Ngaahi Tali mei he Kau Taki ʻo e Siasí
Founga ke Fehangahangai mo e Ngaahi ʻAhiʻahi ʻo e Tuí
Fai ʻe ʻEletā Neil L. Andersen
ʻO e Kōlomu ʻo e Kau ʻAposetolo ʻe Toko Hongofulu Mā Uá
Mei ha lea ʻi he konifelenisi lahi ʻo ʻOkatopa 2012.
Naʻe fakataumuʻa e ngaahi ʻahiʻahi fefeká ke ke mālohi ange, ka te nau lava ʻo holoki pe fakaʻauha hoʻo falala ki he ʻAlo ʻo e ʻOtuá mo fakavaivaiʻi hoʻo tukupā ke tauhi hoʻo ngaahi palōmesi kiate Iá. ʻOku faʻa fakapuli e ngaahi ʻahiʻahí ni, ʻo faingataʻa ke fakatokangaʻi kinautolu. ʻOku nau kamata mei hotau ngaahi vaivaí, meʻa ʻoku tau tuʻu laveangofua aí, meʻa ʻoku pelepelengesí, pe ngaahi meʻa ʻoku mahuʻinga taha kiate kitautolú. Ko e ʻahiʻahi ko ia ʻe ngali faingofua pē hano lavaʻi ʻe he tahá, ʻoku faingataʻa ia ki ha taha kehe.
ʻOku anga fēfē haʻo “tuʻu maʻu mo taʻe-faʻa-ueʻi” (ʻAlamā 1:25) lolotonga ha taimi ʻoku ʻahiʻahiʻi ai hoʻo tuí? Te ke nofo maʻu ʻi he ngaahi meʻa ko ia naʻá ne langa hake e tefito hoʻo tuí: fakaʻaongaʻi hoʻo tui kia Kalaisí, lotu, fakalaulauloto ki he folofolá, fakatomala, ʻalu ki he lotú pea maʻu ʻa e sakalamēnití tauhi e ngaahi fekaú, peá ke tokoniʻi e niʻihi kehé.
ʻI hoʻo fehangahangai mo hono ʻahiʻahiʻi hoʻo tuí—tatau ai pē pe ko e hā te ke faí, ʻoua naʻá ke mavahe mei he Siasí! ʻOku hangē haʻo mavahe mei he puleʻanga ʻo e ʻOtuá, lolotonga hono ʻahiʻahiʻi e tuí, ko ha mavahe mei ha nofoʻanga malu ʻi he tō mai ʻa e ʻahiohió.
Naʻe pehē ʻe he ʻAposetolo ko Paulá, “ʻOku ʻikai ai ko e kau muli mo e kau ʻaunofo ʻa kimoutolu, ka ko e kaungā kolo mo e kāinga māʻoniʻoni pea mo e fale ʻo e ʻOtuá” (ʻEfesō 2:19). ʻOku tau maluʻi ʻetau tuí ʻi he hūfangaʻanga ʻo e Siasí. ʻOku tau kau fakataha mo e niʻihi kehe ʻoku tuí, ʻo tau lotu pea maʻu ʻa e tali ki heʻetau ngaahi lotú, ‘oku tau moihū ʻi he hiva, vahevahe e fakamoʻoni ki he Fakamoʻuí, fetokoniʻaki pea ongoʻi e Laumālie ʻo e ʻEikí. ʻOku tau maʻu e sākalamēnití, maʻu e ngaahi tāpuaki ʻo e lakanga fakataulaʻeikí, mo ʻalu ki he temipalé. Naʻe folofola e ʻEikí, “ʻOku fakahā ʻi hono ngaahi ouaú … , ʻa e mālohi ʻo e anga faka-ʻOtuá” (T&F 84:20). ʻI hoʻo fehangahangai mo ha ʻahiʻahiʻi ʻo e tuí, nofo ʻi loto he maluʻanga mo e ungaʻanga ʻo e fale ʻo e ʻOtuá. ʻOku ʻi ai maʻu pē hao feituʻu heni. ʻOku ʻikai ha ʻahiʻahi ʻe fuʻu lahi ʻo ʻikai te tau taʻe lavaʻi ʻi heʻetau ngāue fakatahá (vakai, Mōsaia 18:8–10).