Pōpoaki ʻa e Faiako ʻAʻahí
Ko e Mālohi Fakaivia ʻo Sīsū Kalaisí mo ʻEne Fakaleleí
Ako ʻi he faʻa lotu ʻa e fakamatala ko ʻení pea fekumi ki ha ueʻi fakalaumālie ke ʻiloʻi ʻa e meʻa ke vahevahé. ʻE teuteuʻi fēfē ʻe he mahino ki he taumuʻa ʻo e Fineʻofá ʻa e ngaahi ʻofefine ʻo e ʻOtuá ki he ngaahi tāpuaki ʻo e moʻui taʻengatá?
“ʻOku ou faʻa fai ʻa e ngaahi meʻa kotoa pē ʻia Kalaisi ʻokú ne fakamālohiʻi aú” (Filipai 4:13). ʻOku pehē ʻe Palesiteni Tieta F. ʻUkitofa, ko e Tokoni Ua ʻi he Kau Palesitenisī ʻUluakí, “Neongo ʻoku tau maʻu kotoa ha vaivaiʻanga, ka te tau lava ʻo ikunaʻi kinautolu.” “Kapau te tau loto fakatōkilalo mo tui, ʻe lava ke hoko e ngaahi meʻa vaivaí ʻo mālohi, tuʻunga ʻi he ʻaloʻofa pē ʻa e ʻOtuá.”1
ʻOku folofola ʻa hotau Fakamoʻuí ʻi he Tokāteline mo e Ngaahi Fuakavá, “Te u muʻomuʻa ʻi homou ʻaó. Te u ʻi homou nima toʻomataʻú pea ʻi homou toʻohemá, pea ʻe ʻi homou lotó ʻa hoku Laumālié, pea ʻe takatakai ʻa kimoutolu ʻe heʻeku kau ʻāngeló, ke poupouʻi hake ʻa kimoutolu” (T&F 84:88).
ʻOku pehē ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko Nīfai ko ha sīpinga ia ʻo ha taha naʻá ne ʻilo, mahino, pea falala ki he mālohi fakaivia ʻo e Fakamoʻuí.” “Naʻe haʻi ʻe he ongo taʻokete ʻo Nīfaí ia ʻaki ha ngaahi afo mo palani ke fakaʻauha ia. Kātaki ʻo fakatokangaʻi ange e lotu ʻa Nīfaí: ‘ʻE ʻEiki, ke ke fakahaofi muʻa au mei he nima ʻo hoku ongo tokouá, ʻo fakatatau ki heʻeku tui kiate koé; ʻio, foaki mai muʻa kiate au ha mālohi ke u lava ai ʻo motuhi ʻa e ngaahi afó ni ʻa ia kuo haʻi ʻaki aú” (1 Nīfai 7:17; toki tānaki ʻa e fakamamafá).
“… [Naʻe] ʻikai ke lotu ʻa Nīfai, ke liliu hono tūkungá. Ka naʻá ne lotu ke maʻu e mālohi ke liliu e tūkunga naʻá ne ʻi aí. Pea ʻoku ou tui naʻá ne lotu ‘i he founga ko ‘ení, he naʻá ne ‘ilo, mahino peá ne ʻosi aʻusia ‘a e mālohi fakaivia ‘o e Fakaleleí.
“ʻOku ʻikai ke u tui naʻe homo fakafokifā pē ʻa e ngaahi haʻí mei he nima ʻo Nīfaí. Ka ʻoku ou tui naʻe tāpuekina ʻaki ia ʻa e vilitakí mo e mālohi fakafoʻituitui fakatouʻosi naʻe mahulu atu he meʻa fakanatula naʻá ne malavá, pea naʻá ne toki ngāue leva ‘ʻi he mālohi ʻo e ʻEikí’ (Mōsaia 9:17) ke vilohi mo fusi e afó, pea faifai pē naʻe lava ke motu e ngaahi haʻí.”2
Ngaahi Potu Folofola mo e Fakamatala Makehe
Tuí Fāmilí Fakafiemālié