Vahe 21

Ko e Mālohi ʻo e Angaʻofá

ʻI heʻetau angaʻofa mo faʻa kātakí, ʻe lava ai ke tau fakamolū ʻa e lotó mo poupouʻi e niʻihi kehé ke nau moʻui angamāʻoniʻoni.

Mei he Moʻui ʻa Siaosi ʻAlipate Sāmitá

Naʻe tui mālohi ʻa Siaosi ʻAlipate Sāmita ki hono fakamolū ʻa e lotó ʻe he mālohi ʻo e ʻangaʻofá. Naʻá ne akonaki ʻo pehē ʻoku totonu ke tau “fakaleleiʻi ʻetau ngaahi palopalemá ʻi he laumālie ʻo e ʻofa mo e angaʻofa ki he kakai kotoa pē.”¹ Naʻe talanoa hono mokopuna fefiné ki hono fakahoko ʻe heʻene angaʻofa mo ʻene faʻa fakaʻatuʻi e niʻihi kehé ʻa e fakamelino ki ha meʻa naʻe hoko:

“ ʻI ha ʻaho vela ʻe taha naʻe hoko ai ha palopalema ʻi lalo he halá ofi ki he ʻapi ʻo ʻeku kuitangatá ʻi Sōleki Sití, pea naʻe haʻu ha kau ngāue mei kolo ke ngāue ki ai. Naʻe vela ʻaupito ʻa tuʻa, ulo kakaha e laʻaá, pea ko e ngāue naʻe faí ko e keli mo e tata sāvolo, pea naʻe fetafetafei e mata mo e tuʻa ʻo e kau tangatá he pupuhá ʻi heʻenau kelí. Naʻe ʻikai ke nau tokanga ki he ngaahi lea naʻa nau fakaʻaongaʻí, pe mahalo naʻe ʻikai pē akoʻi kinautolu ʻe heʻenau ngaahi faʻeé ke nau ʻilo ha meʻa lelei ange, ka nau kapekape mo lea kovi. Naʻe fakaʻau ke pangoʻia e tokolahi ʻo e kaungāʻapí naʻe fakaava honau matapā sioʻatá mo e matapā lahí ke hū atu ha ʻea ke nau mokomoko aí ʻi he ngaahi lea naʻa nau fakaʻaongaʻí.

“Ne hū atu ki tuʻa ha taha ʻo kole ki he kau tangatá ke tuku ʻenau lea koví, mo talaange ʻoku nofo ai ʻa Misa Sāmita—ke nau kātaki muʻa ʻo anga fakaʻapaʻapa pea ʻoua te nau longoaʻa. Ko ʻene ʻosi pē ʻene leá kuo haʻu mo ha ngaahi lea kovi foʻou. Naʻe teuteuʻi fakalongolongo pē ʻe heʻeku kuí ha inu lēmani peá ne ʻai ha ʻū ipu fakataha mo e siokí ʻi ha laulau ʻo ʻalu atu mo ia ki he kau tangata ngāué mo pehē ange, ‘Hoku ngaahi kaungāmeʻa, ʻoku mou hā ʻafuʻia mo ongosia. Mou ō mai ʻo tangutu hifo ʻi hoku lalo ʻakaú ʻo maʻu hamou inu mokomoko.’ Ne ʻosi e ʻita ʻa e kau tangatá, pea nau tali ʻaki ʻa e angavaivai mo e loto houngaʻia ki he angaʻofa ko ʻení. Hili ʻenau kiʻi mālōloó, naʻa nau foki ʻo fakaʻosi fakalelei mo fakalongolongo ʻenau ngāué.”² [Vakai, fokotuʻu 1 he peesi 248.]

