Talateú
Kuo faʻufaʻu ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻa e ngaahi tohi ʻo e Ngaahi Akonaki ʻa e Kau Palesiteni ʻo e Siasí ke tokoni ke toe loloto ange ʻa e mahino ʻokú ke maʻu ki he ongoongolelei kuo toe fakafoki maí peá ke ʻunuʻunu ofi ange ki he ʻEikí ʻo fakafou ʻi he ngaahi akonaki ʻa e kau palōfita ʻo e ngaahi ʻaho kimui ní. ʻI hono tānaki atu ʻe he Siasí ki he fakahokohoko ʻo e ngaahi tohí ni, ʻe lahi ʻa e ngaahi tohi fekauʻaki mo e ongoongoleleí ʻe tauhi ʻi ho ʻapí. ʻOku fakataumuʻa ʻa e ngaahi tohi fakahokohoko ko ʻení ke fakaʻaongaʻi ki he ako fakatāutahá mo akoʻi ʻi he ʻaho Sāpaté. ʻE lava foki ke nau tokoni atu ʻi hoʻo teuteu ha ngaahi lēsoni kehe pe ngaahi lea mo tali ha ngaahi fehuʻi kau ki he tokāteline ʻo e Siasí.
ʻOku ʻoatu ʻi he tohi ko ʻení ʻa e ngaahi akonaki ʻa Palesiteni Siaosi ʻAlipate Sāmitá, ʻa ia naʻe hoko ko e Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mei he ʻaho 21 ʻo Mē 1945, ki he ʻaho 4 ʻo ʻEpeleli 1951.
Ako Fakatāutahá
ʻI hoʻo ako e ngaahi akonaki ʻa Palesiteni Siaosi ʻAlipate Sāmitá, fekumi ki he ueʻi ʻa e Laumālié ʻi he faʻa lotu. ʻE tokoni atu e ngaahi fehuʻi ʻi he fakaʻosinga ʻo e vahe takitaha ke mahino e ngaahi akonaki ʻa Palesiteni Sāmitá pea fakaʻaongaʻi kinautolu ʻi hoʻo moʻuí. Mahalo pē te ke fie fakakaukauʻi e founga ke akoʻi ʻaki e ngaahi akonaki ko ʻení ki he kau mēmipa ʻo e fāmilí mo e ngaahi kaungāmeʻá ʻi he taimi te ke ako ai kinautolú. ʻE fakamālohia heni hoʻo mahino fekauʻaki mo e meʻa ʻokú ke laú.
Ko e Faiako mei he Tohi Ko ʻEní
Te ke lava ʻo fakaʻaongaʻi ʻa e tohí ni ke faiako ʻaki ʻi ʻapi pe ʻi he lotú. ʻE lava ke tokoni atu ʻa e ngaahi fakahinohino ko ʻení.
Teuteu ke Faiako
Fekumi ki he tataki ʻa e Laumālie Māʻoniʻoní lolotonga hoʻo teuteu ke faiakó. Ako ʻa e vahé ʻi he faʻa lotu ke ke ʻiloʻi fakapapau ʻoku mahino kiate koe ʻa e ngaahi akonaki ʻa Palesiteni Sāmitá. Te ke faiako ʻaki ʻa e loto-moʻoni mo e mālohi lahi ange ʻi he taimi kuo tākiekina fakatāutaha ai koe ʻe heʻene ngaahi leá (vakai, T&F 11:21).
Kapau ʻokú ke akoʻi ha lēsoni ʻa e Lakanga Taulaʻeiki Faka-Melekisētekí pe Fineʻofá, ʻoku ʻikai totonu ke ke tuku e tohí ni ki he tafaʻakí ka ke teuteu e ngaahi lēsoní mei ha ngaahi nāunau kehe. Faʻa lotu pea fili mei he vahé ʻa e ngaahi akonaki ko ia ʻokú ke ongoʻi ʻe ʻaonga taha kiate kinautolu ʻokú ke akoʻí. ʻI he ngaahi vahe ʻe niʻihi ʻoku lahi ange ʻa e fakamatala aí ʻi he meʻa te mou lava ʻo aleaʻi lolotonga e taimi kalasí. Tuku ke hokohoko atu ha ngaahi fealēleaʻaki ʻoku leleí ʻi haʻo feinga ke akoʻi kātoa e ngaahi akonakí.
