¶ 1 BEA koeni nae lahi aubito ae koloa moe nāunāu a Jihosafate, bea nae hoko ia o kau taha mo Ehabi.

2 Bea hili ae gaahi ta‘u nae alu hifo ia kia Ehabi ki Samelia. Bea nae tamate‘i e Ehabi ae faga sibi moe faga bulu o lahi aubito, ko hono tali, bea ma ae kakai nae iate ia, o ne fakaloto‘i ia ke alu hake mo ia ki Lemoti‐kiliati.

3 Bea behe e Ehabi koe tu‘i o Isileli kia Jihosafate koe tu‘i o Juta, Te ke fie alu mo au ki Lemoti‐kiliati? Bea nae behe eia kiate ia, Oku ou loto fakataha mo koe, bea oku tatau hoku kakai mo hoo kakai; bea te mau iate koe i he tau.

¶ 4 Bea nae behe e Jihosafate ki he tu‘i o Isileli, Oku ou kole kiate koe, ke ke fehui i he folofola a Jihova he aho ni.

5 Koia nae tanaki o fakataha ai e he tu‘i o Isileli mei he kau balofita ae kau tagata e toko fageau, o ne behe kiate kinautolu, Te ma‘u alu ki Lemotikiliati ki he tau, be teu taofi? Bea naa nau behe, Alu hake: he koeuhi e tuku mai ia e he Otua ki he nima oe tu‘i,

6 Ka nae behe e Jihosafate, Oku ikai i heni ha balofita a Jihova oku toe, koeuhi ke tau fehui ai kiate ia?

7 Bea nae behe e he tu‘i o Isileli kia Jihosafate, Oku kei toe ae tagata e toko taha, aia ke tau fehui ai kia Jihova; ka oku ou fehia kiate ia; he oku ikai jii fakaha eia ha lelei kiate au, ka koe kovi mau ai be: ko Mikaia ia koe foha o Imila. Bea nae behe e Jihosafate, Ke oua naa lea behe e he tu‘i.

8 Bea nae ui e he tu‘i o Isileli ki he ene tagata talifekau, o ne behe, Alu o omi ke vave a Mikaia koe foha o Imila.

9 Bea koe tu‘i o Isileli, mo Jihosafate koe tu‘i o Juta naa na nofo taki taha i hono nofoa fakatu‘i kuo teuga aki ho na bulubulu, bea na nonofo i he malae i he huaga ki he mataba o Samelia; bea nae kikite e he kau balofita kotoabe i ho na ao.

10 Bea nae gaohi e Setikia koe foha o Kinana ae ogo nifo ukamea maana, o ne behe, Oku behe e Jihova, Te ke teke‘i a Silia aki ae mea ni o fai ai be ke nau auha.

11 Bea nae kikite behe be ae kau balofita kotoabe, o behe, Alu hake ki Lemoti‐kiliati, bea  ke monuia: koeuhi e tuku mai ia e Jihova ki he nima oe tu‘i.

12 Bea nae lea ae tagata fekau aia nae alu ke ui a Mikaia, o ne behe kiate ia, Vakai, koe gaahi lea ae kau balofita oku fakaha be ae lelei ki he tu‘i: koia, oku ou kole kiate koe, tuku ke behe be hoo lea, ke hage ha taha okinautolu, bea ke lea lelei koe.

13 Bea nae behe e Mikaia, I he moui a Jihova, koia oku tala kiate au e hoku Otua, koia be teu lea aki.

14 Bea i he ene hoko ia ki he tu‘i, nae behe e he tu‘i kiate ia, Te mau alu ki Lemoti‐kiliati ke tau, be teu taofi? Bea behe eia, Mou alu hake, mo monuia, bea e tuku mai akinautolu kotoabe ki ho mou nima.

15 Bea behe e he tu‘i kiate ia, E liuga fiha eku fakafuakava‘i koe ke oua naa ke lea ki ha mea ka ke tala ae mooni kiate au i he huafa o Jihova?

16 Bea toki behe eia, Naaku mamata ki Isileli kotoabe nae movetevete i he gaahi mouga, o hage koe faga sibi oku ikai ha nau tauhi: bea behe e Jihova, Ko kinautolu ni, oku ikai ha nau eiki; koia, tuku ke nau liu mai taki taha ki hono fale i he fiemalie.