Ko hono ʻuhinga ʻe taha naʻe fuʻu angaʻofa pehē ai ʻa Palesiteni Sāmita ki he kakaí ko ʻene tui ʻoku ʻi ai ʻa e lelei ʻi he tokotaha kotoa pē. ʻI he ngaahi uike siʻi pea pekia ʻa Palesiteni Sāmitá, naʻe ʻaʻahi ki ai ʻi falemahaki ʻa ʻEletā Mātiu Kauli, ko ha mēmipaʻo e Kōlomu ʻo e Kau ʻAposetolo ʻe Toko Hongofulu Mā Uá. Naʻá ne pehē, “Ne u ʻalu atu ki hono veʻe mohengá peá ne ala mai ʻo puke atu hoku nimá, ʻo ne kuku mālohi ia mo ne talamai, ‘Talavou, manatuʻi ʻi he ʻaho kotoa pē ʻo hoʻo moʻuí te ke maʻu ʻa e lelei ʻi he tokotaha kotoa pē kapau te ke feinga ke ʻiloʻi ia.”

Naʻe toki lea leva ʻa ʻEletā Kauli ʻo kau kia Palesiteni Sāmita:

“Naʻá ne ʻofa ʻi he tokotaha kotoa pē he naʻe lava ke ne sio ki he lelei naʻe ʻiate kinautolú. Naʻe ʻikai ke ne sio ki he fai angahalá ʻo teitei fakaʻatuʻi, ka naʻá ne ʻofa ʻi he tokotaha faiangahalá he naʻá ne ʻiloʻi ko e ʻOtuá ko e ʻofa [vakai, 1 Sione 4:16], pea ko e ʻofa ʻa e ʻOtuá ʻokú ne fakafoʻou e laumālie ʻo e tangatá, pea ʻi heʻene fakahoko iá, te ne lava ʻo liliu ʻa e tokotaha angahalá ko ha tokotaha māʻoniʻoni.

“Mahalo ʻoku ʻi ai ha kau faiangahala ʻe niʻihi ʻoku nau maʻuhala ʻene ʻofá ko ha fakaʻapaʻapa. Naʻe ʻikai ke ne fakaʻapaʻapaʻi ʻe ia ʻa e tokotaha faiangahalá, ka naʻá ne ʻofa ʻiate ia. ʻOku ou ʻilo pau naʻe tali ʻa e ʻofa ko iá ʻi he loto mo e moʻui ʻa kinautolu naʻá ne ʻofa aí.”³

Ngaahi Akonaki ʻa Siaosi ʻAlipate Sāmitá

Ko e Laumālie ʻo e ʻEikí ko ha laumālie ia ʻo e angaʻofa, ʻo ʻikai ʻo e lea taʻefakafiemālie mo e fakaanga.

ʻOku ou faʻa loto-mamahi he taimi ʻe niʻihi heʻeku fanongo ki he ngaahi lea taʻeʻofa ʻoku faí, ʻo ʻikai ʻe he kakai pē ʻi hotau Siasí, ka ko e kakai ʻo māmaní. ʻOku ʻikai faʻa ueʻi ʻe he laumālie ʻo e ʻEikí ke fai ha ngaahi lea taʻeʻofa. Ko e Laumālie ʻo e Eikí ko ha laumālie ia ʻo e angaʻofa; ko ha laumālie ʻo e faʻa kātaki; ko ha laumālie ʻo e ʻofa faka-Kalaisi mo e ʻofa mo e fakamaʻumaʻu mo e kātaki fuoloa; pea ʻoku ʻikai ha taha ʻiate kitautolu te ne taʻe fie maʻu e ngaahi ʻulungāanga lelei kotoa ko ʻení ʻa ia ʻoku nau tupu mei hono maʻu ʻo e Laumālie ʻo ʻetau Tamai Hēvaní.⁴

ʻOku totonu ke ngāue ʻaki ʻa e ivi tākiekina kotoa pē ke maʻu ʻa e melinó. ʻOku fakaʻaongaʻi ʻe Lusifā ʻa e founga kotoa pē ke fakaʻauha e laumālie ʻo e tangatá. ʻOkú ne toe mālohi ange he taimí ni ʻi ha toe taimi pea ʻokú ne ngāue ʻi he founga kākā. He ʻikai te u fakamoleki e taimí ke fakalau atu e ngaahi founga lahi ʻokú ne fakaʻaongaʻí ka ʻoku ʻi ai ʻa e founga ʻe taha ʻokú ne ngāue ʻaki, pea naʻá ne fakaʻaongaʻi ia mei he kamataʻanga pē ʻo e māmaní, ʻa ia ko haʻane fakataueleʻi ha toko taha ke ne fakaʻauha ʻa e ongoongo lelei ʻo ha taha kehe ʻaki ʻene fai ha ngaahi lea taʻeʻofa kau kiate kinautolu.⁵

