Vahe 19
Ngaahi Tāpuaki Fakatuʻasino mo Fakalaumālie mei he Lea ʻo e Potó
Naʻe foaki mai ʻe heʻetau Tamai Hēvaní ʻa e Lea ʻo e Potó ke tāpuakiʻi ʻaki kitautolu ʻa e sino moʻui lelei fakatuʻasinó mo teuteuʻi kitautolu ki he moʻui taʻengatá.
Mei he Moʻui ʻa Siaosi ʻAlipate Sāmitá
Naʻe puke ʻa Siaosi ʻAlipate Sāmita he mofi taifotí ʻi heʻene kei siʻí. Naʻe talaange ʻe he toketā naʻá ne sivi iá ki heʻene faʻeé ʻoku totonu ke tokoto maʻu ʻi ha uike ʻe tolu, ʻoua ʻe kai meʻakai fefeka, pea inu ha kofi. Ko e manatu ʻeni ʻa Palesiteni Sāmita ki ai kimui angé:
“ ʻI heʻene ʻalú, ne u talaange ki heʻeku faʻeé naʻe ʻikai ke u fie maʻu ʻe au ha kofi. Kuo akoʻi au ʻe he Lea ʻo e Potó ʻa ia naʻe fakahā ʻe he ʻEikí kia Siosefa Sāmitá, ke ʻoua te tau inu kofi.
“Naʻe fāʻeleʻi ʻe heʻeku faʻeé ha fānau ʻe toko tolu ki he māmaní pea naʻe mālōlō e toko ua. Naʻá ne fuʻu hohaʻa ʻaupito kiate au.”
Ka naʻe kole ʻa e tamasiʻi ko Siaosi ʻAlipate Sāmitá ke foaki hano tāpuaki fakataulaʻeiki, pea naʻe fai ʻeni ʻe heʻene faiako fakaʻapí.
“ ʻI he haʻu ʻa e toketaá he pongipongi hono hokó, kuó u vaʻinga atu au mo e fānau kehé ʻi tuʻa. Naʻá ne ʻohovale. Naʻá ne sivi au ʻo ʻiloʻi kuo ʻosi hoku mofí pea kuó u sai.
“Ne u fakamālō ki he ʻEikí ʻi heʻeku saí. Ne u ʻiloʻi fakapapau naʻá ne fakamoʻui au.”1
Naʻe fie maʻu ʻe Palesiteni Sāmita ke mahino ki he Kāingalotú ʻoku ʻikai ngata pē ʻe hono ʻomi ʻe he talangofua ki he Lea ʻo e Potó ʻa e moʻui lelei fakatuʻasinó ka mo e ngaahi tāpuaki fakalaumālie foki. Naʻa ne fai ʻi ha fakataha ʻa e lakanga fakataulaʻeikí he konifelenisi lahí e talanoa ki he palōfita ko Tanielá ʻi he Fuakava Motuʻá, ʻa ia naʻe ʻave pōpula ki Papilone pea fie maʻu ke ne kai e kakanoʻi manu ʻa e tuʻí mo inu e uaine ʻa e tuʻí:
“Ko e palōfita ʻa e ʻOtuá ʻa Taniela, pea naʻá ne hoko ko e palōfitá he naʻá ne tauhi e ngaahi fekau ʻa e ʻOtuá. ʻOku ou loto ke mou … foki mo e pōpoaki ko ʻení. Naʻe talangofua ʻa Taniela mo hono ngaahi kaungāmeʻá ki he ngaahi akonaki ʻa e ʻOtuá fekauʻaki mo e faʻahinga meʻakai mo e inu ʻoku totonu ke nau maʻú, pea nau fakafisi ke tali ʻa e meʻakai naʻe teuteuʻi ʻi he tēpile ʻa e tuʻí. [Vakai, Taniela 1:3–16.]”
Ne hoko atu e fakamatala ʻa Palesiteni Sāmitá ʻo pehē naʻe ʻikai ko e ʻuhinga pē naʻe fakahaofi ai e moʻui ʻa Tanielá ko ʻene talangofua ki he fono ʻa e ʻEikí ki he moʻui leleí ʻi he taimi naʻe moʻui aí, ka koeʻuhí foki he naʻá ne maʻu ha tāpuaki fakalaumālie maʻongoʻonga: “ko e fakamānava ʻa e Māfimafí.”2 [Vakai, fokotuʻu 1 he peesi 225.]
