Vahe 22
Ko Hono ʻOhake ʻo e Fānaú ʻi he Māmá mo e Moʻoní
Kuo fakafatongia ʻaki ʻe he ʻEikí ʻa e ngaahi mātuʻá ʻa hono akoʻi ʻo e ongoongoleleí ki heʻenau fānaú ʻi he lea mo e faʻifaʻitakiʻanga.
Mei he Moʻui ʻa Siaosi ʻAlipate Sāmitá
ʻI he ofi ke mālōlō ʻa Palesiteni Siaosi ʻAlipate Sāmitá, naʻá ne manatu ki heʻene tupu haké mo e ngaahi akonaki ʻa ʻene ongo mātuʻá:
“Naʻe fāʻeleʻi au ʻi ha ʻapi masiva. … Naʻe masivesiva e nofoʻanga ʻo ʻeku ongomātuʻá, ka ʻoku ou fakafetaʻi ki hoku Tupuʻangá mo fakamālō kiate ia ʻaki hoku lotó kotoa ʻi heʻene ʻomai au ki hona ʻapí.
“Naʻá ku tupu hake ʻi Sōleki Siti. Naʻe papitaiso au ʻi Siti Kiliki (City Creek) ʻi hoku taʻu valú. Naʻe hilifakinima au ko e mēmipa ʻo e Siasí ʻi ha houalotu ʻaukai ʻi he Uooti Hongofulu Mā Fitú, peá u ʻilo kei siʻi pē ko e ngāue ʻeni ʻa e ʻEikí. Naʻá ku ʻiloʻi naʻe moʻui ha kau palōfita ʻi he māmaní. Naʻá ku ʻiloʻi ʻe tākiekina ʻe he laumālie ʻo e Māfimafí ʻa kinautolu naʻe moʻui taau ke maʻu iá. …
“ ʻOku ʻikai te u ʻilo ʻe au ha tangata ʻi he māmaní kotoa ʻoku totonu ke lahi ange ʻene loto fakafetaʻí ʻiate au . ʻOku ou fakamālōʻia hoku tupuʻangá, fakamālō ko ha ongomātuʻa ne na akoʻi mai ʻa e ongoongolelei ʻo Sīsū Kalaisí mo tā ʻa e faʻifaʻitakiʻanga ʻi hona ʻapí. Kapau kuó u fai ha meʻa naʻe ʻikai totonu ke u fai ʻi heʻeku moʻuí, naʻe ʻikai ko ha meʻa ia naʻá ku ako ʻi he ʻapi ʻo ʻeku faʻeé. ʻOku fie maʻu ha faʻē kātaki lahi ia ʻi ha fāmili ʻoku tokolahi ʻenau fānaú, ka naʻá ne kātakiʻi maʻu pē kimautolu. Naʻá ne fiefia mo angaʻofa mo ʻofa maʻu pē.”1
Naʻe feinga ʻa Siaosi ʻAlipate Sāmita ke muimui ʻi hono ʻapi ʻoʻoná ʻi he faʻifaʻitakiʻanga ʻa ʻene mātuʻá ʻo faiako ʻaki ʻa e faʻa kātakí mo e ʻofá. Naʻe manatu hono ʻofefine ko ʻEitá ki ha meʻa naʻe hoko ʻi heʻene kei finemuí:
“Naʻá ne faleʻi hokohoko kimautolu ʻi homau ʻulungāangá, ʻo fakamamafaʻi mai ʻa e faitotonú mo e faileleí. ʻOku ou manatu ki he ʻaho ʻe taha ne u foki mai ai mei heʻeku ako tā pianó pea ngalo ia he tangata tānaki totongi he meʻalele uta kakaí ke tānaki ʻeku totongí. … Naʻe fakalaka hake pē ia ʻia au, pea ne u aʻu ki ʻapi ʻoku ou kei toʻotoʻo pē ʻeku sēnití, pea naʻá ku fiefia lahi heʻeku heka taʻetotongí.
“… Ne u lele fiefia ki he Tangataʻeikí ke talaange ʻeku monūʻiá. Naʻá ne fanongo fakalongolongo pē ki heʻeku talanoá. Naʻe kamata ke u fakakaukau ko e meʻa lelei kuo hoko kiate aú. … Ne u ʻilo pau naʻe ʻikai ʻilo ʻe he tangata tānaki totongí ia kuo teʻeki totongi ʻeku heká, ko ia naʻe lelei pē meʻa kotoa.
“ʻI he ʻosi ʻeku talanoá, naʻe pehē mai ʻe he Tangataʻeikí, “Taʻahine, neongo naʻe ʻikai ʻiloʻi ʻeni ʻe he tangata tānaki totongí, ka ʻokú ke ʻiloʻi peá u ʻiloʻi pea ʻoku ʻafioʻi ʻe he Tamai Hēvaní. Ko ia, ʻoku kei ʻi ai pē ʻa e toko tolu kuo pau ke nau ongoʻi fiemālie ʻokú ke totongi kakato ki hoʻo heká.’”
Naʻe foki ʻa ʻEita ki he tuliki halá ʻo totongi ʻene heká ʻi he foki mai ʻa e meʻalele uta kakaí. Naʻá ne fakahā kimui ʻa ʻene fakamālō ʻi he meʻa naʻe fai ʻe heʻene tamaí: “ ʻOku ou fakamālō lahi koeʻuhi ko ha Tamai fakapotopoto ʻo fakamahinoʻi mai kiate au ʻeku fehālaakí, he kapau naʻe ʻikai ke fakatokangaʻi, ne u mei pehē pē ʻe au naʻe sai pē ia ki ai peá u feinga ke fai ha toe meʻa tatau pē ʻi ha taimi kehe.”2 [Vakai, fokotuʻu 1 he peesi 263.]