ʻOku faingofua ʻaupito ke fakaangaʻi ha taha, faingofua ke kumi haʻane fehālaaki, pea ʻoku faʻa ʻi ai e taimi ʻoku tau fai e lea taʻefakafiemālie kau ki hotau kaungāʻapí mo e kaungāmeʻá. Ko e meʻa ʻeni naʻe talamai ʻe heʻetau Tamai Hēvaní … :

“ ʻOua naʻa mou fakamaau, telia naʻa fakamāua ʻa kimoutolu.

“He ko e anga ko ia ʻoku mou fakamaau ʻakí, ʻe fakamāua ai ʻa kimoutolu: pea ko e fuofua ko ia te mou fua ʻakí, ʻe toe fua ʻaki ia kiate kimoutolu.

“Pea ko e hā ʻokú ke tokanga ai ki he malamalaʻi ʻakau ʻoku ʻi he mata ʻo ho kāingá, ka ʻoku ʻikai te ke tokanga ki he fuʻu ʻakau ʻoku ʻi ho mata ʻoʻoú?

“Pea ʻe fēfē haʻo faʻa pehē ki ho kāingá, Tuku ke u toʻo mai ʻa e malamalaʻi ʻakau mei ho matá: kae vakai, ʻoku ai ʻa e fuʻu ʻakau ʻi ho mata ʻoʻoú?” [Mātiu 7:1–4.]

ʻOku faleʻi kitautolu ke ʻoua naʻa tau fakaanga, ʻoua ʻe taʻeʻofa, ʻoua ʻe fai ha lea taʻefakafiemālie kau kiate kinautolu ʻoku tau feohí. ʻOku totonu ke tau hoko kitautolu ko e kau faʻifaʻitakiʻanga lelei taha ʻo e meʻá ni ʻi māmani kotoa. Fakakaukau angé ki he fakaangá he ʻahó ni. Toʻo hake hoʻo nusipepá ʻo sio ki he ngaahi meʻa taʻeʻofa ʻoku lea ʻaki ʻe ha niʻihi kau ki ha niʻihi kehe, lolotonga ko iá, ʻoku ʻi ai e fuʻu ʻakau ʻi he mata ʻo e tokotaha ʻoku fakaangá pea ʻikai lelei ʻene vakaí, ka ʻokú ne pehē ʻe ia ʻoku ʻi ai ha malamalaʻi ʻakau ʻi he mata ʻo hono tokouá.⁶ [Vakai, fokotuʻu hono 2 he peesi 249.]

ʻIkai ʻoku tau faʻa hehema ke sio ki he ngaahi fakangatangata mo e ngaahi vaivai hotau ngaahi kaungāʻapí? Ka ʻoku fepaki foki ia mo e ngaahi akonaki ʻa e Ongoongolelei ʻo Sīsū Kalaisí. ʻOku ʻi ai e faʻahinga kakai ʻoku nau fakasio maʻu pē e fehālaakí mo fakaanga ʻi ha founga ʻe ʻauha ai ha niʻihi. ʻOku ʻi ai e faikehekehe ʻi he fakaangá. Kapau ʻe lava ke tau fai ha fakaanga ʻoku ʻaongá ʻi he ivi ʻo e Laumālie ʻo e ʻEikí, ʻe lava ke tau liliu ʻa e ngaahi meʻa ʻoku hokó ke maʻu ai ha lelei pea ʻi he founga totonu. Ka ʻo kapau ʻoku tau maʻu ʻa e laumālie ʻo e kumi ha fehālaaki ʻa ha taha, ʻo e tuhu ki he ngaahi vaivai mo e ngaahi tōnounou ʻa e niʻihi kehé ʻi ha founga ʻe hoko ai ha maumau, ʻoku ʻikai ʻaupito tupu ia mei he takaua ʻo e Laumālie ʻo ʻetau Tamai Hēvaní pea ʻokú ne fakatupu maʻu pē ʻa e maumau.⁷

ʻOku totonu ke tau fekumi maʻu pē ki he ngaahi ʻulungāanga lelei ʻi he niʻihi kehé pea fakamālōʻia kinautolu ʻi he loto-moʻoni.

