Vahe 17
1 Oku fetogi e Jihosafate a Asa, bea oku bule lelei ia, bea ne monuia. 7 Nae fekau eia ae kau Livai, ke kau moe houeiki ke akonaki‘i a Juta. 10 Kuo fakamanavahe‘i e he Otua hono gaahi fili, bea omi e ho nau niihi ae gaahi mea ofa moe tukuhau. 12 Ko ene lahi, mo ene houeiki bule mo ene gaahi tau.
¶ 1 BEA nae bule a Jihosafate ko hono foha ko hono fetogi, bea naa ne fakamalohi eia ia ki Isileli.
2 Bea naa ne vahe ae kau tau ke nofo ki he gaahi kolo tau kotoabe o Juta, o ne vahe ae gaahi kogakau leo i he fonua o Juta, bea i he gaahi kolo o Ifalemi, aia nae lava‘i e Asa ko ene tamai.
3 Bea nae ia Jihosafate a Jihova, koe mea i he ene alu i he gaahi uluaki aga o ene tamai ko Tevita, bea nae ikai te ne kumi kia Beali;
4 Ka nae kumi eia kia Jihova koe Otua o ene tamai, bea ne alu i he ene gaahi fekau, bea nae ikai fakatatau ki he gaahi gaue a Isileli.
5 Koia nae fakatuu mau e Jihova ae buleaga i hono nima; bea nae omi e Juta kotoabe ae gaahi mea ofa kia Jihosafate; bea ma‘u eia ae koloa moe nāunāu ke lahi aubito.
6 Bea nae hiki hake hono loto i he gaahi hala o Jihova: bea naa ne liaki ae gaahi botu maoluga moe gaahi vao tabu mei Juta.
¶ 7 Bea i hono tolu ta‘u o ene bule foki, naa ne fekau ki hono houeiki, io kia Beniheili, bea kia Obataia, bea kia Sakalia, bea kia Netanili, bea mo Mikaia, ke ako i he gaahi kolo o Juta.
8 Bea naa ne fekau mo kinautolu ae kau Livai, io, a Simaia, mo Netania, mo Sebatia, mo Asaeli, mo Similamoti, mo Jihonatani, mo Atonija, mo Tobija, mo Tobe‐atonija, koe kau Livai: bea alu mo kinautolu a Ilisama mo Jiholami, koe ogo taulaeiki.
9 Bea naa nau fai ae ako i Juta, o nau ma‘u iate kinautolu ae tohi oe fono a Jihova; bea naa nau alu fano i he gaahi kolo kotoabe o Juta, o nau ako ki he kakai.
¶ 10 Bea nae to ae manavahe kia Jihova ki he gaahi buleaga kotoabe oe gaahi fonua nae tuu takatakai i Juta: koia nae ikai laga‘i ai ha tau kia Jihosafate.
11 Bea koe kau Filisitia niihi naa nau omi ae gaahi mea ofa kia Jihosafate, moe siliva tukuhau; bea nae omi kiate ia e he kakai Alebea ae faga manu, koe sibi tagata e fitu afe, moe fitugeau, moe koji tagata e fitu afe moe fitugeau.
¶ 12 Bea nae fakaaau kimua o lahi aubito a Jihosafate; bea nae laga eia i Juta ae gaahi fale maoluga, moe gaahi kolo tukuga mea.
13 Bea nae lahi ene gaue i he gaahi kolo o Juta: bea nae nofo i Jelusalema ae kau tagata tau, ae kau to‘a malohi.
14 Bea ko hono lau eni okinautolu o fakatatau ki he fale oe nau gaahi tamai; Koe kau eiki bule oe gaahi toko afe o Juta; ko Atina, koe tuu kimua, bea nae iate ia ae kau tagata to‘a malohi koe toko tolu kilu.
15 Bea nae hoko mo ia a Jihohanani koe eiki tau, bea nae iate ia ae toko ua kilu, moe toko valu mano.
16 Bea nae hoko mo ia a Amasia koe foha o Sikili, aia naa ne tuku fiemalie be ia ma a Jihova; bea nae iate ia ae kau tagata to‘a malohi koe toko ua kilu.
17 Bea ia Benijimani; ko Iliata koe tagata to‘a malohi, bea nae iate ia ae kau tagata nae mahafu tau aki ae kau fana moe ba, koe toko ua kilu.
18 Bea nae hoko mo ia a Jihosabati, bea nae iate ia ae toko taha kilu moe toko valu mano nae tali teu be ki he tau.
19 Nae tali fekau akinautolu ni ki he tu‘i, kae umaa akinautolu nae tuku e he tu‘i ki he gaahi kolo tau i he botu kotoabe o Juta.