Ngaahi Akonaki ʻa Siaosi ʻAlipate Sāmitá
ʻOku maʻu ʻe he mātuʻá ʻa e tefitoʻi fatongia ke akoʻi ʻa e ongoongoleleí ki heʻenau fānaú.
Ko e taha ʻo e ngaahi tāpuaki maʻongoʻonga mo lahi taha te mou maʻú ʻe maʻu ia kapau te mou akoʻi ʻa e ngaahi laumālie fili ko ʻeni ʻo hangē ko ia ʻoku totonu ke mou faí, ʻa ia kuo fekauʻi mai ʻe heʻetau Tamai Hēvaní ki he māmaní ʻi he ngaahi ʻaho kimui ní. … ʻOua naʻa mou tuku ke akoʻi hoʻomou fānaú ʻe he ngaahi ʻapiako ʻa e puleʻangá. ʻOua naʻa mou tuku ke fai honau akoʻí ʻe he Palaimelí, ʻe he Lautohi Faka-Sāpaté, ʻe he [ngaahi houalotu ʻa e Siasí maʻá e toʻu tupú]. Te nau tokoni lelei atu kiate kimoutolu ka mou manatuʻi naʻe folofola tonu mai e ʻOtuá, ko e ngaahi mātuʻa ko ia ʻoku ʻikai ke nau akoʻi ʻenau fānaú ke tui ki he ʻOtuá, fakatomala pea papitaiso ʻi he hilifaki ʻo e nimá ʻi he hokosia honau taʻu valú, ʻe ʻi he ʻulu ʻo e mātuʻá ʻa e angahalá [vakai, T&F 68:25–28]. Ngaahi tokoua mo e tuofāfine, ʻoku ʻikai ko ha fakamanamana ʻeni, ko e faleʻi ʻofa mo angaʻofa ia ʻa ʻetau Tamai Hēvaní ʻa ia ʻokú ne ʻafioʻi ʻa e meʻa kotoa pē pea mahino kiate ia mo ne ʻafioʻi ʻa e meʻa ʻe hokó ʻi he taimi ʻoku tuku ai ke tupu hake ʻa e fānaú ʻo ʻikai akoʻi kinautolú.3
ʻOku ou tokanga lahi ke mahino ki he ʻatamai ʻo e mātuʻa kotoa pē ʻi Saione ʻa e meʻa ʻoku ʻamanaki ke u lea ʻakí, pea ko ʻeni ia, neongo kuo foaki mai kotoa ʻe he ʻEikí ʻa e ngaahi ʻapiako fakaʻofoʻofá ni, neongo kuo tokoni lahi ʻa e saienisí ke tau fiemālie pea tāpuekina ai kitautolu, neongo kuo teuteuʻi ʻe he Siasí ʻa e ngaahi feituʻu ʻe lava ke ʻave ki ai ʻetau fānaú ke akoʻi e ongoongolelei ʻo Kalaisí kiate kinautolu, ʻoku ʻikai toʻo ai meiate koe pe ko au ʻa e fatongia mo e tufakanga ʻoku tuku mai ʻe heʻetau Tamai Hēvaní ki hono akoʻi ʻetau fānau ʻatautolú. …ʻOku ʻikai feʻunga hono akoʻi pē ki heʻeku fānaú ʻa e tuí, fakatomalá mo e papitaisó, pea mo e hilifaki ʻo e nimá ke maʻu ʻa e meʻafoaki ʻo e Laumālie Māʻoniʻoní ʻi he ngaahi houalotú. Kuo fekau ʻe heʻeku Tamai ʻi hēvaní ke u fai ia ʻe au.4
He ʻikai lava ʻe ha taha kehe ʻo fai ʻa e konga kuo tuku mai ʻe he ʻOtuá kiate kitautolu ngaahi mātuʻá. Naʻa tau toʻo kiate kitautolu ʻa e tufakangá ʻi heʻetau ʻomai ʻa e fānaú ki he māmaní. He ʻikai lava ke tau hilifaki atu ʻa e fatongia ko iá ki ha houalotu. Ko e fatongia ia ʻotautolu. … ʻOku ʻiate koe pea ʻiate au ʻa e tufakanga ʻuluaki mo muʻomuʻa taha ke ʻoua naʻa tau faleʻi pē mo akonakiʻí ka ke tau akoʻi kinautolu ʻi he faʻifaʻitakiʻanga, ʻi hono fakamoleki ha taimi feʻunga mo kinautolu ʻoku tau ʻofa aí, ʻa e fānau tangata mo fefine ko ʻení, ke ʻoua naʻa taki atu ʻa kinautolu ki ha …ngaahi hala kuo tapui.5
Fakatahaʻi mai homou fāmilí, pea kapau naʻe teʻeki ai ke mou fakahā ke mahino kiate kinautolu ʻa e ngaahi taumuʻa ʻo e moʻuí mo ha ʻilo ʻo e Ongoongolelei ʻo hotau ʻEikí, fai ia he taimí ni, he ʻoku ou talaatu kiate kimoutolu ʻi heʻeku hoko ko e tamaioʻeiki ʻa e ʻEikí, ʻoku nau fie maʻu ia he taimí ni pea te nau fie maʻu ia mei he taimí ni ʻo hokohoko atu.6 [Vakai, fokotuʻu hono 2 he peesi 263.]
