Vahe 4

Ko e Palōfita ko Siosefa Sāmitá, ko e Meʻangāue ʻa e ʻOtuá ʻi hono Toe Fakafoki Mai ʻo e Moʻoní

Naʻe fakafoki mai ʻe he ʻOtuá ʻa e ongoongolelei ʻo Sīsū Kalaisí ʻi hono tuʻunga haohaoá ʻi he Palōfita ko Siosefa Sāmitá.

Mei he Moʻui ʻa Siaosi ʻAlipate Sāmitá

ʻI he ofi ki hono fakamanatu ʻo e taʻu ʻe teau hono fāʻeleʻi ʻo e Palōfita ko Siosefa Sāmitá, naʻe fononga atu ʻa ʻEletā Siaosi ʻAlipate Sāmita mo Palesiteni Siosefa F. Sāmita mo ha niʻihi kehe ke ʻaʻahi ki he ngaahi feituʻu mahuʻinga ʻi he moʻui ʻa e Palōfitá. ʻI he pongipongi ʻo e ʻaho 23 ʻo Tīsema 1905, naʻe fakatapui ai ha maka fakamanatu ʻo Siosefa Sāmita ʻi Veamoniti. Naʻe ongoʻi ʻe Siaosi ʻAlipate Sāmita mo kinautolu naʻa nau ʻi aí ʻa ʻenau ʻi ha feituʻu mahuʻinga pehē naʻe toe Fakafoki mai ai ʻa e ongoongoleleí. Ko ʻene manatu ʻeni ki aí, “Ne tō noa pē homau loʻimatá. Naʻe ueʻi ʻe he Laumālié ʻa e loto ʻo e tokotaha kotoa pē ʻo mau ongoʻi loto fakatōkilalo, loto vaivai, pea mau fiefia ʻi he ngaahi tāpuaki ʻa ʻetau Tamai Hēvaní.”¹ Naʻe kole kia Siaosi ʻAlipate Sāmita ke ne fai ʻa e lotu tukú hili e ouau fakatapuí. ʻI he ʻosi ʻene fakamatalaʻi fakanounou ʻa e meʻa naʻe hoko he ʻahó ʻi heʻene tohi noá, naʻá ne tohi ʻo pehē, “Ko e fakaʻosinga ia e taha ʻo e ngaahi ʻaho mahuʻinga taha ʻo ʻeku moʻuí. ʻOku ou fakafetaʻi ʻi heʻeku hoko ko e taha ʻo hotau kakai tokosiʻi ke tokoni ʻi he ngāue ko ia kuo toki fakakakató.”²

Naʻa nau ō kimui ai ki he feituʻu naʻe hoko ai e ʻUluaki Mata Meʻa-Hā-Maí ʻi Palemaila, ʻi Niu ʻIoke. Ko e manatu ʻeni ʻa ʻEletā Sāmita ki aí: “Naʻa mau ō ki he vao ʻakau naʻe tūʻulutui ai ʻa Siosefa ʻo kole ki he ʻEikí ke fakahā mai pe ko e fē siasi naʻe totonu ke ne kau ki aí. Ne mau ongoʻi pē ke mau hivaʻi ʻi he feituʻu toputapu ko iá ʻa e himi … fakaʻofoʻofa ʻKo e Fua Lotu ʻa Siosefá.’”³

Hili ʻenau ʻaʻahi ki he Moʻunga Komolá, Temipale Ketilaní, mo e ngaahi feituʻu kehe naʻe fekauʻaki mo e misiona ʻo e Palōfitá, ne ui fakataha mai kinautolu ʻe Palesiteni Siosefa F. Sāmita ʻi he efiafi fakaʻosi ʻo ʻenau ʻaʻahí. “Hili hono hivaʻi ha ngaahi hiva lahi ʻo Saione, naʻe fakangofua ʻa e tokotaha kotoa pē ke ne fakamoʻoni ki he angalelei mo e ʻaloʻofa ʻa ʻetau Tamaí kiate kitautolú. Naʻe lilingi hifo e Laumālie ʻo e ʻEikí kiate kimautolu, pea naʻe tō homau loʻimatá ʻi he fiefia mo e nēkeneka.”⁴ [Vakai, fokotuʻu 1 he peesi 46.]

Hili mei ai ha ngaahi taʻu lahi, lolotonga e hoko ʻa Siaosi ʻAlipate Sāmita ko e Palesiteni ʻo e Siasí, naʻe pulusi ha ngaahi tohi ko e feinga ke fakaongoongokoviʻi ʻa Siosefa Sāmita. Naʻe taukapoʻi fefeka ʻe Palesiteni Sāmita ʻa e Palōfitá ʻi ha konifelenisi lahi ʻa e Siasí, ʻo ne fakamoʻoni ki hono misioná ʻi he ngaahi leá ni:

“Ko e lahi ʻo e ngaahi lelei mo e ngaahi tāpuaki kuó u maʻú naʻe fakafou mai ia ʻi he tangata naʻá ne foaki ʻene moʻuí koeʻuhi ko e ongoongolelei ʻo Sīsū Kalaisí. Naʻe tuku hifo ia ki lalo ʻe ha niʻihi, ka ʻoku ou fie talaatu, ko kinautolu kuo nau fai ʻení ʻe ʻikai toe manatuʻi kinautolu pea foki honau sinó ki he kelekelé, ʻo kapau kuo teʻeki ai ke foki ki ai, pea he ʻikai teitei mole ʻa e haʻahaʻa ʻo honau ongoongo koví, lolotonga iá ʻe kei pipiki ai pē ki he hingoa ʻo e Palōfita ko Siosefa Sāmitá ʻa e nāunau mo e fakaʻapaʻapa mo e fakaʻeiʻeiki mo e ngeingeia mo e loto-toʻa mo e anganofo naʻe hā meiate iá ʻo taʻengata.”⁵

Naʻe ongo ʻaupito e fakamatalá ni kia ʻEletā Hāloti B. Lī ʻi heʻene kei hoko ko e mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo ne tauhi hano tatau ʻi heʻene kato paʻangá peá ne toutou lau ia, ʻi heʻene fakaʻamu “ ʻe lava ke ongo atu [e ngaahi lea ʻa Palesiteni Sāmitá] ki he ngaahi ngataʻanga kotoa ʻo māmaní.”⁶

Ngaahi Akonaki ʻa Siaosi ʻAlipate Sāmitá

Naʻe hā mei he ʻUluaki Mata-Meʻa-Hā-Mai ʻa Siosefa Sāmitá ʻoku ʻikai tāpuniʻi ʻa e ngaahi langí.

ʻOku tau tui kuo folofola mai ʻa ʻetau Tamai Hēvaní ʻi hotau kuongá ni … , kuó Ne fanongo ki ha lotu ʻa ha talavou ʻi Palemaila, mo tali mai ʻa ʻene lotú pea tāpuakiʻi ia ʻaki ha ʻilo ki Hono ʻulungāangá koeʻuhí ke ʻiloʻi ʻa e ʻEikí ʻe he kakai kotoa, ʻo ka naú ka loto ki ai.

Ko e meʻa fakanatula pē ia ke fekumi ʻa Siosefa Sāmita ki he ʻEikí. Naʻá ne haʻu mei ha … kakai naʻe tui ki heʻetau Tamai Hēvaní, ki he misiona fakalangi ʻo e Fakamoʻuí, ki he ʻaonga ʻo e lotú, pea ʻe fanongo mai mo tali ʻe he ʻOtuá e lotu ʻa hono kakaí ʻo kapau te nau fai ia ʻi he laumālie totonu. Naʻe faingofua ke tui ʻa e talavoú ni, he naʻe fāʻeleʻi mai mo ʻohake ia ʻi ha ʻapi naʻe tui; pea ʻi he taimi naʻá ne ʻalu atu ai ki he vao ʻakaú ko e tali ki he fekau ʻa e potufolofola ʻa (Sēmisi 1:5): “Ka ai hamou taha ʻoku masiva ʻi he potó, ke kole ʻe ia ki he ʻOtuá, ʻa ia ʻokú ne foaki lahi ki he kakai kotoa pē, pea ʻoku ʻikai valokiʻi; pea ʻe foaki ia kiate ia,” naʻá ne tui ʻe tali mai ʻene lotú, pea kuo talaʻofa ʻa ʻetau Tamai Hēvaní ki heʻene fānaú mei he kamataʻangá pē, “ ʻoku fakahoko ʻa e meʻa kotoa pē ʻi he tuí.”⁷

Naʻe ʻave ia ʻe heʻene tui ki he ʻOtuá mei he tui angamaheni ʻi hono taimí, ʻa ia ʻoku ʻi he Tohi Tapú ʻa e fakahā kotoa ʻoku lava ke maʻu ʻe he tangatá, pea kuo tāpuniʻi ʻa e langí meiate ia. Naʻá ne lotu ki he ʻEikí pea naʻe tali ʻene lotú. Naʻá ne mamata ki he hāʻele hifo ʻa e Tamaí mo e ʻAló mei he langí kuo takatakaiʻi ʻe ha maama nāunauʻia. Naʻá Ne maʻu ʻa e ʻilo taʻeveiveiua ʻokú na maʻu ʻa e sino ʻo hangē ko e tangatá, pea ko kinauá naʻe ʻo e sino fakamatelie makehe; naʻá na folofola kiate ia pea naʻá ne ongoʻi hona leʻó.⁸

Ko e ola [ʻo e lotu ʻa Siosefá] ʻa e meʻa-hā-mai fakaofo ko ia naʻe ʻikai tatau mo ha toe meʻa kuo tau fanongo ai ʻi he hisitōlia ʻo e māmaní. Kuo tau ʻosi fanongo ʻi ha ngaahi taimi naʻe fakahā ai ʻe heʻetau Tamai Hēvaní ia; kuo tau lau ʻo kau ki ha ngaahi taimi naʻe fakahā ai ʻe he Huhuʻi ʻo e faʻahinga ʻo e tangatá ia; ka kuo teʻeki ai ke tau fanongo ʻi ha taimi kimuʻa kuo hā ai e Tamaí mo e ʻAló ki ha tangata moʻui pea folofola ki he tokotaha ko iá.

