“22–28 Siulai. Ngāue 16–21: ‘Kuo Ui ʻe he ʻEikí ke Mau Malangaʻaki ʻa e Ongoongoleleí Kiate Kinautolu’” Haʻu, ʻo Muimui ʻIate Au—Maʻá e Palaimelí: Fuakava Foʻou 2019 (2019)
“22–28 Siulai. Ngāue 16–21,” Haʻu, ʻo Muimui ʻIate Au—Maʻá e Palaimelí: 2019
22-28 Siulai
Ngāue 16–21
“Kuo Ui ʻe he ʻEikí ke Mau Malangaʻaki ʻa e Ongoongoleleí Kiate Kinautolu”
Hili hono lau e Ngāue 16–21, fakakaukau ki he founga ʻe lava tokoni atu ai ʻa e ngaahi ueʻi ʻo e Laumālié mo e ngaahi fakakaukau ʻi he fokotuʻutuʻu ko ʻení, ki hoʻo teuteuʻi e lēsoní. Vakai ki he “Feau e Ngaahi Fie Maʻu ʻa e Fānau Iiki Angé” ʻi he tohi lēsoni ko ʻení ki ha tokoni lahi ange.
Lekooti e Ngaahi Ongo ʻOkú ke Maʻú
Fakaafeʻi Ke Vahevahe
Fakaafeʻi e fānaú ke nau tala atu e founga ʻoku hangē ai ʻa Paula ko e kau faifekau ʻi he ʻaho ní. Fehuʻi ange, “Kuo mou vahevahe nai ʻa e ongoongoleleí mo ha taha kehe?
Akoʻi e Tokāteliné
Fānau Iiki Angé
ʻOku akoʻi ʻe he kau faifekaú ki he kakaí fekauʻaki mo Sīsū.
ʻOku ʻiloʻi nai ʻe he fānau ʻokú ke akoʻí ʻa e meʻa ʻoku fai ʻe he kau faifekaú? Te ke tokoniʻi fēfē ʻa e fānaú ke mahino kiate kinautolu te nau lava ʻo vahevahe ʻa e ongoongoleleí ki he niʻihi kehé?
Ngaahi ʻEkitivitī ʻe Ala Fakahokó
-
Tokoniʻi e fānaú ke nau fakatātaaʻi e Ngāue 16:25–34 lolotonga hoʻo fakamatala fakanounouʻi e talanoa ʻo hono vahevahe ʻe Paula mo Sailosi e ongoongoleleí ʻi he fale fakapōpulá (vakai foki “Vahe 61: Ko Paula mo Sailosi ʻi he Fale Fakapōpulá,” Ngaahi Talanoa ʻo e Fuakava Foʻoú, 158–60, pe ko e vitiō fakafekauʻakí ʻi he LDS.org). Fakamatalaʻi ange ʻoku akoʻi foki ʻe he kau faifekau ʻi he kuonga ní, fekauʻaki mo Sīsū pea mo tokoniʻi kinautolu ke nau mateuteu ke papitaiso.
-
Faʻu ha ngaahi pine hingoa fakafaifekau maʻá e fānaú ke nau tui, pea tokoniʻi kinautolu ke hiki honau ngaahi hingoá ʻi he ngaahi piné. Akoʻi ki he fānaú ha ngaahi fakamatala faingofua ʻo e tokāteliné ke nau lava ʻo vahevahe mo e niʻihi kehé, hangē ko e “Ko e ʻOtuá ʻa ʻetau Tamai Hēvani ʻofá,” “ʻOku folofola ʻa e ʻOtuá ʻo fakafou ʻi ha palōfita moʻui,” pe “Ko Sīsū Kalaisi ʻa hotau Fakamoʻuí.”
-
Fakaafeʻi e fānaú ke nau vahevahe e ngaahi fakaikiiki fekauʻaki mo ha tokotaha ʻoku nau ʻilo ʻoku lolotonga ngāue fakafaifekau. Te nau lava ʻo tā ha fakatātā pe tohi ha kiʻi nouti ke ʻave ki ha faifekau.
ʻOku fakamoʻoniʻi ʻe he folofolá ʻa e Tamai Hēvaní mo Sīsū Kalaisi.
