Vahe 6
Ko Hono Poupouʻi ʻo Kinautolu ʻoku Poupouʻi ʻe he ʻEikí
ʻOku fili hotau kau takí ʻe he ʻEikí, pea ʻokú Ne ʻamanaki mai ke tau poupouʻi kinautolu ʻi he lea mo e ngāue.
Mei he Moʻui ʻa Siaosi ʻAlipate Sāmitá
Naʻe hikinimaʻi ʻa Siaosi ʻAlipate Sāmita ko e Palesiteni ʻo e Siasí ʻi he konifelenisi lahi ʻi ʻOkatopa 1945. ʻI he ofi ki he fakaʻosinga ʻo e konifelenisí, naʻe fakahā ʻe Palesiteni Sāmita ʻene houngaʻia ʻi he hikinima ʻa e Kāingalotú ʻo poupou kiate iá: “ ʻE hoku ngaahi tokoua mo e tuofāfine, ʻoku ou fakamālō atu ʻi he falala kuo mou fakahaá, ʻi hoʻomou ʻamanaki te u lavaʻi lelei e ngāué, mo e palōmesi ʻa homou niʻihi te mou tokoniʻi au ke u lavaʻi iá, he ko e tangata pē au, ko e taha ʻo e kau tangata māʻulalo taha ʻi homou lotolotongá, ka kuo uiuiʻi au ki he ngāué ni—pea naʻe ʻikai ke u mei ʻi heni kapau naʻe ʻikai ke u ʻiloʻi kuo uiuiʻi au—ʻi he mafai ʻo ʻetau Tamai Hēvaní.”
Naʻá ne fai leva ʻa e kolé ni: “Te u fie maʻu e tokoni ʻa e tangata mo e fefine mo e fānau kotoa pē, ʻo ʻikai ke tāpuekina au, ka ke tāpuekina ʻa kimoutolu, pea ki hono tāpuekina ʻo e fānau ʻa e tangatá ʻi ha feituʻu pē ʻoku nau ʻi ai. ʻOku ʻikai ko e fatongia ia ʻoʻoku, ko hotau fatongia.”1
Hangē ko ia ʻoku fakahaaʻi ʻe he ngaahi akonaki he vahe ko ʻení, naʻe mahino kia Siaosi ʻAlipate Sāmita ʻa e ngaahi kavenga mafatukituki ʻoku fua ʻe he Kau Palesitenisī ʻUluakí kimuʻa pē ia pea toki hoko ko e Palesiteni ʻo e Siasí. Naʻá ne akonaki ki he Kāingalotú ʻe lava ke tokoni ʻenau faitotonú mo e faivelengá ke faingofua e ngaahi kavenga ko iá, pea naʻá ne hoko ko e sīpinga ʻo e tefitoʻi moʻoni ko ʻení lolotonga ʻene ngāue ʻi he Kōlomu ʻo e Kau ʻAposetolo ʻe Toko Hongofulu Mā Uá.
Lolotonga hono tataki ʻe Palesiteni Sāmita ha fakatahaʻanga ʻo e konifelenisi lahi he 1946, naʻá ne kamata hono hikinimaʻi ʻo e kau ʻōfisa ʻo e Siasí ʻaki hono fakamatalaʻi ʻoku ʻikai ko ha meʻa noaʻia pē ia: “ ʻI he taimi ní ʻoku ʻi ai haʻatau pisinisi ʻe taha ʻoku angamaheni ʻaki pē ʻi he ngaahi Konifelenisí ni; ʻa ia ko hono fakahā ʻo e Kau Taki Māʻolunga ʻo e Siasí ke hikinimaʻi ʻe he kakaí. ʻOku ou ʻamanaki pē te mou ʻiloʻi kotoa ko ha faingamālie toputapu ʻeni. … He ʻikai ko ha fakaʻilonga pē ka ko hano fakahā te mou fakahoko hoʻomou konga ʻo e ngāué fakataha mo e tokoni ʻa e ʻEikí.”2 [Vakai, fokotuʻu 1 he peesi 70.]
Ngaahi Akonaki ʻa Siaosi ʻAlipate Sāmitá
ʻOku teuteuʻi, fili, pea ueʻi ʻe he ʻEikí ʻa kinautolu ʻoku nau puleʻi ʻa e Siasí.