Poupouʻi e kau akó ke ako e vahé kimuʻa he lēsoní pea ō mai mo ʻenau tohí. ʻI heʻenau fai iá, te nau mateuteu lelei ange ke kau ʻi ha fealēleaʻaki pea nau fefakamāmaʻiʻaki.
Fakafeʻiloaki e Vahé
ʻI hoʻo fakafeʻiloaki e vahé, pea ʻi he kotoa ʻo e lēsoní, feinga ke ke fakatupu ha ʻātakai ʻe lava ke aʻu ai ʻa e Laumālié ki he loto mo e ʻatamai ʻo kinautolu ʻokú ke akoʻí. Ke kamata e lēsoní, tokoni kiate kinautolu ʻokú ke akoʻí ke nofo taha ʻenau tokangá ʻi he ngaahi akonaki ʻo e vahé. Ke fai ʻení, ʻe lava ke ke:
-
Lau pea aleaʻi e konga ʻi he kamataʻanga ʻo e vahé ko e “Mei he Moʻui ʻa Siaosi ʻAlipate Sāmitá.”
-
Aleaʻi ha fakatātā pe potufolofola mei he vahé.
-
Hivaʻi ha himi ʻoku fekauʻaki mo ia.
-
Vahevahe nounou mo kinautolu ha meʻa naʻá ke aʻusia fakatāutaha fekauʻaki mo e tefitó.
Tataki ha Fealēleaʻaki kau ki he Ngaahi Akonaki ʻa Palesiteni Sāmitá
ʻI hoʻo faiako mei he tohí ni, fakaafeʻi e niʻihi kehé ke vahevahe mai ʻenau ngaahi fakakaukaú, fai ha ngaahi fehuʻi, pea ke nau feakoʻiʻaki ʻiate kinautolu. Te nau ako lelei taha pē ʻi haʻanau kau atu. Ko ha founga lelei foki ʻeni ke tokoniʻi ai kinautolu ke nau maʻu fakahā fakatāutaha. Fakaʻaongaʻi e ngaahi fehuʻi ʻi he ngataʻanga ʻo e vahé ke fakaʻaiʻai hono fakahoko ʻo e fealēleaʻakí. ʻOku hā e ngaahi fehuʻi ko ʻení ʻi he ngaahi feituʻu kehekehe ʻi he vahé ke fakahaaʻi ʻa e konga ʻo e ngaahi akonaki ʻoku ʻuhinga ki aí. ʻE lava pē foki ke ke faʻu ʻe koe haʻo ngaahi fehuʻi pē ʻaʻau ʻo fakatautefito maʻá e niʻihi ʻokú ke akoʻí. Hangē ko ʻení, te ke lava ʻo ʻeke ki he kau akó pe ʻe lava fēfē ke nau fakaʻaongaʻi e ngaahi akonaki ʻa Palesiteni Sāmitá ʻi honau ngaahi fatongia ko e mātuʻá pe kau faiako fakaʻapí pe faiako ʻaʻahí.
ʻE ʻoatu ʻe he ngaahi meʻa ko ʻeni ke fili mei aí ha toe ngaahi fakakaukau kehe:
-
Kole ki he kau akó ke vahevahe ʻa e meʻa ne nau ako mei heʻenau ako fakatāutaha e vahé. ʻE tokoni ke fetuʻutaki ki ha niʻihi ʻo e kau akó lolotonga e uiké ʻo kole ange ke nau ō maí kuo nau mateuteu ke vahevahe ʻa e meʻa ne nau akó.