Neongo ʻe ʻi ai ha niʻihi ʻo e fānau ʻokú ke akoʻí mahalo ʻoku teʻeki ai ke nau lava ʻo laukonga, te ke lava ʻo tokoniʻi kinautolu ke nau fakatupulaki ha manako ki he folofolá pea vakai ki he anga ʻo ʻenau fakamoʻoni ki he Fakamoʻuí.
Ngaahi ʻEkitivitī ʻe Ala Fakahokó
-
Tuku takai ha ngaahi tatau ʻo e folofolá ʻi he lokí, pea tuku ki he fānaú ke nau kumi kinautolu. Tokoniʻi ha taha ʻo e fānaú ke nau lau e kupuʻi lea “Naʻa nau … kumi ʻi he ngaahi tohí ʻi he ʻaho kotoa pē” (Ngāue 17:11). Fakaafeʻi e fānaú ke nau tuhu ki he ngaahi ʻaho takitaha ʻo e uiké ʻi ha tohi māhina, lolotonga hoʻomou toutou leaʻaki e kupuʻi leá ni.
-
Ke akoʻi ki he fānaú ʻoku fakamoʻoniʻi ʻe he folofolá ʻa e Tamai Hēvaní mo Sīsū Kalaisí, tokoniʻi kinautolu ke nau kumi ki ha vahe ʻi he folofolá, hangē ko e Ngāue 17 pe 18, ʻo kumi ha ngaahi ʻuhinga kehe ʻo e ongo foʻi lea ʻOtua pe ʻEiki. Mahalo te ke fie fakaʻilongaʻi ‘a e ngaahi foʻi lea ko ʻení ke faingofua ange hono maʻu ʻe he fānaú. ʻI he taimi kotoa pē ʻoku nau maʻu ai e ngaahi foʻi lea ko ʻení, fakaafeʻi kinautolu ke vahevahe ha meʻa ʻoku nau ʻilo fekauʻaki mo e Tamai Hēvaní mo Sīsū Kalaisi.
Ko ha fānau au ʻa e ʻOtuá.
ʻI he Moʻunga Māʻasí, naʻe akoʻi ʻe Paula ha ngaahi moʻoni faingofua fekauʻaki mo e natula ʻo e ʻOtuá, kau ai e ngaahi moʻoni ko ʻEne fānau ʻakitautolu pea ʻoku ʻikai ke Ne “mamaʻo ia mo kitautolu takitaha kotoa pē” (Ngāue 17:27). Te ke tokoniʻi fēfē e fānaú ke nau ongoʻi ofi ai ki heʻenau Tamai Hēvaní?
Ngaahi ʻEkitivitī ʻe Ala Fakahokó
-
Tokoniʻi e fānaú ke nau toutou leaʻaki e kupuʻi lea “Ko e hako ʻo e ʻOtuá ʻa kitautolu” (Ngāue 17:29), pea fakamatalaʻi ange ʻoku ʻuhinga e hakó ki he fānau. Vahevahe hoʻo fakamoʻoní ki he fānaú fakafoʻituitui, ko e foha pe ʻofefine ia ʻo e ʻOtuá. Fehuʻi ange pe ʻoku anga fēfē ʻenau ongo ʻi heʻenau fanongo ko e fānau kinautolu ʻo e ʻOtuá. Fakaafeʻi kinautolu ke vahevahe e anga ʻo ʻenau ongo fekauʻaki mo ʻenau Tamai Hēvaní.
-
Fakaʻaliʻali ha ngaahi fakatātā ʻo ha fānau mo honau ngaahi fāmilí (kapau ʻe lava, fakaʻaongaʻi ha ngaahi lauʻi tā ʻo e fānau ʻi ho kalasí). Fakamatalaʻi ange ko e fānau kitautolu ʻo ʻetau ngaahi faʻē mo e tamai, pea ko kitautolu kotoa ko e fānau fakalaumālie ʻo ʻetau Ongomātuʻa Fakalangí.
