29 Siulai–4  ʻAokosi

Ngāue 22–28

“Ko ha Faifekau mo ha Fakamoʻoni”

ʻI hoʻo lau e ngaahi talanoa mei he ngāue fakafaifekau ʻa Paula ko e ʻAposetoló ʻi he Ngāue 22–28, fekumi ki ha ngaahi tefitoʻi moʻoni ʻe ʻuhinga mālie ki he fānau ʻokú ke akoʻí.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Fakaʻaliʻali ha ngaahi fakatātā ʻo ha loki pilīsone, ha vaka, pea mo ha ngata. Fakaafeʻi e fānaú ke vahevahe ha faʻahinga talanoa pē ʻoku nau ʻilo fekauʻaki mo Paula ʻa ia ʻoku kaunga ki ai e ngaahi fakatātā ko ʻení.

Akoʻi e Tokāteliné

Fānau Iiki Angé

Ngāue 23:10–11

ʻOku tokanga mai ʻa e Tamai Hēvaní mo Sīsū kiate au pea ʻe tokoniʻi au lolotonga e ngaahi taimi faingataʻá.

ʻE lava ke tokoni ʻa e ako fekauʻaki mo e founga naʻe tokoniʻi ai ʻe he Fakamoʻuí ʻa Paulá, ke ʻiloʻi ʻe he fānaú ʻoku tokanga mai ʻa e Tamai Hēvaní mo Sīsū kiate kinautolu.

Ngaahi ʻEkitivitī ʻe Ala Fakahokó

• Vahevahe ʻa e talanoa ʻo e ʻaʻahi ʻa e Fakamoʻuí kia Paula ʻi he fale fakapōpulá, ʻi he Ngāue 23:10–11. Pe huluʻi e vitioó “Be of Good Cheer” (LDS.org), ʻa ia ʻokú ne fakamatalaʻi ʻa e talanoá ni. Vahevahe ki ha taimi naʻá ke ʻi ha faingataʻa ai pea naʻá ke maʻu ha fakahinohino mo ha nonga mei he ʻOtuá. Kole ki he fānaú ke nau vahevahe ki ha ngaahi taimi ne nau ongoʻi ai ne fakanonga kinautolu ʻe he ʻOtuá.

• Tokoniʻi e fānaú ke nau maʻuloto e folofola ʻa Sīsū kia Paulá: “Fiemālie pē.” Kole ki he fānaú ke nau fakakaukau ki ha taha te nau lava ʻo fakaafeʻi ke fiemālie—mahalo pē ko ha tokotaha ʻoku lotomamahi pe lotohohaʻa.

Ngāue 26:1–29

Te u lava ʻo vahevahe ʻeku fakamoʻoní mo e niʻihi kehé.

ʻE lava ke tokoni ʻa hono toe fakamanatu e fakamoʻoni ʻa Paula ki he Tuʻi ko ʻAkilipá, ke ako ʻe he fānaú e founga ke nau vahevahe ai e meʻa ʻoku nau ʻilo ʻoku totonú.

Ngaahi ʻEkitivitī ʻe Ala Fakahokó

• ʻOmi ha kalauni ki he kalasí pea tuku ki ha taha ke ne tui mo ʻai ke pehē pē ko e Tuʻi ia ko ʻAkilipá. Fakaafeʻi ha tokotaha kehe ke tuʻu ʻi muʻa ʻi he tuʻí ʻo ne fakafofongaʻi ʻa Paula lolotonga hoʻo fakamatala fakanounouʻi e fakamoʻoni ʻa Paulá mo e tali ʻa e Tuʻi ko ʻAkilipá, ʻa ia ʻoku maʻu ʻi he Ngāue 26:1–29 (vakai “Vahe 63: Ko Hono Fakaʻosi ʻe Paula ʻEne Ngāue Fakafaifekaú,” Ngaahi Talanoa ʻo e Fuakava Foʻoú, 162–66, pe ko e vitiō fakafekauʻakí ʻi he LDS.org). Fakamatalaʻi ange te tau lava ʻo vahevahe ʻetau ngaahi fakamoʻoní mo e niʻihi kehé, ʻo hangē ko ia ne fai ʻe Paulá.

