Vahe 11
Fakahā mei he ʻOtuá ki Heʻene Fānaú
ʻOku tataki fakafoʻituitui kitautolu ʻe heʻetau Tamai Hēvaní pea ʻi heʻetau hoko ko ha Siasí ʻo fakafou ʻi he Laumālie Māʻoniʻoní.
Mei he Moʻui ʻa Siaosi ʻAlipate Sāmitá
Naʻe fakamatala ʻa Siaosi ʻAlipate Sāmita ki ha meʻa naʻe hoko ʻi heʻene heka vakapuna mei Losi ʻEnisilesi ʻi Kalefōniá ki Sōleki Siti ʻi ʻIutā, ke akoʻi ʻa hono mahuʻinga ʻo e fakahaá ke tataki ʻaki e Siasí:
“ʻI heʻemau ofi ki Milifooti ʻi ʻIutaá, naʻa mau fetaulaki mo e taha ʻo e kakapu matolu taha kuó u mamata ai. Ne u feinga ke sio ki tuʻa he matapā sioʻata ʻo e vakapuná ka naʻe ʻikai ke u lava ʻo sio ki ha meʻa ʻi he kakapú. Ne ʻikai pē ʻasi mai ha meʻa mei ha tafaʻaki ʻi tuʻa he vakapuná.
“Ne u ʻiloʻi ne mau ofi atu ki he ʻotu moʻungá ʻi he vave ko e maile ʻe tolu ki he miniti, pea naʻe fie maʻu ke mau fakalaka ai ke aʻu ki he Teleʻa Sōlekí. Ne u hohaʻa peá u fehuʻi hifo pē, ‘ ʻE ʻilo fēfē nai ʻe he pailaté ʻa e halá lolotonga ʻoku ʻikai lava ʻo sio ki ha meʻá?’ ʻOku ʻi ai ʻene kāpasa ka ʻe lava pē ke mavahe e vakapuná mei hono hala totonú. ʻOku ʻi ai e ngaahi meʻangāue ke fakahā homau mamaʻo mei he fukahi tahí ka ʻoku ʻikai ha founga ke ne ʻiloʻi ai homau mamaʻo mei he kelekelé. Ne u fakakaukau te ne puna māʻolunga feʻunga ke mavahe mei he ʻotu moʻunga naʻe ʻi homau vahaʻa mo e Teleʻa Sōlekí pea feinga ke ʻiloʻi e tōʻangá ʻi he ulo ʻa e ʻū maama fakahinohinó kapau te mau ofi feʻunga ki ai, ka naʻá ku manavasiʻi ʻi heʻeku fakakaukau atu ki he fakatuʻutāmaki ʻo haʻamau hē ʻo ʻikai ke mau sio ki he ʻū māmá mo e malaʻe vakapuná.
“ʻI he hohaʻa ʻeku fakakaukaú ne u ʻalu atu ki he feituʻu naʻe ʻi ai e pailaté mo e tokoni pailaté ke vakai pe naʻá na ʻiloʻi e feituʻu naʻa mau ō ki aí. Naʻe ʻikai ke u lava ʻo tala pe naʻa mau fute ʻe teau, tahaafe, pe fute ʻe taha mano mei he fukahi kelekelé pea ʻikai ke u ʻiloʻi pe ʻe lava fēfē ke na tala, tuku kehe pē haʻana fakafuofuaʻi. Ne u fakatokangaʻi ha meʻa naʻe ʻai he telinga ʻo e pailaté hangē ko ia ʻoku fakaʻaongaʻi ʻe he kau ngāue he ngaahi ʻōfisi telefoní ke fanongo ki ha tā atu. Ne u ʻeke ange ki he tokoni pailaté pe naʻe lava fēfē ke na tala ʻoku mau puna ʻi he feituʻu totonú pe ʻiloʻi naʻa mau mavahe mei he halanga totonú. Naʻá ne tali mai, ‘ ʻOku fakahinohino kimaua ʻe he piimi letioó (radop beam,) ʻi he taimi ʻoku ʻikai ke ma lava ai ʻo sió.’
