¶ 1 BEA nae hoko o behe i he gataaga oe ta‘u e uofulu aia nae laga ai e Solomone ae fale o Jihova, bea mo hono fale oona,

2 Nae laga e Solomone ae gaahi kolo aia nae toe omi e Helami kia Solomone, bea naa ne fakakakai ia e he fānau a Isileli.

3 Bea nae alu a Solomone ki Hamatisoba, mo ne ikuna ia.

4 Bea naa ne laga a Tatimoa i he toafa, bea moe gaahi kolo tukuga mea, aia naa ne laga i Hamati.

5 Naa ne laga foki a Bete‐holoni ki oluga, mo Bete‐holoni ki lalo, koe ogo kolo tau, nae ai hono gaahi a, moe gaahi mataba, moe gaahi sogo;

6 Mo Bealati, bea moe gaahi kolo tukuga mea aia nae ia Solomone, bea moe gaahi kolo nae i ai ae gaahi jaliote, moe gaahi kolo nae nofo ai ae kau heka hose, bea moia kotoabe nae fie laga e Solomone i Jelusalema, bea i Lebanoni, bea i he botu kotoabe o hono buleaga.

¶ 7 Bea iloga ae kakai kotoabe nae kei toe oe kakai Heti, moe kakai Amoli, moe kakai Belesi, moe kakai Hevi, moe kakai Jebusi, akinautolu nae ikai o Isileli,

8 Koe nau fānau, aia nae tubu ki mui iate kinautolu i he fonua, akinautolu nae ikai fakaauha e he fānau a Isileli, ko kinautolu ia nae bule‘i e Solomone ke fai ae tukuhau o a‘u mai ki he aho ni.

9 Ka nae ikai gaohi e Solomone ha taha i he fānau a Isileli ke tamaioeiki ke fai ene gaue; ka koe kau tagata ki he tau, moe houeiki o ene kau matābule, moe kau bule ki he ene gaahi jaliote mo ene kakai heka hose.

10 Bea ko kinautolu ni nae eiki hake i he kau matābule o Solomone koe tu‘i, io ae toko uageau ma nimagofulu, nae fai ae bule ki he kakai.

¶ 11 Bea nae o hake e Solomone ae ofefine o Felo mei he kolo o Tevita ki he fale naa ne laga moona: he naa ne behe, E ikai nofo a hoku unoho i he fale o Tevita koe tu‘i o Isileli, koeuhi oku tabu ae gaahi botu kuo hoko ki ai ae buha oe fuakava a Jihova.

¶ 12 Bea nae toki atu e Solomone ae gaahi feilaulau tutu kia Jihova i he feilaulauaga o Jihova, aia naa ne fokotuu i he ao oe huaga fale fakamalumalu,

13 O hage koe lau nae fai ki he aho taki taha, koe feilaulau o hage koe fekau a Mosese, i he gaahi aho tabu, bea i he gaahi mahina foou, bea i he gaahi katoaga molumalu, ke liuga tolu i he ta‘u i he katoaga oe ma taefakalevani, bea i he katoaga oe gaahi uike, bea i he katoaga oe gaahi fale fehikitaki.

14 Bea hage koe fekau a ene tamai ko Tevita, naa ne tuutuuni ae gaahi lakaga oe kau taulaeiki ki he e nau gaue, moe kau Livai ki he e nau gaue anautolu, ke hiva mo tauhi i he ao oe kau taulaeiki, o hage koia nae totonu ke fai i he aho kotoabe: koe kau leo mataba foki i ho nau gaahi lakaga ki he mataba kotoabe: he nae behe ae fekau a Tevita koe tagata ae Otua.

15 Bea nae ikai fai kehe akinautolu moe fekau ae tu‘i ki he kau taulaeiki moe kau Livai i ha mea e taha, be i he mea ki he gaahi koloa.

16 He nae fai ae tokonaki ki he gaue a Solomone ki he aho nae ai ai ae tuuga oe fale o Jihova, o fai o a‘u ki hono fakaoji. Bea nae fakaoji lelei ae fale o Jihova.

¶ 17 Bea nae toki alu a Solomone ki Esioni‐keba, bea mo Eloti, i he matātahi oe fonua o Itomi.

18 Bea nae atu e Helami ae gaahi vaka kiate ia i he ene kau tamaioeiki, moe kau tamaioeiki nae boto i he folau; bea naa nau alu fakataha moe kau tamaioeiki a Solomone ki Ofeli, bea naa nau ave mei ai ae koula koe taleniti e fageau moe nimagofulu, mo  nau omi ia ki he tu‘i ko Solomone.