¶ 1 NAE uofulu ta‘u moe ta‘u e nima ae motua o Hesekaia i he ene kamata bule, bea nae bule ia i he ta‘u e uofulu ma hiva i Jelusalema. Bea koe higoa o ene fa‘e ko Abija koe ofefine o Sakalia.

2 Bea nae fai lelei eia i he ao o Jihova, o fakatatau ki he mea kotoabe nae fai e Tevita ko ene tamai.

¶ 3 I he uluaki ta‘u o ene bule, i he uluaki mahina, naa ne too ae gaahi mataba oe fale o Jihova, o ne gaohi ia ke lelei.

4 Bea ne omi ae kau taulaeiki moe kau Livai, o ne tanaki akinautolu ke fakataha ki he hala fakahahake.

5 Bea nae behe eia kiate kinautolu, Ae kau Livai, ke mou tokaga kiate au, koeni mou fakamaa akimoutolu, bea fakamaa ae fale o Jihova koe Otua o hoo mou gaahi tamai, bea mou fetuku atu ae gaahi mea uli mei he botu maonioni.

6 He nae fai hala e tau gaahi tamai, bea fai aia nae kovi i he ao o Jihova ko ho tau Otua, bea naa nau liaki ia, bea nae tafoki ho nau mata mei he falenofoaga o Jihova, bea fulitua ki ai.

7 Bea kuo nau tabuni ae gaahi mataba oe huaga fale fakamalumalu, bea tamate‘i ae gaahi māma, bea nae ikai tutu ae mea namu kakala be atu ae gaahi feilaulau tutu i he botu maonioni ki he Otua o Isileli.

8 Koia nae to ai ae houhau a Jihova ki Juta mo Jelusalema, bea naa ne tukuage akinautolu ki he mamahi, moe fakaofoofo, moe fakaiseisa, o hage koia oku mou mamata ai aki ho mou mata.

9 Vakai, he kuo to e tau gaahi tamai i he heleta, bea oku nofo bobula i he mea ni ho tau gaahi foha mo ho tau gaahi ofefine mo ho tau gaahi unoho.

10 Bea koeni, oku i hoku loto ia ke fai ae fuakava kia Jihova koe Otua o Isileli, koeuhi ke tafoki hono houhau lahi meiate ki tautolu.

11 E hoku gaahi foha, oua eni naa mou taetokaga: he kuo fili akimoutolu e Jihova ke tuu i hono ao, ke tauhi ia, bea ke mou gaue kiate ia, bea tutu ae mea namu kakala.

¶ 12 Bea nae tuu hake ai ae kau Livai, ko Mehati koe foha o Amasai, mo Joeli koe foha o Asalia, i he gaahi foha oe kau Kohate: bea i he gaahi foha o Melali, ko Kisi koe foha o Abiti, mo Asalia koe foha o Jehalili: bea i he kakai Kesoni; ko Joa koe foha o Sima, mo Iteni koe foha o Joa:

13 Bea i he gaahi foha o Ilisafani; ko Simili, mo Jieli: bea i he gaahi foha o Asafi; ko Sakalia, mo Matania:

14 Bea i he gaahi foha o Hemani: ko Jehieli, mo Simi: bea i he gaahi foha o Jitutuni; ko Simaia, mo Usili.

15 Bea naa nau fakakatoa ho nau gaahi kaiga, bea fakamaa akinautolu, bea ha‘u, o hage koe fekau ae tu‘i, i he folofola a Jihova, ke fakamaa ae fale o Jihova.

16 Bea nae hu ae kau taulaeiki ki he botu i loto i he fale o Jihova, ke fakamaa ia, o nau fetuku mei ai ae gaahi mea uli kotoabe naa nau ilo i he fale tabu o Jihova ki he loto a oe fale o Jihova. Bea nae ave ia e he kau Livai, o fetuku ia ki he mamao ki he vaitafe ko Kitiloni.

17 Bea naa nau kamata i he uluaki aho oe uluaki mahina ke fakamaa, bea i hono valu oe aho oe mahina naa nau hoko ki he huaga fale fakamalumalu o Jihova: koia naa nau fakamaa ae fale o Jihova i he aho e valu; bea i hono aho e hogofulu ma ono i he uluaki mahina naa nau fakaoji.

18 Bea naa nau alu ai kia Hesekaia koe tu‘i, o behe, Kuo mau fakamaa ae botu kotoabe oe fale o Jihova, moe feilaulauaga oe mea tutu, mo hono gaahi ibu kotoabe o ia, moe balebale oe ma oe ao, mo hono gaahi ibu kotoabe oia.

19 Bea koeuhi koe gaahi ibu kotoabe, aia nae liaki e he tu‘i ko Ehabi i he ene bule, i he ene agahala, kuo oji e mau teu‘i mo fakatabu‘i, bea vakai, oku nau i he mua feilaulauaga o Jihova.