Kuo pau ke ʻoua naʻa tupu mei he ngaahi meʻa kehe ʻoku tau manako aí ha ngalo ʻiate kitautolu hotau fatongia ke akoʻi ʻetau fānaú.
ʻOku talamai ʻi he tohi ʻa Luké ʻe hokosia e taimi ʻe fakakāsia ai ʻa e tangatá ʻe he tokanga mamahi mo e koloa mo e fiefia ʻi māmaní [vakai, Luke 8:14]. ʻOku ou fakakaukau atu … he taimí ni ki he kau tangata mo e kau fafine ʻoku ou ʻofa aí, ʻa ia kuo fakakāsia honau tuʻunga fakalaumālié ʻe he ngaahi meʻa ko ʻení, pea ʻoku taki atu kinautolu ʻe he filí ʻi he hala faingofua ʻo e fakafiefiá ʻo nau siʻaki ai honau fatongia ko ha mātuʻa mo e kāingalotu ʻo e Siasi ʻo Sīsū Kalaisí.
… Lolotonga ʻa e puputuʻú, fiefiá mo e ngaahi meʻa fakafiefia kotoa ʻo e moʻuí, … ʻoua naʻa ngalo ʻiate kitautolu hotau fatongia ki he fānau tangata mo e fānau fefine ko ʻeni ʻoku fakatupu ʻi he tatau ʻo e ʻOtuá. Ko e Tamai Ia ʻo honau laumālié, pea te tau haʻisia kiate Ia ki hono akoʻi kinautolú. ʻOku ou ʻamanaki pē mo lotua ʻo ka hokosia ʻa e ngataʻangá te tau akoʻi kiate kinautolu ʻe lava ke tau maʻu meiate Ia ʻa e tāpuaki ko iá, “Mālō, ko e tamaioʻeiki lelei mo angatonu, hū koe ki he fiefiaʻanga ʻo hoʻo ʻEikí,” pea lava ke tau nofo taʻengata ai mo hotau ngaahi ʻofaʻangá.7
ʻOku ou fie fai atu ha talanoa. ʻI he ngaahi taʻu kuo hilí, naʻe ʻi ai ha ongo tamaiki tangata ʻi ʻInitiana naʻá na ngāue ʻi ha ngaahi faama—ko ha ngaahi faama ʻeni naʻe maile ʻe nima ki he fitu honau vāmamaʻó. ʻI he ʻaho takitaha naʻá na fai mālohi ʻena ngaahi ngāué, tatau e fanga pulú, mo e hā fua. Naʻe ʻalu e tamasiʻi ʻuluakí ki heʻene tamaí he ʻaho ʻe taha ʻi hono taʻu 13 pe 14 nai peá ne pehē ange, “Tangataʻeiki, ʻoku ou fie ʻalu ki kolo. ʻOku ou fie sio he ngaahi maama ulo lahí. Fēfē ka ʻi ai ha taimi te u ʻalu efiafia ai hili haʻaku ngāue mālohi ʻo ʻosi ʻeku ngāué?” Naʻe pehē ange ʻe heʻene tamaí, “He ʻikai lava ia he tahá te ke lava ʻo fai hoʻo ngāué.” “ ʻE lava ke u lue ki kolo kapau te u ʻā ʻoku teʻeki ke maama e ʻahó ʻo ngāue he ʻaho kakato? ʻOku ʻikai mamaʻo ki ai, pea te u ʻi ai ʻi ha houa ʻe taha pe ua peá u foki vave mai pē.” Naʻe pehē ange ʻe he tamaí, “ ʻIo, kapau te ke fai kotoa hoʻo ngaahi ngāué, ʻe lava ke ke ʻalu.” Fakatokangaʻi ʻeni, ngaahi tamai. Ko e meʻa naʻe hokó ko ʻene ʻalu. Naʻá ne aʻu ki kolo kuo meimei fakapoʻuli. Kuo ʻosi tāpuni e ʻū falekoloá mo e pangikeé. Naʻe lahi e ngaahi fale hoka mo e ngaahi faiʻanga pele paʻanga naʻe kei avá. Kuo ʻi fale ʻa e kakai lelei kotoa pē ia, ko e tokolahí ʻi honau ʻapí. Ko e kau maumau taimí pē ʻeni ia naʻe kei ʻi he halá pe ngaahi feituʻu ko ʻení. Naʻa nau sio atu ki he haʻu ʻa e talavoú ni ʻo nau puke mai ia ʻo nau ō holo. Ne ʻikai fuoloa kuo nau ʻosi fakaʻaliʻali ki ai e niʻihi ʻo e ngaahi meʻa naʻe ʻikai totonu ke sio ai ha tamasiʻi. Ko e meʻa ʻeni naʻá ne aʻusiá. Naʻá ne ʻiloʻi mei ai ha meʻa naʻe ʻikai lelei.
Naʻe ʻalu e tamasiʻi hono uá ki heʻene tamaí ʻi he founga tatau. Naʻá ne pehē ange, “Tangataʻeiki, ʻoku ou fie maʻu ke ʻi ai ha taimi ke u ʻalu ai ki kolo. Meʻa ní ʻoku ʻikai te ke loto ke u ʻalu ʻo sio ʻi ha niʻihi ʻo e ngaahi meʻa kuo teʻeki ke u sio aí? Kuo pau ke u ʻalu kimuʻa ʻoku teʻeki ai ke fakapoʻulí ke u lava ʻo sio ʻi ha meʻa.” Ne taliange ʻe he tamaí, “ ʻE hoku foha, ʻoku ou pehē ʻoku ʻi ai pē hoʻo totonu ke ke ʻalu ki kolo, pea ʻoku ou pehē ʻoku ʻi ai hoʻo totonu ke mo ō mo hoʻo tamaí. Fili ʻe koe e ʻahó pea te u tokoni atu ʻi he ngaahi ngāué kae lava ke ta ō efiafia ke ke feʻiloaki mo ha niʻihi ʻo hoku ngaahi kaungā ngāué.”
