Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Malimali ʻa e Solá
Ko e angamahení te u tukunoaʻi ia—ko ha tangata tukuhāusia ʻoku fai ʻene pele ʻi he funga tēpile ʻi ha feituʻu faiʻanga vaʻinga ʻo ha falekai. Naʻe kiʻi malimali hono fofonga fakaʻofá ʻi heʻene siofi e vaʻinga ʻa e fānaú. ʻI heʻeku fakalaka atu heʻene tēpilé ke laku e toenga kai ʻo ʻeku ʻofefiné, ne u pehē loto pē, “Pau pē ʻokú ne feinga ke māfana mei he momokó.” Naʻá ku fakatokangaʻi ʻene tēpilé, naʻe ʻikai ha kofukofu meʻakai pe ko ha ipu pepa ai, naʻe fanafana mai ʻa e kihiʻi leʻo siʻí ʻo pehē, “Fakatau mai haʻane meʻakai.”
Ne u foki ki heʻeku tēpilé naʻe toe ha paʻanga ʻi heʻeku kató. Ne u pehē loto pē, “Te u fakamaaʻi ʻe au ia.” Naʻá ku ongoʻi leva ha loto-nonga, pea naʻe fakafiemālieʻi au ʻe he leʻo vanavanaiki ʻo e Laumālié: “Fakatau mai haʻane meʻakai.”
Naʻe ʻikai ke u tala ki heʻeku fānaú ʻa e meʻa ne u faí; ka naʻá ku tufi pē ha veve peá u ʻalu ke lī ia koeʻuhí ke u ofi ki he tēpile ʻo e tangata tukuhāusiá kae ʻoua naʻa ʻilo heʻeku kaungāmeʻa naʻá ma maʻu meʻatokoní.
Naʻá ku ʻunuʻunu atu peá u fehuʻi ange, “ʻE sai pē ke u kumi atu haʻo maʻu meʻatokoni hoʻatā?”
Naʻá ne ʻohovale peá ne tali leʻo siʻi mai, “ʻO kapau te ke loto ki ai.”
Ne u toʻo hake ʻa e toenga paʻanga siʻisiʻi ne u maʻú—naʻe feʻunga pē ia ke fakatau ʻaki ha meʻakai mo ha inu—peá u foaki ange ia maʻana. Naʻá ku foki ki hoku tangutuʻangá ʻo siofi e tangatá ʻi heʻene tuʻu hake ke fakatau haʻane meʻakaí, ne ʻikai teitei ʻilo ʻe he ngaahi faʻē kehé ʻeku meʻa naʻe faí.
ʻI heʻeku fakahekeheka ʻeku fānaú ki he kaá ke mau fokí, naʻá ku fakasiosio atu he luvá ʻo sio ki he tangatá ʻokú ne hapai ha laulau meʻakai ki heʻene tēpilé. Naʻe fotu malimali hono fofonga naʻe mata-fakaʻofá.
Naʻe ʻikai ke loko ongo ʻa e ʻea momokó ki hoku matá. Ne u māfana pē ʻi he Laumālie fiefia naʻá ne fakafonu hoku lotó. Naʻá ku manatu ki he akonaki ʻa e Fakamoʻuí:
“He naʻá ku fiekaia, pea naʻa mou foaki ʻa e meʻakai kiate au: naʻa ku fieinua, pea naʻa mou foaki ʻa e inu kiate au …
“Pea ʻe toki lea ʻa e māʻoniʻoní, ʻo pehē ange kiate ia, ʻEiki, naʻa mau mamata kiate koe ʻanefē ʻokú ke fiekaia, pea mau fafangaʻi koé? pea fieinua, pea mau foaki ʻa e inu kiate koé? …
“Pea ʻe lea ʻa e Tuʻí ʻo pehē ange kiate kinautolu, Ko ʻeku tala moʻoni atu kiate kimoutolu, Ko e meʻa ʻi hoʻomou fai ia ki ha taha ʻoku kihiʻi siʻi hifo ʻi hoku kāingá ni, ko hoʻomou fai ia kiate aú” (Mātiu 25:35, 37, 40).
ʻOku ou fakamālō koeʻuhí ko e tokoni ʻa e malimali ʻo ha solá ke u maʻu ai ha lototoʻa ke fai ʻa ia ʻoku totonú.