Kuo tokangaʻi e Siasi maʻongoʻongá ni ʻe ha kau tangata kuo teuteuʻi makehe, akoʻi makehe, fakanāunau makehe ki he tuʻunga fakaʻeiʻeiki ko ia kuo foaki ki he tokotaha takitaha ʻi heʻene fetongi iá. Kuo tuku ʻe heʻetau Tamai Hēvaní ʻi heʻene fakakaukau potó ke takatakaiʻi ʻa e kau taki ko ʻeni ʻo ʻIsilelí ʻe ha niʻihi ʻoku maʻu ʻa e tui tatau mo kinautolu pea ʻikai ke fakahā ʻa e fakaʻapaʻapa ki he fakafoʻituituí koeʻuhi ko hono ʻulungāangá pe tuʻunga fakafoʻituitui ko e palesiteni ʻo e Siasí, ka ʻoku nau ʻiloʻi ko e tokotaha lea ia ʻa ʻetau Tamai Hēvaní pea nau poupou mo pukepuke hake mo lotua, pea ʻofeina ia, koeʻuhí ke nau maʻu foki ʻe kinautolu ʻa e ngaahi tāpuaki ʻa ʻetau Tamai Hēvaní.
ʻOku ʻikai mo ha toe kautaha hangē ko ʻení ʻi māmani. ʻOku ʻikai mo ha toe kakai [ʻoku] tataki ʻo hangē ko hono tataki ʻo e kakaí ni. ʻOku moʻoni ʻa e pehē ko ia ko ha kakai faitotonu ʻoku nau pulé. ʻE fakahoko ʻe heʻetau Tamai Hēvaní ʻa ʻene ngāué ʻo fakafou ʻiate kinautolu. Kuo pau ke akoʻi ʻa e ongoongoleleí ʻo fakafou ʻiate kinautolu. … ʻOku ʻikai ko e pule ʻa e tangata ko ia ʻokú ne tokangaʻi kitautolu he ʻaho ní koeʻuhi ko hono poto fakanatulá. ʻOku ʻikai ko ʻene takí koeʻuhi ko e foha ia ʻo ha houʻeiki, ka ʻoku ʻi he tuʻunga ʻokú ne maʻú koeʻuhi ʻoku ʻafioʻi ʻe heʻetau Tamai ʻi hēvaní ʻa e fakaʻeiʻeiki ʻa hono laumālié. ʻI heʻene ʻafioʻi ʻa e loto vilitaki ʻoku maʻu ʻe he tokotahá ni ke ne ʻave ʻa e pōpoakí ni ki he ngaaahi puleʻanga kotoa ʻo e māmaní, naʻá ne teuteuʻi ia ki he uiuiʻi māʻolunga kuo fakanofo ia ki aí. ʻOkú ne pule ko e fakafofonga ʻo ʻetau Tamai Hēvaní.3
Ne u fakakaukau he ʻahó ni ki he kau tangata loto-fakatōkilalo kae maʻongoʻonga kuo nau tataki ʻa e Siasí ni mei he taimi naʻe fokotuʻu aí. … Kuó u maheni lelei mo e [tokolahi ʻo e] kau Palesiteni [ʻo e Siasí] peá u tui ko ha kau tangata kotoa kinautolu ʻa e ʻOtuá. ʻOku ʻikai ke tau fakakaukau atu ʻe fili ʻe heʻetau Tamai Hēvaní ha toe faʻahinga kakai ke puleʻi hono Siasí.4
Ko e hā e meʻa naʻe hoko ʻi he pekia ʻa [Siosefa Sāmitá]? … Naʻe ʻikai ke fai ha fakataha [ʻa e Kāingalotú], fili ha tangata ke sea mo fili ha taki foʻou. Kuo ʻosi fili ʻa e takí ʻe he ʻEikí. Ko e mēmipa fuoloa taha ia ʻo e Kōlomu ʻo e Toko Hongofulu Mā Uá, ʻa Pilikihami ʻIongi. … Naʻe hikinimaʻi ia ʻe he Siasi fakakātoa ʻi heʻene ngaahi fakatahaʻangá ko e Palesiteni. ʻI heʻene pekiá, naʻe ʻikai pehē ʻe hono ongo tokoní ko kinaua ʻe Palesitení, ka naʻe puleʻi ia ʻe he Kōlomu ʻo e Toko Hongofulu Mā Uá ʻi ha taimi lōloa, hili iá naʻe hikinimaʻi leva hono mēmipa fuoloa tahá ko e Palesiteni ʻo e Siasí. Naʻe kei maau pē ʻa e fokotuʻutuʻú. …