Ne u fehuʻi ange, “‘Ko e hā ia?’ Naʻá ne fakamatala mai ʻoku fakatatau ʻa e piimí (beam) ki ha hala puleʻanga fakaʻuhila ʻi he ʻataá he vahaʻa ʻo ha ongo kolo, pea tau pehē ʻi he meʻá ni ko e vahaʻa ia ʻo Milifooti mo Sōleki Sití. Naʻá ne pehē ko e kiʻi meʻangāue ko ʻena ʻi he telinga ʻo e pailaté ʻoku ngāue ia ke ne lava ʻo tala ʻa e taimi ʻoku nofo tonu ai e vaká ʻi he loto hala fakaʻuhilá pe pīmí ʻaki ha kiʻi ongo mumuhu molū leʻosiʻi, pea ka hē ʻa e vaká ki hema pe ko mataʻu ʻe fetongi leva ʻa e ongó ki he patopatō o hangē ko e mākoní. Ko ʻene foki pē ki he lotohala totonú pe letiō pīmí, (radio beam) ʻe longo leva ʻa e patopatoó kae hoko atu ʻa e ongo mumuhú. Pea kapau te tau hokohoko atu pē ʻi he loto pīmí te tau aʻu lelei leva ki he feituʻu ʻoku tau fononga ki aí.
“Ne u foki ki hoku nofoʻangá kuó u ongoʻi fiemālie ʻaupito heʻeku ʻiloʻi neongo hono takatakaiʻi kimautolu ʻe he kakapú mo e fakapoʻulí pea ʻikai ke mau lava ʻo sio pe ongoʻi e feituʻu naʻa mau ʻi aí, ka naʻe maʻu pē ʻe he pailaté ha fakamatala ʻoku mau ʻi he hala totonú pea kuo vave pē ʻemau tau. Hili pē ha ngaahi miniti siʻi mei ai kuó u ongoʻi e tō hifo ʻa e vakapuná. Kuo mau fakalaka mai he tumuʻaki ʻo e ʻotu moʻungá pea ne mau ofi ki he malaʻe vakapuná. ʻI he ofi ke mau tō hifó, naʻe lava ke mau sio ki he ngaahi maama ulo lahi ʻo e malaʻé ʻo fakahinohino mai ʻa e feituʻu ke tō aí pea naʻe moulu e tō hifo ʻa e vakapuná mo ʻene utá ʻo hangē ko e tō hifo ʻa ha foʻi tala ki he fukahi tahí, pea māmālie ʻo tuʻu pea mau hifo mei ai ki he kelekelé mo e fiefia ke toe aʻu mai ki ʻapi. …
“Kuó u fakakaukau tuʻo lahi ki he lēsoni ne u ako he vakapuná peá u fakaʻaongaʻi ia ki he meʻa ʻoku hoko ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. …
“ ʻOku ʻikai ngata pē hono foaki mai ʻe he ʻEikí ʻa e meʻangāue kuo ʻosi hiki ʻi he ngaahi folofolá ke fakahinohinoʻi ʻaki kitautolú ka kuó ne fokotuʻu ha taki ʻi he Siasí ni, ko ha taha ʻo hono ngaahi foha kuo ʻosi fili pea fakanofo mo vaheʻi ke hoko ko e Palesitení. Ko hotau pailaté ia pea ʻe fakahinohinoʻi ia ʻe ha leʻo ʻo lava ke ne tataki ai kitautolu ʻi he feituʻu ʻoku totonu ke tau ʻalu ki aí. Kapau te tau fakapotopoto he ʻikai ke tau tuku ke fepaki ʻetau ngaahi fakakaukaú mo ia ka te tau fiefia ke fakaʻapaʻapaʻi ia ʻi hono tuʻungá lolotonga ʻoku poupouʻi ia ʻe he ʻEikí.”
Naʻe fakaʻaongaʻi foki ʻe Palesiteni Sāmita e meʻa naʻe hoko he vakapuná ke akoʻi mai te tau lava ʻo takitaha maʻu fakahā fakatāutaha ke tataki ʻaki ʻetau moʻuí ʻo kapau ʻoku tau moʻu taau:
“Kapau ʻoku tau moʻui ʻo hangē ko ia ʻoku tau ʻilo ʻoku totonú, ʻoku ʻi ai ʻetau totonu ki he fanafana ʻa e kihiʻi leʻo siʻí ʻo fakatokanga mai ʻi ha fakatuʻutāmaki, ʻo talamai ko e hala ʻeni te mou malu aí, ke [mou] ʻalu ʻi ai. … Kapau kuo tau fehālaaki, ʻe fanafana mai ʻa e leʻó kiate kitautolu ‘foki, kuó ke fai e fehālaaki; kuo ʻikai ke ke tokanga ki he faleʻi ʻa hoʻo Tamai Hēvaní.’ Tafoki mei hoʻo fehālākí lolotonga ʻoku kei taimi, he ka ke mavahe ʻo fuʻu mamaʻo mei he hala totonú, he ʻikai te ke fanongo ki he leʻó pea te ke hē ʻo ʻikai ha toe ʻamanaki lelei. …
“Ko ʻeku faleʻi kiate kimoutolú ke mou maʻu ʻa e Laumālie ʻo e ʻOtuá pea tauhi maʻu ia pea ko e founga pē ʻe lava ke tau tauhi maʻu ai iá ko ʻetau moʻui ofi kiate ia ʻaki hono tauhi ʻene ngaahi fekaú. … Fakafanongo ki he kihiʻi leʻo siʻí ʻa ia te ne tataki maʻu pē kimoutolu kapau ʻoku mou moʻui taau ʻi ha hala ʻe iku ki he fiefia taʻengatá.”1 [Vakai, fokotuʻu 1 he peesi 128.]
