¶ 1 NAE hogofulu ta‘u moe ta‘u e ua ae motua o Manase i he ene kamata bule, bea nae bule ia i Jelusalema i he ta‘u e nimagofulu moe ta‘u e nima.

2 Ka nae fai eia aia nae kovi i he ao o Jihova, o hage koe gaahi agakovi oe hiteni aia nae kabuji e Jihova mei he ao oe fānau a Isileli.

¶ 3 He naa ne toe laga‘i ae gaahi botu maoluga, aia nae holoki hifo e he ene tamai ko Hesekaia, o ne fokotuu ae gaahi feilaulauaga kia Beali, o ne gaohi ae gaahi vao tabu, bea lotu ia ki he mea kotoabe oe lagi, bea ne tauhi ki ai.

4 Bea naa ne laga ae gaahi feilaulauaga i he fale o Jihova, aia nae folofola ki ai e Jihova, E tuu hoku higoa i Jelusalema o taegata.

5 Bea naa ne laga ae gaahi feilaulauaga ki he mea kotoabe oe lagi i he loto a e ua oe fale o Jihova.

6 Bea naa ne bule eia ke alu ene fānau o aji i he afi i he telea oe foha o Henomi: bea naa ne tokaga foki ki he gaahi kuoga, bea ne fai ae hu fakatevolo, bea fai ae tuki fakatevolo, bea nae kaumea ia ki he laumalie kovi, bea ki he kau kikite loi: naa ne fai ae kovi lahi i he ao o Jihova, ke fakatubu ai ae houhau kiate ia.

7 Bea nae fokotuu eia ae tamabua nae togi, koe otua loi naa ne gaohi, i he fale oe Otua, aia nae folofola ai ae Otua kia Tevita bea mo Solomone ko hono foha, Teu tuku hoku higoa i he fale ni, bea i Jelusalema aia kuou fili i he ao oe gaahi faahiga kotoabe o Isileli ke taegata:

8 Bea e ikai teu toe hiki ae va‘e o Isileli mei he fonua aia naaku tuutuuni moo hoo mou gaahi tamai; o kabau te nau tokaga ke fai aia kotoabe naaku fekau kiate kinautolu, o fakatatau ki he fono kotoa moe gaahi tuutuuni, moe gaahi fakamāu i he nima o Mosese.

9 Koia nae bule e Manase kia Juta moe kakai o Jelusalema ke nau he, bea ke nau fai kovi lahi hake i he hiteni, aia nae fakaauha e Jihova mei he ao oe fānau a Isileli.

10 Bea nae folofola a Jihova kia Manase, bea mo ene kakai: ka nae ikai te nau fie tokaga.

¶ 11 Koia nae omi ai e Jihova kiate kinautolu ae gaahi eiki oe tau oe tu‘i o Asilia, aia naa nau buke a Manase i he gaahi tala‘i akau, bea ha‘i aki ia ae gaahi mea ha‘i, bea ave ia ki Babilone.

12 Bea kuo moua ia i he mamahi, naa ne hu ai kia Jihova, ko hono Otua, o ne fakavaivai lahi ia i he ao oe Otua o ene gaahi tamai,

13 Bea nae lotu ia kiate ia: bea naa ne talia eia ia, o tokaga‘i ene lotu fakakolekole, bea ne toe omi ia ki Jelusalema ki hono buleaga. Bea nae toki ilo ai e Manase ko Jihova koia koe Otua.

14 Bea hili ae mea ni naa ne laga ae a maka ituaa i he kolo o Tevita, i he botu luluga o Kihoni, i he toafa, io o hoko atu ki he mataba ika, o alu fakatakamilo i Ofili, o ne fokotuu hake ia ke maoluga aubito: bea nae fakanofo ae gaahi eiki tau i he gaahi kolo tau kotoabe o Juta.

15 Bea nae ave mei ai eia ae gaahi otua kehe, bea moe otua loi mei he fale o Jihova, bea moe gaahi feilaulauaga aia naa ne laga i he mouga oe fale o Jihova, bea i Jelusalema, o ne li ia kituaa mei he kolo.

16 Bea nae toe gaohi eia o fakalelei ae feilaulauaga o Jihova, bea ne feilaulau ki ai ae gaahi feilaulau fakamelino, moe gaahi feilaulau fakafetai, bea ne fekau ki Juta ke tauhi a Jihova koe Otua o Isileli.

17 Ka nae kei fai feilaulau ae kakai i he gaahi botu maoluga, ka  nae fai ia kia Jihova be ko ho nau Otua.

¶ 18 Bea ko hono toe oe gaue a Manase, mo ene lotu ki hono Otua, moe gaahi lea ae kau kikite aia naa nau lea aki kiate ia i he huafa o Jihova koe Otua o Isileli, vakai, kuo tohi ia i he tohi oe gaahi tu‘i o Isileli.

19 Bea ko ene lotu foki, mo hono talia loto ofa e he Otua, mo ene agahala kotoabe, mo ene fai hala, moe gaahi botu naa ne laga ai ae gaahi botu maoluga, bea fokotuu ai ae gaahi vao tabu, moe gaahi mea fakatātā, i he teeki fakavaivai‘i ia: vakai kuo tohi ia i he gaahi lea ae kau kikite.

¶ 20 Bea nae mohe a Manase mo ene gaahi tamai, bea naa nau tanu ia i hono fale oona: bea nae fetogi ia i he bule e hono foha ko Amoni.

¶ 21 Nae uofulu ta‘u moe ta‘u e ua a Amoni i he ene kamata bule, bea nae bule ia i he ta‘u e ua i Jelusalema.

22 Ka nae fai eia aia nae kovi i he ao o Jihova, o hage koia nae fai e Manase ko ene tamai; he nae feilaulau a Amoni ki he gaahi mea fakatātā kotoabe, aia nae tātā mo gaohi e Manase ko ene tamai, o ne tauhi ki ai;

23 Bea nae ikai te ne fakavaivai ia i he ao o Jihova, o hage ko hono fakavaivai ia e Manase ko ene tamai: ka nae fakaaau ki mua be a Amoni i he fai hala.

24 Bea nae alea fakataha a ene kau tamaioeiki o labaji bea tamate‘i ia i hono fale oona.

¶ 25 Ka nae tamate‘i e he kakai oe fonua, akinautolu kotoabe nae fakataha o laba ki he tu‘i ko Amoni; bea nae fakanofo e he kakai oe fonua a hono foha ko Josaia ke tu‘i ko hono fetogi ia.