Ko e hā ʻoku ʻikai ke tau ʻilo lahi ai ki heʻetau Faʻē Fakalangí?
ʻOku tau ʻiloʻi ʻoku fakatou ʻi ai ʻetau Tamai Hēvani mo ha Faʻē Fakalangi. Naʻe fuofua maʻu ʻa e ʻilo ko ʻení ʻe Siosefa Sāmita pea naʻe toutou fakamālohia ia ʻe he ngaahi akonaki fakalaumālie mei he kau taki ʻo e Siasí ʻi he ngaahi taʻu kuo hili angé. Neongo iá, makehe mei he ʻilo ʻoku ʻi ai ha Faʻē Fakalangí mo e fatongia ʻo ʻetau ongomātuʻa fakalangí ke ngāue fakataha maʻá e fakamoʻui mo e hākeakiʻi ʻo ʻena fānaú, kuo teʻeki toe fakahā ha fakaikiiki makehe kau ki he Faʻē Fakalangí. ʻI he taimi ní, ʻoku feʻunga pē ʻetau ʻiló ke mahino ko e fānau kitautolu ʻo ha ongomātuʻa fakalangi, pea ʻokú na fie maʻu ke tau hānge pē ko kinauá. ʻOku tokoni ʻa e mahino ko ʻení ke tau ʻiloʻi ko hai kitautolu mo e meʻa te tau lava ʻo hoko ki aí. ʻOkú ne fakahā mai ko e tuʻunga fakaetangatá pe fakaefefiné ko ha konga ia ʻo ʻetau tuʻunga taʻengatá pea he ʻikai ke lava ʻo hākeakiʻi ʻa e tangatá taʻe ʻi ai ha fefine pe fefiné taʻe ʻi ai ha tangata. Pea ko ha ngaahi moʻoni ia ʻoku hāhāmolofia pea mahuʻinga.