Ngaahi Akonaki ʻa Siaosi ʻAlipate Sāmitá
Ko e Lea ʻo e Potó ko ha faleʻi ia ʻi he ʻofa mei heʻetau Tamaí, ʻa ia ʻokú Ne ʻafioʻi ʻa e meʻa kotoa pē.
Te u lau atu ha konga ʻo e folofola ʻa e ʻEikí ki he Siasí ʻi he ʻaho 27 ʻo Fēpueli 1833.
“Ko ha Lea ʻo e Potó, ke ʻaonga ki he fakataha ʻo e kau taulaʻeiki lahi, kuo fakataha ʻi Ketilaní, pea mo e Siasí, kae ʻumaʻā foki mo e Kāingalotu ʻi Saioné—
“Ke ʻoatu ko e pōpoaki ʻofa; kae ʻikai ʻi he fekau pe kouna fakamālohi, ka ʻi he fakahā mo e lea ʻo e poto, ʻo fakahā atu ʻa e founga mo e finangalo ʻo e ʻOtuá ʻi hono fakahaofi fakasino ʻo e kau māʻoniʻoni kotoa pē ʻi he ngaahi ʻaho fakaʻosí.”
Kiʻi fakakaukau ange ki ai he taimi ní—“ ʻi hono fakahaofi fakasino ʻo e kau māʻoniʻoni kotoa pē ʻi he ngaahi ʻaho fakaʻosí.”
“ ʻOku foaki ia ko ha tefitoʻi moʻoni mo hano talaʻofa, ʻa ia ʻoku fakafeʻunga ki he ivi ʻo e vaivaí pea mo kinautolu ʻoku vaivai taha ʻi he kāinglotú kotoa pē, ʻa ia ʻoku faʻa ui pe lava ke ui ko e kau māʻoniʻoní.” [Vakai, T&F 89:1–3.]
Ne toki hoko atu e ʻEikí ʻo fakahā mai e ngaahi meʻa ʻoku lelei maʻatautolú, fakamatalaʻi mai ʻa e faʻahinga meʻakai ʻoku lelei ke tau kaí, peá ne ʻomi ha fakatokanga ki he niʻihi ʻo e ngaahi meʻakai ʻoku fakatuʻutāmaki tahá [vakai, T&F 89:5–17].
Hangē kiate au ko ha kakai monūʻia lahi kitautolu. … Kuo ʻaloʻofa mai e ʻEikí ke ne fakatokanga mo faleʻi kitautolu ʻi he ngaahi meʻa lahi.3
ʻOku ou lau e Lea ʻo e Potó ko ha faleʻi ʻa ʻetau Tamai ʻi hēvaní, ko hono finangaló ke hoko ʻEne fānaú ʻo hangē pē ko Iá. … ʻOku ou lau ia ko e faleʻi ʻa ha tamai ʻokú ne ʻiloʻi ʻa e meʻa ʻoku ou fie maʻú peá ne pehē mai: “ ʻE hoku foha, ʻoku ʻikai lelei e ngaahi meʻá ni kiate koe, pea kapau te ke fakaʻehiʻehi mei ai, te u foaki atu ʻa e takaua ʻo hoku Laumālie Māʻoniʻoní mo e fiefiá lolotonga hoʻo moʻui ʻi he māmaní mo e moʻui taʻengatá ʻi he ngataʻangá.” Meʻa ngali vale ia ke u kai ʻa e ngaahi meʻa ko ʻeni kuo tapuí lolotonga ʻeku ʻiloʻi pau ko e faleʻi ia ʻa e ʻEikí ke u fakamamaʻo meí he ngaahi meʻa ko iá. Te u ongoʻi ʻoku ou malaʻia kapau te u kai kinautolu he ʻoku talamai ʻe Ia ʻokú ne ʻilo lahi ange ʻi ha toe tahá ʻoku nau fakatuʻutāmaki, peá Ne ʻosi fakatokanga mai ke ʻoua naʻá ku kai. …