-
Hivaʻi ha foʻi hiva fekauʻaki mo e Tamai Hēvaní, hangē ko e “ʻOku Moʻui ʻEku Tamaí” (Tohi Hiva ʻa e Fānaú, 8). ʻI he tokoni ʻa e fānaú, hiki ha ngaahi lea pe tā ha ngaahi fakatātā ʻi he palakipoé ʻa ia ʻokú ne fakafofongaʻi e ngaahi meʻa ʻoku tau ako mei he hivá fekauʻaki mo e Tamai Hēvaní.
-
Lau ki he fānaú ʻa e ngaahi lea ko ʻeni mei he Ngāue 17:27: “ʻOku ʻikai mamaʻo Ia mo kitautolu taki taha kotoa pē.” Talanoa fekauʻaki mo e ngaahi taimi naʻa ke ongoʻi ofi ai ki he Tamai Hēvaní, pea fakaafeʻi e fānaú ke nau fai e meʻa tatau.
Ko e tokotaha kotoa pē ko e fānau ʻa e ʻOtuá.
Akoʻi e Tokāteliné
Fānau Lalahi Angé
Ngāue 16:14–15, 25–34; 18:7–8, 24–28
Te u lava ʻo hoko ko ha faifekau ʻi he taimí ni.
Te ke tokoniʻi fēfē ʻa e fānaú ke nau hoko ʻo hangē ko Paulá pea vahevahe mo e niʻihi kehé ʻa e meʻa ʻoku nau ako fekauʻaki mo e ongoongoleleí?
Ngaahi ʻEkitivitī ʻe Ala Fakahokó
-
Fakaafeʻi e fānaú ke nau lau e Ngāue 16:14–15, 25–34; 18:7–8, 24–28 pea faʻu ha lisi ʻo e kakai naʻe vahevahe ki ai ʻe Paula mo ʻApolosi e ongoongoleleí. Hili ia pea fakaafeʻi kinautolu ke nau faʻu ha lisi ʻo e kakai te nau lava ʻo vahevahe ki ai e ongoongoleleí. Tuku ki he fānaú ke nau fakatātaaʻi e founga te nau lava ʻo talanoa ai ki he kakai ko ʻení fekauʻaki mo Sīsū Kalaisi pe fakaafeʻi kinautolu ki he lotú. Te ke lava foki ʻo fakaafeʻi e fānaú ke nau hiki ʻenau fakamoʻoní ke vahevahe ki he kakaí ni ha moʻoni ʻo e ongoongoleleí.
-
Fakaafeʻi ha kau faifekau taimi kakato lolotonga, kau faifekau kuo lava ʻenau ngāue fakafaikefakaú, pe kau faifekau fakauooti ke ʻaʻahi mai ki he kalasí ʻo talanoa ki heʻenau ngaahi aʻusia ʻi hono vahevahe ʻo e ongoongoleleí. Poupouʻi e fānaú ke nau fai ha ngaahi fehuʻi fekauʻaki mo e founga te nau lava ai ʻo vahevahe ʻa e ongoongoleleí mo e niʻihi kehé.
ʻOku fakamoʻoni ʻa e ngaahi folofolá kia Sīsū Kalaisi.
ʻOku fakamoʻoni ʻa e kau palōfita kotoa pē kia Sīsū Kalaisi. Te ke lava fēfē ʻo akoʻi e fānaú ke nau kumi Ia ʻi he folofolá, tatau ai pē kapau ʻoku ʻikai ʻasi ai Hono hingoá?
Ngaahi ʻEkitivitī ʻe Ala Fakahokó
-
ʻAi e fānaú ke nau lau e Ngāue 17:2–4, 10–12; 18:28, pea fakaafeʻi kinautolu ke nau fekumi ko e hā e ngaahi meʻa ʻoku faitatau ai e ngaahi kupuʻi leá ni. Fakatatau ki he ngaahi veesi ko ʻení, ko e hā naʻá ne tokoniʻi e kakaí ke nau tui ki he ongoongolelei ʻo Sīsū Kalaisí?