Ngaahi Akonaki ʻa Siaosi ʻAlipate Sāmitá
ʻOku fakahā ʻe he ʻOtuá Ia ki Heʻene fānaú ʻi hotau kuongá ni ʻo hangē ko ia kuó Ne fai ʻi he ngaahi kuonga kuo hilí.
Ko ha monū ke moʻui ʻi he kuonga ʻo e māmaní ʻoku tau ʻiloʻi ai ʻoku moʻui ʻa e ʻOtuá, ʻoku tau ʻiloʻi ai ko e Fakamoʻui ʻo e māmaní mo hotau Huhuʻí ʻa Sīsū Kalaisi, pea ʻoku tau ʻiloʻi ai ʻoku kei hokohoko atu hono fakahā ʻe he ʻEikí Ia ki heʻene fānau kuo nau teuteuʻi kinautolu ke maʻu ʻene ngaahi tāpuakí! ʻOku ou vakai atu he pongipongí ni [ʻi ha fakatahaʻanga ʻo e konifelenisi lahí] ki he fofonga ʻo ha haʻofanga tokolahi, ʻa ia ʻoku maʻu ʻe honau tokolahi ʻa e ueʻi ʻa e ʻOtua Māfimafí, pea ʻi he taimi ʻoku nau lotu aí, ʻoku nau lotu ki heʻenau Tamai ʻi hēvaní pea ʻiloʻi ʻe tali mai ʻenau ngaahi lotú ʻaki ha ngaahi tāpuaki ki honau ʻulú. … ʻOku tau ʻiloʻi ʻoku ʻi ai ha ʻOtua ʻi he langí, ko ʻetau Tamaí ia, ʻokú ne tokanga mai ki heʻetau ngaahi meʻa ʻoku faí, pea kuo pehē ai pē talu mei he kamataʻanga ʻo e māmaní, ʻi he taimi naʻe tuku ai ʻene fuofua fānaú ki he funga ʻo e māmaní.2
Ko e faikehekehe ʻo e Siasi maʻongoʻongá ni mei he ngaahi siasi kotoa mei he kamataʻangá, ko ʻetau tui ki he fakahā fakalangí, ʻoku tau tui ʻoku folofola ʻetau Tamaí ki he tangatá he ʻahó ni ʻo hangē kuó Ne fai mei he taimi ʻo ʻĀtamá. ʻOku tau tui pea tau ʻiloʻi—ʻa ia ʻoku ʻikai ko e tui pē—kuo ala mai e toʻukupu ʻo ʻetau Tamaí ʻi he māmani ko ʻení ke fakamoʻui e fānau ʻa e tangatá.3
ʻOku ʻikai ko hono ʻuhinga pē ʻoku faʻa ui ai kitautolu ko ha kakai makehé ko ʻetau tui ki he ngaahi tohí ni [ʻa e Tohi ʻa Molomona, Tokāteline mo e Ngaahi Fuakavá, mo e Mataʻitofe Mahuʻingá] ka koeʻuhí ko ʻetau tui mo falala kuo folofola mai ʻetau Tamai ʻi he langí ʻi he ʻaho mo e kuonga ko ʻení. Ko hono moʻoní, ʻoku tau ʻiloʻi ʻoku ʻi ai ʻa e fetuʻutaki mo e langí. ʻOku tau tui ʻoku maʻu ʻe Sihova ʻa e ongo tatau kiate kitautolu, ʻa e ivi tākiekina tatau naʻá ne maʻu maʻa ʻene fānau naʻe moʻui ʻi he māmaní ʻi he kuo hilí.