ʻOku ou tuʻu atu heni he ʻahó ni ke talanoa ki ha tangata kuó ne mālōlō ʻi he ngaahi taʻu lahi kuo hilí. … Ko ʻeku ʻuhingá kia Falanisisi M. Laimani (Francis M. Lyman) [ʻo e Kōlomu ʻo e Kau ʻAposetolo ʻe Toko Hongofulu Mā Uá] pea ʻoku ou fie talaatu naʻe angavaivai ʻa e tangata maʻongoʻonga ko iá ʻo hangē ha kiʻi pēpeé, angavaivai ʻo hangē tofu pē ha tamasiʻi siʻí, pea ko e meʻa fakaʻofoʻofa ʻa ʻene loto fie tokoni mo fakalotolahí. Kuó u ʻosi fanongo tuʻo lahi ki heʻene fakamālōʻiaʻi ha kau tangata ʻi haʻanau fai ha faʻahinga meʻa naʻe taau ke fakamālōʻia—naʻe fai ʻe he tokotaha ha lea lelei, fai ʻe ha tokotaha ha fakamoʻoni mālohi, pea fai ʻe ha taha kehe ʻa e meʻa naʻe taau ke fakamālōʻia. Kuó u mamata ki heʻene ala atu ʻo puke mai kinautolu mo pehē ange, “ ʻOku ou laukau ʻaki e meʻa lelei kuó ke faí.” ʻIkai ko ha founga ia ʻoku taau ke tau moʻui ʻaki? Ko e founga ia te tau fiefia aí. ʻE toe lelei ange ʻa e moʻuí kapau he ʻikai ke tau meheka ka tau sio ki he ngaahi ʻulungāanga lelei mo e ngaahi meʻa ʻoku lava ʻe hotau kāingá pea tau fakamālōʻia mo fakahoungaʻi ia, kapau te tau sio ki he mālohi ʻi he [niʻihi kehé] ke fai ha leleí.

ʻOku moʻui hotau tokolahi ʻi ha faʻahinga ʻātakai ʻoku ʻikai ke tau lava ʻe kitautolu ʻo fakahīkihikiʻi ha taha kehe. Hangē ia ʻoku ʻikai lava ke tau lea ʻaki ʻa e ngaahi meʻa … ʻe lelei ki he niʻihi kehé. Tau kumi ki he ngaahi ʻulungāanga lelei ʻo kinautolu ʻoku tau kaungā ngāué pea ʻi heʻetau ʻiloʻi iá, tau ʻai ke nau fiefia ʻaki haʻatau fakamālōʻia kinautolu.⁸

ʻE hoku ngaahi tokoua mo e tuofāfine, ʻoku ou kole atu kiate kimoutolu ke tau feangaleleiʻaki. Tau fekātakiʻaki ʻo hangē ko ʻetau loto ke kātakiʻi kitautolu ʻe he niʻihi kehé. Tau sio ki he ngaahi ʻulungāanga lelei ʻo hotau kaungāʻapí mo e kaungāmeʻá pea talanoa ki he ngaahi ʻulungāanga lelei ko iá kae ʻoua ʻe kumi ʻenau fehālaakí mo fakaanga. Ka tau fai ia te tau ʻoatu ʻa e māmá pea ʻe ʻofeina kitautolu ʻe he kakai ʻoku nau ʻiloʻi lelei taha kitautolú.⁹ [Vakai, fokotuʻu hono 3 he peesi 249.]

ʻOku ʻi ai e mālohi ʻo e angaʻofá ke taki e kakaí ke mavahe mei heʻenau ngaahi fehālaakí.