Ne u fakatotoloʻi e niʻihi ʻo e ngaahi meʻá ni ke ʻoua naʻa ʻi ai ha fehālaaki. Naʻe ʻikai fili pē ʻe Siosefa Sāmita ia ke hoko ko e Palesiteni ʻo e Siasí. Pea naʻe ʻikai pehē mo ha taha naʻe hoko atu aí. … Ko e filí ia naʻe fai ʻe heʻetau Tamai Hēvaní ʻo fakafou ʻi Heʻene ueʻi fakalaumālié, pea ʻe maʻu ʻe he tangatá ʻa e mālohi kotoa ko ia ʻoku ō fakataha mo ha lakanga.5
ʻOku totonu ke tau fakamālō hono ʻiloʻi ʻoku ʻikai ko ha ngāue ʻeni ʻa ha tangata, ka ko e ngāue ʻa e ʻEikí; ʻoku ui ʻaki ʻa e Siasí ni ʻa e huafa ʻo Sīsū Kalaisí, ʻokú ne tataki ia, pea he ʻikai te ne fakangofua ha tangata pe kau tangata ke fakaʻauha ia. He ʻikai te ne fakangofua ʻa e kau tangata ʻoku nau puleʻi hono Siasí ke takihalaʻi e kakaí, ka te ne poupouʻi kinautolu ʻaki hono māfimafí. Te ne fakaongoongoleleiʻi kinautolu ʻi he ʻao ʻo e kau tangata mo e kau fefine lelei mo maʻongoʻonga. Te ne tāpuekina ʻenau ngāué pea ʻe fonu lavameʻa ia. Ko kinautolu ʻoku fakafepaki mo fakaangá he ʻikai ke nau fiefia ʻi heʻenau fakafepakí. Ko kinautolu ʻoku nau fakaanga mo feinga ke fakaʻauha e ivi tākiekina ʻo e kau taki ʻo e Siasí, ʻe hoko kiate kinautolu ʻa e nunuʻa ʻo ʻenau fai-halá.6
ʻOku fie maʻu ke tau fakafetaʻi ʻi hotau lotó ʻoku tataki kitautolu ʻe he kau tangata māʻoniʻoni ʻoku ueʻi ʻe heʻetau Tamai ʻi hēvaní ke akoʻi kitautolu ʻi he ʻaho ki he ʻaho.7 [Vakai, fokotuʻu hono 2 he peesi 70.]
ʻOku akoʻi ʻe he ʻEikí kiate kitautolu ʻa e hala ki he fiefiá mo e malú ʻo fakafou ʻi Heʻene kau tamaioʻeikí.
Talu pē mei he kuonga ʻo ʻetau tamai ko ʻĀtamá ʻo aʻu mai ki he lolotongá ni mo e naʻinaʻi ʻa e ʻEikí ki hono kakaí ʻo fakafou ʻi heʻene kau tamaioʻeikí. Naʻá ne ueʻi kinautolu ki ha tuʻunga moʻui lelei ange ʻi heʻenau fakafanongo kiate iá, pea kuó ne fekauʻi mai ki māmani ha kau tangata māʻoniʻoni mei he kuonga ki he kuonga ʻo fakatatau mo e fie maʻu ʻe heʻene fānaú, ke nau ʻomai ʻa e fakahinohino fekauʻaki mo e fiefiá, ueʻi kinautolu ke nau akoʻi ʻa e ngaahi moʻoni nāunauʻia ʻokú ne hakeakiʻi mo fakakoloaʻi ʻa e faʻahinga ʻo e tangatá.8
ʻOku ʻikai ke u ʻilo ha meʻa mahuʻinga lahi kuo hoko ʻi he māmaní kuo teʻeki faleʻi ʻe he ʻEikí ʻa e kakaí kimuʻa fekauʻaki mo ia ʻo fakafou ʻi heʻene kau palōfitá, koeʻuhí ke ʻoua naʻa nau taʻeʻilo ki he meʻa ʻe hokó, kae lava ke nau palani ʻenau moʻuí pea ʻe lelei kiate kinautolu ʻo kapau te nau fai ia. …
