¶ 1 NAE uofulu ta‘u moe ta‘u e nima ae motua o Amasia, i he ene kamata bule, bea nae bule ia i he ta‘u e uofulu ma nima i Jelusalema. Bea koe higoa o ene fa‘e ko Jihoatani o Jelusalema.

2 Bea nae fai lelei eia i he ao o Jihova, ka nae ikai i he loto haohaoa.

¶ 3 Bea nae hoko o behe, i he hoko o tuumau ae buleaga kiate ia, naa ne tamate‘i ene kau tamaioeiki aia nae labaji ae tu‘i ko ene tamai.

4 Ka nae ikai te ne tamate‘i e nau gaahi fānau, ka nae fai eia o hage koia kuo tohi i he fono i he tohi a Mosese, aia nae fekau ai e Jihova, o behe, E ikai mate ae gaahi tamai koeuhi koe fānau, bea e ikai mate ae fānau ma ae mātua, ka e mate ae tagata taki taha koeuhi ko ene agahala aana.

¶ 5 Bea nae fakakatoa e Amasia a Juta kotoabe, o ne fakanofo kiate kinautolu ae gaahi eiki bule ki he gaahi toko afe, moe gaahi eiki bule ki he gaahi toko teau, o fakatatau ki he gaahi fale oe nau gaahi tamai, i Juta kotoabe mo Benijimani: bea naa ne lau akinautolu mei he ta‘u e uofulu o fai hake, o ne ilo akinautolu koe toko tolu kilu nae lelei, bea malohi ke alu atu ke tau, bea maheniai i he ala ki he tao moe ba.

6 Bea naa ne totogi ae kau tagata e toko taha kilu mei Isileli aki ae taleniti siliva e teau, koe kau malohi mo to‘a.

7 Ka nae ha‘u kiate ia ha tagata ae Otua, o ne behe, E tu‘i, oua naa tuku ke alu mo koe ae kau tau a Isileli; he oku ikai kau mo Isileli a Jihova, koe fānau kotoabe a Ifalemi.

8 Bea kabau te ke alu koe, fai be, ke ke malohi koe ki he tau: e fakahiga koe e he Otua i he ao oe fili: he oku i he Otua ae malohi ke tokoni, bea ke li ki lalo.

9 Bea nae behe e Amasia ki he tagata ae Otua, Ka koeha te mau fai koeuhi koe taleniti e teau aia kuou tuku ki he tau a Isileli? Bea nae beheage e he tagata ae Otua kiate ia, Oku faa fai e Jihova ke foaki kiate koe ae mea lahi hake aubito i he mea ni.

10 Bea nae toki vaeua akinautolu e Amasia, ae tau nae ha‘u kiate ia mei Ifalemi, ke nau toe alu ki ho nau fonua: koia nae tubu o lahi ai e nau ita ki Juta, bea naa nau toe alu ki ho nau abi i he ita lahi.

¶ 11 Bea nae fakamalohi e Amasia ia, bea taki atu eia hono kakai ki he toafa masima, o ne ta‘i i he fānau a Seia ae toko mano.

12 Bea koe toko mano e taha nae moui nae buke e he fānau a Juta o ave fakabobula, bea nae o hake akinautolu ki he tumutumu oe maka tuu, o li akinautolu mei he tumutumu oe maka ki lalo, koia nae lailai ai akinautolu kotoabe.

¶ 13 Ka koe kau tagata tau oe tau nae fekau e Amasia ke nau foki, ke oua naa nau alu mo ia ki he tau, naa nau teia ae gaahi kolo o Juta, mei Samelia o a‘u atu ki Beteholoni, bea nae teia ae toko tolu afe okinautolu, o  nau fetuku ae vete lahi.

¶ 14 Bea nae hoko o behe, hili ae liu mai a Amasia mei he tamate‘i ae kakai Itomi, naa ne omi ae gaahi otua oe fānau a Seia; bea ne fokotuu akinautolu ke ne otua aki, bea bunou ia kiate kinautolu, o ne tutu ae mea nanamu kiate kinautolu.

