Vahe 7
Ko e Taʻe-faʻa-mate ʻo e Laumālié
ʻOku taʻengata ʻetau moʻuí, pea ʻoku tokoni ʻa e ʻilo ko ʻení kiate kitautolu ke tau fai ʻa e ngaahi fili totonú mo fakafiemālieʻi kitautolu ʻi he taimi ʻo e mamahí.
Mei he Moʻui ʻa Siaosi ʻAlipate Sāmitá
Naʻe monūʻia ʻa Siaosi ʻAlipate Sāmita ke ne maʻu ha mahino taʻeveiveiua ki he taumuʻa ʻo e moʻuí, pea naʻe lava ai ke ne fakalotolahiʻi ʻa e niʻihi kehé ʻi heʻenau fehangahangai mo e faingataʻá. Naʻá ne faʻa fakamanatu ki he Kāingalotú “ ʻoku taʻengata ʻetau moʻuí”—ʻoku ʻikai kamata ʻa ʻitāniti hili ʻa e moʻuí ni ka ko e moʻui matelié ko ha konga mahuʻinga ia ʻo ʻitāniti. “Ne u faʻa pehē ange ki hoku ngaahi kaungāmeʻá ʻi he taimi naʻe hangē ka fai ai haʻanau fili pea ʻikai mahino kiate kinautolu ʻa e hala naʻa nau fie fou aí.‘Ko e ʻahó ni ʻa e kamataʻanga ʻo e fiefia taʻengatá pe loto-mamahi taʻengatá kiate kimoutolu.’”1
Naʻe fakamoʻoni ʻa Palesiteni Sāmita ki he ngaahi moʻoni ko ʻení ʻi he ouau meʻafakaʻeiki ʻo Hailame G. Sāmitá, ko e Pēteliake ki he Siasí naʻe mālōlō kei talavou kae kei moʻui pē hono uaifí mo e fānau ʻe toko valu:
“Talu hono fakahā mai ke u lea ʻi he meʻafakaʻeikí ni mo ʻeku ongoʻi mahalo pē he ʻikai ke u lava. Naʻe ʻalu hake ʻa e ngaahi ongó ʻiate au, pea naʻe ʻikai ke u lava ʻo mapuleʻi, kae talu ʻeku haʻu ki he falé ni mo ʻeku maʻu ha ongo fakaʻofoʻofa mo nonga ʻi hoku lotó. …
“Naʻe ʻikai ke u tengihia ka u ongoʻi ke u fakamālō ki heʻetau Tamai ʻi hēvaní ʻi he Ongoongolelei ʻa Hono ʻAlo ʻOfaʻangá kuo toe fakahā mai ʻi hotau kuonga ní. …Ko ha tāpuaki fakaʻofoʻofa ia ke ʻiloʻi ʻoku taʻengata ʻa e moʻuí,—ke ʻiloʻi ko e ngaahi tāpuaki ko ia naʻe ngāueʻi ʻe he tangata leleí ni ke ne maʻú ʻe ʻaʻana ia ʻi hono kotoa ʻo e nofo taʻengatá. Naʻe ngata ʻa ʻene moʻui fakamatelié ka ko e konga pē ʻeni ʻo e moʻui taʻengatá. Kuó ne fakatoka ʻo loloto mo malu ʻa e fakavaʻe naʻá ne langa aí pea kei hokohoko atu ʻene langa aí ʻi he kotoa ʻo e nofo taʻengatá. ʻE toe fakalahi atu ki he fiefia ko ia naʻá ne maʻu ʻi he māmaní. …
“ʻI heʻeku fakakaukau ki he ngaahi meʻa ʻoku aʻusia ʻe he kakai ʻi he māmaní, ʻi he ngaahi meʻa ʻoku hoko ʻo hangē ko ʻení, ʻoku ou fakatumutumu ʻi hotau tāpuakí. ʻOku ʻikai haʻaku veiveiua fekauʻaki mo e moʻui taʻengatá mo e taʻe-faʻa-mate ʻa e laumālié ʻo hangē pē ko e pau ʻe ulo mai ʻa e laʻaá he hoʻatāmālié. … Ko e meʻa fakamamahi ke māvae mo kinautolu ʻoku tau ʻofa aí, neongo ko e fakataimi pē. ʻOku tau taʻelata he taimi ʻoku nau ō ai ʻo ngāue fakafaifekaú, pe ko ʻenau hiki ʻo nofo ʻi ha ngaahi konga kehekehe ʻo e māmaní. Hangē ʻoku nau toe mamaʻo ange kinautolu he taimi ʻoku nau mate aí, ka ko hono moʻoní ʻoku ʻikai ke pehē ia, ʻo kapau ʻe mahino kiate kitautolu. … ʻOku ou ongoʻi lahi ange ke u fiefia he ʻahó ni ʻi haʻaku fai ha pōpoaki fakafiemālie ʻa ia ʻoku faʻa fai ki he kau mamahí, he ʻoku ou ʻilo ʻoku ʻikai ko e ngataʻangá ʻeni. …
“… ʻI heʻeku tuʻu leva ʻi homou ʻaó he ʻaho ní, ʻa ia mahalo ʻoku totonu ke tō ʻa e loʻimata, ka ʻoku fonu hoku laumālié ʻi he fiemālie mo e nonga. ʻOku ou lotua ke ʻi he moʻui ʻa kinautolu takitaha ʻoku mamahí ʻa e fiemālie ko iá.”2 [Vakai, fokotuʻu 1 he peesi 83.]