ʻOku ʻi ai e niʻihi te nau fai ha ngaahi fehālaaki. ʻOku ʻi ai hatau niʻihi he ʻahó ni kuo nau hē atu, ka ko e fānau kinautolu ʻa hotau ʻEikí pea ʻokú ne ʻofa ʻiate kinautolu. Kuó ne foaki mai ʻa e totonu kiate kitautolu ke tau ō atu ʻi he angaʻofa mo e ʻofa mo e faʻa kātaki pea mo e loto ʻoku holi ke faitāpuekina kinautolu, mo feinga ke taʻofi kinautolu mei he ngaahi fehālaaki ʻoku nau fakahoko pē. ʻOku ʻikai ʻaʻaku ke fakamāuʻi ʻa kinautolu kuo nau fai ha ngaahi fehālaakí pea ʻoku nau kei fai ha ngaahi fehalaaki, tuku kehe ʻo ka toki fie maʻu ke u fai ia ʻi he mafai kuo foaki kiate aú. Ka ko hoku monū ke fakatafoki kinautolu ki he hala ʻoku taki atu ki he moʻui taʻengata ʻi he puleʻanga faka-Silesitialé.¹⁰

ʻOua muʻa naʻa tau lāunga ʻi he ʻikai ke fai ʻe hotau ngaahi kaungāmeʻá mo e kaungāʻapí ʻa ia ʻoku tau loto ki aí. Ka tau ʻofa ʻiate kinautolu ke nau fai e ngaahi meʻa ko ia ʻoku finangalo ʻetau Tamai Hēvaní ke nau faí. ʻE lava ke tau fai ia, pea he ʻikai ke tau lava ʻo maʻu ʻenau falalá mo ʻenau ʻofá ʻi ha toe founga kehe.¹¹

Toki meʻa fakafiefia, toki meʻa fakanonga, toki meʻa fakafiemālie ʻe lava ke fakafou atu ʻi he angaʻofá ʻo fakalahi atu ʻaki ki he moʻui ʻa hotau kaungāʻapí mo e kaungāmeʻá. ʻOku ou loto au ke u tohi fakamatalalahi e foʻi lea ko iá ʻaki ha ngaahi lanu mataʻāʻā ʻi he ʻataá. Ko e angaʻofá ko e mālohi ia kuo foaki mai ʻe he ʻOtuá ke tau fakaava ʻaki ʻa e ngaahi loto ʻoku fefeká mo fakavaivaiʻi e ngaahi laumālie ongongataʻá pea ʻai ke mahino kiate kinautolu ʻEne ngaahi taumuʻá.¹² [Vakai, fokotuʻu hono 4 he peesi 249.]

ʻE lava ʻe he ʻofa mo e angaʻofa ʻi hotau ngaahi ʻapí ʻo ʻai ke fakafanongo ʻetau fānaú ki heʻetau faleʻí.

Ko hotau fatongia—ʻoku totonu ke u pehē ko hotau faingamālie mo hotau fatongia ke fakaʻaongaʻi ha taimi feʻunga ke maluʻi takai ʻetau fānaú mo ʻofa ʻiate kinautolu pea ʻai ke nau ʻofa ʻiate kitautolu koeʻuhí ke nau fiefia ke fakafanongo ki heʻetau faleʻí mo e akonakí.¹³

Moʻui ʻaki ʻa e ʻofá mo e angaʻofá koeʻuhí ke ʻi homou ngaahi ʻapí ʻa e melinó mo e lotú mo e loto fakafetaʻí. ʻOua naʻa tuku ke hoko homou ngaahi ʻapí ko ha feituʻu pē ke tautau ai homou tataá he efiafí mo maʻu meʻatokoni ai pea mou fakavavevave leva ki ha feituʻu kehe ka ke hoko homou ngaahi ʻapí ko e feituʻu ʻe nofo ai ʻa e Laumālie ʻo e ʻEikí.¹⁴