ʻOku ʻikai tui ki ai e kakai ʻo māmaní. Kuo ʻosi akoʻi ki he kakai tangatá mo e kakai fefiné kuo ʻosi tāpuni ʻa e langí … , pea ʻi he taimi ne fakahā ai ʻe he talavoú ni ʻi hotau kuongá ni ʻi he taimi ʻoku tau fuʻu fie maʻu lahi taha ai ʻa e māmá, ʻa e taimi ʻoku felelei holo ai ʻa e tangatá mo e fefiné ko e fekumi ki he folofola ʻa e ʻOtuá kae ʻikai malava ke maʻu ia, ʻo hangē ko hono kikiteʻi ʻe he kau palōfita ʻi muʻá [vakai, ʻĀmosi 8:11–12], ne ʻosi fakahā pē ia ʻe he ʻEikí, ka naʻe kei manumanukiʻi pē ʻa Siosefa. Naʻe ʻikai ke tali ʻene fakamatalá, pea tafoki meiate ia ʻa kinautolu naʻe totonu ke hoko ko hono ngaahi kaungāmeʻá pea aʻu pē ki heʻenau pehē ko e haʻu ia mei he tēvoló. Ko e hā e fakamoʻoni ʻa e tamasiʻí?

“… Kuó u mamata moʻoni ki ha maama, pea naʻá ku mamata ʻi he lotolotonga ʻo e maama ko iá ki ha tangata ʻe toko ua, pea naʻá na folofola moʻoni mai kiate au; pea neongo naʻe fehiʻanekinaʻi mo fakatangaʻi au koeʻuhi ko ʻeku taukaveʻi kuó u mamata ki ha meʻa-hā-maí, ka naʻe moʻoni ia; pea lolotonga ʻenau fakatangaʻi au, mo lauʻikoviʻi au, mo tukuakiʻi kovi au ʻaki ʻa e ngaahi meʻa kovi kehekehe kotoa pē ko e meʻa ʻi heʻeku lea ʻaki iá, naʻe langaʻi ai ʻa ʻeku pehē ʻi hoku lotó: Ko e hā hono ʻuhinga ka fakatangaʻi ai au koeʻuhi ko ʻeku tala ʻa e moʻoní? Kuó u mamata moʻoni ki ha meʻa-hā-mai, pea ko hai au ke u fakafepaki ki he ʻOtuá, pe ko e hā ʻoku fakakaukau ai ʻa e māmaní ke fakamālohiʻi au ke u fakafisingaʻi ʻa e meʻa kuó u mamata moʻoni ki aí? He kuó u mamata ki ha meʻa-hā-mai; naʻá ku ʻiloʻi ia, pea ʻe ʻikai te u lava ʻo fakaʻikaiʻi ia, pea ʻe ʻikai foki te u toʻa ke fai pehē, kae kehe naʻá ku ʻiloʻi kapau te u fai pehē, te u fakatupu houhau ai ki he ʻOtuá, pea moʻua ki he tauteá.” [Vakai, Siosefa Sāmita—Hisitōliá 1:25.]⁹

ʻI he taʻu 1830, ʻi he taimi naʻe fokotuʻu ai e Siasí, naʻe ʻikai ha siasi ʻi he funga ʻo e māmaní te ne fanongonongo naʻa nau tui ʻe fakahā ʻe he ʻOtuá ia ki he fānau ʻa e tangatá. Naʻe fepaki kotoa e ngaahi akonaki ʻa e ngaahi siasí mo ia, pea naʻe ʻafioʻi ʻe heʻetau Tamaí ʻa e taʻeʻaonga ʻo e feinga ke fakahaofi hono ngaahi fohá mo e ngaahi ʻofefiné kae ʻoua kuo ueʻi kinautolu ke haʻu kiate ia ʻi he tui te ne fanongo mai mo tali ʻenau ngaahi lotú. ʻI he mamata ʻa e palōfita kei tamasiʻí ni ki he Tamaí mo e ʻAló ʻi he vao ʻakau ʻo Palemailá, peá ne ʻiloʻi ko e ongo tangata kinaua, pea naʻe lava ke na fanongo mai mo tali ki he meʻa naʻá ne lea ʻakí, naʻe kamata ha kuonga foʻou ʻi he māmaní, ʻo ne fakatoka ha fakavaʻe ki he tui ʻa e fānau ʻa e tangatá. Kuo lava ʻeni ke nau lotu ki heʻetau Tamai ʻi hēvaní pea ʻiloʻi ʻe lava ke ne fanongo mai mo tali ʻenau ngaahi lotú, pea naʻe kei ʻi ai pē ʻa e fetuʻutaki ʻa e langí mo māmani.¹⁰ [Vakai, fokotuʻu hono 2 he peesi 46.]

Neongo e kei siʻi mo taʻetaukei ʻa Siosefa Sāmitá, ka ne ui ia ke ne toe fakafoki mai e Siasi moʻoni ʻo Sīsū Kalaisí.