-
Vahe ki he kau akó ke nau lau ha ngaahi fehuʻi kuo filifili mei he fakaʻosinga ʻo e vahé (fakafoʻituitui pe fakakulupu iiki). Kole ange ke nau kumi ʻa e ngaahi akonaki ʻi he vahé ʻoku fekauʻaki mo e ngaahi fehuʻí. Hili iá pea fakaafeʻi kinautolu ke vahevahe mo e toenga ʻo e kulupú ʻa ʻenau ngaahi fakakaukaú mo e ngaahi ʻilo ʻoku nau maʻú.
-
Lau fakataha ha ngaahi fakamatala ʻa Palesiteni Sāmita kuo filifili meí he vahé. Kole ki he kau akó ke nau vahevahe ha ngaahi sīpinga mei he potufolofolá pe ngaahi meʻa naʻa nau aʻusia ke fakatātaaʻi ʻaki e meʻa naʻe akonaki ʻaki ʻe Palesiteni Sāmitá.
-
Kole ki he kau akó ke nau fili ha konga ʻoku nau manako ai pea lau fakalongolongo ia. Fakaafeʻi kinautolu ke nau fakakulupu tautau toko ua pe toko tolu mo kinautolu naʻa nau fili e konga tataú pea aleaʻi e meʻa naʻa nau akó.
Fakaʻosi e Fealēleaʻakí
Fakamatalaʻi fakanounou e lēsoní pe kole ki ha toko taha pe toko ua ke na fai ia. Poupouʻi ʻa kinautolu ʻokú ke akoʻí ke vahevahe mo e niʻihi kehé ʻa e meʻa naʻa nau ako mei he ngaahi akonaki ʻa Palesiteni Sāmitá. Fakamoʻoni ki he ngaahi akonaki kuo mou aleaʻí. Mahalo pē te ke fie fakaafeʻi foki mo ha niʻihi ke vahevahe ʻenau ngaahi fakamoʻoní.
Fakamatala ki he Ngaahi Maʻuʻanga Fakamatala ʻOku Hā ʻi he Tohi Ko ʻEní
Ko e ngaahi akonaki ʻa Palesiteni Sāmita ʻi he tohi ko ʻení ko ha ngaahi lea ia naʻe toʻo fakahangatonu mei ha ngaahi maʻuʻanga fakamatala kehekehe. ʻOku kei ʻi he ngaahi konga ko ʻení ʻa e fakaʻilonga mālōlō, sipela, fakamataʻitohi lahi, mo e fakapalakalafi ʻi he tatau totonú tuku kehe ha ngaahi liliu fakaʻētita pe ʻi hono taipeʻí ke faingofua ange hono laú. Ko hono ʻuhinga ʻeni te ke fakatokangaʻi ai ha fanga kiʻi faikehekehe siʻi ʻi he tohí. Hangē ko ʻení, ʻi he ngaahi lea ʻe niʻihi ʻoku mataʻitohi iiki ʻa e foʻi lea ko e ongoongoleleí pea mataʻitohi lahi ʻi he niʻihi.
Naʻe faʻa fakaʻaongaʻi foki ʻe Palesiteni Sāmita ʻa e ngaahi foʻi lea hangē ko e kau tangata, tangata, pe faʻahinga ʻo e tangatá ko e ʻuhinga ki he kakai kotoa pē, ʻa e tangata mo e fefine fakatouʻosi. Naʻá ne fakaʻaongaʻi ʻa e fetongi nauna ko e ne, ʻene, mo e mo ia ko e ʻuhinga ki he tangata mo e fefine. Ko e lea angamaheni pē ia ʻi hono taimí. Neongo e faikehekehe ʻi he ngaahi lea ko ʻení mo hono ngāue ʻaki ʻi he lolotongá, ka ʻoku fakatou ʻuhinga pē ʻa e ngaahi akonaki ʻa Palesiteni Sāmitá ki he kakai fefiné mo e kakai tangatá.