEikí pe ko ha toe tangata kehe pē ʻa ia ʻoku hoko ko e Palesiteni ʻo e Siasí ni ke ne takihalaʻi ʻa kimoutolu.” Kuo toe fakapapauʻi mai ʻe he kau palōfitá mo e kau ʻaposetoló ʻa e akonaki ko ʻení ʻi he ngaahi toʻu tangata lahi. ʻOku fakahā mo fakatonuleaʻi ʻa e tokāteliné ʻe he Palesiteni ʻo e Siasí pea hikinimaʻi ʻe he Kau Palesitenisī ʻUluakí mo e Kōlomu ʻo e Toko Hongofulu Mā Uá ʻi he loto-taha, ʻo muimui ki he sīpinga kuo ʻomi ʻi he Tokāteline mo e Ngaahi Fuakava 107:27–31.

ʻOku tui e Kāingalotu ʻo e Siasí he ʻikai ke toe ʻave mei māmani ʻa e kakato ʻo e ongoongolelei kuo fakafoki maí pea mo e mafai ʻo e lakanga fakataulaʻeikí. ʻOku ʻuhinga ʻeni ʻe tataki maʻu pē ʻe he ʻOtuá ʻa e kau palōfitá ke fakapapauʻi ʻoku fakahoko ʻe he Siasí hono misioná ke teuteuʻi ʻEne fānaú ki he ngaahi tāpuaki ʻo e moʻui taʻengatá. ʻE hokohoko atu ʻEne fakahā Hono finangaló ki he kau palōfitá ʻi he ʻotu lea ki he ʻotu lea, ʻo fakalahi ʻetau mahinó mo taʻofi ʻa e fehalaākí ko ha konga ʻo hono Fakafoki Mai ʻo e ongoongoleleí.

Ko e hā e ʻuhinga ʻoku liliu māmālie ai ha ngaahi meʻa ʻe niʻihi ʻi he Siasí?

ʻOku fakahā ʻe he ʻEikí ʻi he Tokāteline mo e Ngaahi Fuakava 1:30, ko e Siasí ʻa e “siasi moʻoni mo moʻui pē taha ʻi he funga ʻo e māmaní kotoa.” Ka ʻoku tupulaki mo liliu ʻa e ngaahi meʻa moʻui kotoa pē. ʻOku kehe ʻa e founga ngāue ʻa e Siasí he ʻahó ni mei he ngaahi taʻu siʻi kuohilí. Ko ha konga mahuʻinga ʻeni ʻo e Siasí, ʻa ia naʻe fakavaʻe ʻi he tefitoʻi moʻoni ʻo e hokohoko atu e maʻu fakahaá. ʻOku tui ʻa e Kāingalotu ʻo e Siasí ʻe “kei fakahā mai [ʻe he ʻOtuá] ʻamui ha ngaahi meʻa lalahi mo mahuʻinga.”

ʻE lava ke fakalahi pe fakaleleiʻi ʻe he hokohoko ʻo e fakahaá ʻa ʻetau mahinó, tataki kitautolu ke liliu ha niʻihi ʻo ʻetau ngaahi tukufakaholó, mo tokoni ke tau ʻunuʻunu ke ofi ange ki he tuʻunga lelei ʻo Saioné. ʻOku liliu ʻa e Siasí fakaemāmani lahi kae lava ke feau ʻe hono ngaahi tuʻutuʻuní ʻa e ngaahi fiemaʻu ʻo ha kuonga mo e ngaahi feituʻu pau. He ko hono moʻoní, naʻe kehekehe ʻaupito e ngaahi fiemaʻu ʻa e Kāingalotu ʻi he kauʻāfonua ʻo ʻAmelika ʻi he senituli 19, mei he kāingalotu ʻo e Siasí ʻe laui miliona kuo nau movete ʻi he funga ʻo e māmaní he ʻaho ní.

