Ikunaʻi ʻEku Ngaahi ʻAhiʻahi Fakafāmilí
Tā fakatātā ʻe Melissa Manwill
Ko ha taimi faingataʻa ia ʻo ʻeku moʻuí hili ʻa e vete-mali ʻeku ongomātuʻá. Ne u faʻa ongoʻi fiemālie maʻu pē ʻi he ʻalu ki he lotú, ka naʻe ongo kiate au ʻa e ngaahi malanga ʻo kau ki he fāmilí koeʻuhí naʻe ʻikai ke u tui ne ʻi ai haʻaku fāmili.
Ko ʻeku faʻeé naʻe māmālohi pē pea naʻá ne toe mali. Ko ʻeku tamaí naʻe ʻikai tui ʻOtua pea naʻe nofo ia mo ha fefine kehe. Naʻe fakatou ʻi ai ʻena fānau mo hona ongo hoa foʻoú, pea naʻá ku ongoʻi leva ne u hangē pē ha kavengá—ko ha fehālaaki—hangē ha meʻa noa peé.
Ko ia naʻe kamata leva ke u lotu, lau e folofolá, fakalaulauloto, pea feinga ke u kei ʻalu pē ki he lotú. Ka naʻá ku faʻa fifili: Ko e hā nai te u fai ʻi he maama ka hoko maí ʻi he ʻikai ke silaʻi hoku fāmilí ʻi he temipalé?
Naʻe ʻikai ke hoko mai e talí ʻi he taimi pē ko iá, ka naʻe hoko mai pē. Naʻá ku fekumi ki he fakaʻuhinga ʻo e fāmilí mo lau e ngaahi veesi folofola ne fekauʻaki mo iá, pea naʻe kamata leva ke toe matala ange ʻeku fakakaukaú. Naʻá ku ako te u lava ʻo tokoni ke ʻomi e fānau ʻa e ʻOtuá ki he Siasí ʻi hoku fatongia ko ha faifekaú, kae ʻikai ko e fakakaukau pē ʻoku ʻikai haʻaku fāmilí. Ne u ako ke fakahā ʻa e faʻa kātakí pea hoko ko ha maama. Ne u feinga ke u toe lelei ange. Ne u toe ʻiloʻi foki ka ne taʻeʻoua hoku fāmilí, mahalo he ʻikai ke tupulaki e tui ko ia ʻoku ou maʻú, pea he ʻikai ke u mahuʻingaʻia ʻi he fono ʻo e angamaʻá mo e palani ʻo e fakamoʻuí ʻo hangē ko ia ʻoku ou maʻu he taimi ní.
Kuó u maʻu ha mahino ʻoku ʻi ai pē hoku fāmili, pea ʻoku ou fakamālō koeʻuhí ko hoku fāmili foʻou mo tokolahí. Ne faingataʻa, ka ʻoku ʻikai ke u hohaʻa ki he meʻa ʻe hoko ki hoku fāmilí hili ʻa e maté. ʻOku ou falala ki he ʻOtuá, pea ʻokú Ne afioʻi e ʻuhinga ʻoku ʻikai ke silaʻi ai kimautolú. ʻOkú Ne ʻafioʻi ʻeku ʻofa ʻiate kinautolú mo e meʻa ʻoku lelei taha kiate aú. ʻOku ʻikai lava ke tau maʻu ha mahino ki he meʻa kotoa pē, ko ia ʻoku mahuʻinga leva ke tau falala ʻe hanga ʻe he ʻOtuá ʻo poupouʻi mo tokoniʻi ke tau ʻiloʻi ʻe lelei ʻa e meʻa kotoa pē.