May We So Live, tā ʻe Sam Lawlor

8–14 Siulai

Ngāue 6–9

“Ko Ho Finangaló Ke U Fai ʻa e Hā?”

Kamataʻaki hoʻo lau e Ngāue 6–9. ʻE lava ke tokoni atu ʻa eFokotuʻutuʻu ki he uike ní mei he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke mahino ʻa e ngaahi vahé ni kiate koe. ʻE lava pē e ngaahi ʻekitivitī ʻa e fānau iiki ʻi he fokotuʻutuʻu ko ʻení ke fakaleleiʻi ke tonu maá e fānau lalahí pea toe fai pehē fakafoki.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Hiki ha niʻihi ʻo e ngaahi hingoa ʻo e kakai mei he Ngāue 6–9 ʻi he palakipoé—ʻe lava pē ko Saula pe Sitīveni. Fakaafeʻi e fānaú ke vahevahe ha meʻa ʻoku nau ʻilo fekauʻaki mo ha taha ʻo e kakai ko ʻení.

Akoʻi e Tokāteliné

Fānau Iiki Angé

Ngāue 6–7

Te u lava ʻo muimui kia Sīsū Kalaisi ʻaki ʻeku tuʻu maʻu ʻi he totonú.

Ko e hā ʻe lava ako ʻe he fānaú meia Sitiveni fekauʻaki mo e hoko ko ha tokotaha muimui ʻo Sīsū Kalaisi?

Ngaahi ʻEkitivitī ʻe Ala Fakahokó

• Tokoniʻi e fānaú ke nau faʻu ha ngaahi fakatātaaʻi ʻo ha hiva fekauʻaki mo hono fili ʻa e moʻoní, hangē ko e “Tuʻu ʻI he Totonú” (Tohi Hiva ʻa e Fānaú, 81). Fakaʻaongaʻi e Ngāue 7:51–60 ke talaange ki he fānaú e founga naʻe akoʻiʻaki ʻe Sitīveni fekauʻaki mo Sīsū Kalaisí, neongo naʻe fuʻu loto ʻita ʻaupito ʻa e kau taki ʻo e kakai Siú ʻi heʻene fai iá (vakai foki “Vahe 57: Ko Hono Tāmateʻi ʻe he Kau Tangata Angakoví ʻa Sitīvení,” Ngaahi Talanoa ʻo e Fuakava Foʻoú, 150–51, pe ko e vitiō fakafekauʻakí ʻi he LDS.org). Naʻe founga fēfē e tuʻu maʻu ʻa Sitīveni ʻi he totonú?

• ʻOange ki he fānaú ha ngaahi tūkunga ʻe niʻihi ʻo ha fānau ne nau fai ha fili ʻi he vahaʻa ʻo e totonú mo e halá. Fehuʻi ki he fānaú pe ko e hā te nau fai ke nau tuʻu maʻu ai ʻi he totonú.

Ngāue 8:26–39

ʻOku ueʻi au ʻe he Laumālie Māʻoniʻoní ke u vahevahe e ongoongoleleí mo e niʻihi kehé.

Naʻe muimui ʻa Filipe ki he ngaahi ueʻi ʻo e Laumālié ʻo tokoniʻi ai ha tangata ʻItiopea ʻa ia naʻe faingataʻa ke mahino kiate ia e folofolá. Ko e hā e ngaahi lēsoni ʻoku maʻu mei he talanoa ko ʻení fekauʻaki mo e fānau ʻokú ke akoʻí?

Akoʻi ʻe Filipe ʻa e tangata ʻItiopeá, tā ʻe Robert T. Barrett

Ngaahi ʻEkitivitī ʻe Ala Fakahokó

• Toho fakataha mai ha ongo sea ʻe ua ke faʻu ha sāliote. Fakaafeʻi ha toko ua ke na tangutu ʻi he sālioté, ko e tokotaha ke ne fakafofongaʻi ʻa Filipe pea ko e tahá, ko e tangata ʻItiopeá. Pea fai leva e talanoa ʻo hono akoʻi ʻe Filipe e ongoongoleleí ki he tangata mei ʻItiopeá.