… Naʻá Ne fakakaukau ʻoku mahuʻinga feʻunga ia ke fakahā mai, pea ke fakatokanga kiate kitautolu, pea kapau ʻoku pehē ʻe Ia ʻokú ne ʻafioʻi e meʻa kotoa peé ʻoku ʻaonga ke ʻomi ha faleʻi mo e fakahinohino fekauʻaki mo e ngaahi meʻa fakatuʻasino ko ʻení, pea mo e totonu ko ia ke tau tokanga, ʻa kitautolu ʻoku ʻikai ke tau ʻiloʻi e meʻa ʻe hoko mai he kahaʻú, ʻo fai ki he faleʻi fakalangi ko iá. ʻOku ou ongoʻi pē ʻoku ʻi he Lea ʻo e Potó ha fono te ne hakeakiʻi e Kāingalotú mo hiki hake ʻa kinautolu ke māʻolunga ange ʻiate kinautolu ʻoku ʻikai ke nau tauhi ki aí.4
ʻOku ʻi ai e ongoongolelei ʻo Sīsū Kalaisí ke fakamoʻui e laumālié, pea ko e sinó ko e fale ia ʻo e laumālié, ke maʻu ʻa e fiefia taʻengatá. Meʻa fakavalevale ia kapau te tau fakavaivai ki he ngaahi ʻulungāanga mo e angafai ʻa māmaní! … Naʻe [fakatokanga] mai ʻa ʻetau Tamai Hēvaní ʻi heʻene angaleleí mo ʻEne ʻofá: “Kuó u ʻosi tomuʻa fakatokanga atu fekauʻaki mo e ngaahi kovi pea mo e ngaahi taumuʻa ʻe ʻi he loto ʻo e kau tangata angatuʻu ʻi he ngaahi ʻaho fakaʻosí, ʻaki hono foaki kiate kimoutolu ʻa e lea ʻo e poto ko ʻení ʻi he fakahā.” (T&F 89:4.) … Ko e taumuʻa ʻo e Siasi ʻo Sīsū Kalaisí ke teuteuʻi kitautolu ke mahino ʻa e fakaʻofoʻofa ʻo e moʻuí ʻo hangē ko e founga ʻoku fakahā mai ʻe he ʻEikí ke tau moʻui ʻakí, ʻi hono talamai e founga ke tau fakaʻehiʻehi ai mei he ngaahi meʻa ʻoku nau fakaʻauha ʻa e māmaní.5
ʻOkú ke tui naʻe ʻomai ʻe he ʻEikí ʻa e Lea ʻo e Potó kiate kitautolu? ʻOkú ke fakakaukau fakamoʻomoʻoni ʻokú ne ʻafioʻi e meʻa ʻoku lelei maʻatautolú? ʻOkú ke pehē ʻe fiefia kapau te tau tauhi ʻa e fono ko iá? ʻOkú ne pehē ʻio. ʻOkú ke pehē ko ʻene moʻoni?6
ʻE ngaahi tokoua mo e tuofāfine, he ʻikai lava ke tau taʻetokanga ki he Lea ʻo e Potó pea ʻikai tauteaʻi kitautolu. Naʻe foaki mai ia ko ha faleʻi mo e talatalaifale, ʻo ʻikai ko ha fekau pe kouna fakamālohi, ka ko ha lea ʻo e potó mei heʻetau Tamaí, ki hono fakahaofi hotau sinó mo hono teuteuʻi hotau laumālié ki he moʻui taʻengatá.7 [Vakai, fokotuʻu hono 2 he peesi 225.]
ʻOku talaʻofa ʻe he ʻEikí ʻa e moʻui lelei ʻo e ʻatamaí mo e sinó kiate kinautolu ʻoku talangofua ki he Lea ʻo e Potó.
