¶ 1 NAE uofulu ta‘u ae motua o Ahasi i he ene kamata ene bule, bea nae bule ia i he ta‘u e hogofulu ma tolu i Jelusalema: ka nae ikai fai eia aia nae lelei i he ao o Jihova, o hage ko Tevita ko ene tamai:

2 He nae alu ia i he gaahi hala oe gaahi tu‘i o Isileli, bea naa ne gaohi ae gaahi mea fakatātā haka kia Beali.

3 Bea ne tutu foki ae mea namu kakala i he telea oe foha o Henomi, bea ne tutu ene fānau i he afi o fakatatau ki he mea kovi ae gaahi hiteni aia nae kabuji kitua e Jihova mei he ao oe fānau a Isileli.

4 Naa ne feilaulau foki mo tutu ae mea namu kakala i he gaahi botu maoluga, bea ki he gaahi tafugofuga, bea i he lolo akau mata kotoabe.

5 Koia nae fakatukutuku‘i ia e Jihova ko hono Otua ki he nima oe tu‘i o Silia; bea naa nau ta‘i ia, o nau fetuku bobula ho nau toko lahi ki Tamasikusi. Bea nae tukuage ia ki he nima oe tu‘i o Isileli foki, aia naa ne ta‘i ia aki ae tamate‘i lahi.

¶ 6 He nae tamate‘i e Beka koe foha o Limalia i Juta i he aho be taha ae toko taha kilu moe toko ua mano, aia koe kau tagata to‘a kotoabe; koe mea i he e nau liaki a Jihova koe Otua oe nau gaahi tamai.

7 Bea nae tamate‘i ai e Sikili, koe tagata malohi o Ifalemi, a Maaseia koe foha oe tu‘i, mo Asilikami koe bule oe fale, mo Elikena aia nae hoko moe tu‘i.

8 Bea nae fetuku fakabobula e he fānau a Isileli i ho nau gaahi kaiga ae toko ua kilu, koe kau fefine, moe fānau tagata, moe fānau fefine, bea ave foki moe koloa lahi aubito iate kinautolu, bea nae omi ae koloa ki Samelia.

9 Ka nae i ai ae balofita a Jihova ko Oteti hono higoa: bea nae alu kitua ia ki he ao oe tau nae ha‘u ki Samelia, o ne behe kiate kinautolu, Vakai, koe mea i he houhau a Jihova koe Otua o hoo mou gaahi tamai ki Juta, kuo ne tuku akinautolu ki ho mou nima, bea kuo mou tamate‘i akinautolu i he lili kuo a‘u hake ki lagi.

10 Bea koeni oku mou loto ke fakamoulaloa ae fānau a Juta mo Jelusalema koe kau tagata bobula, moe kau fefine bobula kiate kimoutolu: ka ikai oku iate kimoutolu, io iate kimoutolu, ae gaahi agahala kia Jihova ko ho mou Otua?

11 Bea koia mou tokaga mai kiate au, bea mou tukuage ae kau bobula, aia kuo mou ma‘u fakabobula i ho mou gaahi kaiga: he oku iate kimoutolu ae houhau lahi a Jihova.

12 Bea nae toki tuu hake ai ae niihi i he kau tuu kimua oe fānau a Ifalemi ko Asalia koe foha o Johanani mo Belakia koe foha o Misilimoti, mo Jesikia koe foha o Salumi, mo Amasa koe foha o Hatilai, ke taofi akinautolu kuo ha‘u mei he tau.

13 O  nau behe kiate kinautolu, Oua te mou omi ae kau bobula ki heni: he kuo mau fakahouhau kia Jihova, bea oku mou loto ke fakalahi ki he e mau gaahi agahala bea ki he e mau gaahi kovi: he oku lahi aubito e mau fai hala, bea oku houhauia lahi aubito a Isileli.

