Ko e Ngaahi Lotu ʻi he ʻAho Fāʻeleʻi ʻo ʻEku Tangataʻeikí
Tā fakatātā ʻe Melissa Manwill
Naʻe ʻikai ʻaupito ke ohi hake ʻeku tamaí ʻi ha faʻahinga tui fakalotu, pea naʻe māmālohi e fāmili ʻeku faʻeé ʻi he kei siʻi pē ʻeku faʻeé. Ka ʻi ha ʻaho ʻe taha naʻe ongoʻi ʻe heʻeku faʻeé naʻe ʻi ai pē ha meʻa naʻe mole, ko ia naʻá ne fakakaukau ai ke toe foki ki he siasi naʻe tupu hake aí, ʻa ia ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ne mau ʻalu fakataha mo ia mo hoku tuofāfine īkí. Ka naʻe ʻikai ke saiʻia ʻeku tamaí ʻi heʻemau ʻalu ki he lotú, pea naʻe ʻahiʻahiʻi lahi ai e vā ʻo ʻeku ongomātuʻá.
Naʻe papitaiso au ʻi hoku taʻu valú, pea ne u ako ai ʻa e malava ke taʻengata ʻa e ngaahi fāmilí. ʻI he hokosia hoku ʻaho fāʻeleʻí ʻi he taʻu kotoa peé, ne u puhiʻi ʻa e teʻelangó mo fakaʻamu fakapulipuli pē ke papitaiso ʻeku tamaí. Naʻá ku lotua ke fakamolū ʻa e loto ʻo ʻeku tangataʻeikí. Hili ha ngaahi taʻu lahi, naʻe faifai pē pea fakangofua heʻeku tamaí ke mau maʻu meʻatokoni efiafi fakataha mo e ongo faifekaú. Ka naʻe ʻikai ʻaupito ke fai ha talanoa ki he ongoongoleleí.
Pea ʻi ha faʻahitaʻu māfana ʻe taha ne u ʻalu fakataha ai mo ʻeku tamaí ki ha kemi ʻa e Kau Talavoú. Naʻe tuku ki heʻeku tangataʻeikí ke ne tokangaʻi ʻa e faeasaití, neongo naʻe ʻikai ke ne siasi! Naʻá ku ilifia, ka naʻe tokoni ʻa e tokotaha kotoa pē ʻaki ʻenau kau atu ki he faeasaití. Naʻe vahevahe leva ʻe hoku kaungāmeʻá ʻa ʻene fakamoʻoni ki he lotú. Naʻá ne fakamoʻoni ʻo kau ki ha taimi naʻe tokoniʻi ai heʻeku tamaí ʻa hono tehina pea naʻe hoko ia ko ha tali ki heʻene lotú. Ko e fuofua taimi ia ne u sio ai ki heʻeku tangataʻeikí ʻoku tangi. Naʻá ne ongoʻi ʻa e Laumālié.
Hili pē ʻa e kemi ko iá, naʻe loto vēkeveke ʻeku tamaí ke fieʻilo lahi ange ki he ongoongoleleí, pea ʻi ha pongipongi ʻe taha naʻá ne talamai ʻokú ne fie papitaiso. Ne ʻikai ke mau tui ki he meʻa ʻoku hokó!
Naʻe hoko e ʻaho papitaiso ʻo ʻeku tamaí ko e taha ia ʻo e ngaahi ʻaho lelei taha ʻo ʻeku moʻuí. Naʻe fonu ʻa e falelotú ʻi he niʻihi naʻe omi ke poupouʻi ʻeku tangataʻeikí, ne tā tuʻolahi ʻeku toutou ako e lotu papitaisó koeʻuhí he naʻá ku fuʻu fiefia. Ne u lava ʻo papitaiso ʻeku tangataʻeikí, pea ʻoku ʻikai ke u lava ʻo mafakamatalaʻi ʻa e ngaahi ongo ne lōmekina ʻaki aú ʻi heʻeku fāʻofua ki heʻeku tamaí ʻi he loto vai papitaisó.
ʻI he taʻu hono hokó, naʻe silaʻi homau fāmilí ʻi he temipalé. Hili ʻa e silá, ne mau tuʻu takatakai ʻi ha siakale—ko ha fāmili taʻengata—ʻo fāʻofua mo fetāngihi fiefia.
Naʻá ku ako mei he aʻusia ko ʻení ʻoku malava pē ha faʻahinga meʻa ke hoko. ʻOua te ke foʻi. Te u feinga hoku tūkuingatá ke u moʻui taau ke u sila ʻi he temipalé mo hoku fāmili ʻi he kahaʻú.