¶ 1 BEA nae hoko o behe, i he hoko o fokotuu mau e Lehoboami ae buleaga, o ne fakamalohi ia, naa ne liaki ae fono a Jihova, bea behe mo Isileli kotoabe.

2 Bea nae hoko o behe, i hono ta‘u e nima oe tu‘i ko Lehoboami nae alu hake ai a Sisaki koe tu‘i o Ijibite ke tau‘i a Jelusalema, koe mea i he e nau fai talagataa kia Jihova,

3 Moe jaliote e taha mano moe ua afe, moe kau tagata heka hose e toko ono mano: bea nae taefaalaua ae kakai nae alu hake mo ia mei Ijibite: ae kakai Libea, moe kakai Sukimi, moe kakai Itiobea.

4 Bea naa ne kaba ae gaahi kolo tau nae kau ki Juta, o ne ha‘u ki Jelusalema.

¶ 5 Bea nae ha‘u ai a Simaia koe balofita kia Lehoboami, bea ki he houeiki o Juta, aia nae katoa fakataha ki Jelusalema koe mea ia Sisaki, o ne behe kiate kinautolu, Oku behe mai a Jihova, Kuo mou liaki au, bea koia kuou liaki ai foki akimoutolu ki he nima o Sisaki.

6 Koia nae fakavaivai ai akinautolu ae houeiki o Isileli moe tu‘i; bea naa nau behe, Oku tonuhia a Jihova.

7 Bea i he vakai e Jihova kuo nau fakavaivai akinautolu, nae hoko mai ae folofola a Jihova kia Simaia, o behe, Kuo nau fakavaivai akinautolu, koia e ikai ai teu fakaauha akinautolu; ka teu tuku kiate kinautolu ae fakamoui o fuoloa jii: bea e ikai ligi eku ita lahi ki Jelusalema i he nima o Sisaki.

8 Ka koe mooni te nau hoko ko ene kau tamaioeiki; koeuhi ke nau ilo eku gaue, moe gaue ki he gaahi buleaga oe gaahi fonua.

9 Koia nae hoko mai a Sisaki o tau‘i a Jelusalema, bea nae ave moia ae gaahi koloa mei he fale o Jihova, moe gaahi koloa oe fale oe tu‘i: naa ne ave kotoabe: naa ne fetuku o ave ae gaahi ba koula aia nae gaohi e Solomone.

10 Bea nae gaohi e Lehoboami ae gaahi ba balasa ke fetogi ia, o ne tuku ia ki he matābule oe kau leo, aia nae leohi ae huaga ki he fale oe tu‘i.

11 Bea i he hu ae tu‘i ki he fale o Jihova, nae ha‘u ae kau leo o fetuku ia ki ai bea nae toe omi ia mei ai ki he fale oe kau leo.

12 Bea i he ene fakaagavaivai ia, nae tafoki meiate ia ae houhau a Jihova, koeuhi ke oua naa fakaauha aubito ia: bea nae hoko foki ae lelei i Juta.

¶ 13 Koia nae fakamalohi‘i ia e Lehoboami i Jelusalema, bea bule ia: he nae fagofulu ta‘u moe ta‘u e taha ae motua o Lehoboami i he ene kamata bule, bea nae bule ia i he ta‘u e hogofulu ma fitu i Jelusalema, koe kolo aia nae fili e Jihova mei he gaahi faahiga kotoabe o Isileli, ke tuku ki ai hono huafa. Bea koe higoa o ene fa‘e ko Neama, koe fefine Amoni.

14 Bea nae fai kovi ia, koeuhi nae ikai te ne teuteu hono loto ke kumi kia Jihova.

15 Bea ko hono toe oe gaahi gaue a Lehoboami koe uluaki moe kimui, ikai kuo tohi ia i he tohi a Simaia koe balofita, bea mo Ito koe tagata kikite, ki he gaahi hohoko? Bea nae fai mau ae fetauaki a Lehoboami mo Jeloboami.

16 Bea nae mohe a Lehoboami mo ene gaahi tamai, bea nae fai hono butu i he kolo a Tevita: bea nae fetogi ia i he bule e hono foha ko Abija.