¶ 1 BEA hili ae mea ni, nae hoko o behe foki, koe fānau a Moabe, moe fānau a Amoni, moe toko lahi nae fakataha moe kau Amoni, naa nau ha‘u ke tau‘i a Jihosafate;

2 Bea nae ha‘u ae niihi nae lea kia Jihosafate, o behe, Oku ha‘u ae fuu toko lahi ke tau‘i koe mei he tua tahi i he botu mai ki heni o Silia; bea, vakai, oku nau i Hesasonitema, aia ko Eniketi.

3 Bea nae manavahe a Jihosafate, bea naa ne haga ia ke kumi kia Jihova, bea ne fekau ke fai ae aukai i Juta kotoabe.

4 Bea nae fakakatoa a Juta kotoabe, ke kole ae tokoni mei a Jihova: io naa nau ha‘u mei he gaahi kolo o Juta ke kumi kia Jihova.

¶ 5 Bea nae tuu a Jihosafate i he fakataha o Juta mo Jelusalema, i he fale o Jihova, i he botu ki mua oe loto a foou,

6 O ne behe, E Jihova koe Otua oe mau gaahi tamai, ikai koe Otua koe i he lagi? bea ikai oku ke bule akoe ki he gaahi buleaga kotoabe oe hiteni? bea ikai oku i ho nima ae malohi moe mafai, koeuhi ke oua naa faa agatuu ha toko taha kiate koe?

7 Ikai ko ho mau Otua akoe? naa ke kabuji kituaa ae kakai oe fonua ni mei he ao o ho kakai ko Isileli, mo ke foaki ia ki he hako o Ebalahame ko ho kaiga ke taegata?

8 Bea naa nau nofo ai, bea kuo nau laga i ai ae fale nofoaga moou ki ho huafa, o behe,

9 Oka hoko ae kovi kiate kimautolu, koe heleta, be koe fakamalaia, be koe mahaki lahi, be koe hoge, kabau te mau tuu i he mata fale ni, bea i ho ao, (he oku i he fale ni a ho huafa,) bea  mau tagi kiate koe i he e mau tuutamaki, bea te ke ogo‘i mo ke tokoni.

10 Bea koeni, vakai, koe fānau a Amoni mo Moabe moe mouga ko Seia, akinautolu nae ikai te ke tuku a Isileli ke nau tau‘i, i he e nau ha‘u kituaa mei he fonua ko Ijibite, ka naa nau tafoki meiate kinautolu, bea nae ikai fakaauha akinautolu;

11 Vakai, ki he aga oe nau totogi kiate kimautolu, kuo ha‘u akinautolu ke kabuji akimautolu mei ho tofia, aia kuo ke foaki kiateki mautolu ke mau ma‘u.

12 E ho mau Otua, e ikai te ke fakamāu‘i akinautolu? he oku ikai ha malohi iate kimautolu ki he fuu toko lahi ni oku ha‘u ke tau‘i akimautolu: bea oku ikai te mau ilo foki ae mea ke fai: ka oku haga ho mau mata kiate koe.

13 Bea nae tuu hake a Juta kotoabe i he ao o Jihova, fakataha moe nau gaahi fānau jii, mo ho nau gaahi unoho, moe nau gaahi fānau.

¶ 14 Bea nae hoko ai ae Laumalie o Jihova kia Jaesieli koe foha o Sakalia, koe foha o Benaia, koe foha o Jeieli, koe foha o Matania, koe tagata Livai i he gaahi foha o Asafi, i he lotolotoga oe fakataha;

15 Bea behe eia, Mou fanogo mai, a Juta kotoabe, moe kakai o Jelusalema, mo koe ae tu‘i ko Jihosafate, Oku behe mai e Jihova kiate kimoutolu, Oua naa mou manavahe be ilifia koeuhi koe fuu kakai toko lahi ni; he oku ikai amoutolu ae tau, ka oku i he Otua ia.

16 Mou alu hifo abogibogi kiate kinautolu: vakai, oku nau alu hake i he tahifohifo o Sisi; bea te mou ma‘u atu akinautolu i he gataaga oe vaitafe, i he mata toafa o Jilueli.

17 E ikai ke mou tau i he tau ni: kae tuu mau be, E Juta mo Jelusalema, bea tuu logo be, bea mamata ki he fakamoui a Jihova ma amoutolu; oua naa mou manavahe be ilifia; alu atu kiate kinautolu abogibogi: koeuhi e iate kimoutolu a Jihova.

18 Bea nae bunou hifo hono fofoga e Jihosafate mo hono mata ki he kelekele; bea nae to fakafoohifo i he ao o Jihova a Juta kotoabe moe kakai kotoabe o Jelusalema, o nau hu kia Jihova.

19 Bea nae tuu hake ae kau Livai, oe fānau ae kau Kohate, bea i he fānau a Kola, ke nau fakamalo kia Jihova koe Otua o Isileli aki ae le‘o lahi o maoluga.