Hangē ko ia ko Noá. Naʻe fekau ʻe he ʻEikí ke ne foʻu ha vaka ke fakahaofi ai ʻa e kakai anga māʻoniʻoní mei he lōmaki ʻe hokó. Naʻe foʻu ʻe Noa ʻa e ʻaʻaké pea malanga ki hono toʻu tangatá ʻi he taʻu ʻe teau uofulu ke nau fakatomala, ʻo fakahoko ai ʻa e fakatokanga kakato kiate kinautolu. Ka naʻe fuʻu faiangahala ʻa e kakaí ʻo ʻikai ke nau tokanga ki he fakatokangá. Naʻa nau tauʻatāina pē ke fili, ʻo nau fili ki he koví kae ʻikai ki he māʻoniʻoní. Ne tō e ʻuhá, pea hoko mo e lōmakí, pea ko Noa pē mo hono fāmilí ko e toko valu naʻe haó. Naʻe ʻosi fakatokanga kakato ki he kakai kotoa pē, ka ʻi heʻenau fai pē honau lotó mo ʻenau taʻefie fakatomalá, naʻa nau melemo. [Vakai, Mōsese 8:13–30.]9
Ko e finangalo ʻo e ʻEikí ke tau fiefia. Ko hono ʻuhinga ia ʻene ʻomai ʻa e ongoongolelei ʻo Sīsū Kalaisí. Ko hono ʻuhinga ia ʻene foaki ʻa e lakanga fakataulaʻeikí kiate kitautolú. Ko hono finangaló ke tau maʻu ʻa e fiefiá. Ko hono ʻuhinga ia naʻá ne fokotuʻu ai ʻa e siasí ni pea tuku ʻi ai ʻa e ngaahi lakanga kehekehe, pea ʻoku maau ʻa e ngaahi meʻá ni kotoa. … Kapau te ke muimui ʻi he tataki ʻa e ʻEikí, mo kinautolu ʻoku poupouʻi ʻe he ʻEikí, he ʻikai te ke hē atu ki he fakapoʻulí, mole ʻa e māmá meiate koe, maumauʻi e ngaahi fono ʻa e ʻOtuá, mo tuku ange ke mole ho ngaahi faingamālie ʻokú ne tokanga mai ke tau maʻu hono kotoá.10
ʻOku taha pē ʻa e hala ki he nofo malú kiate au he ʻahó ni ʻa ia ko e muimui ʻiate kinautolu kuo fili ʻe he ʻEikí ke nau takí. ʻE ʻi ai pē ʻeku ngaahi fakakaukau, pea ʻi ai ʻeku ngaahi fili fekauʻaki mo ha ngaahi meʻa, ka ʻoku ou ʻiloʻi ko e taimi pē ʻe fepaki ai ʻeku filí mo e ngaahi akonaki ʻanautolu kuo tuku mai ʻe he ʻEikí ke fakahinohino ʻa e halá, ʻoku totonu leva ke liliu ʻeku foungá. Kapau ʻoku ou fie maʻu ʻa e fakamoʻuí te u muimui ʻi he kau taki kuo tuku mai ʻe heʻetau Tamai Hēvaní kiate kitautolú, lolotonga ʻokú Ne poupouʻi kinautolu.11 [Vakai, fokotuʻu hono 3 he peesi 70.]
ʻOku poupouʻi mo maluʻi ʻe kinautolu ʻoku loto-fakatōkilalo mo faivelengá ʻa e kau tamaioʻeiki ʻa e ʻEikí.
Kuó u ʻilo e kau mēmipa ʻe lauiafe ʻo e ngaahi houalotu ʻo e Siasi maʻongoʻonga ko ʻení, ʻa e kakai tangata mo fefine ʻo ha ngaahi puleʻanga lahi kuo nau tali ʻa e ongoongoleleí ʻi he loto-fakatōkilalo mo e faivelenga ke kau fakataha mo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. … Kuo [nau] lotua mo poupouʻi honau kau takí … , pea lolotonga ʻeku ngāue ʻi he Siasí, kuo teʻeki ai ke u ʻilo ha taha kuó ne tauhi ki he ngaahi fekau ʻa e ʻEikí kuó ne hiki hake hono leʻó ʻo fakafepaki kiate kinautolu naʻe uiuiʻi ke puleʻi ʻa e Siasí ni. Ko ha meʻa fakaofo moʻoni ia. …
Ko e taha ʻo e ngaahi fakamoʻoni maʻongoʻonga taha kiate au ʻo e faka-ʻOtua ʻo e ngāué ni ko ha kakai tokolahi … kuo nau maʻu ʻa e faingamālie ʻi he Konifelenisi Fakasiteikí … ke fakahā honau lotó ʻaki ʻenau hikinima ke poupouʻi pe taʻepoupou kiate kinautolu ʻoku puleʻi kinautolú (ʻoku fakaʻaongaʻi ʻe he tokotaha kotoa pē ʻa e tauʻatāina ke filí) ʻoku kei hokohoko atu pē ʻenau poupou ki honau kau takí. Ko e moʻoni ʻoku ueʻi ʻe he Laumālie ʻo e ʻEikí ʻa e kakai faivelenga mo loto-fakatōkilaló ke poupou ki heʻene kau tamaioʻeiki kuo filí.12