ʻOku ou fakamālō ki he Lea ʻo e Poto fakaʻofoʻofa ko iá, neongo ʻene faingofuá, pea hangē ko e folofola ʻa e ʻEikí, “ ʻa ia ʻoku fakafeʻunga ki he ivi ʻo e vaivaí pea mo kinautolu ʻoku vaivai taha ʻi he kāinglotú kotoa pē, ʻa ia ʻoku faʻa ui pe lava ke ui ko e Kau Māʻoniʻoní.” Te u kiʻi tuʻu siʻi ai ʻo fehuʻi … , ʻoku tau taau nai ke ui kitautolu ko e Kau Māʻoniʻoni? Ko kinautolu kotoa pē ʻoku loto ke ui kinautolu ko e Kau Māʻoniʻoní, ʻoku totonu ke nau tauhi e Lea ʻo e Potó. Pea ko e hā hono mahuʻinga kiate kitautolú? ʻOkú ne ʻai ke tau fiefia ʻi he moʻuí, ʻokú ne toʻo atu ʻa e ngaahi ʻahu kona ʻe mānava ʻaki ʻe he kakaí ko e tupu mei he ifi tapaká. ʻOkú ne ʻai ke tau fakaʻehiʻehi mei he tūkunga fakatokakovi ʻoku tupu mei hono fakateka ʻo e tapaká. Kapau te tau tauhi ia, te ne fakahaofi kitautolu mei he vaivai ʻa e sinó tupu mei heʻetau ʻai ki ai e [ngaahi faitoʻo kona tapu] ʻoku ʻi he tií mo e kofí, pea mo e ngaahi ola fakatuʻutāmaki ʻo e kava mālohí. …
ʻOku ʻikai ngata pē ʻi hono talamai ʻe heʻetau Tamai Hēvaní ʻa e meʻa ʻoku totonu ke tau fakaʻehiʻehi mei aí, ka ko ia ke tau fakaʻaongaʻi pea ʻaonga kiate kitautolú. Naʻá ne fakahā mai ʻoku lelei ki he tangatá ʻa e faʻahinga kotoa ʻo e kēlení, ʻa e ngaahi lauʻi ʻakau fakatupu moʻui leleí, ʻa e fua ʻo e vainé, mo e alā meʻa pehē. ʻA e kakanoʻi manú mo e manupuna ʻo e ʻataá; pea ʻe lava ke tau fakaʻaongaʻi e ngaahi meʻá ni ʻi he fakapotopoto mo loto-fakafetaʻi; pea ʻoku ou fie fakamamafaʻi atu ʻa e loto-fakafetaʻí.8
Ne mau fakatokangaʻi ʻoku hanga ʻe hono tauhi ʻo e ngaahi lao ʻo e moʻui leleí ʻo ʻomi ʻa e ivi fakaʻatamai mo fakatuʻasino, pea mau ʻiloʻi ʻoku ʻikai moʻui lelei e ʻatamaí mo e sinó ʻi he talangataʻa ki he lao ko iá. Ko hotau Tupuʻangá, ʻa e Tamai hotau laumālié, naʻá ne ʻomi ʻa e faingamālie ke tau nofo ʻi he māmaní, naʻá ne talamai ʻoku ʻi ai e ngaahi meʻa pau ʻoku lau ki ai ʻi he fakahā ko iá ʻoku ʻikai lelei kiate kitautolu. Naʻá ne fai ha ngaahi talaʻofa mahuʻinga kiate kitautolu kapau te tau talangofua ki he lao ko ʻení,—ngaahi talaʻofa ʻo e potó, ʻo e moʻui leleí mo e ivi mālohi, pea ʻe fakalaka ʻa e ʻāngelo fakaʻauhá ʻiate kitautolu ʻo ʻikai tāmateʻi ʻ a kitautolu, ʻo hangē ko e fānau ʻa ʻIsilelí [vakai, T&F 89:18–21].9 [Vakai, fokotuʻu hono 3 he peesi 225.]
ʻOku fakamālohia ʻetau tuí mo e tuʻunga fakalaumālié ʻe he talangofua ki he Lea ʻo e Potó.