• Kuó ke ongoʻi nai ha talaatu ʻe he Laumālie Māʻoniʻoní ke vahevahe ʻa e ongoongoleleí mo ha taha kehe, hangē ko ia naʻe aʻusia ʻe Filipe ʻi he Ngāue 8:29? Vahevahe hoʻo aʻusiá mo e fānaú.

Ngāue 9:1–20

ʻI he taimi ʻoku ou fai ai ha fehālaaki, ʻoku fakaafeʻi au ʻe he Tamai Hēvaní ke u fakatomala ʻo liliu.

ʻI he taimi naʻe folofola ai ʻa Sīsū kia Saula ke taʻofi hono fakatangaʻi e Siasi ʻo e ʻEikí, naʻe fakatomala leva ʻa Saula he taimi pē ko iá ʻo liliu. ʻE tokoni fēfē ʻa e talanoa ko ʻení ki he fānau ʻokú ke akoʻí, ke nau maʻu ha holi ke nau liliu vave ʻi he taimi ʻoku nau fai ai ha fehālākí?

Ngaahi ʻEkitivitī ʻe Ala Fakahokó

• Fakanounouʻi ʻa e talanoa ʻo hono fakaului ʻa Saulá ʻa ia ʻoku maʻu ʻi he Ngāue 9:1–20 (vakai foki “Vahe 59: Ko e Ako ʻa Saula ʻo Fekauʻaki mo Sīsuú,” Ngaahi Talanoa ʻo e Fuakava Foʻoú, 154–55, pe ko e vitiō fakafekauʻakí ʻi he LDS.org).

• Lisi pe ʻomi ha ngaahi fakatātā ʻo e ngaahi meʻa ʻoku liliu lolotonga e ngaahi faʻahitaʻu kehekehé hangē ko e liliu ha ikeikaʻāvai ki ha potó, pe ngaahi ʻuluʻakaú. Naʻe liliu fēfē ʻa Saula ʻi he taimi naʻe ʻaʻahi ange ai ʻa Sīsū Kalaisi kiate iá?

• Tā ha hala ʻoku manga ua ʻi he palakipoé. Fakaafeʻi e fānaú ke nau talaatu ha ngaahi feituʻu ʻoku nau fie ʻaʻahi ki ai, pea hiki kinautolu ʻi ʻolunga ʻi ha foʻi hala ʻe taha. Ko e hā e meʻa ʻe hoko ʻo kapau ne tau afe ki ha hala kehe? ʻOku tatau fēfē nai ʻa e fakatomalá mo e foki ki he hala totonú?

• Kole ki he fānaú ke nau toe leaʻaki e meʻa ne leaʻaki ʻe Saula ki he ʻEikí: “Ko ho finangaló ke u fai ʻa e hā?” Ko e hā ʻoku finangalo ʻa e ʻEikí ke tau faí?

Akoʻi e Tokāteliné

Fānau Lalahi Angé

Ngāue 6–7

Te u hoko ko ha fakamoʻoni ʻo Sīsū Kalaisi.

Te ke tokoniʻi fēfē e fānau ʻokú ke akoʻí ke nau ako mei he sīpinga ʻo e hoko ʻa Sitīveni ko ha fakamoʻoni ʻo Sīsū Kalaisí?

Ngaahi ʻEkitivitī ʻe Ala Fakahokó

• Lau fakataha mo e fānaú e Ngāue 6:5–15 mo e 7:51–60. Naʻe fēfē ʻa Sitīveni ʻi heʻene hoko ko ha fakamoʻoni ʻo Sīsū Kalaisí? Fakaafeʻi ha taha ʻo e fānaú pe tokolahi ange, ke pehē pē ko Sitīveni ia pe kinautolu pea vahevahe e meʻa ʻoku nau tui ki aí mo e ʻuhingá.

