¶ 1 BEA nae fai foki e Josaia ae  katoaga oe Laka‐atu kia Jihova i Jelusalema: bea naa nau tamate‘i ae Lakaatu i hono  aho hogofulu ma fa oe uluaki mahina.

2 Bea naa ne fokotuu ae kau taulaeiki i ho nau gaahi lakaga, o ne totoni akinautolu i he gaue i he fale o Jihova.

3 Bea nae behe eia ki he kau Livai aia nae akonaki‘i a Isileli kotoabe, akinautolu nae maonioni kia Jihova, Mou ai ae buha maonioni i he fale nae laga e Solomone koe foha o Tevita koe tu‘i o Isileli: e ikai ai ia koe kavega ki ho mou uma: koeni mou tauhi a Jihova ko ho mou Otua, mo hono kakai ko Isileli,

4 Bea teuteu akimoutolu i he gaahi fale o hoo mou gaahi tamai, o fakatatau ki ho mou lakaga, o tāu moe tohi a Tevita koe tu‘i o Isileli, bea hage koe tohi a Solomone ko hono foha.

5 Bea mou tuu i he botu maonioni o fakatatau moe vahe oe gaahi fale oe gaahi tamai o ho mou kaiga koe kakai, bea tāu moe vahe oe gaahi fale oe kau Livai.

6 Koia mou tamate‘i ae Laka‐atu, bea fakamaonioni akimoutolu, bea teuteu ho mou gaahi kaiga, koeuhi ke nau fai o hage koe folofola a Jihova i he nima o Mosese.

7 Bea nae foaki e Josaia ki he kakai, i he faga manu, koe faga lami moe uhiki‘i koji, koe mea foaki kotoabe ki he  katoaga oe Laka‐atu, ma ae kakai nae katoa, koe tolu mano, moe faga bulu e tolu afe: nae omi ae mea ni mei he koloa ae tu‘i.

8 Bea nae foaki fiemalie be e hono houeiki ki he kakai, bea ki he kau taulaeiki, moe kau Livai: ko Hilikia mo Sakalia mo Jehieli, koe kau bule ki he fale oe Otua, naa nau foaki ki he kau taulaeiki koe feilaulau i he  katoaga ae Laka‐atu, koe faga manu jii koe ua afe moe onogeau, moe faga bulu e tolugeau.

9 Bea ko Kononaia foki, mo Simaia mo Netanili, ko hono kaiga, mo Hesabaia mo Jehieli mo Josabati, koe kau tuu ki mua oe kau Livai, naa nau foaki ki he kau Livai koe feilaulau ki he  katoaga oe Laka‐atu, koe faga manu jii e nima afe, moe faga bulu e nimageau.

10 Koia nae teuteu ae gaue, bea nae tuu ae kau taulaeiki i ho nau botu, moe kau Livai i ho nau lakaga, o fakatatau ki he fekau ae tu‘i.

11 Bea naa nau tamate‘i ae Laka‐atu, bea nae luluku e he kau taulaeiki ae toto mei ho nau nima, bea nae fohifohi‘i ae gaahi manu e he kau Livai.

12 Bea naa nau hiki ae gaahi feilaulau tutu, koeuhi ke nau foaki o fakatatau ki he gaahi vahe oe gaahi fale nofoaga oe kakai, ke atu kia Jihova, o hage koia kuo tohi i he tohi a Mosese. Bea naa nau fai behe be ki he faga bulu.

13 Bea naa nau tunu ae  feilaulau oe Laka‐atu aki ae afi o fakatatau ki he tuutuuni: ka ko hono gaahi mea maonioni niihi naa nau haka i he gaahi kulo, moe kulo lahi, moe gaahi ibu, bea tufa leva ia ki he kakai kotoabe.

14 Bea hili ia naa nau teuteu ma anautolu, bea ma ae kau taulaeiki: koeuhi nae moua ae kau taulaeiki koe gaahi foha o Elone i he atu ae gaahi feilaulau tutu moe gako, o feouga moe bouli; koia nae teuteu ai ma anautolu e he kau Livai, bea ma ae kau taulaeiki koe gaahi foha o Elone.