Ngaahi Akonaki ʻa Siaosi ʻAlipate Sāmitá
Naʻa tau moʻui ko ha ngaahi laumālie kimuʻa pea tau haʻu ki he māmaní, pea ʻe kei moʻui hokohoko atu ai pē hotau ngaahi laumālié hili ʻetau maté.
Ko e mahino kiate kitautolu ʻa e moʻui ko ʻení ko e moʻui taʻengata ia—ʻoku tau moʻui ʻi ʻitāniti he ʻahó ni ʻo hangē ko haʻatau moʻui ʻi ʻitāniti ʻi he kahaʻú. Ko ʻetau tuí naʻa tau moʻui kimuʻa pea tau toki haʻu ki hení; ko e ʻatamai potó, ko e laumālié, naʻe ʻikai kamata ia ʻi he moʻui ko ʻení. ʻOku tau tui naʻa tau maʻu ha sino fakalaumālie kimuʻa pea tau toki haʻu ki he māmaní. Naʻe fekauʻi mai ʻa e sino fakalaumālie ko iá ki māmani, pea naʻá ne maʻu ʻi heni ha sino fakaemāmani, ʻa e sino ko ia ʻoku tau mamata ki aí. Ko e konga fakatuʻasino ko ia ʻoku tau mamata ki aí ʻoku ʻo e kelekelé ia, ʻoku kelekeleʻia [vakai, 1 Kolinitō 15:47], ka ko e konga ko ia ʻoku mavahe mei he sinó ʻi he taimi ʻoku tau mate aí ko e konga ia ʻoku fakalaumālié, pea he ʻikai ʻaupito mate ia. ʻOku tokoto ʻa e sino fakaemāmaní ʻi he fonualotó—ko ha konga ia ʻo e kelekelé pea ʻe foki ia ki he kelekelé—ka ko e ʻatamai poto (ʻiniteliseni) ko ia kuo tuku ʻe he ʻOtuá ʻi loto he sinó, ʻa ia ʻokú ne maʻu ʻa e mālohi ke fakaʻuhinga mo fakakaukaú, ʻa ia ʻoku ʻi ai ʻa e mālohi ke hiva pea mo leá, ʻoku ʻikai mate ia; ko ʻene paasi atu pē mei he māmani ko ʻení ko e konga ʻo e taʻengatá, ʻo tatali kae fakahoko hono fakamaʻa hono sino fakamatelié, kae ʻoua ke hoko ʻa e taimi ʻe toe fakataha ai mo hono sino ko ʻení, ʻa ia ʻe nāunauʻia, ʻio ʻo hangē pē ko e nāunauʻia ʻa e sino ʻo hotau ʻEiki toetuʻú, ʻo kapau naʻa tau moʻui taau ke maʻú.3
ʻI he lau ʻa e punaké, “ Ko e moʻuí ʻoku moʻoni, Ko e moʻuí ʻoku fakamātoato,” pea “ ʻoku ʻikai ko ʻene taumuʻá ʻa faʻitoka.” [Henry Wadsworth Longfellow, “A Psalm of Life.”] ʻOku taʻe-faʻa-mate ʻa e laumālie ʻoku nofoʻia ʻa e sinó. ʻOku moʻui ia hili ʻa faʻitoka. ʻOku ʻauʻauha ʻa e sinó pea foki ki he kelekelé ka ʻoku moʻui atu pē ʻa e laumālié.4
ʻOku ou fakamālō ʻi hono fakahā mo fakamahinoʻi mai kiate kitautolu ʻi he ngaahi ʻaho kimui ní ʻoku ʻikai ko e ngataʻanga ʻeni ʻo e moʻuí, ka ko e konga pē ia ʻo ʻitāniti, pea kapau te tau fakaʻaongaʻi lelei hotau ngaahi faingamālie ʻi hení, ko ha hala pē ia ke tau fakalakalaka ai ki ha ngaahi tuʻunga maʻongoʻonga mo lelei ange.5 [Vakai, fokotuʻu hono 2 he peesi 83.]
Ko ʻetau taumuʻa ʻi he māmaní ke teuteuʻi kitautolu ke nofo mo ʻetau Tamai Hēvaní.