Naʻe lau ʻe he kakai taʻetuí ʻa e kāingalotu ʻo e Siasi ʻo Sīsū Kalaisí ʻi he kuonga kotoa pē ko ha kakai makehe. ʻI he taimi naʻe folofola mai ai e ʻEikí ʻi heʻene kau tamaioʻeikí, ne ʻi ai e ngaahi vahaʻataimi kehekehe naʻe pehē ai ʻe ha kakai tokolahi ʻi he māmaní, “ ʻOku ʻikai ke u tui ki he fakahaá.” ʻOku ʻikai toe kehe ʻa e kuongá ni. ʻOku toe fai pē ʻe he toko lauiafe, ʻio, ʻe he lauimiliona ʻo e fānau ʻa ʻetau Tamaí kuo moʻui ʻi he māmaní ʻa e hisitōlia ʻo e kuo hilí ʻa hono fakaʻikaiʻi kuo toe fakahā mai ʻe he ʻOtuá ʻa hono finangaló ki he fānau ʻa e tangatá, pea nau pehē ʻoku ʻikai ke nau fie maʻu mo ha toe ngaahi fakahā kehe.4
ʻOku ʻikai ke tau tui kuo tāpuni ʻa e langí meiate kitautolu, ka ʻoku ʻofeina mo tauhi kitautolu ʻe he Tamai tatau pē ko ia naʻá ne ʻofeina mo tauhi e fānau ʻa ʻIsilelí. ʻOku tau tui ʻoku tau fie maʻu lahi ʻa e tokoni ʻa ʻetau Tamai Hēvaní ʻi hono tataki ʻetau moʻuí ʻo hangē ko ia ne nau fie maʻú. ʻOku tau tui kuo fakaava mai ʻa e langí ʻi he ʻaho mo e kuonga ʻoku tau moʻui aí, pea kuo toe folofola mai ʻa e ʻOtuá mei he langí.5 [Vakai, fokotuʻu hono 2 he peesi 128.]
ʻOku tataki ʻe he ʻEikí ʻa Hono kakaí ʻi he fakahā ki he Palesiteni ʻo e Siasí.
Naʻe fokotuʻu ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he fekau fakahangatonu mei heʻetau Tamai Hēvaní. Naʻe fokotuʻu ʻa e Siasí ni ʻi he maka ʻo e fakahā pea ʻoku tataki ia ʻi he fakahā.6
ʻOku ʻikai hano tatau ʻo e mahuʻinga ke kau ki ha siasi he ʻahó ni, ʻa ia ʻoku tui ʻa kinautolu ʻoku mēmipa aí ʻoku folofola mai ʻa e ʻEikí ʻo fakafou ʻi honau kau takí. ʻI he taimi ʻoku fakahinohinoʻi ai kitautolu ʻe he Palesiteni ʻo e Siasi ko ʻení, ʻoku tau tui ʻokú ne talamai ʻa e meʻa ʻoku finangalo e ʻEikí ke tau faí. Kiate kitautolu, ʻoku ʻikai ko ha faleʻi pē ia ʻa ha tangata ka ʻoku toe loloto ange ai. ʻOku tau tui ʻoku hanga ʻe he tui ko ʻení ʻo ʻai ke tau vakavakaiʻi hotau lotó, pea ʻoku ueʻi ai kitautolu ke tau fakafoʻou ʻetau fakapapau ke aʻu ki he tuʻunga ʻoku fie maʻu ʻe he ʻOtuá ke tau aʻusiá.7
Kuo ʻi ai ha kakai ʻi he Siasí kuo takihalaʻi kinautolu ʻi heʻenau taʻeʻiló, ʻo nau fakafepakiʻi ʻa e faleʻi ʻa e [Palesiteni ʻo e Siasí], ʻo ʻikai ke nau ʻiloʻi ko ʻenau fakafepakiʻi ia e ʻEikí pea kuo nau tō atu ki he fakapoʻulí mo e mamahí, pea he ʻikai ke nau maʻu ha feituʻu ʻi he puleʻanga fakasilesitialé tuku kehe ʻo ka nau fakatomala.