Naʻe ueʻi ʻe he tuí ʻa Siosefa ke ne fekumi ki he ʻOtuá ʻi he lotu ʻo fehuʻi pe ko e siasi fē ʻe kau ki aí. Ko e hā e talí? Naʻe folofola ange nai e ʻEikí ʻo pehē, “ʻE hoku foha, ʻoku nau lelei hono kotoa, ʻoku nau feinga kotoa pē ke tauhi ʻeku ngaahi fekaú, ʻoku ou tali lelei ʻa e kau tangata ʻoku hoko ko e kau taki ʻo e ngaahi siasí ni, ha faʻahinga siasi pē, he te nau tataki atu kotoa pē koe ki he ʻafioʻanga ʻo ʻetau Tamai Hēvaní?” Mahalo naʻe ʻamanaki e tamasiʻí ki ha tali pehē tuʻunga ʻi he ngaahi tūkunga naʻe ʻi aí. Ka naʻá ne fie ʻilo pe ko e hā te ne faí, pea naʻá ne tui kakato ʻe fakahā ange ʻe he ʻEikí. Ko ia ʻi heʻene lotú, naʻá ne fehuʻi pe ko e fē ʻo e ngaahi siasí ʻe totonu ke kau ki aí, pea ʻoku ou fakakaukau pē naʻá ne ʻohovale ʻi [hono fakahā ange ki aí], “ ʻOua ʻe kau ki ha taha ʻo kinautolu; ʻoku nau akoʻi ko e ngaahi tokāteline ʻa e ngaahi fekau ʻa e tangatá; ʻoku nau ʻunuʻunu mai kiate au ʻaki honau loungutú, ka ʻoku mamaʻo honau lotó meiate au; ʻoku nau maʻu hono ngeʻesi ʻo e lotú, ka ʻoku nau fakaʻikaiʻi ʻa hono mālohí.” [Vakai, Siosefa Sāmita—Hisitōliá 1:19.] Fakakaukau ki ha tamasiʻi taʻu hongofulu mā fā ʻokú ne tuʻu hake mei heʻene tūʻulutui ʻi he vao ʻakau ofi ki hono ʻapí ʻo talaki ki māmani ha pōpoaki hangē ko iá! Te ke lava ʻo fakakaukau atu ki ha talavou te ne loto-toʻa ke fai ha faʻahinga meʻa pehē? Ka ʻi he fakamoʻoni ko ia kuo foaki kiate ia ʻe heʻene Tamai Hēvaní, fakataha mo e fekau mei he ʻEikí, naʻe ʻikai ke ne fai mo ha toe meʻa kehe ka ko hono fakahā pē kuo folofola ʻa e ʻEikí kiate ia.¹¹

Naʻe kei tamasiʻi pē ʻa Siosefa ʻi he taimi naʻe hilifaki ai e ngaahi nima ʻo Pita, Sēmisi mo Sioné ʻi hono ʻulú pea fakanofo ia ki he Lakanga Taulaʻeiki Faka-Melekisētekí,—ko ia mo ʻŌliva Kautele. Taimi siʻi mei ai ne fakahinohinoʻi ʻa Siosefa Sāmita ke ne fokotuʻu ha Siasi. Ko ha talavou pē ia, ka naʻá ne fokotuʻu ia ʻi he fakahinohino ʻa e Huhuʻi ʻo e faʻahinga ʻo e tangatá. Pea ʻoku ʻi he sīpinga ia ʻo e Siasi naʻe fokotuʻu ʻe he Fakamoʻuí ʻi heʻene ʻi māmaní. ʻOku ʻikai haʻaku veiveiua naʻe tokolahi ʻa e kakai ne nau pehē naʻe fakafokifā ʻa e hoko ʻa e tamasiʻi māʻulaló ni ko ha tokotaha mahuʻinga, pea nau pehē naʻe ngalivale ke hoko ko ha taki ha taha naʻe ʻikai ako. Ka naʻá ne hangē pē ko e kau tamaioʻeiki kehe ʻa ʻetau Tamai Hēvaní kuo nau moʻui ʻi he māmaní, ʻa ia ne ui ʻe he ʻEikí ke nau fakahoko ha ngāue makehe, pea naʻe ʻikai taʻofi ʻe heʻene taʻeʻilo ki he ngaahi meʻa ʻo e māmaní hono ʻoange ʻe he ʻEikí kiate ia ʻa e ngaahi ako naʻe ngaohi ai ia ʻo ne tatau mo toe laka hake ʻi he ngaahi meʻa lahi ʻiate kinautolu naʻe maʻu ʻa e ngaahi faingamālie lahi fakamāmani naʻe ʻikai ke ne maʻú.¹²

Neongo hono ngaohikovia mo tukuakiʻi halá, ʻa hono fehiʻanekina ʻe kinautolu naʻe totonu ko hono ngaahi kaungāmeʻá, fakafepakiʻi ʻe he kau tangata ako mo poto ʻo e taimi ko iá, ka naʻe lava lelei ke ne toe fakafoki mai ʻa e Ongoongolelei ʻo e moʻuí mo e fakamoʻuí pea mo hono fokotuʻu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Neongo naʻe ngāue ʻa e ngaahi mālohi ʻo e tēvoló ke fakaʻauha ia, ka naʻe fakahaofi ia ʻe he ʻEikí kae ʻoua kuo ʻosi ʻene ngāué pea toe ʻomi ki he tangatá ʻa e ngaahi kī mo e ngaahi ouau kātoa naʻe fie maʻu ki hono fakamoʻui ʻo e fāmili ʻo e tangatá.¹³ [Vakai, fokotuʻu hono 3 he peesi 46.]