¶ 20 Bea nae tuu hegihegi hake a Hesekaia koe tu‘i, o ne tanaki ke fakataha ae kau bule oe kolo, bea alu ia ki he fale o Jihova.

21 Bea naa nau omi ae faga bulu e fitu, moe sibi tagata e fitu, moe lami e fitu, moe koji tagata e fitu, koe feilaulau i he agahala ae buleaga, bea ma ae falenofoaga, bea mo Juta. Bea nae fekau ia ki he kau taulaeiki koe gaahi foha o Elone ke atu ia i he fuga feilaulauaga o Jihova.

22 Koia naa nau tamate‘i ae faga bulu, bea nae fakatali ae toto e he kau taulaeiki, bea nau luluku aki ae feilaulauaga: bea behe be, hili e nau tamate‘i ae faga sibi tagata, naa nau luluku aki ae toto ae feilaulauaga: bea naa nau tamate‘i ae faga lami foki, bea nau luluku ae toto ki he feilaulauaga.

23 Bea naa nau omi kitua ae faga koji tagata koe feilaulau ma ae agahala ki he ao oe tu‘i moe fakataha; bea naa nau hilifaki ho nau nima ki ai:

24 Bea nae tamate‘i akinautolu e he kau taulaeiki, bea fai ae fakalelei aki a ho nau toto i he fuga oe feilaulauaga, ke fai ai ae fakalelei koeuhi ko Isileli kotoabe: he nae fekau e he tu‘i ke fai ae feilaulau tutu moe feilaulau ma ae agahala ma a Isileli kotoabe.

25 Bea naa ne fokotuu ae kau Livai he fale o Jihova moe gaahi mea bakihi, moe gaahi utete, moe gaahi haabe, o fakatatau ki he fekau a Tevita, bea mo Kata koe tagata kikite ae tu‘i, mo Netane koe balofita: he nae behe be ae fekau a Jihova i he ene kau balofita.

26 Bea nae tuu ae kau Livai moe gaahi mea faiva a Tevita, moe kau taulaeiki moe gaahi mealea.

27 Bea nae fekau e Hesekaia ke fai ae feilaulau tutu i he fuga oe feilaulauaga. Bea i he kamata atu ae feilaulau tutu, nae kamata foki ae hiva kia Jihova aki ae gaahi mealea, bea i he gaahi mea faiva nae tuutuuni e Tevita koe tu‘i o Isileli.

28 Bea nae hu ae fakataha kotoabe, bea hiva ae kau hiva, bea fakaogo e he kau ifi mealea: bea nae fai ai be ae mea ni kotoabe ke oua ke oji ae feilaulau tutu.

29 Bea hili e nau fakaoji ae feilaulau, nae bunou ae tu‘i mo kinautolu kotoabe nae iate ia, o nau hu.

30 Bea nae fekau foki e Hesekaia koe tu‘i moe houeiki ki he kau Livai ke hiva mo fakafetai kia Jihova aki ae gaahi lea a Tevita, bea mo Asafi koe tagata kikite. Bea naa nau hiva aki ae gaahi fakafetai i he fiefia, o nau bunou hifo ho nau ulu o hu.

31 Bea nae tali e Hesekaia o ne behe, Koeni kuo mou fakatabu‘i akimoutolu kia Jihova, mou ha‘u ke ofi, bea omi ae gaahi feilaulau moe feilaulau fakafetai ki he fale o Jihova. Bea nae omi e he fakataha ae gaahi feilaulau moe gaahi feilaulau fakafetai; bea omi ekinautolu nae loto ataataina ae gaahi feilaulau tutu.

32 Bea ko hono lau oe gaahi feilaulau tutu, aia nae omi e he fakataha lahi, koe faga bulu e fitugofulu, koe sibi tagata e teau, moe lami e uageau: koeni kotoabe koe feilaulau tutu kia Jihova.

33 Bea koe mea nae fakatabu‘i koe faga bulu e onogeau moe sibi e tolu afe.

34 Bea nae toko jii ae kau taulaeiki, koia nae ikai te nau faa fai ke fohi ae feilaulau tutu kotoabe: koia nae tokoni ai akinautolu e ho nau kaiga koe kau Livai, ke oua ke oji ae gaue, bea ke oua ke fakamaa a hono toe oe kau taulaeiki: he nae agatonu lahi hake i loto ae kau Livai ke fakamaa akinautolu i he kau taulaeiki.

35 Bea nae lahi aubito foki ae gaahi feilaulau tutu, moe gako oe gaahi feilaulau fakalelei, moe feilaulau inu i he feilaulau tutu kotoabe. Koia nae teuteu lelei ae gaue oe fale o Jihova.

36 Bea nae fiefia a Hesekaia, moe kakai kotoabe, koe mea i he teuteu‘i e he Otua hono kakai; he nae fai fakafokifa be ae mea ni.