Ko e vahefonua tatau pē ʻoku ou talanoa ki aí—naʻe ʻikai vāmamaʻo e ongo fāmá. ʻI he uike pē taha kuó ne ʻosi fili e ʻahó. Naʻá na fai e ngaahi ngāué peá na ō ki kolo. Naʻá na aʻu ki ai kimuʻa he taimi faá. Naʻá na aʻu ʻoku teʻeki ai tāpuni e ʻū pangikeé. Naʻe tui ʻe he tamasiʻí hono teunga leleí. Naʻe ʻave ia ʻe heʻene tamaí ki he pangikeé ʻo fakafeʻiloaki ki he tokotaha naʻe ʻaʻana e pangikeé, peá ne lulululu mo ia mo pehē ange, “Ko hoʻo haʻu pē ki kolo peá ke haʻu ki heni pea te mau talitali lelei koe.”
Naʻe ʻave ia ʻe heʻene tamaí ki he ngaahi fale pisinisi naʻá ne ngāue mo iá, pea naʻe talitali lelei ia ʻe he kakai aí. ʻI heʻena foki fakataha atu ki ʻapi hili ia haʻana sio heleʻuhila, kuo maheni ʻa e tamasiʻí mo e niʻihi ʻo e kau tangata lelei taha ʻi he koló. Ko e meʻa naʻe hoko aí ko ʻene feohi mo ha kakai lelei ʻi he taimi naʻá ne ʻalu ai ki kolo ʻi heʻene matuʻotuʻa angé.8 [Vakai, fokotuʻu hono 3 he peesi 263.]
ʻOku ou fie fokotuʻu atu … , ko e founga lelei taha ʻe lava ke mou fakamoleki mo fakaʻaongaʻi ki ai homou taimí ko hono akoʻi hoʻomou fānau tangatá mo e fānau fefiné ke nau moʻui taau ke maʻu e ngaahi tāpuaki ʻa ʻetau Tamai Hēvaní.9
ʻE lava ʻe he faʻifaʻitakiʻanga ʻa e mātuʻá ʻo ʻai ke malu, angamāʻoniʻoni, mo fiefia ha tamasiʻi.
Tau hoko muʻa ko ha faʻifaʻitakiʻanga ʻo e angamāʻoniʻoní ki heʻetau fānaú, fai ʻetau ngaahi lotu fakafāmilí pea tāpuakiʻi ʻa e meʻakaí. ʻAi ke sio ʻetau fānaú ʻoku tau feʻofaʻaki ʻa kitautolu ko e husepāniti mo e uaifí. Fakaʻaongaʻi kei taimi ʻa e faingamālie ke mou feʻinasiʻaki ai ko e husepāniti mo e uaifi ʻi hoʻomou ʻofá, ʻi hoʻomou angaʻofá pea mo hoʻomou fetokoniʻakí ʻi he founga kotoa pē. Fakaʻaongaʻi kei taimi ʻa e faingamālie ke akoʻi ai ki homou ngaahi fohá mo e ngaahi ʻofefiné ʻa e founga te nau moʻui fiefia aí. … Tuku ke hoko hotau ngaahi ʻapí ko ha hūfangaʻanga ʻo e melino mo e ʻamanaki lelei mo e ʻofa.10
ʻI he ngaahi ʻaho siʻi kuo hilí, ne u sio ki ha tohi mei ha tangata naʻá ne moʻui pē mahalo ʻi he vahe ua ʻe taha ʻo e taimi naʻe totonu ke ne moʻui aí. Naʻá ne tohi ki heʻene tamaí ʻo pehē: “Kuo hoko hoʻo fakaʻatuʻi ʻo kinautolu ʻokú ke ʻofa aí, hoʻo akonakiʻi aú, ʻa e ngaahi faʻifaʻitakiʻanga naʻá ke tā maʻakú, ko ha meʻa ke ne ueʻi au ke fai ʻa e meʻa ʻoku finangalo e ʻEikí ke u faí. Ne u ongoʻi te u malu ʻi heʻeku molomolomuivaʻe ʻiate koé.” Ko ha tamai poto ia, ko ha tamai monūʻia, ke ne fakatupu ʻi he ʻatamai ʻo hono fohá ha loto-falala pehē. … Koeʻuhí ko e ʻulungāanga ʻo e tamaí— he naʻá ne fakalāngilangiʻi ʻene tamaí ʻi heʻene tohí—koeʻuhi ko e faʻifaʻitakiʻanga ʻi hono ʻapí, ʻokú ne hoko ai he ʻahó ni ko e taha ʻo e kakai falalaʻanga taha ʻo e Siasí ni. ʻOku lava pē ke ne moʻui ʻi he māmaní mo tauhi e ngaahi fekau ʻa e ʻEikí. Ko ʻene fie faileleí naʻe fakatupu ia ʻe he ʻapi naʻá ne nofo aí. Naʻe ʻikai ke ne ʻilo ha siokita ʻi ʻapi, ka ko e taʻesiokita pē. Naʻe ʻikai holi e ongomātuʻá ke maʻu mai e meʻa kotoa ʻe lava ke na maʻú peá na siokita ʻo tuku pē ia maʻanaua, ka naʻá na feʻaluʻaki ʻo kumi ʻa e kakai naʻa nau fie maʻu iá, ʻo fakalotolahiʻi mo tokoniʻi kinautolu. Naʻe ʻikai hanga ʻe he ngaahi lea kotoa naʻe faí ʻo ueʻi e loto ʻo e tangatá ʻo hangē ko ia ʻokú ne maʻu he ʻaho ní, ka ʻe he faʻifaʻitakiʻanga ʻa ʻene mātuʻá, mo kinautolu naʻe nofo ʻi he ʻapi naʻá ne nofo aí.