ʻOku ʻomi ʻe he ngaahi moʻoni naʻe toe fakafoki mai ʻia Siosefa Sāmitá ʻa e melino mo e fiefia kiate kinautolu ʻoku nau tali iá.

Naʻe maʻu mei he tamasiʻi naʻe mamata ki he Tamaí mo e ʻAló ʻi hono taʻu hongofulu mā faá ʻa e pōpoaki fakaofo ko ia ko ha ongo tangata nāunauʻia ʻetau Tamai ʻi hēvaní mo hono ʻAlo ko Sīsū Kalaisí; pea kuo toetuʻu ʻa e Fakamoʻui ʻo māmaní mei he maté. Naʻe mamata ʻa e talavou ko iá ki he meʻa kuo ʻiloʻi ʻe māmani, ka kuo ngalo ʻi ha faʻahinga ʻuhinga, pea kamata ke ne fakamoʻoniʻi ia ki he fānau ʻa e tangatá.¹⁴

[ʻI he konga ki muʻa ʻo e ngaahi taʻu ʻo e 1800] naʻe tokosiʻi e kakai ʻi he māmaní naʻa nau tui ki ha ʻOtua fakatāutaha ʻoku ʻi ai hono sino. Ka naʻe fakahā mahino ʻeni he taimi ko iá ki he Palōfita ko Siosefa Sāmitá ʻi heʻene kei siʻí, ʻa ia ne teʻeki hoko hono taʻu hongofulu mā nimá, pea mamata ki he Tamaí mo e ʻAló peá ne fakamoʻoni ki ai. Naʻe ʻaʻahi foki ki ai mo ha kau talafekau fakalangi kehe, pea naʻe fakafou mai ʻe he ʻEikí ʻiate kinautolu ha toe ngaahi fakamatala kehe maʻá e fānau ʻa e tangatá, peá ne ʻomi kiate kitautolu pea mo kinautolu naʻe mui mai ʻiate kitautolu ʻi he Siasí, ʻi he founga pē ʻaʻana, ha mahino fekauʻaki mo e taumuʻa ʻo e moʻuí. … ʻOku ueʻi kitautolu ʻe heʻene fakamatala kau ki hēvaní ke tau maʻu ha holi ke moʻui ʻo taau mo ha ʻapi ʻi ai ʻi he taimi ʻe ʻosi ai ʻetau moʻui ʻi he māmaní. ʻOku mahino ʻaupito hono fakamatalaʻi ʻo e toetuʻú mo hēvani pea mo heli, ʻo hangē ko e lau ʻa ha potufolofola, “neongo ko e vale ʻa e kakai fonongá, ʻe ʻikai te nau hē ai.” [Vakai, ʻĪsaia 35:8.]¹⁵

Naʻe fakafou ʻiate ia hono fakahā ʻo e langa temipalé, ʻa e taʻengata ʻo e fuakava ʻo e malí, mo e fakamoʻui ʻo e kakai pekiá, ʻo ne ʻomi ha fiefia ʻoku ʻikai mafakamatalaʻi ki he fānau ʻe laumano ʻa ʻetau Tamaí.

ʻOku mafola atu e ngaahi moʻoni taʻengata naʻá ne fakahaá ʻi he lotolotonga ʻo e kakai ʻo māmani, ʻo ne ʻomi ʻa e melino mo e fiemālie kiate kinautolu ʻoku nau tali iá.¹⁶