ʻOku tui ha niʻihi ko ʻetau mavahe pē mei he moʻui ko ʻení, ko e ngataʻangá ia. ʻOku ʻasi taumamaʻo kiate au, ʻi heʻetau vakai atu ki he ngaahi ngāue ʻa natulá, ʻi heʻetau vakai atu ki he sino ʻo e tangatá, ʻa e tā ʻa hono mafú, ʻa ʻene tupulaki mo fakamālohia ia mei he kei siʻi ʻo aʻu ki heʻene fuʻu tangatá, pea mo ʻene toe holo māmālie kae ʻoua kuo ngata ʻa ʻene moʻuí—ʻe lava ke tui ha taha ʻo e fānau ʻa ʻetau Tamaí naʻe fāʻeleʻi mai pē ʻa e tangatá ki he māmaní ke ne moʻui ʻo aʻu ki heʻene hoko ko ha tangata mo ha fefine lahi, hoko atu ki heʻene taʻu motuʻa, pea mate, taʻe ʻi ai ha taumuʻa ʻo ʻenau moʻui ʻi hení.6
ʻOku ʻikai tuku mai ʻa e moʻuí ni ke tau vaʻinga ʻaki. Naʻe ʻi ai ha taumuʻa molumalu ʻo hono fakatupu kitautolú, ʻi he moʻui kuo foaki ʻe he ʻOtuá maʻatautolú. Tau ako angé ke ʻilo ʻa e taumuʻa ko iá, ke tau fakalakalaka ʻo maʻu ʻa e moʻui taʻengatá.7
ʻOku ʻikai ha veiveiua ʻi he ʻatamai ʻo ha tokotaha Siasi ki he taumuʻa ʻo ʻetau moʻui ʻi he māmaní. ʻOku tau ʻi hení ke teuteuʻi kitautolu mo tau fakalakalaka pea fakafeʻungaʻi kitautolu ke nofo ʻi he ʻafioʻanga ʻo ʻetau Tamai Hēvaní.8
ʻOku tau tui ʻoku tau ʻi hení he naʻa tau tauhi ki hotau muʻaki tuʻungá pea maʻu ʻa e faingamālie ke haʻu ki he māmaní. ʻOku tau tui ko ʻetau ʻi hení ko ha fakapale ia ʻo ʻetau faivelenga kimuʻa pea toki haʻu ki māmaní, pea ʻoku tau fiefia ʻi māmani ʻi he ngaahi fua ʻo ʻetau ngaahi ngāue ʻi he maama fakalaumālié. ʻOku tau tui foki ʻoku tau lulu he ʻahó ni ʻa e tenga ʻo ha ututaʻu te tau utu ʻi heʻetau mavahe mei hení. Kiate kitautolu ko e moʻui taʻengatá ko e ola fakakātoa ia ʻo e moʻui ʻi he maama fakalaumālié, ʻo ʻetau moʻui lolotongá, pea mo e hokohoko atu ʻo e moʻuí ʻi he taʻe-faʻa-maté, ʻo ne foaki kiate kitautolu ʻa e mālohi ʻo e fakalakalaka mo e tupulaki ʻoku ʻikai hano ngataʻangá. Pea ʻi heʻetau maʻu ʻa e ongo mo e ʻilo pau ko iá, ʻoku tau tui ai, “ Ko e tuʻunga ʻoku ʻi ai ʻa e tangatá, naʻe ʻi ai ʻa e ʻOtuá, pea ko e tuʻunga ʻo e ʻOtuá he taimi ní, ʻe lava pē ke aʻu ki ai ʻa e tangatá.” [Vakai, Lorenzo Snow, “The Grand Destiny of Man,” Deseret Evening News, July 20, 1901, 22.] Koeʻuhí ko hono fakatupu kitautolu ʻi he tatau ʻo e ʻOtuá, ʻoku tau tui ai ʻoku ʻikai taʻetotonu, ʻoku ʻikai taʻemāʻoniʻoni, ke tau ʻamanaki ʻe fakangofua kitautolu ke tau ʻinasi ʻi he ngaahi ʻulungāanga ʻo e ʻOtuá, pea te tau hoko ʻo tatau mo e ʻOtuá kapau te tau faivelenga,; he ʻi heʻetau maʻu pea talangofua ki he ngaahi fono fakanatula ʻa ʻetau Tamaí ʻoku nau puleʻi ʻa e moʻui ko ʻení, ʻoku tau hoko ai ʻo tatau ange mo Ia; pea ʻi heʻetau fakaʻaongaʻi ʻa e ngaahi faingamālie ʻoku lava ke tau maʻú, ʻoku tau teuteu ai ke maʻu ha ngaahi faingamālie lahi ange ʻi he moʻuí ni mo e moʻui ka hoko maí. …
ʻOku totonu ke tau hoko ko ha kakai fiefia ʻi heʻetau ʻiloʻi ʻoku ʻikai ko e vahaʻataimi teuteuʻanga ko ʻení ke teuteuʻi ai kitautolu ki haʻatau mate, ka ke tau moʻui; ko e fakaʻamu ia ʻa e Tamaí ke tau fakaʻehiʻehi mei he ngaahi meʻa hala kotoa pē pea tali ʻa e moʻoni kotoa pē, pea te tau hoko ʻo tatau ange mo ia ʻi heʻetau moʻui ʻaki ʻa e moʻoní, ʻo tau moʻui feʻunga ai ke nofo mo Ia.9
ʻE ngaahi tokoua mo e tuofāfine, ko e meʻa mamafa ʻeni. ʻOku totonu ke tau fakakaukauʻi fakamātoato ia. ʻOku totonu ke tau vakai hifo ki heʻetau moʻuí ke ʻiloʻi pe ʻoku tau mateuteu ki he kahaʻu maʻongoʻonga ko iá, ka ui kitautolu ʻapongipongi, kuo tau mateuteu nai ke fai ha fakamatala ki heʻetau ngaahi ngāue naʻe fai ʻi he māmaní; pe ʻe lava ke tau ongoʻi ʻe talitali kitautolu ʻe heʻetau Tamai Hēvaní mo e lea fakamālō “Mālō, ko e tamaioʻeiki lelei mo angatonu.”10 [Vakai, fokotuʻu hono 3 he peesi 83.]