ʻOku ʻikai haʻaku veiveiua ʻoku toko laungeau ʻa e kakai tangata mo e kakai fefine, pe mahalo ko hanau toko lauingeau mei hotau tukui koló pe ʻi māmani, te nau talamai ʻa e meʻa tatau kau ki he ngaahi akonaki ʻa ʻenau ngaahi tamaí mo e faʻeé. Ka ʻoku ou manavasiʻi he ʻoku ʻi ai hatau niʻihi kuo taki atu kinautolu ʻe he ngaahi ʻulungāanga ʻo e māmaní pea ʻoku nau moʻua ʻi he fakakaukau ko ia ʻoku fie maʻu ke tau muimui ʻi he meʻa ʻoku fai ʻe he kakai kehé ʻo tatau ai pē pe ko e hā e meʻa ʻoku nau tui ki ai pe faí. ʻI heʻene peheé he ʻikai hoko ai ʻetau faʻifaʻitakiʻangá ko ha tāpuaki ka te ne fakaʻauha ʻe ia e fiefia ʻa ʻetau fānaú.11
Tau fakamoʻoniʻi ʻi heʻetau ngaahi ngāue fakaʻahó, pea ʻi heʻetau ngaahi leá, ʻoku tau tui ko e ngāue ʻeni ʻa e Tamaí pea te tau maʻu ai ʻa e fiefia ʻoku ʻikai faʻa fakamatalaʻi, pea ʻe tupulaki ʻa e tui mo e loto-fakatōkilalo ʻa e fānau ʻoku tupu hake ʻi hotau ngaahi ʻapí. ʻE fakalahi kiate kinautolu, pea ʻoange mo e mālohi ke nau tekeʻi e ngaahi ʻahiʻahi ʻa e filí ʻoku hanga mai kiate kinautolú, pea ʻe fetongi ʻaki ʻa e mamahi kuo faingataʻaʻia ai e fānau ʻa e tangatá koeʻuhi ko e faiangahalá, ʻa e fiemālie, melino mo e fiefia, pea … ʻe nofo ʻi he māmaní ʻa e kau tangata mo e kau fefine ʻe mālohi honau ʻulungāangá ke matuʻuaki ʻa e ngaahi kovi ʻo e moʻuí.12 [Vakai, fokotuʻu hono 4 he peesi 263.]
ʻE lava ke tau tokoni ki hono maluʻi hotau toʻu tupú meí he koví ʻaki hono ʻofeina mo akoʻi kinautolu.
Kāingalotu, akoʻi hoʻomou fānaú ke nau tauhi ʻa e fono ʻo e angamaʻá. Takatakaiʻi kinautolu ʻaki homou nima ʻofá, koeʻuhí ke ʻoua naʻa nau holi ki he ngaahi ʻahiʻahi ʻa e tēvoló ʻoku ʻātakaiʻi ʻa kinautolu ʻi he tafaʻaki hono kotoá. …
Ko ha faingamālie ia maʻá e ngaahi mātuʻá ke nau nofo hifo ai ʻi honau ngaahi ʻapi pē ʻonautolú, pea haʻohaʻo takai ʻiate kinautolu ha fāmili ko ha fānau tangata mo ha fānau fefine angamāʻoniʻoni ne foaki ange ʻe heʻetau Tamai Hēvaní, ʻa ia naʻe fakatupu honau laumālié ʻe heʻetau Tamai ʻi Hēvaní! Meʻa fakafiefia moʻoni ke nau feohi pea ʻinasi ʻi he ngaahi tāpuaki ʻa ʻetau Tamai Hēvaní pea fiefia ʻi he takaua ʻo hono Laumālié, pea ke akoʻi ʻa kinautolu ʻi he foungá ni ʻi heʻenau kei īkí ke nau kei moʻui angamāʻoniʻoni pē lolotonga ʻenau fakalakalaka ke aʻu ki heʻenau matuʻotuʻá!