Ne ʻafioʻi ʻe heʻetau Tamai Hēvaní ʻa e meʻa ʻe hokó ʻi heʻene toe fakafoki mai ʻa e ongoongoleleí ʻi hono tuʻunga haohaoá ʻi he ngaahi ʻaho kimui ní. Naʻá ne ʻafioʻi ʻa e hē ʻa ʻene fānaú mei he moʻoní ʻi he māmaní, pea kuo nau mavahe mei he moʻoni mahinongofuá, pea ʻi heʻene ʻaloʻofa lahí, naʻá ne fakahā ai ʻa e ngāue ko ʻeni ʻo e ngaahi ʻaho fakamui ní. Naʻá ne fili ha tamasiʻi mei he kakai he tukuʻutá, pea ueʻi ia ke ne kamata ʻa e ngāue naʻe fakataumuʻa ke ne liliu ke kehe ʻa e tuʻunga ʻo e lotú ʻi māmani. Naʻá ne ʻafioʻi ʻa e taufā ʻa e māmaní ʻi he fakapoʻulí, peá ne ʻaloʻofa ʻo toe fakafoki mai ʻa e māmá. ʻOku ʻikai mo ha toe founga ʻe maʻu ai ʻe he fānau ʻa e tangatá ʻa e fiefiá ka ke nau moʻui angamāʻoniʻoni, pea he ʻikai lava ke moʻui māʻoniʻoni e kakaí taʻemoʻui ʻaki e moʻoní. Naʻe lahi e moʻoní ʻi he māmaní ka ne fio fakataha ia mo e ngaahi meʻa hala ʻo fakahā tonu ai ʻe he ʻEikí ki he Palōfita ko Siosefa Sāmitá naʻe akoʻi ʻe he kau akonaki mo e kau faiako ʻi he ngaahi siasí ʻa e ngaahi fekau ʻa e tangatá ko e tokāteline, peá ne fakatokanga ki he tamasiʻí ke ʻoua naʻa kau mo kinautolu. Naʻá ne toki fakafoki mai ʻa e ongoongoleleí, ʻa e mālohi ʻo e ʻOtuá ki he fakamoʻuí, kiate kinautolu kotoa pē ʻe tui mo talangofua ki aí.¹⁷

ʻOku ou pehē ki he kakai hono kotoa ʻi he feituʻu kotoa pē, vakavakaiʻi ʻa e ngaahi akonaki ʻo e Ongoongolelei ʻa hotau ʻEikí ʻo hangē ko hono fakahā ki he Palōfita ko Siosefa Sāmitá, fakatotolo ai ʻi he faʻa lotu, pea te mou ʻilo ʻa e faitoʻo ki he ngaahi faingataʻaʻia ʻo e māmaní, pea he ʻikai ʻilo ia ʻi ha toe founga kehe.¹⁸ [Vakai, fokotuʻu hono 4 he peesi 47.]

Naʻe loto fiemālie ʻa Siosefa Sāmita ke foaki ʻene moʻuí koeʻuhi ko ʻene fakamoʻoní.

Hangē ko e kau palōfita ne fokotuʻu hake ʻe he ʻEikí ʻi muʻá, naʻe fie maʻu ia ke fakamaʻu ʻa e fakamoʻoni ʻa ʻEne tamaioʻeikí ʻaki ʻa hono totó. He ʻikai toe hā he hisitōlia ʻo e māmaní ha peesi [fakamamahi] ka ko ia ʻoku tohi ko e lea fakaʻosi ʻa hotau Palōfita ʻofeina ko Siosefa Sāmitá. Naʻá ne ʻiloʻi kuo ofi hono taimí; naʻá ne ʻiloʻi kuo ʻosi fakakakato hono misiona he moʻui ní. … Pea ʻi he hokosia e taimi ke ne fehangahangai ai mo e maté, naʻá ne pehē, “ ʻOku ou ʻalu ʻo hangē ko e lami ke tāmateʻi; ka ʻoku nonga hoku lotó ʻo hangē ko e pongipongi malū ʻi he faʻahitaʻu māfaná. ʻOku ou maʻu ʻa e konisēnisi ʻoku ʻataʻatā mei he fai hala ki he ʻOtuá, pea ki he kakai kotoa pē. Te u mate ʻoku ou taʻehalaia, pea ʻe pehē ʻo kau kiate au ʻi he kahaʻú, ‘Naʻe fakapoongi ia ʻi he anga-fitaʻa.’” [Vakai, T&F 135:4.]

Naʻe ʻikai ke ne ilifia ke tuʻu ʻi he ʻao ʻo e fakamaauʻangá … ʻo tali ki he ngaahi ngāue naʻe fakahoko ʻi he sinó. Naʻe ʻikai ke ne ilifia ke fehangahangai mo hono tukuakiʻi ne faí, ʻo pehē naʻá ne lohiakiʻi e kakaí mo fai taʻetotonu kiate kinautolu. Naʻe ʻikai ke ne ilifia ʻi he ola ʻo hono misiona he moʻuí, pea mo e ikuna aofangatuku ʻo e ngāue naʻá ne ʻiloʻi ko ha ngāue ʻa e ʻOtuá, ʻo ne foaki ʻene moʻuí koeʻuhi ko ia. Kae hangē pē ko ia naʻe fai ʻi muʻá, naʻe fakamāuʻi ʻe he kakai ʻo māmaní ʻa e ngāué ni ʻi he laumālie ʻo e tangatá. ʻOku ʻikai ke nau maʻu ʻa e Laumālie ʻo e ʻOtuá, ʻa ia ʻe lava ke mahino ai kiate kinautolu naʻe mei heʻetau Tamai ʻi hēvaní ia.¹⁹