ʻOku ou tui ʻaupito naʻe ʻikai ʻomi ʻe he ʻEikí ʻi Heʻene ʻaloʻofá ʻa e Lea ʻo e Potó kiate kitautolu koeʻuhi pē ke tau moʻui lelei lolotonga ʻetau ʻi māmaní, ka ke fakamālohia ʻetau tuí, ke fakatupulaki ʻetau fakamoʻoní ki hono faka-ʻOtua ʻo e misiona ʻa hotau ʻEikí, ʻo lava ke tau mateuteu lelei ange ai ke foki ki hono ʻafioʻangá ʻo ka ʻosi ʻetau ngāue ʻi hení. ʻOku ou manavasiʻi ʻoku ʻi ai e taimi ʻoku ʻikai faʻa fakatokangaʻi ai ʻe kitautolu ngaahi foha mo e ngaahi ʻofefine ʻo Saioné ʻa hono mahuʻinga ʻo e pōpoaki maʻongoʻongá ni ki māmaní.10
ʻOku ou fie lea kiate kimoutolu, ki heʻeku fakakaukaú, neongo ʻe pehē ʻe ha kau tangata ʻe niʻihi ko e kiʻi meʻa siʻi pē hono fakaʻaongaʻi ʻo e tapaká, ka kuo hoko ia ko ha meʻa ke ne fakaʻauha ʻenau moʻui fakalaumālié, ko ha meʻa ke ne fakamālohiʻi ke mavahe meiate kinautolu ʻa e takaua ʻo e Laumālie ʻo ʻetau Tamaí, kuó ne fakamavaheʻi kinautolu mei he feohi mo ha kakai tangata mo fefine lelei, pea kuó ne fakatupu hano taʻetokaʻi mo tukuakiʻi kinautolu ʻe he fānau kuo fāʻeleʻi maí, kā ʻe kei pehē pē ʻe he tēvoló ia ki he tangatá, Siʻi, ko e kiʻi meʻa leka pē ia!11
ʻOku tau moʻui ʻi ha kuonga kuo toe folofola ai e ʻEikí ki Hono kakaí. ʻOku mahino lelei kiate kitautolu kāingalotu ʻo e Siasí kuo tau fai ki he ngaahi meʻa ʻoku fie maʻu ʻe heʻetau Tamai ʻi hēvaní, ʻoku moʻui ʻa e ʻOtuá pea ʻokú Ne fakapaleʻi ʻa kinautolu ʻoku tauhi faivelenga kiate Iá. ʻOku mahino kiate kitautolu kuó ne foaki mai ha ngaahi lao mo e ngaahi tuʻutuʻuni pau ke puleʻi ʻaki kitautolu ʻi he moʻuí ni, pea ʻokú Ne fiefia ʻi heʻetau talangofua ki he ngaahi meʻa ʻokú Ne fie maʻú, pea ʻe muimui mai ʻa e ngaahi tāpuaki naʻe talaʻofa ʻakí ʻi heʻetau talangofuá; ka kapau he ʻikai ke tau talangofua ki Heʻene ngaahi akonakí, kapau te tau taʻetokanga ki Heʻene ngaahi faleʻi fakapotopotó, ʻoku tau maumauʻi e ngaahi faingamālie he ʻikai ke tau toe maʻu. ʻOku ou ongoʻi ʻa hono mahuʻinga ke tauhi ʻe he Kāingalotú e lao ko ʻení [ʻa e Lea ʻo e Potó]. ʻOku ou tui ʻe lahi ange ʻa e tui ʻe maʻu ʻe he Kāingalotú ʻi haʻanau talangofua ki ai. ʻOku tau lau ʻi he ngaahi akonaki ʻa Molomoná ʻoku pehē ai kapau naʻe ʻikai hoko ha ngaahi meʻa mana ʻi he lotolotonga ʻo e kakai ko iá, naʻe tupu ia mei he taʻetuí; peá ne toe talaange kiate kinautolu, kapau ʻoku ʻikai ke ʻi ai ha tui, “ ʻoku fakamanavahē ʻa e tuʻunga ʻoku ʻi ai ʻa e tangatá.” [Vakai, Molonai 7:37–38.] Kapau te tau maumauʻi e finangalo ʻo e ʻEikí ʻoku tau ʻiló, ʻoku fakanatula pē ʻa e holo ʻetau tuí, koeʻuhí he ʻikai fefaʻuhi maʻu ai pē ʻa e Laumālié mo kitautolu. …
… ʻOku ou tui pau kuo fakaʻau ke siʻisiʻi e tuí ʻi he loto ʻo e niʻihi ʻo hotau kakaí tupu mei he taʻetokanga ki he fie maʻu faingofua ko ʻení—pea ka toe lahi ange hono tauhi fakakātoa ʻo e Lea ʻo e Potó, ʻe toe lahi ange ʻa e tui ʻa e Kāingalotú, pea lahi mo e poto ʻe maʻú tupu mei ai; he ʻi he talangofua ki aí, ʻe anga ʻaki leva ʻa e talangofua ki he ngaahi fono kehe ʻa ʻetau Tamaí, pea ʻoku pau ʻa e tāpuaki ʻoku maʻu ʻi hono tauhi ʻo e fono takitaha.12 [Vakai, fokotuʻu hono 3 mo e 4 he peesi 225.]