17 Bea behe e he tu‘i o Isileli kia Jihosafate, Ikai naaku tala kiate koe e ikai te ne tala ha lelei kiate au, ka koe kovi be?

18 Bea toe behe eia, Koia fanogo ki he folofola a Jihova: Naaku mamata kia Jihova oku nofo i hono afioga, bea nae tuu ae kakai kotoabe oe lagi i hono nima toomatau mo hono toohema.

19 Bea nae behe e Jihova, Kohai e faa fakaloto‘i a Ehabi koe tu‘i o Isileli, koeuhi ke alu hake ia o to i Lemotikiliati? Bea nae lea e he toko taha o behe, e behe be ia, bea lea e he taha kehe o behe, e behe na ia.

20 Bea nae toki ha‘u kitua ae laumalie e taha, bea tuu ia i he ao o Jihova, o ne behe, Teu fakaloto‘i ia. Bea behe e Jihova, Aki aeha?

21 Bea behe eia, Teu alu atu, beau hoko koe laumalie loi i he gutu o ene kau balofita kotoabe. Bea behe e Jihova, Te ke fakaloto‘i ia, bea ke lava‘i ia foki: alu atu, bea ke fai ia.

22 Bea koeni, vakai, kuo tuku e Jihova ae laumalie loi i he gutu o ho kau balofita ni, bea kuo folofola a Jihova aki ae kovi kiate koe.

23 Bea nae unuunu o ofi a Setikia koe foha o Kinana, o ne ta‘i a Mikaia i he kouahe, o ne behe, Koefe ae hala nae fou ai ae Laumalie o Jihova meiate au ke lea kiate koe?

24 Bea nae behe e Mikaia, Vakai, te ke mamata i he aho koia aia te ke hu ai ki he loki i loto ke fufu koe.

25 Bea behe ai e he tu‘i o Isileli, Mou buke a Mikaia, bea toe ave ia kia Amoni koe bule oe kolo, bea kia Joasi koe foha oe tu‘i;

26 Bea ke behe, Oku behe mai ae tu‘i, Fakahu ae jiana ni ki he fale fakabobula, bea fafaga ia aki ae ma oe mamahi moe vai oe mamahi, o a‘u ki he eku liu mai i he fiemalie.

27 Bea nae behe e Mikaia, Kabau te ke liu mai mooni i he fiemalie, bea ta nae ikai folofola a Jihova iate au. Bea nae behe eia, Ae kakai kotoabe, mou tokaga.

¶ 28 Koia, nae alu hake ki Lemotikiliati ae tu‘i o Isileli mo Jihosafate koe tu‘i o Juta.

29 Bea behe e he tu‘i o Isileli kia Jihosafate, Teu fakabuli au, beau alu ki he tau: ka ke ai ekoe a ho gaahi bulubulu teuga. Koia nae fakabuli ia e he tu‘i o Isileli; bea naa na o ki he tau.

30 Bea koeni nae oji hono fekau e he tu‘i o Silia ki he gaahi eiki bule o ene gaahi jaliote aia nae iate ia, o behe, Oua naa mou tau ki he jii be ki he lahi, ka ki he tu‘i be o Isileli.

31 Bea nae hoko o behe, i he mamata ae kau eiki bule oe gaahi jaliote kia Jihosafate, naa nau behe, Koe tu‘i ia o Isileli. Koia naa nau tuu takatakai iate ia ke tau: ka nae tagi kalaga a Jihosafate, bea nae tokoni ia e Jihova: bea nae fakaloto‘i akinautolu e he Otua ke nau alu iate ia.

32 He nae hoko o behe, i he mamata e he houeiki bule oe gaahi jaliote o ilo oku ikai koe tu‘i ia o Isileli, naa nau foki ki mui mei he tuli kiate ia.

33 Bea koe tagata e taha nae teke ae kau fana o fana noa be, bea nae tau ia ki he tu‘i o Isileli i he vahaa oe hokoaga oe kofu tau; koia naa ne behe ai ki he ene tagata jaliote, Tafoki ho nima, koeuhi ke ke ave au kitua mei he tau; he kuou lavea.

34 Bea nae tubu malohi ae tau i he aho koia: ka nae boubou hake ia e he tu‘i o Isileli i he ene jaliote o tau‘i ae kakai Silia o a‘u ki he efiafi, bea nae bekia ia o feouga moe alu hifo ae laa.