Naʻe ʻiloʻi fakapapau ʻe he talavoú ni ʻa e fakahā kuó ne maʻú, pea naʻá ne fuʻu tokanga ke ʻiloʻi ʻe he fānau kotoa pē ʻa ʻene Tamaí ʻa e moʻoní, ʻo kamata pē mei he taimi naʻá ne maʻu ai e ngaahi lauʻi peleti ʻo e Tohi ʻa Molomoná mei he ʻāngelo ko Molonaí mo ʻene līʻoa ʻene moʻuí kotoa ki hono fokotuʻu ʻo e Siasí pea mo hono fakamafola ʻo e moʻoní. … Naʻe māfana ʻi hono laumālié ha ʻilo ʻo hangē ko ia naʻe maʻu ʻe Sitīvení [vakai, Ngāue 7:54–60], hangē ko ia naʻe maʻu ʻe he Huhuʻí, ʻa ia naʻe puleʻi ʻa e meʻa kotoa pē ʻe heʻetau Tamai Hēvaní, ko e ngāue ʻi he māmaní naʻe ʻaʻana ia, pea ko hono mālohí te ne iku puleʻi iá, pea ko e moʻuí ni ko ha konga pē ia ʻo ʻitāniti. Naʻá ne mateuteu ke foaki ha konga ʻo ʻene moʻui fakaemāmaní ʻo ka fie maʻu, koeʻuhí kae lava ke ne maʻu ʻa e takaua ko ia naʻá ne ʻofa lahi aí ʻo taʻengata, mo e feohi mo ha kakai tangata mo fefine naʻa nau moʻui pea ʻoku nau moʻui ʻi he māmaní, pea toe nofo ʻi he māmaní ʻi he taimi ʻe hoko ai ko e puleʻanga fakasilesitialé.²⁰

Naʻe akonaki ʻa Siosefa Sāmitá ʻo pehē naʻá ne ʻiloʻi naʻe ʻi ai ʻa e moʻui hili ʻa e maté, pea naʻá ne ʻiloʻi ʻoku moʻui ʻa e ʻOtuá, pea naʻe ʻafioʻi ʻe he ʻOtuá ʻokú ne ʻiloʻi ʻoku moʻui ʻa e ʻOtuá. Naʻá ne loto fiemālie ke foaki ʻene moʻuí kae lava ke fakamālohia hoʻomou tuí, ʻe hoku ngaahi tokoua mo e tuofāfine, pea ʻoua naʻa ngaue hoʻomou falala kiate iá. Naʻá ne ʻiloʻi ʻa e taumuʻa ʻo e moʻui ko ʻení. Naʻá ne ʻiloʻi ʻoku tau ʻi hení ke teuteu ki he kahaʻú mo ha moʻui ʻe nāunauʻia ange. Pea naʻá ne loto fiemālie ke foaki ʻene moʻuí, ʻo ka fie maʻu, ʻo ʻikai koeʻuhí ke mole kae lelei maʻatautolu, ka koeʻuhí he naʻá ne ʻiloʻi kuo folofola ʻa e Tamaí ʻo pehē ko ia ia ʻe kalofaki ʻene moʻuí, ʻe mole ia, ka ko ia ʻe mole ʻene moʻuí koeʻuhi ko Iá, te ne maʻu ia, ʻio ʻa e moʻui taʻengatá [vakai, Mātiu 16:25]. Ko e ʻilo ʻeni naʻe lava ai ʻe he Palōfitá mo [e] Pēteliake ʻo e Siasí [Hailame Sāmita] ʻi he ngaahi ʻaho kimuʻá ʻo [tuku] ʻa kinautolu naʻá na ʻofa aí, ke tuku kinaua ʻi he fale fakapōpulá, pea foaki ʻa e meʻa kotoa naʻá na maʻu ʻi he māmaní ʻa ia ʻe lava ʻe he tangatá ʻo foaki maʻa honau kāingá—ʻa ʻena moʻui ʻi he māmaní.²¹

ʻI he taʻu 1830, naʻe fokotuʻu e Siasí ʻaki ha kau mēmipa ʻe toko ono. Naʻe kamata mei he ʻaho ko iá ʻo aʻu mai ki he ʻahó ni ʻa e feinga ʻa e fili ʻo e māʻoniʻoni kotoá ke taʻofi ʻene fakalakalaká pea ke fakaʻauha ia. ʻOku ou fifili pe ʻoku lava nai ke mamata mai ʻa e tangata maʻongoʻonga ko iá, ʻa Siosefa Sāmita, ʻa ē naʻe foaki ʻene moʻuí kae fokotuʻu e Siasí pea hokohoko atu ʻo hangē ko e fakataumuʻa ʻa e ʻEikí, ki he tuʻu ʻa e Siasí he ʻaho ní, mo hono ngaahi kolo kuo fokotuʻu ʻi he feituʻu kotoa ʻo e māmaní, mo ne ʻiloʻi ko e ʻaho takitaha talu mei hono fakapōngí, talu mei heʻene tuku hifo ʻene moʻuí pea fakamaʻu ʻene fakamoʻoní ʻaki hono totó, kuo mālohi ange ʻa e Siasí ʻi he ʻaho kimuʻá.²² [Vakai, fokotuʻu hono 5 he peesi 47.]

Ngaahi Fokotuʻu ki hono Ako mo Akoʻí

Fakakaukauʻi e ngaahi fakakaukau ko ʻení lolotonga hoʻo ako e vahé pe teuteu ke akoʻí. Ki ha toe tokoni makehe, vakai ki he peesi vii–ix.

