¶ 1 BEA nae fakamalohi ia e Jihoiata i hono fitu oe ta‘u, o ne omi ae gaahi eiki bule oe gaahi teau  mo Asalia koe foha o Jilahami, mo Isimeli koe foha o Jihohanani, mo Asalia koe foha o Obeti, mo Maaseia koe foha o Ataia, mo Ilisafate koe foha o Sikili, o nau fefuakava aki.

2 Bea naa nai alu fano be i Juta, o nau tanaki ae kau Livai mei he gaahi kolo kotoabe o Juta, moe kau tuu ki mua i he gaahi tamai a Isileli, bea nau ha‘u ki Jelusalema.

3 Bea nae fai ae fuakava ki he tu‘i e he kakai kotoabe i he fale oe Otua. Bea nae behe eia kiate kinautolu, Vakai, e bule ae foha oe tu‘i, o hage koia nae folofola aki e Jihova ki he gaahi foha o Tevita.

4 Koeni ae mea te mou fai; Ko hono tolu oe vahe omoutolu oku hu ki loto i he aho tabu oe kau taulaeiki moe kau Livai, te mou leo mataba;

5 Bea ko hono vahe tolu  e taha te mou i he fale oe tu‘i; bea ko hono tolu oe vahe e i he mataba oe tuuga: bea e i he gaahi lotoa oe fale o Jihova ae kakai kotoabe.

6 Kae oua naa hu ha niihi ki he fale o Jihova ka koe kau taulaeiki, mo kinautolu i he kau Livai oku tauhi; e hu ki ai akinautolu, he oku nau maonioni: ka ke tauhi e he kakai kotoabe ae le‘o o Jihova.

7 Bea ke tuu o a‘i ae tu‘i e he kau Livai o takataka‘i, o taki taha ae tagata mo ene mahafu i hono nima; bea iloga ha toko taha kehe oku hu ki he fale, e tamate‘i ia: ka ke i he tu‘i akimoutolu i he ene hu ki loto, mo ene hu kitua.

8 Koia, nae fai e he kau Livai mo Juta kotoabe ae mea kotoabe nae fekau e Jihoiata koe taulaeiki kiate kinautolu, o nau ave taki taha hono kau tagata aia nae tonu ke hu ki loto i he aho tabu, mo kinautolu nae tonu ke alu kitua i he aho tabu: he nae ikai tuku ke alu e Jihoiata ae kau leo.

9 Bea nae tufaki foki e Jihoiata koe taulaeiki ki he kau eiki bule oe gaahi teau ae gaahi tao moe gaahi ba, moe gaahi fakāu, aia nae oe tu‘i ko Tevita, aia nae i he fale oe Otua.

10 Bea naa ne fakaotu ae kakai kotoabe, ae tagata taki taha mo ene mahafu tau i hono nima, mei he nima toomatau oe fale tabu ki he nima toohema oe fale tabu, o ofi ki he feilaulauaga moe fale tabu, o takatakai o ofi ki he tu‘i.

11 Bea hili ia naa nau omi kitua ae foha oe tu‘i, bea nau ai ae tatā fakatu‘i kiate ia, bea atu kiate ia ae fuakava, bea fakanofo ia koe tu‘i. Bea nae bani aki ia ae lolo e Jihoiata mo hono gaahi foho, o ne behe, Ke fakamoui e he Otua ae tu‘i.

¶ 12 Bea i he fanogo e Atalia ki he uulu oe kakai i he lele moe fakamalo ki he tu‘i, nae ha‘u ia ki he kakai ki he loto fale o Jihova:

13 Bea jio ia, bea, vakai, nae tuu ae tu‘i i hono bou i he huaga; bea nae ofi ki he tu‘i ae houeiki moe gaahi mealea: bea nae fiefia ae kakai kotoabe oe fonua, o nau ifi ae gaahi mealea, moe kau hiva foki moe gaahi mea faiva, mo kinautolu nae ako ke hiva ae fakamalo. Bea nae hae hono kofu e Atalia, o ne behe, Koe laba, koe laba.

14 Bea nae omi ai e Jihoiata koe taulaeiki ae kau eiki bule oe gaahi teau aia nae fakanofo ki he gaahi tau, o ne behe kiate kinautolu, Ave ia ki he mamao mei he gaahi fakagatagataaga: bea ko ia e muimui iate ia ke tamate‘i ia aki ae heleta. He nae behe e he taulaeiki, Oua naa tamate‘i ia i he fale o Jihova.

15 Koia naa nau buke ia aki ho nau nima: bea i he ene hoko ki he huaga oe mataba oe faga hose o ofi ki he fale oe tu‘i, naa nau tamate‘i ia i ai.

¶ 16 Bea nae fai e Jihoiata ae fuakava, aia moe kakai kotoabe, bea moe tu‘i, koeuhi ke nau hoko koe kakai a Jihova.

17 Bea nae alu ai ae kakai kotoabe ki he fale o Beali, bea holoki hifo ia o maumau‘i, bea laiki hono gaahi feilaulauaga mo hono gaahi fakatātā ke fakaikiiki, bea nau tamate‘i a Metani koe taula o Beali i he ao oe gaahi feilaulauaga.

18 Bea nae fakanofo e Jihoiata ae gaahi matābule oe fale o Jihova i he bule ae kau taulaeiki moe kau Livai, aia nae tufaki e Tevita i he fale o Jihova, ke atu ae gaahi feilaulau tutu, o hage ko ia nae tohi i he fono a Mosese, aki ae fiefia moe hiva, o hage koia nae tuutuuni e Tevita.

19 Bea ne fakanofo ae kau leo i he gaahi mataba i he fale o Jihova, koeuhi ke oua naa hu ki ai ha toko taha nae tae maa i ha mea e taha.

20 Bea nae ave eia ae gaahi eiki bule oe gaahi teau, moe houeiki, moe kau bule oe kakai, bea moe kakai kotoabe oe fonua, o ne omi ae tu‘i mei he fale o Jihova: bea naa nau hu i he mataba maoluga ki he fale oe tu‘i, bea nae fakanofo ae tu‘i ki he nofoa fakatu‘i oe buleaga.

21 Bea nae fiefia ae kakai kotoabe oe fonua: bea nae fiemalie ae kolo, hili e nau tamate‘i a Atalia aki ae heleta.