ʻOku totonu ke tau fekumi ki he ngaahi meʻa ʻoku taʻengata honau mahuʻingá lolotonga ʻa e moʻuí ni.
Mahalo naʻe foaki mai kiate kitautolu ha ngaahi meʻa siʻi he moʻuí ni ke tau fiemālie fakataimi ai; ka ko e ngaahi meʻa ʻoku taʻengatá, ʻa e ngaahi meʻa ko ia ʻoku “ ʻaongá,” ʻa e ngaahi meʻa taʻengata ko ia ʻoku tau kakapa ki ai, pea teuteuʻi kitautolu ke maʻú, pea ʻe maʻu ia ʻi he ngāue ʻoku tau fakahoko fakafoʻituituí.11
ʻOku ʻikai ko ha meʻa fakaofo ʻa e fie maʻu lahi he kuongá ni ʻo e ngaahi meʻa ko ia ne feinga ki ai ʻa māmani talu mei he kamataʻangá ke maʻú, ʻa e koloá, mafaí, ʻa e ngaahi meʻa kotoa ʻoku fakafiemālie ki he tangatá—ʻa e vala lelei ange mo lahi ange ʻi ha toe taimi ki muʻá, meʻakai lahi ange ʻi he meʻa ʻe lava ʻo kaí, koloa kehekehe lahi ange ʻi he koloa kuo maʻu ʻe māmani ki muʻa. ʻOku tau fiemālie ange ʻi hotau ngaahi ʻapí. Kuo tā liunga e ngaahi faingamālie ʻo e moʻuí kuo maʻu talu mei hono ʻomi ʻo e Ongoongoleleí ki he māmaní, pea kuo tau maʻu he ʻahó ni ʻa e meʻa kotoa pē naʻa tau feinga ke maʻú. Kuo aʻu ʻa e akó ki he tuʻunga māʻolunga tahá. Kuo maʻu ʻe he tangatá ha ʻilo lahi ange ki he ngaahi meʻa ʻo e māmaní ʻi ha toe taimi ki muʻa. ʻOku maʻu ʻi he māmaní he ʻahó ni ʻa e meʻa kotoa pē ʻoku lau ʻoku fie maʻu lahi tahá ʻa ia kuo feinga ʻa e faʻahinga ʻo e tangatá ke maʻu talu mei he kamataʻanga ʻo taimí; ka neongo ʻení, ʻoku ʻi ai ʻa e veiveiua mo e tailiili ki he meʻa ʻoku hanga mai mei he kahaʻú.
Ko e hā e meʻa ʻoku hoko kiate kitautolú? Kuo tau fekumi ki he ngaahi meʻa ʻoku fakafiemālie ki he sinó mo e ʻatamaí, kuo tau fekumi ki he fakalāngilangi ʻa e tangatá, kuo tau fekumi ki he ngaahi meʻa ko ia kuo ʻomi ʻe he siokitá ki hotau laumālié. Kuo tau feinga ke pehē ʻoku tau mahuʻinga ange mo tau lau ʻoku tau lelei ange ʻi he fānau kehe ʻa ʻetau Tamaí.12
ʻOua naʻa tuku ke tau fakafiefiemālie, ʻoua naʻa kākaaʻi kitautolu ʻe he lahi ʻo e ngaahi meʻa ʻo e māmaní; he ko e hā hano ʻaonga ki ha tangata kapau te ne maʻu ʻa māmani kotoa pē kae mole hono laumālie ʻoʻoná? [Vakai, Maʻake 8:36.] ʻOua naʻa ngalo ʻa e taumuʻa naʻe fakatupu ai kitautolú; ka tau ngāue ke fakamoʻui hotau laumālié.13
Ko e taha ʻo e ngaahi meʻa fakamamahi ʻo e moʻuí ko e mamata ki ha tangata pe fefine ʻoku mate pea tanu ʻi he kelekelé pea tau ʻiloʻi naʻe ʻikai ke nau tali ʻa e ngaahi tāpuaki maʻongoʻonga ange naʻe foaki ʻe heʻetau Tamaí kiate kinautolú, pea kei hokohoko atu pē ʻa ʻenau pipiki ki ha pula ʻi ha vaikoa kuo pā ʻo pulia. ʻOku ou ongoʻi loto-mamahi heʻeku fakakaukau atu ki he fānau ʻe lauimiliona ʻa e ʻOtuá ʻi he māmaní ʻoku siʻisiʻi ʻenau feinga ki he ngaahi meʻa ko ia ʻoku ʻaonga moʻoní.14
Manatuʻi ko e ʻatamai poto ko ia ʻokú ke maʻú ʻoku taʻengata, ʻa e moʻoni ʻokú ke ako ʻi heni pea moʻui ʻakí, ʻa e ʻilo mo e meʻa ʻokú ke aʻusia pea ʻaonga kiate koé—te ke ʻave ʻa e ngaahi meʻá ni mo koe ʻi hoʻo foki ki ʻapí.15
Ko e ngaahi koloa te tau maʻu ʻi he taimi te tau ō ai ki he moʻui hili ʻa e maté ʻa e ngaahi koloa ko ia kuo tau tokonaki ki ai ʻaki ʻetau tokoni ki he ngaahi foha mo e ngaahi ʻofefine kehe ʻo ʻetau Tamaí naʻa tau feohi ʻi hení. Kuó Ne fakahoko ke tau lava kotoa ʻo maʻu ʻeni, pea te tau fiefia ange ʻi he tokoni ki hotau kāingá lolotonga ʻetau ʻi hení ʻi ha toe founga kehe.16
