Ko hono Teuteuʻi ʻo ha Maʻu Meʻatokoni Fakalaumālie
ʻOku nofo ʻa e tokotaha naʻá ne faʻú ʻi he Lepāpulika Tominikení.
Ko e taimi naʻe ui ai au ke u hoko ko ha tokoni ʻuluaki ʻi he kau pīsopelikí, naʻe fakaʻau ke tokosiʻi ange ʻa e houalotu sākalamēnití. Ne mau fakakaukau ʻi he pīsopelikí ke mau ʻaukai fakamātoato mo lotua ha poto mei he Tamai Hēvaní ke mau ʻiloʻi ha founga ke fakamālohia ʻaki ʻa e kāingalotú.
Naʻe ueʻi kimautolu ʻe he ʻEikí ke fakamamafaʻi ko e houalotu sākalamēnití ko ha maʻu meʻatokoni fakalaumālie ia, ko ia ne mau fakakaukauʻi ha founga ke fakaafeʻi mai ai e kāingalotú, honau kaungāmeʻá, mo honau kaungāʻapí ke omi ki he houalotu sākalamēnití ʻo maʻu ha meʻatokoni fakalaumālie. Ne mau faʻu e ʻū tohi fakaafé ke pehē, “Haʻu ʻo fanongo, mamata, pea ongoʻi ʻa e ʻafio ʻa e ʻEikí ʻi ha maʻu meʻatokoni fakalaumālié” pea tufa ia ki he mēmipa taki taha, ʻo kau ai e kau talavoú mo e kau finemuí.
Ne mau teuteuʻi foki mo ha kiʻi kuaea fakauooti naʻe toko valu pē. Naʻa mau fili ʻi he faʻa lotu ʻa e ngaahi himi fakalaumālie mo e kau lea pea fakaafeʻi e kāingalotú ke nau tokoni ki hono tauhi e molumalu ʻo e fakatahá.
Naʻe maau ʻa e meʻa kotoa ki he maʻu meʻatokoni fakalaumālié! Naʻe kau ʻi he maʻulotu ʻo e Sāpate ko iá ha kau fie fanongo mo e kau māmālohi ʻe toko 42. ʻI he maʻu meʻatokoni fakalaumālie hono uá, naʻe toko 64 ai ʻa e kau fie fanongó mo e kau māmālohi. ʻI ha māhina ʻe tolu mei ai naʻe ʻikai ke mau mei lava ʻo hao ʻi he falelotú, pea ʻi he hili ha māhina ʻe ono kuo fuʻu tokolahi homau uōtí naʻe pau ai ke mau mateuteu ke vaeua ki ha uooti ʻe ua.
Naʻa mau ako ai ne hoko hono ngaohi ʻo e houalotu sākalamēnití ko ha aʻusia toputapú kae ʻikai ko ha fakataha peé ke ne ʻomi ha faingamālie fakaofo ke fakaafeʻi mai e niʻihi ʻoku tau ʻofa aí ke nau haʻu kia Kalaisi ʻo fakafou ʻi ha maʻu meʻatokoni fakalaumālie toputapu.
Naʻe tokoni ʻemau mateuteu ke fakatupulaki ʻa e mahuʻinga ke ongoʻi e laumālié mo e molumalu ʻo e houalotu sākalamēnití ke fakautuututu ai e tokolahi ʻo e maʻulotú ʻa ia ko ha niʻihi naʻe ʻikai ke nau teitei fakakaukau te nau ongoʻi e fiefiá ʻi heʻenau haʻu ʻo mamatá, ongoʻí pea maʻu iá ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.