ʻE hoku ngaahi tokoua mo e tuofāfine, ʻoku ou kole atu ke mou maluʻi muʻa e toʻu tupu kei tupu haké mei he ngaahi faingataʻa taʻeʻamanekina kuo tuku ʻe he filí ʻi muʻa ʻiate kinautolú, ʻi he loto fakamātoato ange, ʻi he faʻa fakaʻatuʻi ange, pea mo ha faʻa kātaki ʻoku toe lahi angé. ʻOku taʻefeʻunga ʻa e ngaahi [heleʻuhila] lahi, ngaahi polokalama fakaletiō, ngaahi makasini, ngaahi tohi, mo e alā meʻa pehē ʻoku tau maʻú … , pea ʻe lava ke mole atu ʻa e niʻihi ʻoku tau ʻofa aí meiate kitautolu kae ʻoua leva pē kuo tau taʻofi e ivi tākiekina ʻo e ngaahi meʻá ni ʻaki ʻa e akonaki mo e ʻātakai ʻoku langaʻi moʻuí, ʻoange ki he toʻu tupú ʻa e lelei ʻoku maʻu mei hono ʻiloʻi e moʻui ʻa ha kakai tangata mo fefine lelei, akoʻi kiate kinautolu ʻa e ngaahi ʻulungāanga lelei ʻo e kau palōfitá pea mo hono ʻuhinga ʻo e Ongoongolelei ʻo Sīsū Kalaisí. …
Tau akoʻi muʻa ʻetau fānaú ke nau moʻui angamaʻa, ke nau faitotonu. Akoʻi hoʻomou fānau tangatá ke maluʻi ʻa e ʻulungāanga maʻa ʻo honau ngaahi tuofāfiné mo honau ngaahi kaungā-fefiné. Akoʻi hoʻomou fānau fefiné ke nau maluʻi ʻa e ʻulungāanga maʻa ʻo e fānau tangata ʻoku nau feohí. … Tau tokanga taha, kapau ʻe lava ke tau ngāue ʻaki e kupuʻi lea ko iá, ke ʻohake ʻetau fānau tangata mo fefiné ʻi he ivi tākiekina ʻo e Laumālie ʻo e ʻOtuá, koeʻuhí ke ʻoua naʻa maʻu ʻe he filí ha mālohi ke fakaheeʻi ʻa kinautolu.13 [Vakai, fokotuʻu hono 5 mo e 6 he peesi 263.]
ʻE tokoni hono ako fakafāmili ʻo e folofolá ke tau ʻai ke kei ofi mai pē ʻetau fānaú kiate kitautolu.
Ngaahi tokoua mo e tuofāfine, ko hotau faingamālie ia, ko hotau fatongia, ke tānaki fakataha mai hotau ngaahi fāmilí ʻi hotau ngaahi ʻapí, ke tau fiefia mo fefakamālohiaʻaki mo fepoupouaki fakataha, ke akoʻi kinautolu ʻi he ngaahi moʻoni ʻo e Folofola Māʻoniʻoní. ʻOku totonu ke poupouʻi e fānaú ʻi he ʻapi kotoa pē, ke lau e folofola ʻa e ʻEikí ʻo hangē ko hono fakahā mai kiate kitautolu ʻi he kuonga fakakosipeli kotoa pē. ʻOku totonu ke tau lau ʻa e Tohi Tapú, Tohi ʻa Molomoná, Tokāteline mo e Ngaahi Fuakavá, mo e Mataʻitofe Mahuʻingá; ʻo ʻoua naʻa ngata pē ʻi hono lau ʻi hotau ngaahi ʻapí, ka ke fakamatalaʻi ia ki heʻetau fānaú koeʻuhí ke mahino kiate kinautolu ʻa e … ngaahi fengāueʻaki ʻa e ʻOtuá mo e kakai ʻo māmaní.
Tau vakai angé pe he ʻikai lava ke tau fai ʻeni ʻo lahi ange ʻi he meʻa kuo tau fai ʻi he kuohilí. Tau fakatukupaaʻi kitautolu ki he tefitoʻi moʻoní pea tau ngāue ʻaki hono tānaki mai hotau ngaahi fāmilí ke haʻohaʻo takai ʻiate kitautolu ʻi hotau ngaahi ʻapí. Tau takitaha fehuʻi hifo pē: “Kuó u fai nai hoku fatongiá ʻi hoku ʻapí ʻi hono lau mo akoʻi e ongoongoleleí, ʻo hangē ko ia kuo fakahā ʻo fakafou mai ʻi he kau palōfita ʻa e ʻEikí? Kuó u ʻai nai ke ofi mai ʻeku fānaú kiate au peá u ʻai ke hoko ʻa ʻapi ko ha feituʻu fakafiefia mo ʻi ai ʻa e anga ʻapasiá, ʻofá, mahinó, mo e moʻui mateakí?”
Kapau kuo teʻeki ai, tau fakatomala mei heʻetau taʻetokangá pea tohoakiʻi mai hotau ngaahi fāmilí ke haʻohaʻo takai ʻiate kitautolu pea akoʻi ʻa e moʻoní kiate kinautolu. …
“Kuó u fakamaau nai hoku falé?” Ko e fehuʻi ʻeni ʻoku totonu ke ʻi he loto kotoa pē. ʻIkai ko e, kuo fai nai ʻeni ʻe hoku kaungāʻapí? ka kuó u fai nai ʻa e meʻa ʻoku finangalo e ʻEikí ke u faí?14
Ko e meʻaʻofa mahuʻinga taha ʻoku foaki ʻe heʻetau Tamaí kiate kitautolú ko ʻetau fānaú. Kapau te tau lava ʻo tataki honau vaʻé ʻi he hala ʻo e fakamoʻuí, ʻe maʻu ʻa e fiefia taʻengatá ʻe kitautolu mo kinautolu. …
Ko e founga ʻe taha ʻe lava ke tau ʻai ke nau ofi mai ai kiate kitautolú ko ʻetau toutou fakataha ʻi hotau ngaahi ʻapí. Kuo kole mai e Siasí ke tau tuku mavahe ha pō ʻe taha he uike takitaha ke fakataha kotoa mai ai e fāmilí ʻo fiefia fakataha, ʻo fiefia ʻi he fanga kiʻi meʻa ʻoku fakafiefia e talanoa fakafāmili ki aí, mo aleaʻi e ngaahi meʻa kehe ʻoku mahuʻinga mo tolongá.