-
Fakaafeʻi e fānaú ke vahevahe ʻa ʻenau ngaahi talanoa manako fekauʻaki mo Sīsū Kalaisi, kuo nau ako mei he folofolá ʻi he taʻu ní. ʻI ha ngaahi laʻipepa, hiki ha ngaahi potufolofola ʻokú ne akoʻi fekauʻaki mo e Fakamoʻuí, pea fufū takai kinautolu ʻi he lokí. Fakaafeʻi leva e fānaú ke nau kumi. Tokoniʻi e fānaú ke nau kumi e ngaahi potufolofola ʻoku nau maʻú, pea kole ange ke nau fevahevaheʻaki ʻa e ngaahi meʻa ʻoku akoʻi mai ʻe he potufolofolá fekauʻaki mo Sīsuú.
-
Kole ki he fānaú ke tokoni atu ʻi hono faʻu ha saati faingofua te nau lava ke fakaʻilongaʻi, ʻi he taimi ʻoku nau lau pe ako ai ʻi he folofolá fekauʻaki mo Sīsū. Fakaʻaliʻali ia ʻi he uike takitaha ʻi he toenga ʻo e taʻú, pea tokoniʻi e fānaú ke nau ʻilo e ngaahi feituʻu ʻi he folofolá ʻoku ako ai fekauʻaki mo Sīsuú.
Fānau au ʻa e ʻOtuá,
Te ke tokoniʻi fēfē ʻa e fānaú ke nau manatuʻi ko e fānau kinautolu ʻa e ʻOtuá?
Ngaahi ʻEkitivitī ʻe Ala Fakahokó
-
Fakaʻaliʻali ki he fānaú ha foʻi maka, pea fakamatalaʻi ange ʻi he kuonga ʻo Paulá, naʻe lotu e kakaí ki he ngaahi ʻotua naʻe ngaohi mei he maká mo ha ngaahi nāunau kehe. Kole ki he fānaú ke nau lau e Ngāue 17:27–29. Ko e hā ʻoku tau ako mei he ngaahi veesi ko ʻení fekauʻaki mo e ʻOtuá? Fakamatalaʻiange ʻoku ʻuhinga e hakó ki he fānau. Fehuʻi ki he fānaú pe ʻoku fēfē ʻenau ongoʻi ʻi hono ʻiloʻi ko e fānau kinautolu ʻa e ʻOtuá.
-
Kole ki he fānaú ke nau lau e Ngāue 17:27. Fakaafeʻi e fānaú ke nau tā ha ngaahi fakatātā ʻo e ngaahi founga te nau lava ʻo “ongoʻi” pe fekumi ai ki he ʻOtuá. Ko e fē nai ha taimi kuo nau ongoʻi ai ʻoku ʻikai ke Ne “mamaʻo [meiate kinautolu]”?
Poupouʻi e Ako ʻi ʻApí
Poupouʻi e fānaú ke nau kumi ha potufolofola ʻi he uiké ni ʻokú ne akoʻi fekauʻaki mo Sīsū Kalaisi (ʻe lava ke fai ʻeni lolotonga ʻenau ako folofola fakataautaha pe fakafāmilí). ʻI he uike kahaʻú, fakaafeʻi kinautolu ke vahevahe e meʻa ne nau maʻú.
Fakatupulaki ʻEtau Akoʻí
Tokoniʻi e fānaú ke nau hoko ko ha kau ako leleiange. Ko hoʻo taumuʻa ʻi hono akoʻi ʻo e fānaú, ʻoku ʻikai ko hono akoʻi pē ʻo e moʻoní kiate kinautolu. ʻOku totonu foki ke ke tokoniʻi kinautolu ke nau fakatupulaki ʻenau hoko ko ha kau fekumi ʻiate kinautolu pē ki he moʻoní. Hangē ko ʻení, te ke lava ʻo palani ha ngaahi ʻekitivitī hangē ko ia ʻoku fokotuʻu atu ʻi he fokotuʻutuʻu ko ʻení, ke lava ʻo tokoni kiate kinautolu ke nau ʻiloʻi maʻanautolu ʻa e ngaahi moʻoni ʻi he talanoá, kae ʻikai ko hono talanoa ange pē ki he fānaú ʻa e talanoa ʻo e malanga ʻa Paula ʻi he Moʻunga Maʻasí.