ʻOku ou lotua ke fakafonu kitautolu ʻaki ʻa e laumālie ko ia ʻoku mei he [ʻEikí], ʻa ia ho ha laumālie ʻo e ʻofa, ʻo e angaʻofa mo e faʻa tokoni pea ʻo e faʻa kātaki mo e kātaki fuoloa. Kapau leva te tau tauhi ʻa e laumālie ko iá ʻi hotau ngaahi ʻapí, ʻe tupu hake ʻetau fānau tangatá mo e fānau fefiné ʻo hoko ko e faʻahinga kakai ʻoku tau fie maʻú.¹⁵

ʻOku ou manatu ki heʻeku fononga lēlue atu ki he feituʻu fakatokelaú ʻi he ngaahi taʻu siʻi kuo hilí. Ne u sio atu ki ha fefine naʻá ku ʻiloʻi ʻi he feituʻu nofoʻanga ʻo e lēlué ki he taimi ʻahó. … Naʻá ne fakatokangaʻi mai au heʻeku hū atú. Naʻá ne fakalea mai peá u fehuʻi ange: “Ko hoʻo ʻalú ki fē?” Naʻá ne pehē mai: “Ko ʻeku ʻalu ki Potileni, [ʻOlikoni].” Naʻá ku ʻiloʻi naʻe ʻikai ko ha fāmili ʻeni naʻe tuʻumālie. Ne u ʻiloʻi naʻe tokolahi e fānau tangata ʻa e fefiné, ko ia ne u pehē ange: “Ko hoʻo ʻalú ki Potileni ʻo hā?” Naʻá ne talamai: “ ʻOku ʻi falemahaki hoku fohá ai.”

Naʻe ʻikai ke u ʻiloʻi kuo hiki ha taha ʻo ʻene fānaú mei ai, ko ia ne hoko atu ʻeku fakaʻekeʻeké peá ne talamai leva e meʻa naʻe ʻi hono lotó. Naʻá ne pehē mai: “Ne mavahe mei ʻapi ʻeku tamasiʻi siʻisiʻi tahá he ngaahi uike siʻi kuo maliu atú pea ʻikai ke ne talamai pe ko ʻene ʻalú ki fē. Naʻe ʻikai ke fetuʻutaki mai, ka kuo pau pe naʻá ne fakakaukau ke ʻalu ʻo aʻu tonu ki he meʻa ʻoku hoko ʻi māmaní, pea ko ʻemau ʻuluaki ʻiloʻi pē ʻa e feituʻu naʻe ʻi aí heʻemau maʻu ha mākoni mei he falemahaki Mēsí ʻi Potilaní ʻo talamai naʻá ne puke pea ʻoku ʻi he falemahaki ko iá. Naʻa mau ʻohovale ʻaupito ʻi he pōpoakí. Ko e meʻa pē taha ke faí ko e kumi ha founga ke u ʻalu ki ai he taimi pē ko iá.”

… Naʻá ne ʻosi mateuteu ke tangutu he fuʻu fononga lōloa ko iá ʻi he ʻaho mo e pō, ʻo ʻikai ke ʻita ʻi he taʻeangaʻofa mo taʻefakaʻatuʻi ʻene tamasiʻí, ka ne fakakaukau pē ko ʻene tama ia, ko e tama ia ʻaʻana, naʻe foaki ange ia ʻe he ʻOtuá maʻana, pea naʻe ʻamanaki mai ʻetau Tamai Hēvaní ke ne fakaʻaongaʻi ʻa e founga kotoa pē ʻe lava ke fakakoloaʻi ʻene moʻuí mo teuteuʻi ia ki he ngaahi faingamālie ʻoku fakatatali mai maʻaná. Ko ia naʻe tangutu pē ʻa e fefine leleí ni lolotonga e ngaahi houa lahi ne lele ai e lēlué he pō ko iá, mo e fakaʻamu ke sio ki heʻene tamá, pea ʻi he maile kotoa pē, naʻá ne toe kiʻi ofi ange ai ki he meʻa ko ia naʻe fuʻu hohaʻa ki ai hono lotó. ʻI heʻene aʻú, naʻá ne ʻalu ki he falemahakí ʻi he vave taha naʻe lavá. Naʻe ʻikai mamaʻo e feituʻu naʻá ku ʻi aí mei he falemahakí ko ia ne u ʻalu ki ai ʻo sio pe ko e hā e meʻa naʻe hokó.

