Ko ha Ongo Fakaʻofoʻofa
ʻOku nofo ʻa e tokotaha naʻá ne faʻu ʻi Kololato, USA.
Kuo fai ʻe Paulo ha fehalaaki. Ko e ha nai te ne lava ʻo faí?
ʻI he hake mai ʻa Paulo mei he vaí, naʻá na fetongi mo e Tangataʻeikí. Pea naʻe hilifakinima leva ʻe he Tangataʻeikí, Kui Tangatá mo e pīsopé kiate ia. Naʻá ne hoko leva ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Naʻe pehē ʻe Paulo, “ʻOku ou ongoʻi fiefia ʻaupito”. Naʻá ne ala ki hono fatafatá feʻunga tonu mo hono mafú. “ʻI he feituʻu ko eé.”
Naʻe fāʻofua kiate ia ʻa e Fineʻeikí. “Koeʻuhí he naʻá ke maʻu ʻa e meʻafoaki ʻo e Laumālie Māʻoniʻoní ʻi hono hilifakinima koé.”
Naʻe kamokamo pē ʻa Paulo. Naʻe ʻikai ke ne fie fai ha meʻa ke mole ai e ongoʻi fiefia ko iá.
Ka ʻi he ʻaho pē hono hokó, naʻe maumauʻi ʻe heʻene tokoua siʻisiʻi ko Kaló ʻa e vakapuna meʻavaʻinga ʻa Pauló. Naʻe feʻunga mo e māhina ʻe taha ʻa e tuku paʻanga ʻa Paulo ke fakatau iá!
“Sio ki hoʻo meʻa naʻe faí!” Naʻe kaikaila ʻa Paulo. “Ko e hā ʻoku ʻikai te ke tukunoaʻi ai ʻeku ʻū meʻá?”
Naʻe pehē ange ʻe Kalo, “Fakamolemole.” Naʻe tafe e loʻimatá ʻi hono kouʻahé. “Mahalo te ta lava pē ʻo ngaohi ke sai.”
“He ʻikai pē ke tatau ia!”
Naʻe tangi ʻa Kalo mo lele ki tuʻa mei he lokí.
Naʻe ongoʻi loto-mamahi ʻa Paulo. Naʻá ne ʻiloʻi he ʻikai ke kaikaila pe ʻita ʻa Sīsū. Te ne toe maʻu nai ʻa e ongo naʻá ne maʻu hili ʻene papitaisó?
ʻI he leʻo vaivai, naʻá ne pehē ange ki he Fineʻeikí, “ʻOku ou palōmesi te u feinga ke u hangē ko Sīsuú” “Ka kuó u fai ha fehalaaki.”
Naʻe lea fakalelei ange ʻa e Fineʻeikí, “Naʻe hala hoʻo meʻa naʻe faí.” “Ka ʻoku toe ʻomai foki ʻe Sīsu ha founga ke tau toe maʻu ai ʻa e Laumālie Māʻoniʻoní ʻi he ʻosi ʻetau fehalākí.”
Naʻe ʻosi ʻiloʻi pē ʻe Paulo ʻa e meʻa te ne talaangé. “ʻOku ou ʻiloʻi. Ko e fakatomala. Kuo pau ke u kole fakamolemole.”
Naʻe kamokamo ʻa e Fineʻeikí. “Ko e taimi pē te ke kai ai e sākalamēnití, te ke fakafoʻou ai hoʻo palōmesi ke ke muimui ʻia Sīsuú. Pea te ke maʻa leva ʻo tatau pē mo e taimi naʻá ke maʻa aí ʻi he ʻosi hoʻo papitaisó mo e hilifakinimá.”
Naʻe ʻalu ʻa Paulo ke kumi ʻa Kalo. Naʻá ne pehē ange, “Fakamolemole heʻeku kaikailaʻi koé.” “Ta ngaohi e vakapuná ke sai.”
Naʻe malimali ʻa Kalo, pea naʻe ongoʻi ʻe Paulo kuó ne fai ʻa e meʻa naʻe mei fai ʻe Sīsuú. Ko e taimi naʻá ne fai ai ʻene lotú ʻi he pō ko iá, naʻá ne kole ki he Tamai Hēvaní ke fakamolemoleʻi ia pea tokoniʻi ia ke ne angalelei ange kia Kalo. Naʻá ne ongoʻi ha fiemālie ʻi hono lotó.
Naʻe tokanga makehe ʻa Paulo ki he lotu tāpuaki ʻo e sākalamēnití ʻi he Sāpate ko iá. Naʻá ne fanongo fakalelei ki he ngaahi leá. ʻI heʻene kai ʻa e maá mo inu ʻa e vaí, naʻá ne ongoʻi ʻa e ʻofa ʻa e Tamai Hēvaní kiate iá. Naʻe moʻoni pē Fineʻeikí. Naʻá ne toe maʻu pē ʻa e ongo fakaʻofoʻofa ko iá!