Ngaahi Fakakaukau ki he Efiafi Fakafāmili ʻi ʻApí

ʻOku ʻi he makasini ko ʻení ha ngaahi fakamatala mo e ngaahi ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. Ko ha sīpinga ʻeni ʻe ua.

“Ke Mou ʻi he Kakai Tuí ko ha Fakaʻilonga,” peesi 44: Ko e fakamatala ʻa ʻEletā Kītisi ki he mahuʻinga hono taukaveʻi ʻa e ngaahi tokāteline ʻo e ongoongoleleí ʻaki ʻa e ʻofá mo e angaʻofá. Hili hono lau ʻene leá, te mou lava ʻo talanoa ki he ngaahi taimi ʻi he moʻui ʻa e kau mēmipa ʻo e fāmilí ne fie maʻu ai ke nau taukaveʻi ʻa e ongoongoleleí. Te ke lava foki ʻo lau ha talanoa mei he folofolá ʻo ha taha naʻá ne tuʻu ʻaliʻaliaki ʻi hono taukaveʻi e meʻa ʻokú ne tui ki aí, hangē ko e talanoa kia Tanielá pe ko ʻĒsetá. Naʻe fakahā fēfē ʻe he niʻihi ko ʻení ʻa e ʻofá ki he niʻihi kehé mo e ʻEikí fakatouʻosi? Te ke lava ʻo fakatātaaʻi ha tūkunga ʻe lava ai ʻe he kau mēmipa ʻo e fāmilí ʻo fakaangaanga ke vahevahe ʻenau tuí fekauʻaki mo ha ngaahi kaveinga kehekehe ʻi ha ʻulungaanga nonga mo mahino.

“Fēfē nai kapau ʻoku ou ongoʻi ʻoku ʻikai ke u ʻi he tuʻunga totonú?” peesi 68: ʻOku fakamatala ʻa ʻEletā Hōlani kau ki he meʻa ke tau fai ʻi he taimi te tau ongoʻi ai ʻoku ʻikai ke tau ʻi he tuʻunga ʻoku totonu ke tau ʻi aí. Te mou lava ʻo aleaʻi fakafāmili e ngaahi talēniti kuo foaki ʻe he Tamai Hēvaní maʻá e mēmipa takitaha ʻo e fāmilí. Fakakaukau ke fakaafeʻi ʻa e mēmipa takitaha ʻo e fāmilí ke nau hiki ha taumuʻa ʻoku nau fakaʻamu ke aʻusia ʻi he māhina ka hokó, aleaʻi e ngaahi founga ke aʻusia ai e ngaahi taumuʻa ko ʻení, founga ʻe tokoni ai honau ngaahi talēnití, mo e ngaahi taukei ʻe fie maʻu ke nau fakatupulaki kae lava ke aʻusia ʻenau taumuʻá. Te ke lava ʻo toe vakaiʻi e ʻekitivitī ko ʻení ʻamui ange pea poupouʻi ʻa e mēmipa ʻo e fāmilí ke nau fokotuʻu pea feinga ke aʻusia ʻenau ngaahi taumuʻá.