Ko e lahi taha ʻo e ngaahi liliu ʻoku tau aʻusia ʻi he Siasí ʻoku kau ai hono fakahoko totonu ʻo e ngaahi tefitoʻi moʻoni ʻo e ongoongoleleí, hangē ko e founga ʻoku tau fakahoko ʻaki e moihū he Sāpaté pe ngāue fakaetauhi ki he niʻihi kehe ʻi hotau ngaahi uōtí mo e koló. Ko e taimi ʻe niʻihi kuo iku ʻa e fakahaá ki ha ngaahi liliu mahuʻinga lahi ange ʻi he ngaahi akonaki mo e ngaahi founga ngāue ʻa e Siasí. ʻOku kau ʻi he ngaahi sīpingá ʻa e ongo fanongonongo fakamafaiʻi ʻoku maʻu ʻi he Tokāteline mo e Ngaahi Fuakavá, ʻa ia naʻe iku ki hono fakangata ʻo hono fakahoko ʻo e mali tokolahí pea mo hono fakaaʻu atu ʻa e ngaahi tāpuaki ʻo e lakanga fakataulaʻeikí mo e temipalé ki he taha kotoa pē ʻo tatau ai pē pe ko e hā ʻa e matakalí.

ʻOku mahuʻinga ange nai e ngaahi akonaki ʻa e kau palōfita moʻuí ʻi he ngaahi akonaki ʻi he folofolá pe kau taki ʻo e Siasí he kuohilí?

ʻOku mahuʻinga kotoa ʻa e kau palōfita moʻuí, ko e folofolá, mo e kau taki ʻo e Siasí he kuohilí. Ko e tefitoʻi taumuʻa ʻo e ngaahi maʻuʻanga tokoni ʻe tolu ko ʻeni ʻo e moʻoní ke fakamoʻoni ki he misiona faifakamoʻui ʻo Sīsū Kalaisí. ʻOku totonu ke tau feinga ke mahino kiate kitautolu ʻa e fatongia mahuʻinga ʻo e maʻuʻanga tokoni takitaha pea mo e founga ʻoku nau felālāveʻi aí.

Ko e folofolá ko ha maʻuʻanga tokoni ia ʻo ha ngaahi moʻoni mahuʻinga naʻe fakahā ʻi ha taʻu ʻe lauiafe tupu pea ʻi ha ngaahi tūkunga fakafonua lahi. ʻOku nau tokoni ke tukutaha maʻu ai pē ʻetau tokangá ʻi he ngaahi moʻoni mahuʻinga ʻo e ongoongoleleí. ʻOku nau fakamoʻoni kia Kalaisi mo ʻomi ha faingamālie ke folofola mai ai ʻa e Laumālié kiate kitautolu. ʻOku ʻomi ʻe he ngaahi akonaki ʻa e kau palōfita ʻi he kuohilí ʻo hono Fakafoki Mai ʻo e Ongoongoleleí ha maʻuʻanga tokoni fakalaumālie tatau. ʻOku totonu ke tau feinga ke mahino ʻa e folofolá mo e ngaahi akonaki ʻa e kau palōfita ʻi he kuohilí ʻi he puipuituʻa naʻe ʻomi ai kinautolú pea tali ʻi he loto-houngaʻia ʻa e ngaahi moʻoni kuo fakahā ʻa ia naʻa nau vahevahé.

ʻOku maʻu ʻe he kau palōfita moʻuí ʻa e ngaahi kī ʻo e lakanga fakataulaʻeikí ʻoku fiemaʻu ki hono tataki ʻo e Siasí mo fakahoko e ngaahi ouau ʻo e ongoongoleleí he ʻaho ní. ʻOku nau tānaki atu ʻenau fakamoʻoni kia Kalaisí ki he ngaahi fakamoʻoni kuo fakahaaʻi ʻe he kau palōfita he kuohilí. ʻOku nau tokoni ke tau ʻiloʻi ʻa e founga ʻoku fakaʻaongaʻi ai ʻa e ngaahi moʻoni ʻo e ongoongoleleí ki hotau ngaahi tūkunga lolotongá. ʻOku nau maʻu ha fakahā foʻou maʻá e Siasí, ʻo liliu e ngaahi fakahinohino he kuohilí ki he ngaahi tūkunga lolotongá ʻo fakatatau mo e fakahinohino ʻa e ʻEikí. Ko e taimi ʻe niʻihi ʻoku mahulu hake ʻenau ngaahi akonakí ʻi he ngaahi akonaki ʻo e kau palōfita he kuohilí. Ko e taimi lahi, ʻoku faʻa fakamālohia ʻe heʻenau ngaahi leá ʻa e ngaahi akonaki ʻo e folofolá mo e ngaahi lea ʻa e kau palōfita he kuohilí.

Ako lahi ange

Russell M. Nelson, “Fakahā maʻá e Siasí, Fakahā ki Heʻetau Moʻuí,” Liahona, Mē 2018, 93–96
Neil L. Andersen, “Ko e Palōfita ʻa e ʻOtuá,” Liahona, Mē 2018, 24–27