¶ 1 BEA nae hoko mai ae Laumalie oe Otua kia Asalia koe foha o Oteti:

2 Bea nae alu kitua ia ke fakafetaulaki kia Asa o ne behe kiate ia, E Asa, mo Juta kotoabe, mo Benijimani, mou fanogo kiate au. Oku iate kimoutolu a Jihova, lolotoga oku mou iate ia; bea kabau oku mou kumi kiate ia, te ne tuku ke mou ilo ia; bea kabau oku mou liaki ia, te ne liaki akimoutolu.

3 Bea koeni, kuo nofo fuoloa a Isileli o majiva Otua mooni, bea majiva taulaeiki ke akonaki, bea majiva fono.

4 Ka i he nau tafoki i he e nau mamahi kia Jihova koe Otua o Isileli, o nau kumi ia, nae ilo ia ekinautolu.

5 Bea i he gaahi kuoga koia nae ikai ha fiemalie kiate ia nae alu kituaa, be kiate ia nae ha‘u ki loto, ka nae i he kakai kotoabe oe gaahi fonua ae gaahi mamahi lahi.

6 Bea nae fakaauha ae buleaga e taha e he buleaga e taha, moe kolo ae kolo: he nae fakamamahi akinautolu e he Otua i he gaahi mea mamahi kotoabe.

7 Koia ke mou malohi, bea oua naa tuku ke vaivai ho mou nima: he ko hoo mou gaue e totogi ia.

8 Bea i he fanogo e Asa ki he gaahi lea ni, moe akonaki a Oteti koe balofita, naa ne fiemalie ai, bea tukuage leva eia ae gaahi otua loi moe kovi lahi, mei he fonua kotoabe o Juta mo Benijimani, bea mei he gaahi kolo naa ne toki ma‘u, bea mei he mouga ko Ifalemi, bea ne fakafoou ae feilaulauaga o Jihova, aia nae i he mata oe fale hala o Jihova.

9 Bea ne fakataha a Juta kotoabe mo Benijimani, fakataha moe kau muli mei a Ifalemi mo Manase, bea mei a Simione: he nae ha‘u ae toko lahi kiate ia mei Isileli, i he e nau mamata oku iate ia a Jihova ko hono Otua.

10 Koia naa nau fakakatoa ai akinautolu i Jelusalema, i hono tolu oe mahina, i hono hogofulu ma nima oe ta‘u oe bule a Asa.

11 Bea naa nau atu kia Jihova i he kuoga koia, i he vete naa nau fetuku, koe faga bulu e fitugeau moe faga sibi e fitu afe.

12 Bea naa nau alea fakataha o fai ae fuakava ke nau kumi kia Jihova koe Otua oe nau gaahi tamai aki ho nau loto kotoa mo ho nau laumalie kotoa:

13 O behe, ke iloga ia e ikai loto ke kumi kia Jihova koe Otua o Isileli ke tamate‘i ia, ko ha jii ia be koe lahi, koe tagata ia be koe fefine.

14 Bea naa nau fuakava kia Jihova i he le‘o lahi, bea i he mavava, moe gaahi mealea, bea moe gaahi mea ifi.

15 Bea nae fiefia a Juta kotoabe i he fuakava: he naa nau fuakava aki ho nau loto kotoa, mo nau kumi kiate ia i he e nau holi kotoa: bea nae ha mai ia kiate kinautolu: bea nae foaki e Jihova kiate kinautolu ae fiemalie mei he botu kotoabe.

¶ 16 Bea koe mea kia Meaka koe fa‘e a Asa koe tu‘i, naa ne liua ia ke oua naa bule ia, koe mea i he ene gaohi ae otua loi i he vao tabu: bea nae ta hifo e Asa hono otua loi, bea nae laiki ia, bea tutu ia i he vee vaitafe ko Kitiloni.

17 Ka nae ikai hiki ae gaahi botu maoluga mei Isileli: ka koe mooni nae agatotonu ae loto o Asa i hono gaahi aho kotoabe.

¶ 18 Bea nae fetuku eia ki he fale oe Otua ae gaahi mea nae fakatabu‘i e he ene tamai, moe mea naa ne fakatabu‘i eia, ae siliva, moe koula, moe gaahi ibu.

19 Bea nae ikai ha tau o a‘u ki he ta‘u e tolugofulu ma nima oe bule o Asa.