ʻOku tau teuteu ki he moʻui taʻengatá ʻaki ʻa e talangofua ki he Lea ʻo e Potó.
ʻOku ou faʻa fifili he taimi ʻe niʻihi pe ʻoku ʻiloʻi koā ʻe he Kāingalotú kuo foaki mai ʻa e [Lea ʻo e Potó] ki hotau hakeakiʻí; ʻo ʻikai ki hotau tāpuaki fakatuʻasinó pē, ka ke teuteuʻi kitautolu ki he moʻui fakalaumālié. …
ʻOku talamai ko e nāunau ʻo e ʻOtuá ko e ʻatamai potó [vakai, T&F 93:36], pea ʻoku tau saiʻia kotoa pē ʻi he kakai tangata mo e kau fafine ʻoku ʻatamai potó, ko ia ʻoku totonu ai ke tau fakatoka ʻa e fakavaʻe ke fakatupulaki ʻa e mālohi fakaʻatamaí ʻo ʻikai ha meʻa ke ne fakavaivaiʻi ia. ʻOku hā māhino ʻi he moʻui ʻa ha niʻihi ʻoku ʻikai ke nau maʻu ʻa e mālohi fakaʻatamai ʻe lava ke nau maʻú, koeʻuhi pē ko ʻenau fakaʻaongaʻi hohoko ʻa e ngaahi meʻa kuo folofola ʻa ʻetau Tamaí ʻoku ʻikai leleí; ʻoku tupu ai ʻa e siʻisiʻi ange ʻa e ʻatamai potó, pea ʻikai ke nau teuteu ki he moʻui Taʻengatá ʻo hangē ko ia ʻoku totonu ke nau feinga ki aí.13
Kapau ʻoku tau tui ko Sīsū ʻa e Kalaisí ʻo hangē ko ʻetau laú, pea ko e fānau kitautolu ʻa ʻetau Tamai Hēvaní, ta ʻoku totonu ke tau tokanga ke taau e meʻa ʻoku tau faí mo e ngaahi sino ʻoku tau maʻú, ʻa ia naʻe fakatupu ʻi he tatau ʻo e ʻOtuá. Ko hotau toko fiha nai ʻoku tau ʻiloʻi ʻoku tau ʻuliʻi e temipale ʻo e laumālié ʻi heʻetau ʻai ki hotau sinó e ngaahi meʻa kuo tapui ʻe heʻetau Tamaí? Ko hotau toko fiha nai ʻoku tau tuʻu hifo ʻo fakakaukau ko e taimi ʻoku tau fakavaivai ai ki he kakanó ʻoku mole meiate kitautolu ʻa e ngaahi faingamālie ʻoku fakatatali mai ʻi he kahaʻú, ʻo tau taʻofi ai kitautolu mei he ngaahi tāpuaki kuo tuku fakatatali ʻe he ʻEikí maʻá e kakai faivelengá?14
Kapau te tau talangofua ki he lao ko ʻeni ʻoku fakafeʻunga ki he ivi ʻo kinautolu ʻoku vaivai taha ʻiate kitautolú, ʻe hoko ia ko ha fakavaʻe ʻe ala fakalahi atu ki ai ʻaki ʻa e ngaahi tāpuaki maʻongoʻonga lahi ʻe hōifua ʻa ʻetau Tamaí ke foaki mai, pea kapau te tau talangataʻa he ʻikai haʻatau totonu ki ai pea ʻikai lava ke tau maʻu ia. ʻE lava fēfē ke ongoʻi tonuhia ʻe hatau taha ʻi heʻetau taʻetokanga ki ha lao faingofua ʻa e ʻOtuá kuó Ne folofola tonu mai ʻe lava ʻe ha taha pē ʻo talangofua ki ai? ʻE lava nai ke tau ʻamanaki atu ke tauhi ia ko ha lao māʻolunga ange, pea lava ke maʻu ai ʻa e hakeakiʻí, ʻo kapau he ʻikai ke tau tauhi ʻa e meʻa faingofua ko ʻeni ʻoku fie maʻu maí?15 [Vakai, fokotuʻu hono 3 he peesi 225.]
