¶ 1 BEA nae toki kamata e Solomone ke laga ae fale o Jihova i Jelusalema i he mouga ko Molia, aia nae ha ai a Jihova ki he ene tamai ko Tevita, i he botu nae teuteu e Tevita i he fale hahaaga uite o Olinani koe tagata Jebusi.

2 Bea naa ne kamata laga fale i hono ua oe  aho i hono ua oe mahina, bea i hono fa oe ta‘u o ene bule.

¶ 3 Bea koeni ia ae gaahi mea nae akonaki ai a Solomone i he laga hake ae fale oe Otua. Ko hono loloa i he lau hono haga i he uluaki fuofua, koe haga e teau ma uofulu, bea ko hono māukubu koe haga e fagofulu.

4 Bea ko hono loloa oe huaga fale fakamalumalu aia nae i he ao  oe fale, nae tatau ia mo hono māukubu oe fale koe haga e fagofulu, bea ko hono maoluga koe uageau ma fagofulu: bea naa ne aofi ia i loto aki ae koula haohaoa.

5 Bea koe fale lahi naa ne ato aki ae akau koe baini, aia naa ne aofi aki ae koula lelei, mo ne togitogi ai ae gaahi akau i he faahiga boga, moe gaue fihifihi.

6 Bea naa ne teuteu‘i ae fale aki ae gaahi maka mahuiga ke matamatalelei: bea ko hono koula koe koula mei Balevaimi.

7 Naa ne aofi foki ae fale, a hono lalaga, moe gaahi bou, bea mo hono gaahi holiji oia, mo hono gaahi mataba, aki ae koula; bea nae togitogi ae gaahi jelubi ki he holiji fale.

8 Bea naa ne gaohi ae fale tobutabu lahi, bea nae tatau ae loloa oia mo hono māukubu oe fale, koe haga e fagofulu, bea ko hono māukubu oia koe haga e fagofulu: bea naa ne aofi ia aki ae koula lelei, koe taleniti e onogeau.

9 Bea ko hono mamafa oe gaahi fa‘o koe sikeli koula e nimagofulu. Bea naa ne aofi aki ae koula ae gaahi botu fale ki oluga.

10 Bea i he fale tobutabu lahi naa ne gaohi ae ogo jelubi, koe mea fakatātā, mo ne aofi ia aki ae koula.

11 Bea ko hono loloa oe kabakau oe ogo jelubi koe haga e fagofulu: koe kabakau e taha koe haga ia e hogofulu, bea nae a‘u atu ia ki he holiji fale, bea koe kabakau e taha koe haga ia foki e hogofulu, bea nae a‘u atu ia ki he kabakau oe jelubi e taha.

12 Bea koe kabakau e taha oe jelubi e taha koe haga e hogofulu, bea nae a‘u atu ia ki he holiji fale, bea ko hono kabakau foki e taha koe haga e hogofulu, bea nae fetuutaki ia moe kabakau oe jelubi e taha.

13 Nae mafola atu ae gaahi kabakau oe ogo jelubi ni i he haga e fagofulu: bea naa na tuu ki oluga ki ho na va‘e, bea nae fehagaaki ki loto a ho na mata.

¶ 14 Bea naa ne gaohi ae buibui aki ae lanumoana moe kulokula moe kulaahoaho, moe tubenu lelei, bea naa ne ai ae gaahi jelubi ki ai.

15 Naa ne gaohi foki i he mua fale ae ogo bou e ua ko ho na maoluga koe haga e fitugofulu, bea koe ulu‘i bou nae i he bou taki taha, koe haga ia e hogofulu taki taha.

16 Bea naa ne gaohi ae kahoa fihifihi, o tatau moia nae i he folofolaaga, mo ne ai ia ki he gaahi ulu‘i bou; bea naa ne gaohi ae gaahi bomikanite e teau mo ne ai ia ki he gaahi kahoa fihifihi.

17 Bea naa ne fokotuu ae ogo bou i he ao oe fale tabu, koe taha ki he nima toomatau, bea koe taha ki he toohema; bea naa ne ui ae higoa oia ki he nima toomatau ko Jakini, bea koe higoa oia i he toohema ko Boasi.