15 Bea nae i ho nau botu ae kau hiva koe gaahi foha o Asafi, o fakatatau ki he fekau a Tevita, mo Asafi, mo Hemani, mo Jitutuni koe tagata kikite ae tu‘i: bea nae tali i he mataba ae kau leo mataba; koeuhi ke oua naa nau alu mei he e nau gaue; he nae teuteu‘i ma anautolu e ho nau kaiga koe kau Livai.

16 Bea behe, nae teu ae gaue kotoabe a Jihova i he aho be koia, ke fai ae  katoaga oe Laka‐atu, bea ke atu ae gaahi feilaulau tutu ki he feilaulauaga o Jihova, o fakatatau ki he fekau ae tu‘i ko Josaia.

17 Bea nae fai ae  katoaga oe Laka‐atu i he kuoga koia e he fānau a Isileli nae i ai, moe katoaga oe ma tae levani i he aho e fitu.

18 Bea nae ikai ha  katoaga oe Lakaatu e fai i Isileli o hage koia talu ae gaahi aho o Samuela koe balofita; bea nae ikai fai ha  katoaga oe Laka‐atu e he gaahi tu‘i kotoabe o Isileli o hage ko ia nae fai e Josaia, moe kau taulaeiki, mo kau Livai, mo Juta kotoabe mo Isileli aia nae katoa, moe kakai o Jelusalema.

19 Nae fai ae  katoaga oe Laka‐atu ni i hono hogofulu ma valu oe ta‘u ae bule a Josaia.

¶ 20 Bea hili ae mea ni kotoabe, bea oji hono teu‘i ae fale tabu e Josaia, nae alu hake a Niko koe tu‘i o Ijibite ke tau‘i a Kalikimisi aia oku ofi ki he Iufaletisi: bea nae alu kituaa a Josaia ke tau‘i ia.

21 Ka naa ne fekau ae kau tagata fekau kiate ia, o behe, Koeha eku kau kiate koe, akoe koe tu‘i o Juta? Oku ikai teu ha‘u ke tau‘i koe he aho ni, ka ki he fale aia oku ou tau‘i: he nae fekau au e he Otua keu fakatootoo: ke ke taofi koe ke oua naa ke fie kau ki he Otua, aia oku iate au, telia naa ne tamate‘i koe.

22 Ka nae ikai fie kalofaki e Josaia hono mata meiate ia, ka naa ne fakabuli ia, koeuhi ke na fai moia, bea nae ikai te ne tokaga ki he gaahi lea a Niko mei he fofoga oe Otua, ka nae ha‘u ke tau‘i ia i he telea o Mekito.

23 Bea nae fana e he kau fana ki he tu‘i ko Josaia; bea nae behe e he tu‘i ki he ene kau tamaioeiki, Ave au mei heni; he kuou lavea lahi.

24 Koia nae ave ai ia e he ene kau tamaioeiki mei he jaliote koia, bea nae tuku ia ki hono ua o ene jaliote naa ne ma‘u; bea naa nau omi ia ki Jelusalema, bea bekia ia; bea nau tanu ia i he tanuaga e taha o ene gaahi tamai. Bea nae tagi mamahi a Juta mo Jelusalema koeuhi ko Josaia.

¶ 25 Bea nae tagilāulāu a Jelemaia koeuhi ko Josaia: bea nae kau kia Josaia ae lea ae kau tagata hiva kotoabe moe kau fefine hiva i he e nau gaahi lea tagi o a‘u ki he aho ni, bea naa nau fokotuu ia koe mea fai mau i Isileli: bea, vakai, kuo tohi ia i he gaahi tagilaulau.

26 Bea koeni, ko hono toe oe gaue a Josaia, mo ene agalelei, o fakatatau ki he mea nae tohi i he fono a Jihova,

27 Bea mo ene gaahi gaue, koe uluaki moe kimui, kuo tohi ia i he tohi ki he gaahi tu‘i o Isileli mo Juta.