… Naʻe tohi e Kau Palesitenisī ʻUluakí ʻi he 1915 ʻo kau ki heni ki he “kau palesiteni fakasiteikí, kau pīsopé, mo e ngaahi mātuʻa ʻi Saioné,” pea te u lau atu mei heʻenau lea naʻe faí:
“ ʻOku mau naʻinaʻi mo poupouʻi atu ʻa hono kamata fakahoko ʻo e ‘Efiafi Fakafāmili ʻi ʻApí’ ʻi he feituʻu kotoa pē ʻo e Siasí, ʻa ia ʻe tānaki fakataha mai ai ʻe he tamaí mo e faʻeé ʻa ʻena fānaú ʻi ʻapi pea akoʻi kiate kinautolu ʻa e folofola ʻa e ʻEikí. … ʻOku totonu ke fakatefito ʻa e efiafi fakafāmili ko ʻení ki he lotú, hivaʻi ʻo e ngaahi himí, tā ʻo e ngaahi meʻaleá, lau folofolá, aleaʻi ʻo e ngaahi tefito fakafāmilí mo ha ngaahi fakahinohino makehe fekauʻaki mo e ngaahi tefitoʻi moʻoni ʻo e Ongoongoleleí, pea pehē ki he ngaahi palopalema ʻo e moʻuí, pea mo e ngaahi fatongia mo e ngaahi tufakanga ʻo e fānaú ki he mātuʻá, ʻapí, Siasí, sosaietí pea mo e puleʻangá.”
Pea ko e tāpuaki ʻeni naʻe talaʻofa ʻaki kiate kinautolu te nau fai ʻa ia naʻe kole angé:
“Kapau ʻe talangofua ʻa e Kāingalotú ki he faleʻi ko ʻení, ʻoku mau palōmesi atu ʻe hoko mai ha ngaahi tāpuaki maʻongoʻonga. ʻE fakautuutu ʻa e ʻofá ʻi ʻapi pea mo e talangofua ki he ngaahi mātuʻá. ʻE tupulaki ʻa e tuí ʻi he loto ʻo e toʻu tupu ʻo ʻIsilelí pea te nau maʻu ha mālohi ke fakafepakiʻi e ngaahi tākiekina koví mo e ngaahi ʻahiʻahi ʻokú ne ʻākilotoa kinautolú.”
ʻOku kei hanga mai pē mei muʻa ʻa e ngaahi tefitoʻi moʻoni mo e ngaahi talaʻofa ko ʻení.15
ʻE lahi ʻa e ngaahi ʻapi fiefiá ʻi he kuonga fakamamahi mo loto kehekehe mo faingataʻa ko ʻení ʻo kapau ʻe hoko ʻa e efiafi fakafāmili ʻi ʻapí ko ha foʻi moʻoni ʻi he lotolotonga ʻo e Kāingalotú, ʻo kapau te tau nofo fakataha mo hotau fāmilí pea akoʻi ʻa kinautolu kuo foaki mai ʻe he ʻEikí kiate kitautolú kae tautautefito ke tau akoʻi kinautolu, ʻi he ivi ʻo e laumālie ʻo e ʻEikí, pea ʻi hotau ʻapí. …
… ʻI he taimi ʻoku tau tāpuniʻi atu ai ʻa māmani mo e ngaahi meʻa mei tuʻá, pea akoʻi ki hotau ngaahi fohá mo e ngaahi ʻofefiné ʻa e ngaahi moʻoni kuo foaki kiate kitautolu ʻe he ʻEikí koeʻuhí ko ʻetau leleí pea mo kinautolú, ʻe hoko ai ha tupulaki moʻoni ʻa e tuí. Kapau kuo tau mavahe mei he faleʻi ko iá, ʻoku ou ʻamanaki pē ʻe lava ke tau toe foki. Tanaki fakataha mai ʻetau fānaú pea tuku ke hoko hotau ʻapí ko e nofoʻanga ʻo e Laumālie ʻo e ʻEikí. Kapau te tau fai ʻetau konga ʻatautolú, te tau ʻiloʻi pea fakapapauʻi ʻe fai ʻe heʻetau Tamai Hēvaní ʻene konga ʻaʻaná.16 [Vakai, fokotuʻu hono 7 he peesi 264.]
Ngaahi Fokotuʻu ki Hono Ako mo Akoʻí
Fakakaukauʻi e ngaahi fakakaukau ko ʻení lolotonga hoʻo ako e vahé pe teuteu ke akoʻí. Ki ha toe tokoni makehe, vakai ki he peesi vii–ix.
-
Fakakaukau ki he talanoa he peesi 251–53. ʻOkú ke pehē ko e hā hono ʻuhinga naʻe lava ai ʻe Siaosi ʻAlipate Sāmita ʻo akoʻi lelei hono ʻofefine ko ʻEitá? Fakakaukau angé ki ha taimi naʻe akoʻi atu ai ʻe hoʻo mātuʻá ha meʻa ʻi hoʻo kei talavoú ʻo ne tākiekina koe ki he leleí ʻi hoʻo moʻuí. Ko e hā ne fuʻu ola lelei ai e lēsoni ko iá?