ʻOku ʻikai fuʻu mahuʻinga ʻa e lahi ʻo e ngaahi meʻa ʻokú ke maʻú, ʻa e lahi ʻo e koloa ʻokú ke maʻú, mo e lahi ʻo e fakalāngilangi mei he tangatá ʻokú ke maʻú, mo e ngaahi meʻa kotoa ko ia ʻoku tau holi ke maʻu ʻi he māmaní. Ko e meʻa kuo foaki ʻe he ʻOtuá kiate koe ʻa ia ʻoku mahuʻinga ange ʻi hono toe ʻo e ngaahi meʻa kehé ko e faingamālie ko ia ke maʻu ʻa e moʻui taʻengatá ʻi he puleʻanga silesitialé peá ke feohi ai ʻo lauikuonga pea taʻengata mo e ngaahi foha mo e ʻofefine, husepāniti mo e uaifi ne mou feohi ʻi he māmaní.17 [Vakai, fokotuʻu hono 4 he peesi 83.]
Te tau toetuʻu koeʻuhi ko Sīsū Kalaisi.
Ko e sīpinga haohaoa ki he kakai kotoa pē ʻa e moʻui māʻoniʻoni ʻa e Fakamoʻuí, pea naʻe hoko ʻEne toetuʻú ko e ʻuluaki tala fakapapau ki he faʻahinga ʻo e tangatá te tau toe tuʻu foki mo kitautolu mei he fonualotó.18
ʻI he toe tuʻu hake ʻa Sīsū mei he maté naʻá Ne hoko ko e ʻuluaki polopolo ʻo e toetuʻú. Naʻe toe hū ʻa e laumālie ko ia naʻe ʻaloʻi mai ʻe he Tamaí (ko e konga ʻiniteliseni ʻo Hono laumālié) ki hono sino fakaemāmaní ʻa ia kuo ʻosi fakahaohaoaʻi, peá Ne hoko ko ha tokotaha fakasilesitiale kuo nāunauʻia, ʻo Ne maʻu Hono nofoʻangá ʻi he nima toʻomataʻu ʻo e Tamaí, ko e taha ʻo e toko Toluʻi ʻOtuá. Naʻá ne maʻu ʻa e mālohi ke ikunaʻi ʻa e maté he naʻá Ne fai pau ki he ngaahi fono ʻa ʻEne Tamaí naʻá ne puleʻi iá; pea ʻi heʻene ikunaʻi ʻa e maté naʻá ne fakaava ʻa e kī ke lava ʻo toetuʻu ʻa e faʻahinga kotoa ʻo e tangatá, pea lava foki ke fakanāunauʻia ʻa e kakai kotoa pē ʻi he talangofua ki Heʻene ngaahi akonakí, ʻa ia ʻoku fuʻu faingofua pea lava ke tauhi ki ai ʻa e kakai kotoa pē ʻo kapau te nau loto ki ai.19
Ko ha tangata ʻa Sīsū Kalaisi naʻe ʻikai haʻane angahala. Koeʻuhí ko ʻEne haohaoá, ʻEne angatonú mo ʻEne ʻulungāanga maʻá, naʻe lava ke ne fakaava ʻa e ngaahi matapā ʻo e fale fakapōpulá, ke ikunaʻi ʻa e maté mo faʻitoka, pea muʻomuʻa ʻi he halá … ki he hēvani ko ia ʻoku tau ʻamanaki ke ʻalu atu ki aí.20
Te tau lava ʻo huke ki he vahe 88 ʻo e Tokāteline mo e Ngaahi Fuakavá pea vakai ki he folofola ʻa e ʻEikí ʻo kau ki heʻetau toetuʻú, ʻo ʻikai ko e toetuʻu pē ʻa e Fakamoʻuí, ka ʻokú ne talamai ai ʻa e meʻa ʻe ala hoko kiate kitautolú. … ʻOku fakahā mai ʻi he vahe ko ʻení ʻe fokotuʻu hake hotau sinó mei he faʻitoká, ʻo ʻikai ko ha ngaahi sino kehe, pea ʻe toe maʻu ʻe he ngaahi laumālie ko ia ʻoku ʻi he ngaahi sino ko ʻení he taimi ní ʻa e ngaahi sino tatau pē hili hano fakamaʻa mo fakahaohaoaʻi mo ngaohi kinautolu ke taʻe-faʻa-mate. [Vakai, T&F 88:14–17, 28–33.]21
ʻOku ʻi ai ha kakai lelei tokolahi ʻi māmani ʻoku ʻikai ke nau ʻiloʻi pe ko e hā ʻa e toetuʻú. ʻOkú ke akoʻi hono ʻuhingá ki hoʻo fānaú mo kinautolu ʻoku mou kaungā-ngāué? … ʻOku mahinongofua e toetuʻu [ʻa e Fakamoʻuí] ki he Kāingalotu ʻoku mahino kiate kinautolu ʻa e ongoongoleleí, ka ʻoku tokolahi ʻa e kakai ʻoku ʻikai mahino kiate kinautolu hono ʻuhingá. … Ko e taumuʻa ʻo e Ongoongolelei ʻo Sīsū Kalaisí ke teuteuʻi ʻa e tangata, fefine, mo e fānau kotoa pē ki he taimi ʻe ʻomai ai ʻa kinautolu kotoa pē kuo pekiá mei honau ngaahi faʻitoká, mo e taimi ʻe fokotuʻu ai ʻe heʻetau Tamai Hēvaní ʻa hono puleʻangá ʻi he māmaní pea nofo ai ʻa e kakai māʻoniʻoní pea hoko ʻa Sīsū Kalaisi ko hotau Tuʻi mo e Fakahoko-fono.22 [Vakai, fokotuʻu hono 5 he peesi 84.]