Ko e founga lelei taha ke akoʻi ai hotau ngaahi fāmilí ke talangofua ki he Lea ʻo e Potó ko ʻetau talangofua ʻatautolu.
Kapau e tauhi ʻe he ngaahi tamaí mo e ngaahi faʻeé ʻa e Lea ʻo e Potó, te nau ʻoange ki heʻenau fānaú ha ngaahi ʻulungāanga lelei mo e mālohi naʻe ʻikai ke nau mei lava ʻo ʻoange kiate kinautolu. ʻOku ou tui ʻe ʻi he loto mo e ʻapi ʻo kinautolu ʻoku nau tauhi ʻa e fonó ni ʻa e takaua ʻo e Laumālie ʻo ʻetau Tamaí, pea ʻe ʻoatu ʻa ʻenau holi ke talangofuá ki heʻenau fānaú. … Ko ha foʻi moʻoni ia ʻoku ʻiloʻi lelei ʻa e fuʻu fakatuʻutāmaki ʻo e tapaká ki he ʻuto ʻo e fānaú, ʻo ne maumauʻi ʻa e manatú pea fakatuaiʻi e ngaahi ongó; ʻoku fuʻu fakatuʻutāmaki ʻaupito foki e ngāue ʻa e kava mālohí ki he ʻuto ʻo e fānau kei talavoú; ʻokú ne taʻofi ʻe ia ʻa ʻenau holi ke ʻulungāanga fakaʻapaʻapa mo ʻulungāanga totonú, pea hoko atu ai ki he ʻulungāanga taʻemaʻá mo e fai hiá. … Kuo tuku mai ʻe he ʻEikí ʻa e fonó ni ʻi he angalelei mo e ʻofa, pea talaʻofa mai ha ngaahi tāpuaki pau ʻo kapau te tau talangofua ki Heʻene akonakí. ʻE ngaahi tokoua mo e tuofāfine, ʻoku ou ongoʻi pē ke enginaki atu ke mou akoʻi ʻeni ʻi homou ngaahi ʻapí. Taki ki ai e tokanga ʻa hoʻomou fānau kei tupu haké, pea ki he pale ʻoku makatuʻunga ʻi he talangofua ki aí.
Te u talaatu ko e fakamoʻoni lelei taha pē ʻo ʻetau tui ki he fono ko iá, ʻa ʻetau tui ʻoku mei he ʻOtuá iá, ko haʻatau tauhi maʻu pē ki ai ʻi heʻetau moʻuí. ʻE lava ke tau malangaʻi ia ʻi he ʻaho kakato, ka ʻo ka tau maumaufono ʻi hono fakahoko iá, ʻe fakatuʻutāmaki ʻetau tā sīpingá kiate kinautolu ʻoku tau ʻofa lahi taha aí, he te nau ongoʻi te nau malu pē ʻi heʻenau muimui ʻi heʻetau takí.16
ʻOku ou kole atu, mou fekumi ki he Lea ʻo e Potó ʻi he faʻa lotu. ʻOua naʻa mou laukonga pē ʻo kau ki ai; fekumi ki ai ʻi he faʻa lotu. ʻAi ke mou ʻiloʻi e meʻa naʻe foaki mai ai ʻe heʻetau Tamai Hēvaní. Naʻá ne foaki mai ia mo ha talaʻofa ʻe lōloa ange ai ʻetau moʻuí mo tau fiefia, ʻo ʻikai ʻi heʻetau taʻetauhi ki aí, ka ʻi haʻatau tauhi ki ai. Lau ʻa e Lea ʻo e Potó ke fanongo ho fāmilí pea tā e faʻifaʻitakiʻangá. Kapau te tau fai ia ʻe hokohoko atu e tupulaki ʻa Saioné. Kapau te tau fai ia ʻe hokohoko atu e hoko ʻa e Siasi ʻo e Lami ʻa e ʻOtuá ko ha mālohi ki he leleí ʻi māmani.17 [Vakai, fokotuʻu hono 5 he peesi 226.]
Ngaahi Fokotuʻu ki Hono Ako mo Akoʻí
Fakakaukauʻi e ngaahi fakakaukau ko ʻení lolotonga hoʻo ako e vahé pe teuteu ke akoʻí. Ki ha toe tokoni makehe, vakai ki he peesi vii–ix.