ʻI hono tataki ʻe Mōsese ʻa ʻIsileli mei ʻIsipite ʻo fou atu ʻi he maomaonganoá ki he fonua ʻo e talaʻofá, naʻe ʻohofi ʻe ʻAmaleki ʻa ʻIsileli ʻi Lefitimi. Naʻe fakahinohino ʻe Mōsese ʻa Sosiua ke ne fili ha kau tangata tau ke maluʻi ʻa ʻIsileli. Naʻe ʻalu hake ʻa Mōsese, ʻĒlone, mo Hua ki he tumuʻaki ʻo e moʻunga naʻe hanga hifo ki he malaʻe taú. ʻI he hiki ki ʻolunga ʻe Mōsese ʻa e tokotoko ʻo e ʻOtuá, naʻe mālohi ʻa ʻIsileli, pea ko ʻene vaivai pē ʻo tuku hifo hono ongo nimá ki lalo, naʻe mālohi ʻa ʻAmaleki. Naʻe ʻomi ha fuʻu maka ke ne tangutu ai pea pukepuke hake hono ongo nimá ʻe ʻĒlone mo Hua ke tafe mai ʻa e ngaahi tāpuaki ʻa e ʻOtuá ki ʻIsileli ke mālohi ʻenau kau taú pea naʻe ikuna e taú. Naʻe ʻia Mōsese ʻa e mālohi ʻo e ʻOtuá pea naʻe ʻiate ia kae ʻoua kuo ʻosi ʻene ngāué. [Vakai, ʻEkesōtosi 17:8–13.] Naʻe tāpuakiʻi foki ʻa e kakaí ʻi he taimi naʻa nau poupou ai kiate iá, pea naʻe hoko pehē ki he tamaioʻeiki kotoa pē ʻa e ʻEikí naʻe pule ki ʻIsileli. …
… Ko e hā pē fuoloa hono puleʻi [ʻe he Palesitení] ʻa e Siasí ni, ʻoku ʻikai mahuʻinga ia pe ko e taʻu ʻe fiha, ʻe foaki ʻe heʻetau Tamai Hēvani kiate ia ʻa e ivi, mālohi, poto, fakakaukau lelei, mo e ueʻi fakalaumālie ke ne lea ki ʻIsileli ʻo fakatatau mo hono fie maʻú. Kuo pau ke tau hangē ko ʻĒlone pea mo Hua ʻo e kuonga muʻá ʻi he muimui ki heʻene tatakí; kuo pau ke tau hiki hake hono ongo nimá kae ʻohifo ʻe he ʻEikí ʻa e ngaahi tāpuaki ʻo e langí kiate kitautolu mo e kakaí ni ʻo fakafou mai ʻiate ia.13
ʻOku ou ʻiloʻi ko e kau tangatá ni [ʻa e Kau Taki Māʻolungá] ko e kau tamaioʻeiki kinautolu ʻa e ʻEikí, pea ʻoku ou ʻilo ʻoku nau feinga ke faitāpuekina ʻa e faʻahinga ʻo e tangatá. ʻOku ou ʻamanaki pē he ʻikai hamou taha … te ne taʻepoupouʻi kinautolu, ʻo ʻikai ʻi hoʻomou tuí mo e ngaahi lotú pē ka kapau ʻe fakafofongaʻi hala kinautolu pea ʻave halaʻi mo honau ʻulungāangá, ke mou maluʻi kinautolu ʻo ka fie maʻu, he ʻe ʻi ai e taimi ʻe hoko mai te nau fie maʻu ai hoʻomou maluʻí. Kuo ʻikai ngalo kinautolu ʻi he Filí, pea ko e taha ʻo e ngaahi fakamoʻoni kiate au ʻo e faka-ʻOtua ʻo e uiuiʻi ʻo e kau tangatá ni ko e lea kovi ʻa e kakai koví kau kiate kinautolu, pea lea lelei ʻa e kakai tangata mo e kakai fefine leleí ʻo kau kiate kinautolu.14 [Vakai, fokotuʻu hono 4 he peesi 70.]
ʻI he taimi ʻoku tau fakaangaʻi ai hotau kau takí pe taʻetokanga ki heʻenau faleʻí, ʻoku tau tuku ke taki atu kitautolu ʻe he filí ke tau hē.