ʻOku ueʻi, fakalotolahiʻi, mo fakafiemālieʻi kitautolu ʻe heʻetau ʻilo ki he taʻe-faʻa-mate ʻo e laumālié.
ʻO pehē ʻi he tohi ʻa Siopé, “Ka ʻoku ai ʻa e laumālie ʻi he tangatá; pea ʻoku foaki kiate ia ʻa e ʻilo lahi ʻe he fakamānava ʻa e Māfimafí.” [Siope 32:8.] He ʻikai mahino kiate kinautolu kuo teʻeki ke nau maʻu ʻa e fakamānava ko iá ʻa e ʻuhinga ʻo e toetuʻu mei he maté, pea hangē kiate au ka ʻikai maʻu ʻa e mahino ko iá, ʻe siʻisiʻi ʻa e fiefia ʻanautolu kuo taʻu matuʻotuʻa mo tatali ki he taimi ʻe mavahe ai ʻa e laumālié mei he sinó ke ʻalu ki ha feituʻu ʻoku ʻikai ke nau ʻilo ki ai.23
ʻOiauē, meʻa fakamamahi kapau naʻa tau fakakaukau kuo fakangata ʻe he maté ʻa ʻetau moʻuí. Kapau naʻe ʻikai ha faingamālie ke hokohoko atu ʻetau fakalakalaká ʻi he taimi naʻe ʻosi ai ʻetau ngāue ʻi he māmaní, ʻe siʻisiʻi ha meʻa ke ne ueʻi kitautolu ke tau moʻui ʻo hangē ko ia ʻoku totonu ke tau moʻui ʻaki hení. ʻOku hanga ʻe hono ʻiloʻi ʻe toe lahi ange ʻetau fiefiá ʻi he taʻengatá tupu mei he lelei ne tau fakahoko hení, mo e fakalakalaka kotoa ʻoku tau faí, ʻo fakalotolahiʻi kitautolu ke fai hotau lelei tahá.24
ʻOku vave ke tau aʻusia kotoa e taimi ʻe ui atu ai kitautolu mei hení. Kapau naʻe ʻikai mahino kiate kitautolu ʻoku ʻi ai ha moʻui ʻi he kahaʻú, kapau naʻe ʻikai mahino kiate kitautolu ʻoku ʻi ai ha meʻa ʻoku toe lahi ange ʻi he ivi kuo tau maʻú, kapau naʻe ʻikai ha toe meʻa ka ko e meʻa vaʻinga pē mo fakamamahi ʻo e moʻuí te tau feʻao mo iá hangē kiate au ʻoku tokolahi ʻa e kakai te nau ongosia ʻi he fāinga ke lava ʻo moʻui ʻi hení. Ka ʻi he ʻaloʻofa ʻa ʻetau Tamai Hēvaní kuó Ne foaki ai kiate kitautolu ʻa e ngaahi meʻafoaki fakaʻofoʻofa taha ʻoku maʻu ʻe he faʻahinga ʻo e tangatá.25
Kuo tāpuakiʻi kitautolu ʻe he ʻEikí ʻaki ha ʻilo ʻokú ne moʻui, pea ʻoku ʻi ai hono sino, pea ʻoku fakatupu kitautolu ʻi hono tataú. ʻOku ʻikai ke tau tui ko ha faʻahinga laumālie ia pe ʻoku mahinongataʻa kiate kitautolu. Kapau kuó ke maʻu ʻa e fakamoʻoni kuó u maʻú pea ʻiloʻi ʻo hangē ko ʻeku ʻiloʻí kuo fakahā ʻe heʻetau Tamai Hēvaní Ia ki he fānau ʻa e tangatá, ko ha ʻOtua fakatāutaha ia, ʻoku fakatupu kitautolu ʻi hono tataú, naʻe fakatupu ʻe ia ʻa hotau ngaahi laumālié, pea kuó ne foaki mai hotau faingamālie ke moʻui ʻi he māmaní ʻo maʻu ha sino fakamatelie, koeʻuhí ke lava ai ʻo teuteuʻi kitautolu ke toe foki hake ki hono ʻafioʻangá ʻo nofo mo ia ʻo taʻengata, ʻoku ou pehē, kapau kuo mou ʻilo pau ia, ta ʻoku ʻi ai ha fakavaʻe ʻe lava ke ke langa ai ʻa hoʻo tuí. Ka toʻo meiate kimoutolu ʻa e ʻilo ʻoku moʻui moʻoni ʻa e ʻOtuá, ka ʻave ia meiate koe, ʻa e ʻilo ʻoku moʻui ʻa e ʻOtuá, ʻa e fakapapau ko Sīsū Kalaisí ko hono fakahā mai ia ʻo e ʻOtuá ʻi he kakanó, ʻave meiate koe ʻa e ʻilopau ʻe ʻi ai moʻoni e toetuʻu mei he maté, pea te mou ʻiloʻi ʻoku mou ʻi he tuʻunga ʻoku ʻi ai ʻa e fānau ʻa ʻetau Tamaí ʻi he feituʻu kotoa pē ʻi māmani, pea ʻoku ou fehuʻi atu ai, ko e hā leva ha fiemālie ʻoku mou kei maʻu? Ko e ngaahi moʻoni ʻeni ʻoku mahuʻingá.26