14 Koia nae tuku ai e he kau tagata too mahafu tau ae kakai bobula moe vete i he ao oe houeiki moe kakai kotoa kuo fakataha.

15 Bea nae tuu hake ae kau tagata aia nae lau ho nau higoa, o ave ae kakai bobula, bea fakakofu aki ae vete akinautolu kotoabe nae telefua iate kinautolu, bea naa nau teu‘i mo fakatobuva‘e akinautolu, bea tufa kiate kinautolu ae mea kai moe inu, bea tākai akinautolu bea fakaheka akinautolu kotoabe nae vaivai ki he faga asi, bea  nau omi akinautolu ki ho nau gaahi kaiga ki Jeliko, koe kolo ae akau koe boga: bea naa nau toki liu mai ki Samelia.

¶ 16 Bea nae fekau e he tu‘i ko Ahasi i he kuoga koia ki he gaahi tu‘i o Asilia ke nau tokoni ia.

17 He nae toe ha‘u ae kakai Itomi o teia a Juta, bea fetuku o ave ae gaahi bobula.

18 Bea koe kakai Filisitia foki naa nau ha‘u o tau‘i ae gaahi kolo oe fonua i lalo, moe botu toga o Juta, bea kuo nau lava‘i a Betesemesi, mo Ajaloni, mo Kiteloti, mo Soko fakataha moe gaahi botu kakai oia, mo Timinate mo hono gaahi botu kakai oia, mo Kimiso foki mo hono gaahi botu kakai oia: bea naa nau nonofo ai.

19 He nae fakavaivai hifo e Jihova a Juta koe mea ia Ahasi koe tu‘i o Isileli: he naa ne fakatelefua a Juta, bea fai talagataa aubito kia Jihova.

20 Bea nae ha‘u kiate ia a Tilikati-bilinesa koe tu‘i o Asilia, o ne fakamamahi ia, ka nae ikai te ne tokoni ia.

21 He nae too o ave e Ahasi ae inaji mei he fale o Jihova, bea mei he fale oe tu‘i, bea oe houeiki, bea foaki ia ki he tu‘i o Asilia: ka nae ikai te ne tokoni ia.

¶ 22 Bea i he gaahi aho o ene mamahi naa ne fakalahi ki he ene agahala kia Jihova: ae tu‘i koeni ko Ahasi.

23 He naa ne feilaulau ki he gaahi otua o Tamasikusi, aia nae ta‘i ia: o ne behe, Koe mea i he tokoni akinautolu i he gaahi otua oe gaahi tu‘i o Silia, koia teu feilaulau ai kiate kinautolu, koeuhi ke nau tokoni au. Ka ko hono malaiaaga akinautolu, oona mo Isileli kotoabe.

24 Bea nae tanaki fakataha e Ahasi ae gaahi nāunāu oe fale oe Otua, o ne tuutuu ke fakaikiiki ae gaahi ibu oe fale oe Otua, bea nae tabuni ae gaahi mataba oe fale o Jihova, bea ne fokotuu ae gaahi feilaulauaga i he gaahi tuliki kotoabe o Jelusalema.

25 Bea ne gaohi i he gaahi kolo kehekehe o Juta ae gaahi botu maoluga ke tutu ai ae mea namu kakala ki he gaahi otua kehe, bea naa ne fakatubu ae houhau lahi a Jihova koe Otua o ene gaahi tamai.

¶ 26 Bea koeni ko hono toe o ene gaue mo hono gaahi hala kotoabe, koe uluaki moe ki mui, vakai, kuo tohi ia i he tohi oe gaahi tu‘i o Juta mo Isileli.

27 Bea nae mohe a Ahasi mo ene gaahi tamai, bea naa nau tanu ia i he kolo, io i Jelusalema: ka nae ikai te nau omi ia ki he gaahi tanuaga oe gaahi tu‘i o Isileli: bea nae fetogi ia i he bule e Hesekaia ko hono foha.