Ne siʻi tangutu pē ʻa e faʻē ʻofá ni ʻi he veʻe mohenga ʻo ʻene tamá ʻa ia naʻe puke he niumōniá, pea naʻá ne felāngaaki. Naʻe ʻikai ke ne tafuluʻi ʻene tamá heʻene taʻemanatuʻi mai iá; naʻe ʻikai ke ne ʻita ʻi heʻene taʻefakaʻatuʻí mo ʻene taʻetokangá, ka naʻá ne fakamālō pē ke fakataha mo ʻene tama kuo foaki ange ʻe he ʻOtuá maʻaná. Naʻá ne lolotonga feinga ʻeni ke tauhi ke sai ʻa e tama naʻe tokoni mai ʻene Tamai Hēvaní ke ʻomi ki he māmaní. Naʻá ne taʻu 16 ka naʻá ne kei lau pē ia ko ʻene pēpē. Naʻá ne feinga ke fakalotolahiʻi ia ʻaki hono talaange ki ai e ngaahi meʻa ko ia ʻe fiefia mo fiemālie aí, mo fakahā ange ʻa e ngaahi faingamālie te ne maʻu ʻi haʻane saí. Naʻe ʻi he feituʻu ko ʻeni ʻa e faingataʻaʻia mo e mamahi naʻá ne fakafonu e lokí kimuʻa peá ne hū atú, ne ʻi ai ha maama mo e melino mo e fiefia naʻe hā mei he mata ʻo e tamasiʻí ʻi heʻene sio hake ki he fofonga ʻo ia naʻá ne foaki ʻene moʻuí koeʻuhí ka ne moʻui aí, pea kuó ne haʻu mamaʻo ʻeni ke nofo ʻi hono tafaʻakí ʻo tauhi ia ke sai.

Taimi ʻe niʻihi ʻoku ou fifili pe ʻoku ʻiloʻi nai ʻe he ngaahi faʻē ko ʻení ʻa ʻenau hā fakaʻofoʻofa ki heʻenau fānaú ʻi he taimi hangē ko ʻení. Naʻe fakapapauʻi ʻe he tamasiʻí ʻi he ngaahi miniti siʻi pē ʻo e aʻu atu ʻene faʻeé he ʻikai ʻaupito te ne toe taʻefaitotonu ki ai, ʻikai ʻaupito te ne toe taʻemanatu ki he meʻa kuó ne foaki kiate iá, ka ne fakapapauʻi te ne fakalāngilangiʻi ʻa e hingoa ne foaki fakalāngilangi kiate iá ki he ngataʻanga ʻo ʻene moʻuí.¹⁶ [Vakai, fokotuʻu hono 5 he peesi 249.]

ʻOku ou lotua ʻe ongo ki hotau lotó ʻa e ʻofa ki he ongoongolelei ʻo hotau ʻEikí mo ne fakakoloaʻi ʻetau moʻuí, ke ne fakatupu ha angaʻofa ange ʻa e husepānití ki he uaifí, pea angaʻofa ange ʻa e uaifí ki he husepānití, ʻa e mātuʻá ki he fānaú, mo e fānaú ki he mātuʻá koeʻuhí ko e ongoongolelei ʻo Sīsū Kalaisí, ʻa ia ko ha ongoongolelei ʻo e ʻofa mo e angaʻofa.¹⁷

Ngaahi Fokotuʻu ki Hono Ako mo Akoʻí

Fakakaukauʻi e ngaahi fakakaukau ko ʻení lolotonga hoʻo ako e vahé pe teuteu ke akoʻí. Ki ha toe tokoni makehe, vakai ki he peesi vii–ix.