Tau manatuʻi muʻa naʻe ʻosi vaheʻi ʻa e Palesiteni ʻo e Siasi ko ʻení ke hoko ko e pailate ʻo e Siasí ʻi he moʻui fakamatelié ni ke ne fakafofongaʻi ʻa e ʻEiki ʻo langi mo māmaní.8
ʻI he taimi ka haʻu ai ha kau tangata ki ha tokotaha fakafoʻituitui pe niʻihi fakafoʻituitui ʻo hangē ko ʻenau faʻa fai ʻi heʻenau feinga ke kau atu ha niʻihi mo kinautolú, ʻo nau pehē, “Ne u misi ko e meʻa ʻeni ʻoku finangalo e ʻEikí ke tau faí,” te ke ʻilo ʻoku ʻikai ke nau ʻi he tafaʻaki ʻa e ʻEikí. Kuo fakafou mai maʻu pē ʻa e ngaahi misi mo e ngaahi meʻa-hā-mai ʻa e ʻOtuá ki he fānau ʻa e tangatá ʻi heʻene tamaioʻeiki kuo fakanofó maʻu pē. ʻE lava ke ke misi mo maʻu fakahā ke fakafiemālieʻi koe mo ke maʻu e nongá, ka he ʻikai te ke maʻu fakahā maʻá e Siasí. … ʻOku ʻikai totonu ke kākaaʻi ʻa kitautolu fekauʻaki mo e meʻá ni.9
ʻOku fonu hoku lotó ʻi he fakafetaʻi he ʻahó ni ke ʻiloʻi lolotonga ʻetau hokohoko atu ko e mēmipa ʻi he Siasí ʻoku ʻi ai ʻetau pailate ʻokú ne ʻiloʻi e halá, pea ka tau muimui ʻi heʻene fakahinohinó … he ʻikai hoko mai kiate kitautolu ʻa e ngaahi faingataʻa fakalaumālie ko ia ʻoku hoko ki he māmaní ka te tau feʻaluʻaki ʻo fai lelei, faitāpuekina e faʻahinga ʻo e tangatá, pea fiefia ʻi he feohi mo kinautolu ʻoku tau ʻofa aí.10 [Vakai, fokotuʻu hono 3 he peesi 128.]
ʻOku takitaha ʻi ai ʻetau totonu ke maʻu ha ueʻi fakalaumālie fakatāutaha mei he Laumālie Māʻoniʻoní ʻo kapau te tau talangofua ki he ngaahi fekaú.
ʻE hoku ngaahi tokoua mo e tuofāfine, ʻoku ou tui kiate kimoutolu. … ʻOku ʻi ai hoʻomou totonu ke maʻu ʻa e ʻilo tatau mo ia ʻokú ne puleʻi e Siasí. ʻOku ʻi ai hoʻomou totonu ki he tākiekina fakalaumālie ʻoku tafe atu kiate kinautolu kuo fili ʻe he ʻOtuá pea fakanofo ko ʻEne kau taki. ʻOku ʻi ai hoʻomou totonu ke maʻu e ueʻi ʻa e Laumālié, mo hono ʻiloʻi ko hoʻomou Tamaí Ia, pea ʻi heʻeku pehē “kimoutolú” ʻoku ou ʻuhinga kiate kinautolu kotoa pē kuo talangofua ki he ngaahi fekau ʻa ʻetau Tamaí, pea ʻinasi ʻi he ivi tākiekina fakaʻofoʻofa ʻo e Laumālie ʻo e ʻEikí ʻi he Siasi ʻo Kalaisí. … ʻOku ʻi ai ʻetau totonu takitaha ki he ueʻi ʻa e laumālie ʻo e ʻEikí ʻo fakatatau ki heʻetau moʻui anga-māʻoniʻoní.11
Ko e fē pē ha feituʻu te mou ō ki ai, he ʻikai ke mou ʻilo ai ha kulupu ʻo hangē ko ʻení, ʻa ia ʻoku tui ʻa e tokotaha takitaha ki he ʻOtuá; pea kapau te tau fehuʻi kiate kimoutolu hono kotoa pe ko homou toko fiha ʻoku ʻi ai ʻene fakamoʻoni, ʻo ʻikai ko ha tui pē ne lea ʻaki ia ʻe ha taha, ka ko homou toko fiha ʻokú ne ʻiloʻi fakapapau ko e ngāue ʻeni ʻa e ʻOtuá, ko Sīsū ʻa e Kalaisí, pea te tau moʻui ʻo taʻengata, ko Siosefa Sāmitá ko ha palōfita ia ʻa e ʻOtua Moʻuí, te mou tali mai ʻoku mou maʻu ʻa e fakamoʻoni ko ʻení ʻa ia ʻokú ne fakalotolahiʻi kimoutolu mo fakamālohia kimoutolu mo fakafiemālieʻi kimoutolu lolotonga ʻoku mou laka atu ki muʻa ʻi he māmaní. …