ʻOku ʻi ai ha niʻihi ʻiate kitautolu … kuo fakakuihi ʻe he ngaahi fakaʻuhinga mo e ngaahi fakakaukau fakavalevale ʻa e tangatá. ʻOku ʻi ai e niʻihi ʻoku nau siʻaki ʻa e faleʻi mo e akonaki ʻa e tangata kuo fokotuʻu ʻe he ʻOtuá ʻi he ʻulu ʻo e Siasí ni. …
ʻOku fakafokifā ha maʻu ʻe he kakai ʻoku ʻikai ke nau ʻilo ha meʻa lahí ha foʻi fakakaukau, pea nau fokotuʻu mai “ko e foungá ʻeni” pe “ko e foungá ʻena,” pea neongo ʻene fepaki mo e faleʻi ʻa e ʻEikí ʻoku fakalotoa e niʻihi ia ke nau ʻahiʻahiʻi. Kuo foaki mai ʻe he ʻEikí ha faleʻi ʻoku malu pea fakamafaiʻi ʻa e Palesiteni ʻo hono Siasí ke ne fakaʻuhingaʻi ʻa e faleʻi ko iá. Ka ʻikai ke tau tokanga ki he faleʻi ʻokú ne ʻomaí ʻi heʻene hoko ko e Palesiteni ʻo e Siasí, te tau toki ʻiloʻi kuo tau fai ha fehālaaki lahi.15
Ko e Kau Palesitenisī ʻo e Siāsí … ʻa e kau fakafofonga ʻo ʻetau Tamai Hēvaní, ʻo ʻikai ki he kakaí ni pē, ka ʻoku nau fakafofongaʻi ia ki he kakai kotoa pē ʻo e māmaní. ʻE lelei kapau te tau fakalāngilangiʻi mo fakaʻapaʻapaʻi ʻa e kau tangata ko ʻení kuó ne fokotuʻu ko hotau kau takí. ʻOku ʻi ai e ngaahi vaivai fakaetangata ʻo e kau tangatá ni, ʻe ʻi ai ʻenau ngaahi fehālaaki, ka kapau te tau angaʻofa ki he ngaahi fehālaaki ʻoku nau faí ʻo hangē ko ʻetau fai ki heʻetau ngaahi tōnounoú mo e fehālākí, te tau vakai ki honau ngaahi ʻulungāanga leleí ʻo hangē ko ʻetau sio ki haʻatautolú.
ʻE ngaahi tokoua mo e tuofāfine, ʻoku ou tuʻu hení ke kole atu kiate kimoutolu ke ʻoua naʻa tuku ke ʻalu atu mei homou ngutú ʻa e ngaahi lea fakaangá pe taʻeʻofá ʻo kau kiate kinautolu kuo uiuiʻi ʻe he ʻEikí ke tataki kitautolú. ʻOua naʻa mou takanga mo e kakai te nau tuku hifo kinautolu pe fakavaivaiʻi honau ivi takiekiná ʻi he lotolotonga ʻo e fānau ʻa e tangatá. Ka mou fai ia, ʻoku ou talaatu ʻe maʻu kimoutolu ʻe he mālohi ʻo e filí. Te ne tākiekina kimoutolu ke mou mamaʻo ʻaupito mei he hala ʻo e moʻoní, pea kapau he ʻikai ke mou fakatomala te mou toki ʻiloʻi tōmui kuo mole meiate kimoutolu ʻa e “mataʻitofe mahuʻingá.” Koeʻuhi ko hoʻomou siokitá mo hoʻomou kuí ʻe tataki atu ʻa kimoutolu, pea ʻe mamahi homou ngaahi ʻofaʻangá … ʻi he tafaʻaki ʻe taha ʻo e veilí ko e tupu mei hoʻomou vaivaí mo hoʻomou valé.16 [Vakai, fokotuʻu hono 5 he peesi 71.]
ʻOku ʻikai mohe ʻa e filí. ʻOkú ne lohiakiʻi ʻa e tokolahi pea taki ʻa kinautolu ke faiangahala. … ʻOku ʻi ai ha niʻihi ʻoku nau akoʻi ʻa e ngaahi tokāteline hala; pea feinga mo e niʻihi ke fakalotoʻi ʻa e kakai tangatá mo e kakai fefiné ke maumauʻi e ngaahi fekau ʻa ʻetau Tamai Hēvaní. … Kapau ʻe kiʻi tuʻu siʻi hifo ʻa e kāingalotu ʻo e Siasí ni ʻoku nau kumi e fehālaaki ʻa e kau taki ʻo e Siasí mo fakaangaʻi ʻa kinautolu ʻoku foaki ʻenau moʻuí ke tau monūʻia mo maʻu ai ʻetau leleí, ʻo fehuʻi ʻi he faʻa lotu, “Ko e fē he kau faiakó ni ʻoku malu ke muimui aí?” he ʻikai faingataʻa ke nau ʻiloʻi ʻa e hala totonú pea te nau poupouʻi ʻa kinautolu ʻoku poupouʻi ʻe he ʻEikí.17
ʻI heʻetau poupouʻi hotau kau takí, ʻoku tau tukupā ke muimui ʻi heʻenau faleʻí pea fua totonu hotau ngaahi uiuiʻi ʻotautolú.