Lau e talanoa ki hono teuteuʻi ʻe Siaosi ʻAlipate Sāmita ʻa e inu lēmani maʻá e kau ngāue naʻa nau ongosiá (peesi 241–42). Ko e fē nai ha taimi naʻá ke mamata ai ki hano fakamolū ʻo e loto ʻo ha taha ʻe ha ngāue ʻofa? ʻOkú ke pehē nai ko e hā ha niʻihi ʻo e ngaahi palopalema ʻe lava ke fakaleleiʻi ʻaki ʻa e “laumālie ʻo e ʻofá mo e angaʻofá ki he kakai kotoa pē”?
Naʻe akonaki ʻa Palesiteni Sāmita “ ʻoku totonu ke tau hoko kitautolu ko e kau faʻifaʻitakiʻanga lelei taha ʻi māmani kotoa” ʻi he fakaʻehiʻehi mei he fakaangá (peesi 242–43). Ko e hā ha ngaahi tūkunga ʻe lava ke tau tā ai ha faʻifaʻitakiʻanga pehē? ʻI hoʻo fakakaukau ʻaʻaú, ko e hā nai hono ʻuhinga ʻoku fuʻu fakatuʻutāmaki ai ʻa e fakaangá mo e kumi ʻo e fehālaakí?
ʻI he peesi 244–45, ʻoku fakamatala ai ʻa Palesiteni Sāmita ki hono fakamālōʻia ʻe Felenisisi M. Laimani e kau taki naʻa nau ngāué. Naʻe lelei fēfē nai kiate koe hano fakamālōʻia koe ʻe ha taha ʻi he loto-moʻoni? Kiʻi fakakaukau siʻi angé ki ha taha ʻoku totonu ke ke fakamālōʻia.
Naʻe akonaki ʻa Palesiteni Sāmita ʻo pehē “ko e angaʻofá ko e mālohi ia kuo foaki mai ʻe he ʻOtuá ke tau fakaava ʻaki ʻa e ngaahi loto ʻoku fefeká” (peesi 245). Ko e hā e ngaahi talanoa mei he folofolá ʻoku lava ke ke fakakaukau ki ai ke fakatātā ʻaki e tefitoʻi moʻoni ko ʻení? (Ki ha ngaahi fakatātā, vakai, Mātiu 9:10–13; ʻAlamā 20:1–27.)
Toe fakamanatu ʻa e talanoa ki he fefine naʻe ʻaʻahi ki heʻene tamasiʻi ʻi he falemahakí (peesi 246–48). Ko e hā nai ʻoku faʻa faingataʻa ai ke hangē ʻete tōʻongá ko e meʻa naʻe fai ʻe he faʻē ʻi he talanoá he taimi ʻoku hē atu ai haʻatau fānau? Fakalaulauloto ʻi he faʻa lotu ki he founga ʻe hanga ai ʻe he laumālie ʻo e angaʻofá mo e faʻa kātakí ʻo fakaleleiʻi ho vā mo e kau mēmipa ʻo homou fāmilí.

Ngaahi Potufolofola Fekauʻakí: Lea Fakatātā 15:1; Mātiu 18:15; Sione 8:2–11; ʻEfesō 4:29–32; 3 Nīfai 12:22–24; Tokāteline mo e Ngaahi Fuakava 121:41–46

Tokoni fakafaiakó: ʻI he ngaahi fealēleaʻaki fakakulupu īkí ʻoku “ ʻoange ai ha faingamālie ki ha fuʻu kakai tokolahi ke nau kau ʻi he lēsoní. Ko kinautolu fakatāutaha ʻoku ʻikai ke nau faʻa fie kau maí mahalo naʻa nau fie vahevahe ʻenau ngaahi fakakaukaú ʻi he fanga kiʻi kulupu īkí ʻa ia he ʻikai te nau lea ai ʻi muʻa ʻi he fuʻu kulupú kotoa” (ʻOku ʻIkai ha Ui ʻe Mahuʻinga Ange ʻi he Faiakó, 197).

“Naʻe teuteuʻi fakalongolongo pē ʻe heʻeku kuí ha inu lēmani peá ne ʻai ha ʻū ipu fakataha mo e siokí ʻi ha laulau ʻo ʻalu atu mo ia ki he kau tangata ngāué.”

“Moʻui ʻaki ʻa e ʻofá mo e angaʻofá koeʻuhí ke ʻi homou ngaahi ʻapí ʻa e melinó mo e lotú mo e loto fakafetaʻí.”