Kau Palōfitá

Ko e kau palōfitá ko ha kau tangata kuo ueʻi fakalaumālie pea ui kinautolu ke nau lea maʻá e ʻEikí. Ko e Palesiteni ʻo e Siasí ʻa e palōfita lolotongá—ko e tokotaha pē ia ʻi he māmaní ʻokú ne maʻu ʻa e fakahā ke tataki fakakātoa ʻa e Siasí.

Vakai Fakalūkufuá

ʻI heʻetau hoko ko e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku tau monūʻia ke tataki kitautolu ʻe ha kau palōfita moʻui—ko ha kau tangata ʻoku tataki fakalaumālie mo uiuiʻi ke nau lea ʻo fakafofongaʻi ʻa e ʻEikí, hangē ko Mōsese, ʻĪsaia, Pita, Paula, Nīfai, Molomona, mo e kau palōfita kehe ʻi he folofolá. ʻOku tau poupouʻi e Palesiteni ʻo e Siasí ko ha palōfita, tangata kikite mo e tangata maʻu fakahā—ko e tangata pē ia ʻe taha ʻi he māmaní ʻokú ne maʻu ʻa e fakahā ki hono tataki ʻo e Siasí fakakātoa. ʻOku tau poupouʻi foki e ongo tokoni ʻi he Kau Palesitenisī ʻUluakí mo e kau mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá ko ha kau palōfita, kau tangata kikite, mo e kau tangata maʻu fakahā.

ʻOku fakamoʻoniʻi ʻe he kau palōfita ʻo e ʻaho ní ʻa Sīsū Kalaisi mo akoʻi ʻEne ongoongoleleí ʻo hangē ko e kau palōfita ʻo e kuonga muʻá. ʻOku nau fakaʻilo mai ʻa e finangalo mo e ʻulungaanga totonu ʻo e ʻOtuá. ʻOku nau lea fakahangatonu mo mahino, fakahalaʻi ʻa e faiangahalá mo fakatokanga mai ki hono ngaahi nunuʻá. ʻI he taimi ʻe niʻihi, ʻe ueʻi fakalaumālie kinautolu ke nau kikiteʻi ʻa e ngaahi meʻa ʻe hoko he kahaʻú ke ʻaonga kiate kitautolu.

Te tau lava ʻo falala maʻu pē ki he kau palōfita moʻuí. ʻOku fakafōtunga mai heʻenau ngaahi akonakí ʻa e finangalo ʻo e ʻEikí, ʻa ia naʻá Ne folofola: “ʻIlonga ha meʻa kuó u lea ʻaki ʻe au ko e ʻEikí, kuó u lea ʻaki ia, pea ʻoku ʻikai te u tuli tonuhia; pea neongo ʻe mole atu ʻa e ngaahi langí mo e māmaní, ka ʻe ʻikai mole atu ʻa ʻeku leá, ka ʻe fakamoʻoniʻi hono kotoa, neongo pe ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamioʻeikí, ʻoku tatau ai pē” (Tokāteline mo e Ngaahi Fuakava 1:38).

Ko hotau maluʻanga lelei tahá ʻa ʻetau muimui pau ki he folofola ʻa e ʻEikí ʻoku fakahoko mai ʻi Heʻene kau palōfitá, kae tautautefito ki he Palesiteni lolotonga ʻo e Siasí. ʻOku fakatokanga ʻa e ʻEikí ko kinautolu ʻoku ʻikai ke nau tokanga ki he ngaahi lea ʻa e kau palōfita moʻuí kuo pau ke nau tō (vakai, Tokāteline mo e Ngaahi Fuakava 1:14–16). ʻOkú Ne talaʻofa ha ngaahi tāpuaki maʻongoʻonga maʻanautolu ʻoku muimui ki he Palesiteni ʻo e Siasí:

“Ke ke tokanga ki heʻene ngaahi lea kotoa pē mo e ngaahi fekau te ne fai kiate koé, ʻo ka ne ka maʻu ia, pea ʻaʻeva ʻi he māʻoniʻoni kakato ʻi hoku ʻaó;

“He ke mou tali ʻene leá, ʻo hangē ko e lea ia mei hoku ngutu ʻoʻokú, ʻi he kātaki mo e tui kotoa pē.

“Koeʻuhí ʻi hoʻomou fai ʻa e ngaahi meʻá ni ʻe ʻikai ikuna ʻa kimoutolu ʻe he ngaahi matapā ʻo helí; ʻio, pea ʻe fakamovetevetea atu ʻe he ʻEikí ko e ʻOtuá ʻa e ngaahi mālohi ʻo e fakapoʻulí ki muʻa ʻiate kimoutolu, pea pule ke ngalulululu ʻa e ngaahi langí koeʻuhí ko hoʻomou leleí, pea mo e lāngilangi ʻo hono huafá” (Tokāteline mo e Ngaahi Fuakava 21:4–6).

Lekooti e Ngaahi Ongo ʻOkú ke Maʻú