¶ 20 Bea naa nau tuu hegihegi hake i he abogibogi, o alu atu ki he toafa o Tikoa: bea i he e nau alu atu, nae tuu a Jihosafate o ne behe, E Juta, me kimoutolu ae kakai o Jelusalema, tokaga kiate au; Tui kia Jihova ko ho mou Otua, koia e fakatuumau ai akimoutolu: tui ki he ene kau balofita, koia te mou monuia ai.

21 Bea hili a ene fakakaukau fakataha moe kakai, nae tuutuuni eia ae kau hiva kia Jihova, ke nau fakaogo lelei ae matamata lelei oe maonioni, i he e nau alu kituaa i he ao oe tau, mo nau lea o behe, Fakafetai kia Jihova: he oku tologa taegata ene agaofa.

¶ 22 Bea i he e nau kamata ae hiva mo fai ae fakafetai, nae fakatoka e Jihova ae gaahi malumu ki he fānau a Amoni, mo Moabe, moe mouga ko Seia, aia nae ha‘u ke tau‘i a Juta: bea nae teia akinautolu.

23 He nae tuu ae fānau a Amoni mo Moabe o tau‘i ae kakai oe mouga ko Seia, bea ta‘i mo fakaauha akinautolu: bea hili e nau fakagata ae kakai o Seia, naa nau fai o fetokoni aki i he fetamateaki akinautolu.

24 Bea i he hoko a Juta o ofi ki he fale leo i he toafa, bea nau fakajio atu ki he kakai, bea iloage, koe gaahi jino mate be akinautolu, kuo nau to ki he kelekele, bea nae ikai ha niihi kuo hao.

25 Bea i he hoko a Jihosafate mo hono kakai ke ave ae vete onautolu, naa nau ilo iate kinautolu ae koloa lahi i ho nau gaahi jino mate, moe gaahi teuga maogooga, aia naa nau vete ma anautolu, nae lahi hake i he e nau mafai ke fetuku o ave: bea naa nau aho tolu i he tanaki ae koloa vete, he nae lahi ia.

¶ 26 Bea i hono aho fa, naa nau fakakatoa akinautolu i he toafa ko Belaka: he naa nau fakafetai kia Jihova i ai, koia nae fakahigoa ai ae botu koia ko Belaka, o a‘u ki he aho ni.

27 Bea nae tafoki ae tagata kotoabe o Juta mo Jelusalema, bea muomua a Jihosafate iate kinautolu, ke nau toe alu ki Jelusalema i he fiefia; he nae takafiefia‘i akinautolu e Jihova ki ho nau gaahi fili.

28 Bea naa nau ha‘u ki Jelusalema moe gaahi utete moe gaahi haabe moe gaahi mea lea ki he fale o Jihova.

29 Bea nae  to ae manavahe ki he Otua ki he gaahi buleaga kotoabe oe gaahi fonua koia, i he e nau ogo‘i nae tau e Jihova ki he gaahi fili o Isileli.

30 Koia nae fiemalie ae buleaga o Jihosafate: he nae foaki kiate ia e hono Otua ae fiemalie i he botu kotoabe.

¶ 31 Bea nae bule a Jihosafate ki Juta: nae tolugofulu ta‘u moe ta‘u e nima ia i he ene kamata bule, bea nae bule ia i he ta‘u e uofulu ma nima i Jelusalema. Bea koe higoa o ene fa‘e ko Asuba koe ofefine o Sili.

32 Bea nae alu ia i he gaahi hala o Asa ko ene tamai, bea nae ikai tafoki mei ai, ka nae fai eia aia nae lelei i he ao o Jihova.

33 Ka koe mooni nae ikai liaki ae gaahi botu maoluga: koeuhi nae heeki ai teuteu ho nau loto e he kakai ki he Otua oe nau gaahi tamai.

34 Bea koeni ko hono toe oe gaue a Jihosafate, koe uluaki moe kimui, vakai, kuo tohi ia i he tohi a Jehu koe foha o Hanani, aia kuo lau ia i he tohi oe gaahi tu‘i o Isileli.

¶ 35 Bea hili ae mea ni nae fakakau ia e Jihosafate kia Ahasia koe tu‘i o Isileli, aia nae fai agakovi lahi:

36 Bea naa ne kau taha mo ia ke fa‘u ae gaahi vaka ke alu ki Tasisi: bea naa nau fa‘u ae gaahi vaka i Esioni‐keba.

37 Bea nae lea ai a Eliesa koe foha o Totava mei Malesa o valoki a Jihosafate, o behe, Koe mea i hoo kau koe kia Ahasia, kuo maumau hoo gaahi gaue e Jihova. Bea nae maumau ae gaahi vaka, koia nae ikai te nau faa folau ki Tasisi.