ʻOku tokolahi ange ʻa kinautolu ʻoku ou ʻofa aí ʻi he tafaʻaki ʻe tahá ʻiate kinautolu ʻoku ʻi hení, pea he ʻikai fuoloa ʻi he founga ʻo natulá haʻaku maʻu hoku ui ke u ʻalu atu ki ai. ʻOku ʻikai ke u hanganaki atu ki he taimi ko iá ʻi he loto-hohaʻa mo faingataʻaʻia, kae ʻi he ʻamanaki lelei mo e ʻilo pau ko e taimi ʻe hoko ai ʻa e liliú, ʻe lahi ange ai ʻa e fiefiá mo e ngaahi lelei ʻoku ʻikai lava ke tau ʻilo ʻi he moʻui matelié.27
ʻI he taimi te tau ʻilo ai ko e maté ko e taha pē ia ʻo e ngaahi sitepu ʻe fou ai e fānau ʻa e ʻOtuá ki ʻitānití, pea ʻoku fai ia ʻo fakatatau mo ʻene palaní, ʻe mole ai mei he maté ʻa hono huhú peá ne ʻomi kitautolu ke tau fehangahangai mo hono moʻoni ʻo e moʻui taʻengatá. Kuo ʻi ai ha ngaahi fāmili kuo nau lea māvae fakataimi kiate kinautolu ʻoku nau ʻofa aí. ʻI he taimi ʻoku hoko peheni ai ʻa e maté, te tau hohaʻa ʻo kapau te tau tuku ʻeni ke hoko, pea te ne ʻomi ha mamahi lahi ki heʻetau moʻuí. Ka kapau ʻe lava ke fakaava hotau mata fakalaumālié pea lava ke tau mamata, ʻoku ou ʻilo pau te tau fiemālie ʻi he meʻa te tau mamata ki aí. Kuo ʻikai tuku kitautolu ʻe he ʻEikí taʻe ʻi ai ha ʻamanaki lelei. Ka kuó ne fakapapauʻi mai te tau maʻu ʻa e fiefia taʻengatá ʻo kapau te tau tali ʻene faleʻí mo e akonakí lolotonga ʻetau ʻi he moʻui ní.
ʻOku ʻikai ko ha misi pē ʻeni. Ko e ngaahi meʻa moʻoni kinautolu. Ko ha talanoa faingofua pē ʻeni kiate kimoutolu kāingalotu ʻo e Siasi ʻo Sīsū Kalaisí, ka ʻoku moʻoni. ʻOku ʻi ai e ngaahi tohi folofola toputapu lahi kuo tuku mai ʻe heʻetau Tamai Hēvaní ʻo nau akoʻi mai ʻoku tau moʻui ʻo taʻengata. … Kuo ʻomi ʻe he ʻEikí ʻa e fakamatalá ni ʻo fuʻu mahinongofua ʻaupito, pea ʻoku ou fakafetaʻi kiate ia ʻi hoku lotó kotoa ko e ʻilo kuó ne foaki mai kiate kitautolú, ʻa ia ʻe lava ke fakafiemālieʻi ʻa kinautolu ʻoku mamahí pea ʻe lava foki ke mahino ai kiate kitautolu ʻa e taumuʻa ʻoku tau ʻi heni aí. Kapau naʻe lava ke lea mai ʻa kinautolu kuo pekiá kiate kitautolu, mahalo te nau pehē mai, “Vilitaki atu ki he taumuʻa te tau maʻu fakataha ai ʻa e moʻui taʻengatá.” Fai ʻa e meʻa ʻe fie maʻu ʻe he ʻEikí ke ke faí, pea he ʻikai mole meiate koe ha meʻa ʻoku ʻaongá; ka ʻe kei hokohoko atu pē hoʻo tānaki ha koloa ʻi he langí ʻa ia ʻe ʻikai kai ʻe he ané pe haeʻi ʻe he kau kaihaʻá ʻo kaihaʻasi. [Vakai, Mātiu 6:19–20.]