15 Koia nae tubu ai ae houhau a Jihova kia Amasia, bea naa ne fekau ae balofita kiate ia, aia nae behe kiate ia, Koeha kuo ke kumi ai ki he gaahi otua oe kakai, aia nae ikai te nau mafai ke fakamoui ho nau kakai onautolu mei ho nima?

16 Bea iloage lolotoga a ene kei lea kiate ia, nae behe e he tu‘i kiate ia, He kuo fakakau koe ki he kau fakakaukau ae tu‘i? tuku mua; he koe umaa ae ta‘i koe? Bea nae tuku ai ae balofita, o ne behe, Oku ou ilo kuo tuutuuni e he Otua ke ta‘i koe, koe mea i hoo fai ae mea ni, bea nae ikai te ke tokaga ki he eku akonaki.

¶ 17 Bea nae toki kumi ae fakakaukau e Amasia koe tu‘i o Juta, bea ne fekau atu kia Joasi, koe foha o Jihoaasi, koe foha o Jehu koe tu‘i o Isileli, o behe, Ha‘u ke ta fejiofaki be akitaua.

18 Bea nae fekau e Joasi koe tu‘i o Isileli kia Amasia koe tu‘i o Juta, o behe, Koe talatalaamoa nae i Lebanoni nae fekau ki he sita nae i Lebanoni, o behe, Foaki mai ho ofefine ki hoku foha ke na fakamau: bea nae alu ai ae manu kai vao nae i Lebanoni, bea malaki hifo ae talatalaamoa.

19 Oku ke lau, Vakai, kuo ke teia ae kakai Itomi: bea kuo fakahikihiki koe e ho loto ke vikiviki; ka ke nofo koe eni ki abi: koe umaa hoo kau ke ke kovi ai, ke ke higa ai, io, akoe, mo Juta foki mo koe?

20 Ka nae ikai tokaga e Amasia ki ai; he nae mei he Otua ia, koeuhi ke ne tukuage ia ki he nima  o ho nau gaahi fili, koe mea i he e nau kumi ki he gaahi otua o Itomi.

21 Koia nae alu hake ai a Joasi koe tu‘i o Isileli: bea na fejiofaki akinaua, io, aia mo Amasia koe tu‘i o Juta, i Betesemesi, aia oku kau ki Juta.

22 Bea nae fakatuutamaki a Juta i he ao o Isileli, bea naa nau hola taki taha ae tagata ki hono fale fehikitaki.

23 Bea nae buke e Joasi koe tu‘i o Isileli a Amasia koe tu‘i o Juta, koe foha o Joasi, koe foha o Jihoaasi, i Betesemesi, o ne omi ia ki Jelusalema, bea naa ne holoki hifo ae a maka o Jelusalema mei he mataba o Ifalemi ki he mataba i he tuliki a, koe haga e valugeau.

24 Bea naa ne ave ae koula kotoabe moe siliva, moe gaahi ibu kotoabe nae ilo i he fale oe Otua ia Obeti‐itomi, bea moe gaahi koloa i he fale oe tu‘i, moe kau fakamooni foki, bea tafoki ia o alu ki Samelia.

¶ 25 Bea nae moui a Amasia koe foha o Joasi koe tu‘i o Juta hili ae bekia a Joasi koe foha o Jihoaasi koe tu‘i o Isileli i he ta‘u e hogofulu ma nima.

26 Bea ko hono toe oe gaue a Amasia, koe uluaki moe ki mui, vakai, ikai kuo tohi ia i he tohi oe gaahi tu‘i o Juta mo Isileli?

¶ 27 Bea hili ae kuoga nae tafoki ai a Amasia mei he muimui ia Jihova naa nau teu laba kiate ia i Jelusalema; bea nae hola ia ki Lakisi: ka naa nau fekau o tuli ia ki Lakisi, bea nae tamate‘i ia i ai.

28 Bea naa nau fakaheka ia ki he faga hosi, bea nau tanu ia mo ene gaahi tamai i he kolo o Juta.