• Kole ki he fānaú ke nau fakafanongo lolotonga hoʻo hivaʻi pe lau ha foʻi hiva fekauʻaki mo e fakamoʻoní, hangē ko e veesi 2 ʻo e “Ko e Fakamoʻoní” (Ngaahi Himi, fika 68) pe “ʻOku Moʻui ʻEku Tamaí” (Tohi Hiva ʻa e Fānaú, 8). Fakaafeʻi e fānaú ke hiki honau nimá ʻi he taimi te nau fanongo ai ki ha meʻa te nau lava ʻo fakamoʻoniʻi. Mahalo te ke fie maʻu ke toutou hivaʻi e foʻi hivá; fakaafeʻi e fānaú ke nau kau fakataha hono hivaʻí ʻi heʻenau feangai mo e ngaahi leá. Kole ange ke nau vahevahe ha ngaahi meʻa fekauʻaki mo e ongoongoleleí ʻa ia ʻoku nau ʻiloʻi ʻoku moʻoni.

• Fakaʻaongaʻi e peesi ʻekitivitī ki he uike ní ke tokoni ki he fānaú ke nau fakakaukau ki ha meʻa te nau lava ʻo leaʻaki ʻi he taimi ʻoku nau vahevahe ai ʻenau fakamoʻoní. Fakaafeʻi kinautolu ke vahevahe ʻenau fakamoʻoní mo ha taha ʻi honau fāmilí.

Ngāue 27

ʻOku fakatokanga mai kiate au ʻe he kau palōfitá ha fakatuʻutāmaki.

Fakakaukau ki he founga ʻoku lava ke akoʻi ai ki he fānaú ʻe he talanoa ʻo e fakaevaha ʻa Paulá, ʻoku mamata ʻa e kau palōfitá ki ha fakatamaki ʻoku ʻikai ke tau lava ʻo sio ki aí.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau pehē pē ʻoku nau ʻi ha vaka ʻoku lolotonga maumauʻi ʻi ha matangi. Lau e fakatokanga ʻa Paula ki he kakaí ʻa ia ʻoku hā ʻi he Ngāue 27:9–10, pea vahevahe e talanoa ʻo e fakaevaha naʻe hokó koeʻuhi ko e ʻikai ke nau fanongo ki heʻene fakatokangá (vakai veesi 11, 39–44). Fakaʻaliʻali ange ha laʻitā ʻo e Palesiteni ʻo e Siasí. Ko e hā ha faʻahinga fakatokanga ʻokú ne ʻomi kiate kitautolu?

• Fokotuʻu ha ngaahi fakatātā pe ngaahi meʻa ʻi he lokí ʻa ia ʻokú ne fakafofongaʻi e ngaahi meʻa kuo akoʻi mai ʻe he kau palōfitá ke tau faí, hangē ko e ʻalu ki he lotú pe papitaisó. Lue takai fakataha mo e kalasí ʻi he lokí, pea tuʻu ʻi he fakatātā pe meʻa takitaha ke talanoa fekauʻaki mo e tokoni ʻa ʻetau muimui ki he ngaahi akonaki ʻa e kau palōfitá ke tau malú.

ʻOku tokoni ʻa ʻetau muimui ki he ngaahi akonaki ʻa e palōfitá, ke tau malu ai.

Akoʻi e Tokāteliné

Fānau Lalahi Angé

Ngāue 23:10–11; 27:18–26; 28:1–6

ʻI he taimi ʻoku ou fehangahangai ai mo e ʻahiʻahí, ʻoku ʻikai liʻaki au ʻe he ʻOtuá.

ʻI he ngaahi faingataʻa ne aʻusia ʻe Paulá, naʻe ʻiate ia ʻa e ʻEikí. Te ke lava fēfē ʻo tokoni ki he fānaú ke nau fakatatau e ngaahi aʻusia ʻa Paulá ki heʻenau ngaahi moʻuí?