… Ne u ʻiloʻi ʻi heʻeku kei siʻí ko e ngāue ʻeni ʻa e ʻEikí. Ne u ʻiloʻi naʻe ʻi ai ha kau palōfita naʻe moʻui ʻi he funga ʻo e māmaní. Ne u ʻiloʻi ʻe tākiekina ʻe he ueʻi fakalaumālie ʻa e ʻOtua Māfimafí ʻa kinautolu ʻoku moʻui taau ke maʻu iá, ko ia ʻoku ʻikai ai ke tau fakafalala ki ha toko taha pe toko ua pe ha toko ono. ʻOku lauiafe ʻa e kāingalotu ʻo e Siasí ni ʻoku nau ʻiloʻi—ʻoku ʻikai ko e anga pē haʻanau fakakaukau—ʻoku nau ʻiloʻi ʻoku moʻui ʻa e ʻOtuá pea ko e Kalaisí ʻa Sīsū pea ko e fānau kitautolu ʻa e ʻOtuá.12
ʻOku ʻikai ke mou fakafalala ʻataʻatā pē ki he hisitōliá, pe ki he ngaahi akonaki ʻa ha tangata, ke ʻiloʻi ko e ngāue ʻeni ʻa e ʻEikí, he kuo tongi ia ki homou laumālié ʻe he meʻafoaki ʻo e Laumālie Māʻoniʻoní. ʻOku ʻikai ha veiveiua ʻi homou ʻatamaí ki homou tupuʻangá, pe ki he feituʻu te mou ō ki ai ʻi he ʻosi ʻa e moʻui ní, ʻo kapau te mou faivelenga ki he falala kuo tuku kiate kimoutolú.13
He ʻikai lava ʻe ha taha kehe ʻo ʻomai haʻatau fakamoʻoni. ʻOku maʻu e fakamoʻoní ia mei heʻetau Tamai Hēvaní.14
ʻOku ou tuʻu heni he ʻahó ni mo e houngaʻia lahi ʻi he ʻilo kuó u maʻú. ʻOku ou fakamālō ʻoku ʻikai ke u fakafalala ki ha taha ʻi he fakamoʻoni ʻoku ou maʻú. Ko e moʻoni, ʻoku hounga kiate au ʻa e fakalotolahi ne u maʻu mei he niʻihi kehe ʻoku nau maʻu ʻa e māmá mo e moʻoní, pea nau fakalotolahiʻi au ʻaki ʻenau ngaahi moʻui angamāʻoniʻoní, ka ʻoku ʻikai ke u fakafalala ki hanau taha ʻi heʻeku ʻiloʻi ʻoku moʻui ʻa e ʻOtuá, ko Sīsū Kalaisi ʻa e Huhuʻi ʻo e faʻahinga ʻo e tangatá pea ko Siosefa Sāmitá ko e palōfita ia ʻa e ʻEikí. ʻOku ou ʻiloʻi e ngaahi meʻá ni ʻiate au pē.
… ʻOku ou fiefia ke fakamoʻoni ʻoku ou ʻiloʻi ʻoku moʻoni ʻa e ongoongoleleí, pea ʻoku ou fakamālō ki heʻeku Tamai Hēvaní ʻaki hoku lotó kotoa ʻi heʻene fakahā ia kiate aú.15
Ko e mahuʻinga taha ʻi he ngaahi tāpuaki kotoa kuó u maʻu ʻi he moʻuí ʻa hono ʻiloʻi ko ia ʻoku moʻui ʻa e ʻOtuá pea ko ʻene ngāué ʻeni, he ʻokú ne fakalūkufua kotoa ʻe ia ʻa e ngaahi tāpuaki kehe ʻoku ou ʻamanaki ke maʻu ʻi he moʻui ní pe ʻi he moʻui ka hoko maí.16 [Vakai, fokotuʻu hono 4 he peesi 129.]
Ko e Laumālie Māʻoniʻoní ko ha tataki malu ia ʻi he hala ʻo e moʻui matelié.