ʻOku tuku ʻeku fakamoʻoní mo kimoutolu ʻoku ou ʻilo ʻoku tau moʻui ʻo taʻengata, pea ko e māvae fakataimi ʻo e maté … ko e taha pē ia ʻo e ngaahi sitepu ʻi he hala ʻo e fakalakalaka taʻengatá pea ʻe iku ia ki he fiefia ʻo kapau te tau faivelenga.28 [Vakai, fokotuʻu hono 6 he peesi 84.]
Ngaahi Fokotuʻu ki hono Ako mo Akoʻí
Fakakaukauʻi e ngaahi fakakaukau ko ʻení lolotonga hoʻo ako e vahé pe teuteu ke akoʻí. Ki ha toe tokoni makehe, vakai ki he peesi vii–ix.
-
ʻI hoʻo lau “Mei he Moʻui ʻa Siaosi ʻAlipate Sāmitá” (peesi 73–74), fakakaukau ki ha taimi naʻá ke feinga ai ke fakafiemālieʻi ha taha hili e pekia ha taha naʻe ʻofa ai. Ko e hā e meʻa naʻá ne fakafiemālieʻi ʻa Palesiteni Sāmitá?
-
Naʻe akonaki ʻa Palesiteni Sāmita “ko e [moʻuí] ni ko e konga pē ia ʻo ʻitāniti” (peesi 75). Ko e hā ʻene ʻuhinga kiate koé? ʻOku takiekina fēfē ʻe heʻetau mahino fekauʻaki mo e tefitoʻi moʻoni ko ʻení ʻa e ngaahi fili ʻoku tau faí?
-
Ako ʻa e konga ʻoku kamata ʻi he peesi 75. ʻOku kehe fēfē ʻa e ngaahi akonaki ʻi he konga ko ʻení mei he meʻa ʻoku akoʻi ʻe māmani fekauʻaki mo e taumuʻa ʻo e moʻuí? Ko e hā e ngaahi meʻa ʻoku tau aʻusia ʻi he moʻui fakamatelié ʻe lava ʻo tokoniʻi kitautolu ke tau “ ʻinasi ʻi he ngaahi ʻulungāanga ʻo e ʻOtuá”?
-
Toe fakamanatu ʻa e konga ʻoku kamata he peesi 77, fakatautefito ki he palakalafi fakamuimuitaha ʻe fā ʻo e kongá. Ko e hā ʻoku tatau ai ʻa e fekumi ki he ngaahi meʻa ʻo e māmaní mo e “pipiki ki he pula ʻi ha vai koa kuo pā ʻo pulia”?
-
ʻOku lau ʻa Palesiteni Sāmita he peesi 79 ki he fakamatala kau ki he toetuʻú ʻi he Tokāteline mo e Ngaahi Fuakava 88. Ko e hā e meʻa ʻoku akoʻi atu ʻi he veesi 14–17 mo e 28–33 ʻo e konga ko ʻení ʻo kau ki he toetuʻú? Ko e hā ha ngaahi founga ʻaonga ke akoʻi ʻaki ʻa e fānaú fekauʻaki mo e toetuʻú?
-
Lau ʻa e konga ʻoku kamata ʻi he peesi 81. Ko e hā e niʻihi ʻo e ngaahi faingataʻa ʻo e moʻuí ʻoku faingofua ange ke ke matuʻuaki koeʻuhi he ʻoku ʻi ai hoʻo fakamoʻoni ki he ngaahi tefitoʻi moʻoni ʻoku akoʻi ʻi he konga ko ʻení?
Ngaahi Potufolofola Fekauʻakí: 1 Kolinitō 15:12–26, 35–42, 53–58; 2 Nīfai 9:6–13; ʻAlamā 12:24; 28:12; Tokāteline mo e Ngaahi Fuakava 93:19–20, 29–34; 130:18–19; ʻĒpalahame 3:24–26
Tokoni fakafaiakó: “Kole ki he kau akó ke fili ha konga ʻoku nau manako ai pea lau fakalongolongo ia. Fakaafeʻi kinautolu ke nau fakakulupu tautau toko ua pe toko tolu mo kinautolu naʻa nau fili ʻa e konga tataú pea nau aleaʻi e meʻa naʻa nau akó” (mei he peesi ix ʻo e tohi ko ʻení).
“ʻOku ou fakamālō ʻi hono fakahā mo fakamahinoʻi mai kiate kitautolu ʻi he ngaahi ʻaho kimui ní ʻoku ʻikai ko e ngataʻangá ʻa e moʻui ko ʻení, ka ko e konga pē ia ʻo ʻitāniti.”
“Ko e meʻa … ʻoku mahuʻinga ange ʻi hono toe ʻo e ngaahi meʻa kehé ko e faingamālie ko ia ke maʻu ʻa e moʻui taʻengatá [mo ho] ngaahi fohá mo e ʻofefiné, husepānití mo e uaifí.”
“Naʻe hoko … [e toetuʻu] ʻa e Fakamoʻuí ko e ʻuluaki tala fakapapau ki he faʻahinga ʻo e tangatá te tau toe tuʻu foki mo kitautolu mei he fonualotó.”