Fakamatala Fakahisitōlia Nounou

ʻOku ʻoatu ʻe he fakahokohoko hoko hake ʻo e ngaahi meʻa naʻe hokó ha fakamatala fakahisitōlia nounou ki he ngaahi akonaki ʻa Palesiteni Siaosi ʻAlipate Sāmita ʻoku ʻoatu ʻi he tohi ko ʻení.

4 ʻo ʻEpeleli, 1870	Fāʻeleʻi ʻi Sōleki Siti, kia Sione Henelī mo Sela Fā Sāmita.
1874–75	Ngāue fakafaifekau ʻene tamaí, ʻa Sione Henelī Sāmita, ʻi Pilitānia Lahi. Taʻu fā ʻa Siaosi ʻAlipate ʻi he taimi naʻá ne mavahe aí.
27 ʻo ʻOkatopa, 1880	Fakanofo ʻa Sione Henelī Sāmita ko ha ʻAposetolo.
1882–85	Hoko ʻa Sione Henelī Sāmita ko e palesiteni ʻo e Misiona ʻIulopé.
1883	Kamata ngāue ʻa Siaosi ʻAlipate Sāmita ʻi ha fale ngaahiʻanga tupenu ʻi hono taʻu 13.
1888	Kamata ngāue ki ha kautaha faʻu halanga lēlue. Naʻe hoko ha maumau lahi ki hono ongo matá tupu mei heʻene ngāué.
Sepitema–Nōvema, 1891	Ngāue fakafaifekau he feituʻu fakatonga ʻo ʻIutaá maʻá e Mutuale ʻa e Kau Talavoú (Young Men’s Mutual Improvement Association).
25 ʻo Mē, 1892	Mali mo Lusi ʻEmelī Utalafi ʻi he Temipale Manitai ʻIutaá.
1892–94	Ngāue fakafaifekau ʻi he feituʻu fakatonga ʻo e ʻIunaiteti Siteití, kamata pē hili ha ngaahi uike siʻi ʻene malí. Hili pē ha māhina ʻe fā ne ʻalu atu ʻa Lusi ki ai ʻi he misioná.
8 ʻo ʻOkatopa, 1903	Fakanofo ko e ʻAposetolo ʻe Palesiteni Siosefa F. Sāmita.
1904	Hiki ʻene “tui fakatāutahá,” ko ha lisi ʻo e ngaahi sīpinga moʻui ʻe 11 ʻokú ne tukupā ke moʻui ʻaki (vakai, peesi 1–2 ʻo e tohí ni).
1909–12	Moʻua ʻi ha ngaahi palopalema faingataʻa fekauʻaki mo e moʻui leleí.
1919–21	Puleʻi ʻa e Misiona ʻIulopé.
1921–35	Hoko ko e supiliniteni lahi ʻo e Mutuale ʻa e Kau Talavoú.
1922	Fili ko e tokoni palesiteni ʻo e National Society of the Sons of the American Revolution (Sosaieti Fakapuleʻanga ʻo e Ngaahi Foha ʻo e Tau Fakafonua ʻa ʻAmeliká). Naʻá ne ngāue ʻi he lakangá ni ʻo aʻu ki he 1925 pea ʻi he 1944 mo e 1946.
Sepitema, 1930	Tokoni ki hono fokotuʻu ʻo e Utah Pioneer Trails mo e Landmarks Association (Kautaha ki he Ngaahi Maka Fakamanatu ʻo e Hala ʻo e Kau Paionia ʻo ʻIutaá) ke ʻiloʻi mo fakaʻilongaʻi e ngaahi feituʻu fakahisitōlia ʻo e Siasí. ʻOku fili ia ko e fuofua palesiteni ʻo e kautahá.
27 ʻo Siulai, 1933	Hoko ko e palesiteni ʻo e Kautaha ko e Aid of the Sightless (Tokoniʻi ʻo e Kakai Kuí) ʻi ʻIutaá.
31 ʻo Mē, 1934	Maʻu ʻa e Silver Buffalo (Pulu Silivá) ʻa ia ko e fakalāngilangi māʻolunga taha ʻoku foaki ʻe he Boy Scouts of America (Sikauti ʻa ʻAmeliká).
1935–36	Tokangaʻi hono pulusi ʻo e Tohi ʻa Molomona maʻá e kakai kuí.
5 ʻo Nōvema, 1937	Naʻe mālōlō ʻa Lusi ʻi hono taʻu 68 hili ia haʻane mahamahaki fuoloa.
Sānuali–Siulai, 1938	ʻAʻahi ki he ngaahi misiona ʻo e Siasí ʻi he Pasifiki Tongá, kau ai ʻa Hauaiʻi, Haʻamoa, Tonga, Tahiti, Nuʻu Sila, mo ʻAositelēlia.
Siulai, 1943	Vaheʻi ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá.
21 ʻo Mē, 1945	Vaheʻi ko e Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
23 ʻo Sepitema, 1945	Fakatapui e Temipale ʻAitahō Folo ʻAitahoó.
2 ʻo Nōvema, 1945	Fakataha mo Harry S Truman ko e palesiteni ʻo e ʻIunaiteti Siteití ke aleaʻi e ngaahi ngāue ke ʻave ha tokoni ki ʻIulope hili e Tau Lahi ʻa Māmani hono II.
Mē, 1946	ʻAʻahi ki he kāingalotu ʻo e Siasí ʻi Mekisikoú, ko e fuofua Palesiteni ʻo e Siasí ke ne fai ʻeni. Foaki e tatau ʻo e Tohi ʻa Molomoná ki he palesiteni ʻo Mekisikoú, ko Manuela Kamako (Manuel Camacho).
24 ʻo Siulai, 1947	Fakatapui e Maka Fakamanatu This Is the Place (Ko e Feituʻú ʻEní) mo fakamanatu ʻa e taʻu teau ʻo e tūʻuta ʻa e kau paioniá ʻi he Teleʻa Sōlekí.
1947	ʻOku aʻu e tokolahi ʻo e Siasí ki he toko taha milioná.
30 ʻo Sepitema– 2 ʻo ʻOkatopa, 1949	Kau ʻi he fuofua konifelenisi lahi ne fakamafola fakatelevīsoné.
4 ʻo ʻEpeleli, 1951	Pekia ʻi Sōleki Siti, ʻIutā, ʻi hono taʻu 81.