Fānau Loto ʻOfa
Ko e Tā Valivali ʻo e ʻOfá
Mālō e Lelei! Ko hoku hingoá ko Lusi!
ʻOku ou nofo mo hoku fāmilí ʻi ʻIutā, USA. ʻOku ou saiʻia ke tā valivali, pea ʻoku ou saiʻia ke vahevahe ʻa e ʻofá mo e niʻihi kehé.
Toe Mālohi Angé
Naʻe fāʻeleʻi ʻa Lusi mo ha faingataʻaʻia fakaesino ʻa ia ʻoku ʻikai malava ai e ngaahi uoua hono sinó ke ngāue lelei. ʻOku faingataʻa ke ne lava ʻo folo ha meʻa mo lava ʻo lea. ʻOkú ne heka ha pasikala makehe pea ʻokú ne ʻalu mo hono fāmilí ʻo kaka moʻunga ke tokoniʻi ia ke ne mālohi ange.
Tā Valivalí
Ko ha tokotaha ʻaati ʻa e faʻē ʻa Lusí. Ko e taimi naʻe kei pēpē ai ʻa Lusí, naʻá ne manako ke siofi e tā valivali ʻene faʻeé. ʻI he taimi ní ʻoku akoʻi ia heʻene faʻeé ke poto mo ia ʻi he tā valivalí. ʻOku saiʻia ʻa Lusi ke ne ngāue ʻaki e ngaahi lanu ʻoku fakaʻofoʻofá, pea ʻokú ne tā valivali tokanga ʻaupito. ʻOkú ne fakaʻamu ke ʻi ai haʻane fale tā valivali mo ʻene faʻeé ha ʻaho.
Loto ʻo Lusí
Ne kau ʻa Lusi mo hono ngaahi taʻoketé ʻi ha feʻauhi tā valivali ʻi he akó fekauʻaki mo e ʻai ke hoko e māmaní ko ha feituʻu lelei angé. Naʻe ʻiloʻi ʻe Lusi naʻá ne fie tā valivali ha foʻi haati. Naʻá ne pehē, “ʻE toe lelei ange ʻa e māmaní ʻo kapau te tau maʻu ʻa e ʻofá ʻi hotau lotó.”
Ko Ha Tokoua ʻOfa
ʻI he ʻilo ʻe Lusi naʻá ne ikuna ʻa e feʻauhí, naʻá ne talaange ki hono taʻokete ko Lupí, “ʻOku fakaʻofoʻofa hoʻo tā valivalí. Fakaʻamu ange mai ʻe au ko koe naʻe ikuná kae ʻikai ko au.” Ne ʻikai faʻa tui ʻa Lusi ʻi heʻene ʻiloʻi naʻá ne toe ikuna foki mo e feʻauhi ʻi he fakakātoa ʻo e ʻIunaiteti Siteití!
Ko Ha Founga Makehe ʻo e Fetuʻutakí
ʻOku faingataʻa kia Lusi ke ne tala ki he niʻihi kehé hono lotó. Ka ʻokú ne fie tokoni ke ongoʻi ʻe he kakaí ʻoku ʻofaʻi kinautolu mo nau fiefia. Pea ʻoku fakahoko ia heʻene ʻū tā valivalí!