¶ 1 BEA nae mohe a Abija mo ene gaahi tamai, bea naa nau tanu ia i he kolo a Tevita: bea nae fetogi ia i he bule e hono foha ko Asa. Nae melino be ae fonua i hono gaahi aho oona i he ta‘u e hogofulu.

2 Bea nae fai e Asa aia nae lelei i he ao o Jihova ko hono Otua;

3 He naa ne fetuku o ave ke mamao ae gaahi feilaulauaga oe gaahi otua kehe, moe gaahi botu maoluga; o ne feji‘i hifo ae gaahi mea fakatātā, bea ne ta hifo ae gaahi vao tabu:

4 Bea naa ne fekau ki Juta ke kumi kia Jihova koe Otua oe nau gaahi tamai, bea ke fai ki he fono moe fekau.

5 Bea naa ne liaki foki mei he gaahi kolo kotoabe o Juta ae gaahi botu maoluga moe gaahi mea fakatātā: bea nae aga fekamelino be ae buleaga i hono ao.

¶ 6 Bea nae laga eia ae gaahi kolotau i Juta: he nae aga fakamelino be ae fonua, bea nae ikai ha tau kiate ia i he gaahi ta‘u koia; koeuhi nae foaki e Jihova ae fiemalie kiate ia.

7 Koia nae behe ai eia ki Juta, Ke tau laga ae gaahi kolo ni ma atautolu, bea laga ki ai ae gaahi a, moe gaahi fale maoluga, moe gaahi mataba, moe gaahi akau fakalava, i he kei i ho tau ao ae fonua; koe mea i he e tau kumi a Jihova ko ho tau Otua, naa tau kumi ia, bea kuo ne tuku ae fiemalie kiate kitautolu i he botu kotoabe. Koia naa nau laga bea monuia.

8 Bea nae ia Asa ae kau tagata tau, nae fua ae gaahi ba moe gaahi tao, koe toko tolu afe mei Juta; bea koe toko ua kilu moe toko valu mano mei a Benijimani nae fua ba bea teke ae kaufana: koe kau tagata to‘a mo malohi akinautolu ni kotoabe.

¶ 9 Bea nae ha‘u ke tau‘i akinautolu a Sela koe tagata Itiobea moe fuu tau koe taha miliona, moe jaliote e tolugeau; bea naa nau hoko ki Malesa.

10 Bea nae toki alu kituaa a Asa ko hono tali, bea naa nau teuteu ke fai ae tau i he botu talalo o Sefata i Malesa.

11 Bea nae tagi a Asa kia Jihova ko hono Otua, o ne behe, E Jihova, koe mea noabe kiate koe ke tokoni, ki he toko lahi, be kiate kinautolu oku ikai ha nau malohi: E Jihova ko ho mau Otua, ke ke tokoni kiate kimautolu; he oku mau falala kiate koe, bea i ho huafa oku mau alu atu ki he fuu kakai ni. E Jihova, ko koe be ko ho mau Otua; oua naa malohi ae tagata kiate koe.

12 Koia nae ta‘i e Jihova ae kakai Itiobea i he ao o Asa, moe ao o Juta; bea nae hola ae kakai Itiobea.

13 Bea nae tuli akinautolu e Asa moe kakai nae iate ia o a‘u ki Kela: bea i he maveuveu ae kakai Itiobea, nae ikai te nau mafai ke toe fakahaofi akinautolu; he nae fakaauha akinautolu i he ao o Jihova bea i he ao o ene tau; bea naa nau fetuku o ave ae vete lahi.

14 Bea naa nau teia ae gaahi kolo kotoabe nae tuu takatakai i Kela; he nae to ae manavahe kia Jihova kiate kinautolu: bea naa nau maumau ae gaahi kolo kotoabe; he nae lahi aubito ae koloa i ai.

15 Bea naa nau teia foki ae gaahi fale oe faga manu lalahi; bea nae fetuku o ave ae faga sibi moe faga kameli ke lahi aubito o nau liu mai ki Jelusalema.