Ko e takaua ʻo e Laumālie ʻo e [ʻOtuá] … ko ha tataki malu ia ʻi he hala ʻo e moʻui matelié pea mo ha teuteu pau ki ha ʻapi ʻi hono puleʻanga fakasilesitialé.17
ʻOku tau lau ʻi he tohi ʻa Siopé ʻoku ʻi ai ha laumālie ʻi he tangatá, pea ʻoku foaki kiate ia ʻa e ʻilo lahi ʻe he fakamānava ʻa e Māfimafí [vakai, Siope 32:8]. Kapau te tau tauhi e ngaahi fekau ʻa e ʻOtuá ʻoku ʻi ai ʻetau totonu ki he fakamānava ko iá, pea ka tau moʻui ʻo hangē ko ia ʻoku totonu ke moʻui ʻaki ʻe he ngaahi foha ʻo e ʻOtuá, te tau maʻu ʻa e fakamānava ko iá, pea he ʻikai lava ʻe ha taha ʻo taʻofi ia, pea ko hono olá ko ʻetau tupulaki fakatuʻasino mo fakaʻatamai mo fakaeangamaʻa ʻi he moʻui ʻi māmaní, pea hokohoko atu ai pē ʻetau fakalakalaká ʻi ʻitāniti.18
Ko e takaua ʻo e laumālie ʻo e ʻEikí ko ha faitoʻo ia ki he ongosiá, … faitoʻo ki he manavaheé mo e ngaahi meʻa kātoa ʻoku nau faʻa uesia kitautolu ʻi he moʻuí.19
ʻI he taimi naʻe fakataha ai e kau ākonga ʻa e Fakamoʻuí mo iá naʻa nau ʻofa ʻiate ia kae ʻikai ke nau ʻiloʻi moʻoni ʻa e meʻa naʻá ne lavá, ka naʻa nau toki lava pē ʻo fehangahangai mo e ngaahi palopalemá mo kātakiʻi e ngaahi fakatanga naʻe ʻikai ke nau meimei lava ʻo kātakiʻi ʻi he taimi naʻe nofoʻia ai kinautolu ʻe he Laumālie Māʻoniʻoní, pea papitaiso kinautolu ʻaki ʻa e afí. ʻI he taimi naʻe ʻoange ai ʻa e mahinó ʻe he ueʻi ʻa e laumālie ʻo e Māfimafí kiate kinautolú naʻa nau ʻiloʻi naʻe taʻengata ʻenau moʻuí, pea kapau naʻa nau fakamoʻoniʻi ʻoku nau faivelenga, te nau ʻilo ko e taimi te nau mate aí te nau toe tuʻu mei he fonualotó ki he nāunau mo e moʻui taʻe-faʻa-maté.
Ko e ola ia ʻo e ueʻi ʻa e Laumālie ʻo e ʻOtuá naʻe hoko kiate kinautolú, ʻa e ueʻi ʻa e Māfimafí naʻá ne foaki kiate kinautolu ʻa e ʻiló. …
ʻOku ou lotua ʻe nofoʻia kitautolu ʻe he Laumālie ʻokú ne tauhi maʻu kitautolu ʻi he hala ʻo e moʻoní mo e māʻoniʻoní, pea ʻoku ou lotua ʻe tataki kitautolu ʻe he holi ko ia ʻoku haʻu mei he fakamānava ʻa ʻetau Tamai Hēvaní ʻi he hala ʻo e moʻuí.20
ʻI he taimi kuo kakato ai ʻa e ngāue ʻi he moʻuí, ʻofa ke tau ʻiloʻi naʻa tau fakafanongo ki he fanafana ʻa e kihiʻi leʻo siʻi ko ia ʻokú ne tataki maʻu pē kitautolu ʻi he hala ʻo e māʻoniʻoní, pea ʻiloʻi kuó ne fakaava kiate kitautolu ʻa e matapā ki he puleʻanga faka-Silesitialé, maʻatautolu mo kinautolu ʻoku tau ʻofa aí, ke tau laka atu kimuʻa ʻi he ngaahi kuongá, …ʻo fiefia taʻengata.21 [Vakai, fokotuʻu hono 5 he peesi 129.]
Ngaahi Fokotuʻu ki hono Ako mo Akoʻí
Fakakaukauʻi e ngaahi fakakaukau ko ʻení lolotonga hoʻo ako e vahé pe teuteu ke akoʻí. Ki ha toe tokoni makehe, vakai ki he peesi vii–ix.
