Vahe 22
1 Koe fakanofo a Ahasia bea mo ene bule agakovi. 5 Koe kau ia mo Jolami koe foha o Ehabi, bea koe tamate‘i ia e he heleta a Jehu. 10 Koe tamate‘i e Atalia ae fānau bule kotoabe, ka ko Joasi nae toe aia nae fufu e hono tuajina, bea oku faoa eia ae buleaga.
¶ 1 BEA nae fakanofo e he kakai o Jelusalema a Ahasia ko hono foha ki mui ke tu‘i ko hono fetogi: he koe kau tagata nae ha‘u moe kau Alebea ki he abitaga naa nau tamate‘i ae gaahi taolete kotoabe. Koia, nae bule a Ahasia koe foha o Jiholami koe tu‘i o Juta.
2 Nae uofulu ma ua ta‘u ae motua o Ahasia i he ene hoko o bule, bea naa ne bule i he ta‘u be taha i Jelusalelma. Koe higoa o ene fa‘e ko Atalia koe ofefine o Omili.
3 Bea nae alu ia i he gaahi hala oe fale o Ehabi: he nae akonaki‘i ia e he ene fa‘e ke fai agakovi.
4 Koia naa ne fai agakovi i he ao o Jihova o hage koe fale o Ehabi: he ko ene kau akonaki akinautolu hili ae mate a ene tamai, ke malaia ai ia.
¶ 5 Bea nae alu ia foki o muimui ki he e nau fakakaukau, bea alu ia mo Jiholami koe foha o Ehabi koe tu‘i o Isileli ki he tau ke tau‘i a Hasaeli koe tu‘i o Silia ki Lemotikiliati; bea nae fakakafo a Jolami e he kakai Silia.
6 Bea nae liliu mai ia ki Jesilili ke faitoo ki hono gaahi kafo aia naa ne lavea ai i Lama i he ene tau‘i a Hasaeli koe tu‘i o Silia. Bea nae alu hifo ki Jesilili a Asalia koe foha o Jiholami koe tu‘i o Juta ke vakai a Jiholami koe foha o Ehabi koeuhi nae mahaki ia.
7 Bea koe fakamalaia o Ahasia nae mei he Otua i he ene hoko kia Jolami: koeuhi i he ene hokoage, nae alu kituaa ia fakataha mo Jiholami ke tau‘i a Jehu koe foha o Nimisi, aia nae bani aki ae lolo e Jihova ke ne motuhi ae fale o Ehabi.
8 Bea nae hoko o behe, koeuhi, i he fai e Jehu ene tautea ki he faahiga o Ehabi, o ne ilo ae gaahi houeiki o Juta, moe gaahi kaiga o Ahasia, akinautolu nae tauhi a Ahasia, naa ne tamate‘i akinautolu.
9 Bea naa ne kumi a Ahasia: bea naa nau buke ia, (he nae fufu ia i Samelia) o omi ia kia Jehu; bea hili e nau tamate‘i ia, naa nau tanu ia: he naa nau behe, Koe foha ia o Jihosafate, aia nae kumi kia Jihova aki hono loto kotoa. Koia nae ikai ha malohi i he fale o Ehabi, ke buke mau ae buleaga.
¶ 10 Bea i he vakai e Atalia koe fa‘e a Ahasia kuo mate ene tama, nae tuu hake ia o ne tamate‘i ae hako kotoabe oe hau i he fale o Juta.
11 Ka ko Jihosabeati koe ofefine oe tu‘i, naa ne too a Joasi koe foha o Ahasia, o ne kaihaaji ia mei he gaahi foha oe tu‘i aia nae tamate‘i, bea tuku ia mo ene fefine tauhi i ha fale mohe. Koia nae fufu ia e Jihosabeati koe ofefine oe tu‘i, koe unoho o Jihoiata koe taulaeiki, (he koe tuofefine ia o Ahasia,) mei a Atalia, koia nae ikai te ne tamate‘i ia.
12 Bea nae iate kinautolu ia o fufu i he fale oe Otua i he ta‘u e ono: bea nae bule a Atalia ki he fonua.