Ko Hono Ua oe Tohi Fakamatala Mea Hokohoko
Vahe 1
1 Koe feilaulau molumalu nae fai e Solomone i Kibione. 7 Oku fili ae boto e Solomone, bea oku tabuaki‘i ia e he Otua. 13 Koe malohi moe koloaia a Solomone.
¶ 1 BEA nae fakamalohi a Solomone koe foha o Tevita i hono buleaga, bea nae iate ia a Jihova ko hono Otua, o ne fakahikihiki ia ke lahi aubito.
2 Bea nae toki lea a Solomone ki Isileli kotoabe, ki he houeiki bule oe gaahi toko afe, moe gaahi toko teau, bea ki he kau fakamāu, bea ki he gaahi bule fonua kotoabe i Isileli, koe kau tuu ki mua i he gaahi tamai.
3 Bea koia nae alu ai a Solomone, moe fakataha kotoabe moia, ki he botu maoluga nae i Kibione; he nae i ai ae fale fehikitaki oe fakataha oe Otua, aia nae gaohi i he toafa e Mosese koe tamaioeiki a Jihova.
4 Ka kuo omi e Tevita ae buha oe fuakava ae Otua mei Keja‐jialimi ki he botu nae teuteu e Tevita ki ai: he naa ne fokotuu ha fale fehikitaki ki ai i Jelusalema.
5 Bea koe feilaulauaga balasa foki, aia nae gaohi e Besalili koe foha o Uli koe foha o Hua naa ne tuku ia i he ao oe fale fehikitaki o Jihova: bea nae kumi ki ai e Solomone bea moe fakataha.
6 Bea nae alu hake ki ai a Solomone ki he feilaulauaga balasa i he ao o Jihova, aia nae i he fale fehikitaki oe fakataha, bea ne atu ai i hono fuga ha gaahi feilaulau tutu e taha afe.
¶ 7 Bea i he bo koia nae ha mai a Jihova kia Solomone, mo ne behe kiate ia, Kole mai ha mea teu foaki kiate koe.
8 Bea nae behe e Solomone ki he Otua, Kuo ke fakaha ae aloofa lahi kia Tevita ko eku tamai, bea kuo ke tuku au keu fetogi ia i he bule.
9 Bea koeni, E Jihova koe Otua, tuku ke fakababau ae talaofa nae fai ki he eku tamai ko Tevita: he kuo ke tuku au koe tu‘i ki ha kakai oku lahi o hage koe efu oe kelekele.
10 Foaki mai eni ae boto moe iloilo, koeuhi keu faa fealuaki i he ao oe kakai: he kohai oku faa fakamāu a hoo kakai lahi ni?
11 Bea nae behe e he Otua kia Solomone, Koeuhi nae i ho loto ae mea ni bea kuo ikai te ke kole ha koloa, be koe ma‘u mea, be koe ogoogolahi, be koe moui a hoo gaahi fili, be te ke kole ke ke moui fuoloa; ka kuo ke kole ki he boto moe iloilo maau, koeuhi ke ke faa fakamāu ai a hoku kakai, aia kuou tuku koe ke ke tu‘i ki ai:
12 Kuo foaki kiate koe ae boto moe iloilo; bea teu foaki kiate koe ae koloa moe ma‘u mea, moe ogoogolahi, kuo heeki ke ma‘u o lahi behe e he gaahi tu‘i kuo i muaage iate koe, bea e ikai ma‘u o tatau moia e ha toko taha e muimui kiate koe.
¶ 13 Bea hili eni nae ha‘u a Solomone mei he botu maoluga nae i Kibione ki Jelusalema, mei he ao oe fale fehikitaki oe fakataha, bea naa ne bule ki Isileli.
14 Bea nae tanaki e Solomone ae gaahi jaliote moe kau tagata heka hose: bea naa ne ma‘u ae jaliote e taha afe ma fageau, moe kau heka hose e taha mano ma ua afe, bea naa ne tuku akinautolu ki he gaahi kolo tukuga jaliote, bea ke nofo moe tu‘i i Jelusalema.
15 Bea nae gaohi e he tu‘i ae siliva moe koula ke hage koe maka i Jelusalema, bea naa ne ma‘u o lahi ae gaahi akau sita ke tatau moe gaahi akau sukamino i he botu talalo.
16 Bea nae omi kia Solomone ae faga hose mei Ijibite, aia nae tanaki: bea nae ma‘u aia nae tanaki e he kau fakatau ae tu‘i i he totogi.
17 Bea nae alu atu mo o hake ha jaliote mei Ijibite ko hono totogi koe koga siliva e onogeau; bea koe totogi ki ha hose e taha koe teau ma nimagofulu: bea nae behe e nau taufetuku foki ia ki he gaahi tu‘i kotoabe oe kakai Heti bea moe gaahi tu‘i o Silia.