• Fakaafeʻi e fānaú ke nau taufetongi ʻi hono lau e Ngāue 6:3–10, ʻo kumi ki ha ngaahi lelei naʻe maʻu ʻe Sitīveni ʻa ia naʻe tokoni kiate ia ʻi heʻene ngāue tokoní.

• Kole ki he fānaú ke nau tokoni atu kiate koe ke ke fakakaukau ki ha ngaahi tuʻunga ʻa ia te nau lava ai ʻo tuʻu ko ha kau fakamoʻoni ʻo Sīsū Kalaisi mo ʻEne ongoongoleleí. Tokoniʻi kinautolu ke nau fakatātaaʻi ha niʻihi ʻo e ngaahi tuʻunga ko ʻení. Kole ki he fānaú ke nau lau e Mōsaia 18:9. Fakamahinoʻi ange, ʻoku kau ʻa e hoko ko ha fakamoʻoni ʻo Sīsū Kalaisí ʻi he ngaahi palōmesi ʻoku tau fai ʻi he papitaisó.

• Hikiʻi ʻa e ongo hingoa ko e Sitīveni mo e Filipe ʻi he palakipoé. Hiki ʻi lalo ʻi he hingoa ʻo Sitīvení ha ngaahi founga te tau lava ai ʻo hoko ko ha ngaahi faʻifaʻitakiʻanga ki he niʻihi kehé. Hiki ʻi lalo ʻi he hingoa ʻo Filipé ha ngaahi founga te tau lava ai ʻo vahevahe ʻa e ongoongoleleí ki he niʻihi kehé. ʻOku tokoni fēfē nai ʻa e hoko ko ha faʻifaʻitakiʻanga ʻo ha ākonga ʻo Sīsū Kalaisí, ke tau vahevahe ʻa e ongoongoleleí?

Ngāue 8:5–24

Ko e lakanga fakataulaʻeikí ko ha meʻafoaki taʻefakatataua ia mei he ʻOtuá.

ʻOku tufaki ʻe Sētane ʻa e pōpoaki ko e ngaahi meʻa fakamatelié ʻoku nau ʻomi kiate kitautolu ʻa e fiefia. Te ke fakaʻaongaʻi fēfē ʻa e talanoa ʻo Saimoné ke tokoniʻi e fānaú ke nau mahuʻingaʻia ʻi he ngaahi meʻa fakalaumālié, hangē ko e lakanga fakataulaʻeikí mo hono ngaahi tāpuakí?

Ngaahi ʻEkitivitī ʻe Ala Fakahokó

• Fakanounouʻi ʻa e talanoa ʻo Saimone ʻoku maʻu ʻi he Ngāue 8:5–24 (vakai foki “Vahe 58: Saimone mo e Lakanga Fakataulaʻeikí,” Ngaahi Talanoa ʻo e Fuakava Foʻoú, 152–53, pe ko e vitiō fakafekauʻakí ʻi he LDS.org). Ko e hā ʻoku ʻikai ai ke tau lava ʻo maʻu e lakanga fakataulaʻeikí ʻaki hono fakatau maí? ʻOku maʻu totonu fēfē nai ʻe ha taha ʻa e lakanga fakataulaʻeikí? (vakai Tefito ʻo e Tuí 1:5).

• ʻOange ki he fānaú ha paʻanga fakatātā, pea fakaʻaliʻali ha ngaahi fakatātā ʻo e ngaahi meʻa ʻe lava ke fakatau maiʻaki e paʻangá. Fehuʻi ki he fānaú pe ko e hā e lahi ʻo ʻenau paʻanga fakatātaá te nau foaki ke maʻu ai e ngaahi meʻa ko ʻení. Hili ia pea fakaʻaliʻali leva ha fakatātā ʻo e sākalamēnití, ha temipale (ʻokú ne fakafofongaʻi ʻa e ngaahi tāpuaki ʻo e temipalé), ʻa e papitaisó, mo ha ngaahi tāpuaki kehe ʻoku tau maʻu ʻo fakafou ʻi he lakanga fakataulaʻeikí. Fakamatalaʻi ange ko e ngaahi meʻafoaki ko ʻeni mei he ʻOtuá ʻoku mahuʻinga fau pea heʻikai lava ke fakatau ʻaki ia ha paʻanga.