Ngaahi ʻEkitivitī ʻe Ala Fakahokó

• ʻI he ngāueʻaki e Ngāue 23:10, fakamatalaʻi ange naʻe tuku pōpula ʻa Paula koeʻuhi naʻá ne akoʻi e kakaí kau kia Sīsū. Lau leva mo e fānaú e Ngāue 23:11. Pe fakaʻaliʻali e vitioó “Be of Good Cheer” (LDS.org), ʻa ia ʻokú ne fakamatalaʻi ʻa e talanoá ni. Ko e hā naʻe lava ai ʻa Paula ʻo “fiemālie” neongo ʻene ʻi he fale fakapōpulá?

• Hiki ʻi he palakipoé ʻa e Ngāue 23:10–11; Ngāue 27:18–26; mo e Ngāue 28:1–6. Fakaʻaliʻali ha fakatātā ʻo ha fale fakapōpula, vaka, mo ha ngata, pea fakaafeʻi e fānaú ke nau toe vakaiʻi e ngaahi veesi ko ʻení pea fakatauhoa kinautolu ki he ngaahi fakatātaá. ʻI he ngaahi talanoa takitaha ko ʻení, naʻe fakahā fēfē ʻe he ʻEikí kia Paula ʻokú Ne fakataha mo iá?

• Fakaafeʻi ha taha mei he uōtí ke vahevahe ha aʻusia ʻi ha taimi ne ʻiate ia ai e ʻEikí lolotonga ha taimi faingataʻa. Mahalo te ke lava foki pe ko e fānaú ʻo vahevahe ha ngaahi aʻusia.

Ngāue 26:1–29

Te u lava ʻo vahevahe mālohi ʻeku fakamoʻoni kia Sīsū Kalaisí.

ʻE lava ke tokoni ki he fānaú ʻa e lototoʻa ʻa Paulá ʻi he taimi te nau vahevahe ai ʻenau ngaahi fakamoʻoní.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau lau e Ngāue 26:1–29 mo kumi ha ngaahi moʻoni ʻe niʻihi ʻo e ongoongoleleí ʻa ia ne akoʻi ʻe Paula ki he Tuʻi ko ʻAkilipá. Ko e hā e ʻuhinga ne mei ngali fakailifia ai kia Paula ke ne vahevahe e ngaahi meʻá ni ki he tuʻí? Fakaafeʻi e fānaú ke nau lisi ha ngaahi tefitoʻi moʻoni ʻo e ongoongoleleí ʻoku nau ʻiloʻi ʻoku moʻoni. Kole ange ke nau fakakaukau ki ha tokotaha ʻoku nau ʻilo ʻokú ne fie maʻu ke fanongoa ʻenau ngaahi fakamoʻoni ki he ngaahi moʻoni ko ʻení?

• Fakaafeʻi e fānaú ke nau fakaʻaongaʻi e peesi ʻekitivitī ʻo e uike ní ke hiki ha meʻa te nau ala leaʻaki ʻi heʻenau fakamoʻoní.

Ngāue 27

ʻOku fakatokanga mai kiate au ʻe he kau palōfitá ha fakatuʻutāmaki.

ʻE lava ke fanongo ʻa e fānaú ki he ngaahi pōpoaki ʻo e kau palōfita ʻo e kuonga ní mo fakatokangaʻi ʻenau ngaahi fakatokangá. Te ke lava fēfē ʻo tokoniʻi e fānaú ke nau ako ki he founga ke nau muimui ai ki he ngaahi fakatokanga ko iá?