Kuo pau pē ko ha maʻuʻanga ivi ki he Palesiteni ʻo e Siasí ni ke vakai atu ki he fofonga ʻo e kau tangata mo e kau fefine faitotonu ʻe toko lauiafe mo ʻenau hiki honau nimá ko e fuakava mo ʻetau Tamai ʻi hēvaní, ʻo hikinimaʻi ia ʻi he lakanga kuo uiuiʻi ia ki aí, ko e palesiteni ʻo e Siasi maʻongoʻongá ni. Ko ha tufakanga mātuʻaki toputapu ʻoku tau fakahoko ʻi heʻetau hiki hotau nimá ʻi he ngaahi tūkunga peheé. ʻOku ʻikai ʻuhinga ia ko ʻene ʻosi pē pea tau ō mo e loto-fiemālie ʻe tataki ʻe he palōfita ʻa e ʻEikí ʻa e ngāué ni, ka ʻoku ʻuhinga, —kapau ʻoku mahino kiate au ʻa e tufakanga ʻoku ou toʻo kiate au ʻi he hiki hoku nimá—te tau poupou kiate ia; te tau lotua ia; te tau maluʻi hono hingoa ongoongo leleí, pea te tau feinga ke fakahoko ʻene ngaahi fakahinohinó ʻo fakatatau mo hono tataki ia ʻe he ʻEikí ke ʻomi e ngaahi fakahinohinó kiate kitautolu lolotonga ʻene ʻi he lakanga ko iá.18
ʻI he taimi ʻoku ou fakakaukau ai ki he ngaahi kavenga ʻoku fuesia ʻe he Palesiteni ʻo e Siasí ni mo hono ongo tokoní, peá u ʻiloʻi ʻa e ngaahi fatongia ʻoku hilifaki ʻi honau umá, ʻoku ou fakaʻamu ange ʻe au ʻaki hoku lotó kotoa ke tokoni kiate kinautolu, ke ʻoua naʻá ku hoko ko ha fakakavenga, ka ʻi he lakanga kuo uiuiʻi au ki aí, fakataha mo kimoutolu hoku ngaahi tokoua mo e tuofāfine, ke tau takitaha tuʻu ʻi hotau tuʻunga ʻo fakahoko ʻetau konga ʻo e ngāué pea fua totonu hotau uiuiʻí ko e fakaʻapaʻapa mo e fakalāngilangiʻi ʻo e ʻOtuá.19 [Vakai, fokotuʻu hono 4 he peesi 70.]
Ko e finangalo ʻo e ʻOtuá kiate kitautolu kuo hulu fau hotau ngaahi tāpuakí ke tau hiki hake ʻa e ongo nima ʻo e tamaioʻeiki ʻa e ʻEikí ʻokú ne puleʻi kitautolú; ʻo ʻikai ke tau tokoni ʻaki ʻetau tuí pē mo ʻetau ngaahi lotú ka ʻi he angaʻofa ʻi he faingamālie ʻe maʻú; ke tau laka atu mo muimui ʻi heʻene ngaahi fakahinohinó lolotonga ʻoku kei hokohoko atu hono poupouʻi ia ʻe he ʻOtuá ko e Palesiteni ʻo e Siasí, ko e palōfita ʻa e ʻEikí ʻi he ngaahi ʻaho kimui ní.20
Tau poupouʻi ʻa e kau tangata ko ʻeni kuo fokotuʻu hake ʻe he ʻOtuá ke tokangaʻi kitautolú. Tau fakamonūʻiaʻi kinautolu, ʻo ʻikai ʻi he lea pē, ka ʻi heʻetau tokoni ʻi he founga kotoa pē ʻe lava ke fataki ʻa e kavenga ko ʻeni ʻoku mafatukituki ʻi honau umá. … Lotua pea fakamonū mo tokoniʻi kinautolu.21
Ngaahi Fokotuʻu ki hono Ako mo Akoʻí
Fakakaukauʻi e ngaahi fakakaukau ko ʻení ʻi hoʻo ako e vahé pe teuteu ke akoʻí. Ki ha toe tokoni makehe, vakai ki he peesi vii–ix.