Fakakaukau ki he ngaahi meʻa naʻe fakamatala ki ai ʻa Palesiteni Sāmita ʻi heʻuluaki palakalafi ʻe tolu ʻo e “Mei he Moʻui ʻa Siaosi ʻAlipate Sāmitá” (peesi 35–37). Ko e hā ha ngaahi meʻa kuó ke aʻusia ʻi hoʻo moʻuí kuo fakamālohia ai hoʻo fakamoʻoni ki he Palōfita ko Siosefa Sāmita? ʻI hoʻo lau e vahe ko ʻení, kumi e ngaahi fakamatala mei he ngaahi akonaki ʻa Palesiteni Sāmitá ʻokú ne fakamālohia hoʻo fakamoʻoní, pea fakakaukau ke vahevahe ia mo kinautolu ʻi ho fāmilí, kōlomu lakanga fakataulaʻeikí, pe Fineʻofá.
Toe fakamanatu e konga ʻuluaki ʻo e ngaahi akonakí (peesi 37–39) pea toe fakamanatu e fakamatala ʻa Siosefa Sāmita kau ki he ʻUluaki Mata-Meʻa-Hā-Maí (vakai, Siosefa Sāmita—Hisitōliá 1:10–19). Kuo tākiekina fēfē nai ʻe he ʻUluaki Mata-Meʻa-Hā-Maí ʻa hoʻo tui ki he ʻOtuá? ʻOku fēfē haʻo sio ki haʻane tākiekina e tui ʻa e niʻihi kehé?
Ako ʻa e konga ʻoku kamata he peesi 40 pea lau ʻa e Tokāteline mo e Ngaahi Fuakava 1:17–19. Ko e hā ʻe lava ke tau ako mei he faʻifaʻitakiʻanga ʻa Siosefa Sāmitá ʻo fekauʻaki mo e ngāue ʻi he Siasí? Fakakaukau ki ha taimi naʻe ʻoatu ai ha ngāue mei he ʻEikí ke ke fai pea ʻikai te ke ongoʻi ʻokú ke taau. Naʻe tokoniʻi fēfē koe ʻe he ʻEikí?
Ko e hā ha niʻihi ʻo e ngaahi moʻoni naʻe fakahā ʻe he ʻEikí ʻo fakafou mai ʻia Siosefa Sāmitá? (Ke maʻu ha sīpinga ʻo e ngaahi moʻoni ko ʻení, vakai ki he konga ʻoku kamata he peesi 42.) Naʻe anga fēfē hano faitāpuekina hoʻo moʻuí koeʻuhí ko hoʻo ʻiloʻi e ngaahi moʻoni ko ʻení?
ʻI hoʻo fakalaulauloto ki he palakalafi fakamuimuitaha ʻo e ngaahi akonakí (peesi 46), fakakaukau angé ki he meʻa te ke lava ʻo fai ke tokoni ki he hokohoko atu ke toe mālohi ange ʻa e Siasí.

Ngaahi Potufolofola Fekauʻakí: ʻĪsaia 29:13–14; 1 Kolinitō 1:26–27; 2 Nīfai 3:5–9, 11–15; Tokāteline mo e Ngaahi Fuakava 135

Tokoni fakafaiakó: “Fakaʻaongaʻi e ngaahi fehuʻi ʻi he ngataʻanga ʻo e vahé ke fakaʻaiʻai ʻa e fealēleaʻakí. … Te ke lava foki ʻo faʻu haʻo ngaahi fehuʻi pē ʻaʻau ʻo fakatautefito pē maʻanautolu ʻokú ke akoʻí. Hangē ko ʻení, te ke lava ʻo ʻeke ki he kalasí pe ʻe lava ke nau fakaʻaongaʻi fēfē ʻa e ngaahi akonaki ʻa Palesiteni Sāmitá ʻi honau ngaahi fatongia ko e mātuʻá pe kau faiako fakaʻapí pe kau faiako ʻaʻahí” (mei he peesi viii ʻo e tohí ni).

ʻI he ʻaho 23 ʻo Tīsema 1905, naʻe kau fakataha ʻa Siaosi ʻAlipate Sāmita mo ha kau taki kehe ʻo e Siasí ki hono fakatapui ʻo ha maka fakamanatu ʻi he feituʻu naʻe fāʻeleʻi ai ʻa e Palōfita ko Siosefa Sāmitá.

Naʻe “kamata [ʻe he ʻUluaki Mata-Meʻa-Hā-Mai ʻa Siosefa Sāmitá] ha kuonga foʻou ʻi he māmaní, pea fakatoka ai ha fakavaʻe ki he tui ʻa e fānau ʻa e tangatá.”

“ʻOku ou pehē ki he kakai hono kotoa ʻi he feituʻu kotoa pē, vakavakaiʻi ʻa e ngaahi akonaki ʻo e Ongoongolelei ʻa hotau ʻEikí ʻo hangē ko hono fakahā ki he Palōfita ko Siosefa Sāmitá, fakatotolo ai ʻi he faʻa lotu.”