Mamata ki he Palōfita ʻa e ʻOtuá

Fai ʻe ʻEletā Kim B. Clark

ʻO e Kau Fitungofulú

ʻI hoku taʻu 11, naʻá ku tokoni ki hoku uōtí ke langa ha fale foʻou ʻo e Siasí. Naʻe tokoni e kāingalotú ke langa ia he kuonga ko iá—ʻo tuki e faʻó, vali e falé, mo fai e ngaahi ngāue kehekehe kotoa pē.

ʻI heʻeku fanongo pē ko Palesiteni Tēvita O. Makei (1873–1970) te ne fakatapui e falé, naʻá ku fakaʻamu ke u ʻi ai. Naʻe fakangofua ʻe heʻeku ongomātuʻá ke u ʻalu. Ne u ʻalu pongipongia pē ʻo tangutu ʻi he ʻotu muʻá.

ʻOku ou manatu ki heʻeku mamata kia Palesiteni Makeí. Naʻá ku mamata ki he anga ʻene tuʻú, ko ʻene lea ki he kakaí, mo ʻene tōʻonga ki he kakaí. Naʻe lanu pulū vaivai hono kanoʻimatá pea naʻe lanu hinehina hono louʻulú. Naʻá ne fōtunga ʻo hangē pē ha palōfitá. Ko e taimi ne u fanongo ai ki heʻene leá mo fakahoko ʻa e lotu fakatapuí, naʻá ku ʻiloʻi ʻi hoku lotó ko e palōfita ʻeni ʻo e ʻOtuá.

Ne u maʻu ha ongo mālohi fakalaumālie mei he Tamai Hēvaní: “Ko ʻEku palōfitá ʻeni.” Naʻe folofola mai ʻe he Tamai Hēvaní kiate au ʻo fakafou ʻi he Laumālie Māʻoniʻoní ko Palesiteni Makeí ko ʻEne palōfita ia.

ʻI heʻeku ʻiloʻi pē ko Palesiteni Makeí ko ha palōfita ia ʻo e ʻOtuá, naʻá ku ʻiloʻi leva naʻe moʻoni e Siasí pea naʻe hoko ʻa Siosefa Sāmita ko ha palōfita. Naʻa ku ʻiloʻi naʻe moʻoni e Tohi ʻa Molomoná mo hono Fakafoki Mai ʻo e ongoongoleleí. Ne u toe ʻiloʻi foki ko e kau palōfita kotoa pē, meia Siosefa Sāmita kia Tēvita O. Makeí, naʻa nau hoko mo kinautolu ko e kau palōfita ʻo e ʻOtuá.

Ko e taimi kotoa pē ʻoku ui ai ha palōfita foʻou ʻi he taimí ni, ʻoku ou kei maʻu pē ʻa e ongo tatau: “Ko ʻEku palōfitá ʻeni.” Naʻe kamata kotoa ʻeni ʻi heʻeku kei siʻí.