-
ʻI he peesi 217, ʻoku fakamatala ai ʻa Palesiteni Sāmita kau ki he talanoa ki he ʻikai fie kai mo inu ʻa Taniela ʻi he kakanoʻi manu mo e uaine ʻa e tuʻí. Lau ʻa eTaniela vahe 1, peá ke fakakaukau ki ha meʻa naʻá ke aʻusia ʻa ia naʻe ʻamanaki ai ke ke kai pe inu ha meʻa naʻe tapui ʻi he Lea ʻo e Potó. Ko e hā ha niʻihi ʻo e ngaahi founga ke ke talangofua ai ki he Lea ʻo e Potó ʻi ha ngaahi tūkunga pehē ka ke kei anga fakaʻapaʻapa ai ki he niʻihi kehé?
-
Toe fakamanatu ʻa e konga ʻuluaki ʻo e ngaahi akonakí (peesi 218–20). ʻE lava fēfē ke ke fakaʻaongaʻi e ngaahi akonakí ni ke tokoniʻi ʻaki ha taha ʻoku faingataʻaʻia ʻi he talangofua ki he Lea ʻo e Potó?
-
Toe fakamanatu nounou e peesi 220–21), ʻa ia ʻoku fakamatala ai ʻa Palesiteni Sāmita ki ha niʻihi ʻo e ngaahi tāpuaki ʻoku talaʻofa ʻaki kiate kinautolu ʻoku talangofua ki he Lea ʻo e Potó (vakai foki, T&F 89:18–21). Kuo fakahoko fēfē nai e ngaahi talaʻofá ni ʻi hoʻo moʻuí? Ko e hā mo ha toe ngaahi tāpuaki kuó ke maʻu ʻi hoʻo moʻui ʻaki e fonó ni?
-
ʻI he peesi 222–23, ʻoku talaʻofa mai ai ʻa Palesiteni Sāmita, ʻi he talangofua ki he Lea ʻo e Potó, ʻe “anga ʻaki leva ʻa e talangofuá.” Ko e hā nai hono ʻuhinga ʻa e kupuʻi lea ko ʻení kiate koé?
-
ʻI hoʻo fakakaukaú, ʻoku tokoni fēfē nai ʻa e talangofua ki he Lea ʻo e Potó ki he Siasí ke “hoko ko ha mālohi ki he leleí ʻi māmani”? peesi 224. Ako ʻi he faʻa lotu e vahe 89 ʻo e Tokātelilne mo e Ngaahi Fuakavá ʻo hangē ko e fokotuʻu mai ʻe Palesiteni Sāmitá, pea fakalaulauloto ki he meʻa ʻe lava ke fai ke ke talangofua kakato ange ai ki he Lea ʻo e Potó.
Ngaahi Potufolofola Fekauʻakí: 1 Kolinitō 6:19–20; ʻAlamā 34:36; Tokāteline mo e Ngaahi Fuakava 29:34; 130:20–21
Tokoni fakafaiakó: “Te ke lava ʻo fakahaaʻi hoʻo ʻofa ki he niʻihi ʻokú ke akoʻí ʻaki haʻo fakafanongo lelei [kiate] kinautolu mo mahuʻingaʻia fakamātoato ʻi heʻenau moʻuí. ʻOku maʻu ʻe he ʻofa faka-Kalaisí ha mālohi ke fakamolū e lotó mo tokoniʻi e kakaí ke nau fakaongoongo pea talangofua ki he ngaahi fanafana ʻa e Laumālié” (ʻOku ʻIkai ha Ui ʻe Mahuʻinga Ange ʻi he Faiakó, 50).
Naʻe akonaki ʻa Palesiteni Sāmita ʻo pehē naʻe taau ʻa Taniela mo e “fakamānava ʻa e Māfimafí” koeʻuhi ko ʻene tauhi ki he fono ʻo e moʻui leleí ʻi hono kuongá.
“ ʻOku ʻikai ngata pē ʻi hono talamai ʻe heʻetau Tamai Hēvaní ʻa e meʻa ʻoku totonu ke tau fakaʻehiʻehi mei aí, ka ʻokú ne talamai foki mo e meʻa ke tau fakaʻaongaʻi ke ʻaonga kiate kitautolú.”