-
Lau ʻa e palakalafi fakaʻosi ʻo e “Mei he Moʻui ʻa Siaosi ʻAlipate Sāmitá” (peesi 62). Ko e hā “hoʻo konga ʻo e ngāuéʻ? ʻI hoʻo ako e vahe ko ʻení, fakakaukau angé ki he ngaahi founga te ke lava ʻo fakahaaʻi ʻaki hoʻo leá mo hoʻo ngāué ʻokú ke poupouʻi e kau taki ʻo e Siasí.
-
Toe fakamanatu e konga ʻuluaki ʻo e ngaahi akonakí (peesi 62–63), fakatautefito ki he palakalafi uá mo e faá. ʻOku kehe fēfē ʻa e founga fili ʻe he ʻEikí ʻa e kau takí mei he founga ʻa māmaní? Ko e hā ha ngaahi meʻa kuó ke aʻusia ʻo ne fakamālohia hoʻo tui ʻoku fili ʻetau kau takí ʻe he ʻEikí?
-
Ako ʻa e konga ʻoku kamata ʻi he peesi 64 pea lau ʻa e Tokāteline mo e Ngaahi Fuakava 21:4–7. Ko e hā e faleʻi pau kuo foaki ʻe he ʻEikí ʻo fakafou mai ʻi he Palesiteni lolotonga ʻo e Siasí? ʻo fakafou mai ʻi hoʻo palesiteni fakasiteiki pe fakavahefonuá? ʻo fakafou mai ʻi hoʻo pīsopé pe palesiteni fakakoló? Ko e hā ha ngaahi tāpuaki kuó ke maʻu ʻi hoʻo muimui ʻi he faleʻi ko ʻení?
-
Toe fakamanatu ʻa e konga ʻoku kamata ʻi he peesi 65 pea lau kakato ʻa e ongo ʻuluaki palakalafi he peesi 67. Ko e hā ʻene ʻuhinga kiate koe ke poupouʻi e kau taki ʻo e Siasí? ʻOku fakamālohia fēfē ʻe heʻetau poupouʻi ʻo e kau taki ʻo e Siasí ʻa hotau fāmilí mo e ʻapí?
-
Lau ʻa e palakalafi kakato he peesi 67–68. Ko e hā ʻoku fakatuʻutāmaki ai ke fakaangaʻi e kau taki ʻo e Siasí? Ko e hā ha founga lelei ke fakahoko ʻo ka fakaangaʻi ʻe ha taha ha taha ʻo homou kau taki fakalotofonuá?
Ngaahi Potufolofola Fekauʻakí: ʻĀmosi 3:7; ʻEfesō 4:11–14; Hepelū 5:4; Tokāteline mo e Ngaahi Fuakava 84:109–10; 107:22; 112:20
Tokoni fakafaiakó: Ko e founga ʻe taha ke fakaʻaiʻai ai ʻa e ako fakamātoató ko e ako ke fakafanongo lelei ʻi he taimi ʻoku fai ai ʻe ha taha ha fehuʻi pe fakamatala. “Ko e fakafanongó ko hano fakahaaʻi ia ʻo e ʻofá. ʻOku faʻa fie maʻu ki ai ha feilaulau. ʻI he taimi ʻoku tau fakafanongo lelei ai ki he niʻihi kehé, ʻoku tau faʻa tuku ai e meʻa ʻoku tau fie lea ʻakí kae lava ke nau fakamatalaʻi lelei ʻa e meʻa ʻoku nau fie lea ʻakí” (ʻOku ʻIkai ha Ui ʻe Mahuʻinga Ange ʻi he Faiakó, 73).
“Ko e tangata pē au, ko e taha ʻo e kau tangata māʻulalo taha ʻi homou lotolotongá, ka kuo uiuiʻi au ki he ngāué ni … ʻi he mafai ʻo ʻetau Tamai Hēvaní.”
“Kuo pau … ke tau hangē ko ʻĒlone pea mo Hua ʻo e kuonga muʻá; kuo pau ke tau hiki hake e ongo nima [ʻo e palōfitá].”
ʻOku tau poupou ki hotau kau takí ʻi he taimi ʻoku tau “fai ʻetau konga ʻo e ngāué pea fua totonu hotau ngaahi uiuiʻí ko e fakaʻapaʻapa mo fakalāngilangiʻi ʻo e ʻOtuá.”