Ngaahi ʻEkitivitī ʻe Ala Fakahokó

• Kosikosi ha pāsolo mei ha laʻipepa ʻoku fuo hangē ha vaká. Fakaafeʻi e fānaú ke nau hiki e ngaahi fakatokanga ʻa Paula ʻi he Ngāue 27:9–11 ʻi ha ngaahi kongokonga pea fokotuʻu fakataha ʻa e pāsoló. Ko e hā e ʻuhinga naʻe ʻikai fanongo ai e kakaí kia Paulá? (vakai, veesi 11 Fakaafeʻi e fānaú ke nau lau e veesi 18–20 mo e 40–44 ke ʻiloʻi ko e hā e ola ʻo e meʻa naʻe hokó. (Fakamatalaʻi ange, koeʻuhi naʻe muimui e kakaí ki he akonaki ʻa Paula kimui ke nofo maʻu ʻi he vaká, naʻe ʻikai mate ha taha ʻi he fakaevahá; vakai veesi 30–32.) Ko e hā te tau lava ʻo ako mei he aʻusia ko ʻení fekauʻaki mo e muimui ki he palōfitá?

• ʻOmi ha pōpoaki ʻa e Palesiteni ʻo e Siasí mei he konifelenisi fakamuimuitahá, ʻo vahevahe mo e fānaú ha ngaahi fakatokanga pe akonaki naʻá ne ʻomi. Fakaafeʻi e fānaú ke nau fakakaukau ki ha ngaahi founga te nau lava ai ʻo muimui ki he palōfitá.

• Fakaʻaliʻali e vitioó “Blessed and Happy Are Those Who Keep the Commandments of God” (LDS.org). ʻOku hangē fēfē nai ʻa e kau palōfitá ko e tangata mo e meʻa fakaʻata mata-uá?

• Hiki hifo ʻa e ngaahi ʻekitivitī ʻe niʻihi ʻe lava ʻe he fānaú ʻo fai ʻa ia ʻe tokoni ai kiate kinautolu ke nau ako kau ki he fatongia ʻo ha palōfita—hangē ko ʻení, “Lau e Tokāteline mo e Ngaahi Fuakavá 21:4–7” pe “Hivaʻi e ‘Muimui He Palōfitá’” (Tohi Hiva ʻa e Fānaú, 58-59, pe fakaʻaongaʻi ha hiva ʻe taha ʻoku fekauʻaki mo e kau palōfitá). Tautau e lisi ʻo e ngaahi ʻekitivitií ʻi tuʻa ʻi he lokiakó, pea fakaafeʻi ha tokotaha ke tuʻu ʻi he matapaá ʻo lau taki taha e ʻekitivitií ki he toenga ʻo e fānaú, ʻo fakaʻatā ai ke nau fakakakato ʻa e ʻekitivitií kimuʻa pea lau ha ʻekitivitī ʻe taha. Fakamatalaʻi ange ʻoku hangē ʻa hono ʻoatu ʻe he taha ʻo e fānaú ʻa e fakahinohino ki he toenga ʻo e fānaú, mo hono akoʻi kitautolu ʻe ha palōfita ki he meʻa ʻoku finangalo e ʻOtuá ke tau faí. Kole ki he fānaú ke vahevahe e meʻa ne nau ako mei he ngaahi ʻekitivitií ʻo kau ki he kau palōfitá.

Poupouʻi e Ako ʻi ʻApí

Kole ki he fānaú ke nau fakaʻaongaʻi e meʻa ne nau ako kau kia Paulá, ke poupouʻi honau ngaahi fāmilí ke ako e ngaahi pōpoaki fakamuimuitaha ʻa e palōfitá, pea aleaʻi e ngaahi founga te nau lava ai ʻo muimui ki heʻene akonakí.

Fakatupulaki ʻEtau Akoʻí

Fakakau atu ʻa e ngaahi ongoʻangá. “ʻOku ako lelei taha ha fānau (mo e kakai lalahi) tokolahi ʻi he taimi ʻoku fakakau atu ai ha ngaahi ongoʻanga (senses) kehekehé. Kumi ha ngaahi founga ke tokoniʻi ai e fānaú ke nau fakaʻaongaʻi honau ngaahi ongoʻanga ko e sió, fanongó mo e alá ki heʻenau akó. ʻE ʻi ai ha ngaahi tūkunga te ke ʻilo ai ha ngaahi founga ke fakakau honau ngaahi ongoʻanga ko e nāmuʻí pea mo e ʻahiʻahiʻí!” (Ko e Faiako ‘i he Founga ‘a e Fakamoʻuí, 25).