-
ʻI hoʻo lau “Mei he Moʻui ʻa Siaosi ʻAlipate Sāmitá” (peesi 119–121), fakakaukau ki he fekauʻaki e talanoa ʻa Palesiteni Sāmitá mo ʻetau fononga ʻi he moʻui fakamatelié. Ko e hā ʻoku fakafofongaʻi ʻe he kakapú, letiō pīmí, mo e ongo patopatoó? Kuo fakatokanga fēfē atu ʻa e ʻEikí ʻi ha taimi fakatuʻutāmaki mo tokoni ke ke nofo maʻu ʻi he hala ki he moʻui taʻengatá?
-
ʻOku pehē ʻe Palesiteni Sāmita he peesi 122–23 ʻoku fie maʻu ʻa e fakahaá ʻi he kuongá ni ʻo hangē pē ko ia he kuonga ʻo e tohi tapú. Ko e hā haʻo tali ki ha taha ʻokú ne pehē ʻoku feʻunga pē ʻa e ngaahi fakahā ʻi he folofolá maʻa hotau kuongá ni? Ko e hā ha ngaahi meʻa kuó ke aʻusia ʻo ke ako ai “ ʻoku tokanga mai [ʻa e Tamai Hēvaní] ki he ngaahi meʻa ʻoku tau faí”?
-
Toe fakamanatu ʻa e konga ʻoku kamata he peesi 124. Naʻá ke ʻiloʻi fēfē ʻoku mei he ʻEikí ʻa e faleʻi ʻa e palōfitá pea ʻoku “loloto ange ia ʻi he faleʻi ʻa e tangatá”? (peesi 125) ʻE tokoni fēfē nai ʻa e fakahā fakatāutahá ke ke tali mo moʻui ʻaki ha fakahā ʻoku fakafou mai ʻi he palōfitá?
-
ʻI hoʻo ako ʻa e konga ʻoku kamata he peesi 125, fakakaukau ki he founga naʻá ke maʻu ai ha fakamoʻoni ki he ongoongoleleí. Naʻe tokoni fēfē atu e ngaahi fakamoʻoni ʻa e niʻihi kehé? Ko e hā e meʻa naʻá ke fai ke ke ʻiloʻi ai ʻa e moʻoní ʻiate koe pē?
-
Kumi ʻi he konga fakaʻosi ʻo e ngaahi akonakí (peesi 127–28), ʻa e ngaahi foʻi lea mo e ngaahi kupuʻi lea ʻoku nau fakamatalaʻi ʻa e founga ʻe lava ke tokoniʻi ai kitautolu ʻe he Laumālie Māʻoniʻoní. Fakakaukau ki he meʻa te ke lava ʻo fai ke ke taau ʻo lahi ange ʻi hoʻo moʻuí ki he takaua ʻo e Laumālie Māʻoniʻoní.
Ngaahi Potufolofola Fekauʻakí: Sione 15:26; 1 Nīfai 10:17–19; 2 Nīfai 32:5; Molonai 10:3–5; Tokāteline mo e Ngaahi Fuakava 1:38; 42:61; 76:5–10; Ngaahi Tefito ʻo e Tui 1:9
Tokoni fakafaiakó: “ ʻOua naʻá ke hohaʻa ʻo kapau ʻoku fakalongolongo e kau akó ʻi ha kiʻi taimi siʻi hili hoʻo fai ha fehuʻi. ʻOua naʻá ke tali hoʻo fehuʻi pē ʻaʻaú; ʻoange ha taimi ki he kau akó ke nau fakakaukau ai ki he ngaahi talí. Ka neongo ia,ʻe hanga ʻe he longo fuoloá ʻo fakahaaʻi mai ʻoku ʻikai mahino kiate kinautolu e fehuʻí pea ʻoku fie maʻu ke ke toe fakalea ia” (ʻOku ʻIkai ha Ui ʻe Mahuʻinga Ange ʻi he Faiakó, 69).
Ko Siaosi ʻAlipate Sāmita mo hono uaifi ko Lusí. Naʻe fakaʻaongaʻi ʻe Palesiteni Sāmita ha meʻa naʻá ne aʻusia ʻi ha vakapuna ke akoʻi ʻaki e mahuʻinga ʻo e fakahaá.
Ko Siaosi ʻAlipate Sāmita mo hono uaifi ko Lusí. Naʻe fakaʻaongaʻi ʻe Palesiteni Sāmita ha meʻa naʻá ne aʻusia ʻi ha vakapuna ke akoʻi ʻaki e mahuʻinga ʻo e fakahaá.
“ʻOku ʻi ai ʻetau totonu takitaha ki he ueʻi ʻa e laumālie ʻo e ʻEikí ʻo fakatatau ki heʻetau moʻui anga-māʻoniʻoní.”