-
Ako e konga ʻuluaki ʻo e ngaahi akonakí (peesi 253–54) mo e Tokāteline mo e Ngaahi Fuakava 93:37–40. ʻOkú ke pehē ko e hā nai hono ʻuhinga naʻe tuku mai ai ʻe he ʻEikí ki he ngaahi mātuʻá ʻa e fatongia ke akoʻi ʻa e ongoongoleleí ki heʻenau fānaú, kae ʻikai ki ha ngaahi houalotu kehe? ʻE lava fēfē ke tokoni e ngaahi houalotu ʻa e Siasí ki he mātuʻá ʻi he fatongiá ni? ʻE lava fēfē ke tokoni ʻa e kāinga ofí? Kapau ʻoku ʻikai haʻamou fānau, fakakaukauʻi angé ha ngaahi founga ʻe lava ke mou hoko ai ko ha ivi tākiekina māʻoniʻoni ki he toʻu tupu ʻo e Siasí ʻi ha founga ʻe tokoni ai ki he mātuʻá.
-
Toe fakamanatu e talanoa he peesi 255–56. ʻOku lelei fēfē ki he fānaú ʻa e fakamoleki ʻe heʻenau mātuʻá e taimi ke nofo mo kinautolú? Ko e hā e niʻihi ʻo e ngaahi “tokanga mamahi mo e … fiefia ʻi māmani” (peesi 254) te ne lava ke fakatupu ʻetau taʻetokanga ki hotau ngaahi fatongia ki hotau ngaahi fāmilí? Ko e hā ʻe lava ke tau fai ke lavaʻi ʻaki e ngaahi meʻa ko ʻeni ʻoku nau toʻo ʻetau tokangá?
-
Lau e konga ʻoku kamata he peesi 257–58. Fakakaukau ki hoʻo tōʻonga ki he “ngaahi ʻulungāanga ʻo māmani” pea mo hano uesia hoʻo fānaú ʻe he ngaahi tōʻonga ko iá. Ko e hā nai ha ngaahi “ngāue fakaʻaho” ʻokú ne fakamoʻoniʻi mālohi ki heʻetau fānaú e ngaahi meʻa ʻoku tau tui ki aí?
-
Ko e hā nai ha niʻihi ʻo e ngaahi ʻahiʻahi ʻoku fehangahangai mo e fānau pea mo e toʻu tupu ʻi homou tukui koló? Ako ʻa e konga ʻoku kamata he peesi 259, pea kumi ʻa e ngaahi meʻa ʻe lava ke fai ʻe he mātuʻá, ngaahi kuí, pe ha niʻihi kehe ke tokoniʻi e toʻu tupú ke nau matuʻuaki ʻa e ʻahiʻahí.
-
Naʻe ʻomi ʻe Palesiteni Sāmita ʻa e faleʻi ʻoku totonu ke tau “tokanga taha” pe nofo taha ʻi hono ʻohake ʻetau fānaú ʻi he ivi tākiekina ʻo e Laumālié (vakai, peesi 260). Ko e hā ʻene ʻuhinga kiate koé? Ko e hā e ngaahi faʻahinga meʻa ʻe lava ke fai ʻe he mātuʻá ke nau tokanga taha ai ki hono ʻohake ʻo ʻenau fānaú ʻi he māʻoniʻoní?
-
ʻI he peesi 260–62, ʻoku toe fakamanatu ai ʻe Palesiteni Sāmita ʻa e niʻihi ʻo e ngaahi talaʻofa ki he ngaahi fāmili ʻoku nau fakahoko maʻu pē ʻa e efiafi fakafāmili ʻi ʻapí. Kuo fakahoko fēfē ʻa e ngaahi talaʻofa ko ʻení ʻi homou fāmilí? Ko e hā haʻo faleʻi ki ha fāmili kuo teʻeki ai ke fai haʻanau efiafi fakafāmili ʻi ʻapi ki muʻa ka ʻoku nau loto ke nau kamata?
Ngaahi Potufolofola Fekauʻakí: Lea Fakatātā 22:6; ʻĪsaia 54:13; ʻĪnosi 1:1–3; Mōsaia 4:14–15; ʻAlamā 56:45–48; Tokāteline mo e Ngaahi Fuakava 68:25–31; vakai foki, “Ko e Fāmilí: Ko ha Fanongonongo ki Māmani,” Ensign, Nov. 1995, 102.
Tokoni fakafaiakó: “Tokanga ke ʻoua naʻá ke fakangata vave ha ngaahi fealēleaʻaki lelei koeʻuhí ka ke fakahoko kotoa e ngaahi meʻa kuó ke teuteú. Neongo ʻoku mahuʻinga ke fakahoko kotoa e lēsoní, ka ʻoku mahuʻinga ange ke tokoniʻi e kau akó ke nau ongoʻi e mālohi ʻo e Laumālié, tali ʻenau ngaahi fehuʻí, fakatupulaki ʻenau mahino ki he ongoongoleleí pea mo fakamālohia ʻenau tukupā ke tauhi e ngaahi fekaú” (ʻOku ʻIkai ha Ui ʻe Mahuʻinga Ange ʻi he Faiakó, 71).
Ko Lusi, uaifi ʻo Siaosi ʻAlipate Sāmitá mo ʻena ongo tama fefiné, ko ʻEita (toʻohemá) mo ʻEmelī (toʻomataʻú).
“Ko e founga lelei taha ʻe lava ke mou fakamoleki mo fakaʻaongaʻi ki ai homou taimí ko hono akoʻi hoʻomou fānau tangatá mo e fānau fefiné ke nau moʻui taau ke maʻu e ngaahi tāpuaki ʻa ʻetau Tamai Hēvaní.”
“ʻE lahi ʻa e ngaahi ʻapi fiefiá … kapau ʻe hoko ʻa e efiafi fakafāmili ʻi ʻapí ko ha foʻi moʻoni ʻi he lotolotonga ʻo e Kāingalotú.”