Ngāue 9:1–20

ʻI he taimi ʻoku ou fai ai ha fehālaaki, ʻoku fakaafeʻi au ʻe he Tamai Hēvaní ke u fakatomala ʻo liliu.

ʻI he taimi naʻe folofola ai ʻa Sīsū kia Saula ke tuku hono fakatangaʻi e Siasi ʻo e ʻEikí, naʻe fakatomala leva ʻa Saula he taimi pē ko iá ʻo liliu. ʻE tokoni fēfē ʻa e talanoa ko ʻení ki he fānau ʻokú ke akoʻí, ke nau maʻu ha holi ke nau liliu vave ʻi he taimi ʻoku nau fai ai ha fehālākí?

Ngaahi ʻEkitivitī ʻe Ala Fakahokó

• Fakaafeʻi e fānaú ke pelu vaeua ha laʻipepa. Kole ange ke hiki e Kimuʻa ʻi he konga ʻe taha pea Hili ʻi he konga ʻe tahá. Lau fakataha mo e fānaú e Ngāue 8:1–3; 9:1–2; mo e 9:17–22, ʻo kumi ha ngaahi foʻi lea pe kupuʻi lea ʻokú ne fakamatalaʻi ʻa Saula kimuʻa pea mo e hili ʻo ʻene mamata ki he ʻEikí.

• Fakaafeʻi ha mēmipa ʻo e uōtí ke vahevahe ki he fānaú ʻa e talanoa ʻo ʻene uluí pea mo e founga kuo liliu ai ʻe heʻene hoko ko ha mēmipa ʻo e Siasí ʻa ʻene moʻuí, ʻo hangē ko e liliu e moʻui ʻa Saulá.

• Tā ha “hala ki Tāmasikusi” ʻi he palakipoé. Fakaafeʻi e fānaú ke nau lau e Ngāue 9:6, 11, 18, 20–22, mo fekumi ki he meʻa ne fakahoko ʻe Saula ke fakatomala ai mo tafoki kia Kalaisí, pea hiki e ngaahi ngāue ko ʻení ʻi he halá. Ko e hā ʻoku tau ako meia Saula fekauʻaki mo e founga ke tau lava ai ʻo hoko ʻo hangē ko Kalaisí?

• Fakaafeʻi e fānaú ke nau tā e konga ne nau manako taha ai ʻi he talanoa ʻo hono fakaului ʻo Saulá pea vahevahe mo e kalasí ʻenau fakatātaá.

Poupouʻi e Ako ʻi ʻApí

Poupouʻi e fānaú ke vahevahe mo honau fāmilí ʻa e ʻekitivitī ne nau manako ai mei he kalasi he ʻaho ní mo e meʻa naʻá ne akoʻi kiate kinautolú.

Fakatupulaki ʻEtau Akoʻí

Tokoniʻi e fānaú ke nau ako mei he folofolá. Mahalo heʻikai lava ʻe he fānau īkí ʻo laukonga fēfē, ka te ke kei lava pē ke fakakau mai kinautolu ki he ako mei he folofolá. Hangē ko ʻení, te ke lava ʻo lau ha konga pea fakaafeʻi kinautolu ke nau tuʻu ki ʻolunga pe hiki honau nimá ʻi he taimi ʻoku nau fanongo ai ki ha foʻi lea pau pe konga lea ʻokú ke fie maʻu ke tokanga taha ki ai (vakai Faiako ʻi he Founga ʻa e Fakamoʻuí, 20).