15-21 Siulai

Ngāue 10–15

“Naʻe Tupu pea Mafola Atu ʻo Lahi ʻa e Folofola ʻo e ʻOtuá”

Kamata hoʻo teuteú ʻaki hoʻo lau e Ngāue 10–15. ʻE lava ke tokoni atu ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke mahino ʻa e ngaahi vahe ko ʻení, pea lava ke ʻoatu ʻe he lēsoni ko ʻení ha ngaahi fakakaukau ki hono akoʻí.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Ke tokoniʻi e fānaú ke nau vahevahe e meʻa ʻoku nau ako mo aʻusiá, te ke lava ʻo kole kiate kinautolu ke nau vahevahe e ngaahi meʻa ʻoku nau fai ke fakahaaʻi ʻoku nau tui kia Sīsū Kalaisi.

Akoʻi e Tokāteliné

Fānau Iiki Angé

Ngāue 10:34–35

ʻOku ʻofa ʻa e Tamai Hēvaní ki Heʻene fānaú kotoa.

Ko ha tokāteline mahuʻinga ʻa ia ʻe lava foki ʻo mahino ki he fānau īkí, ko e hoko ko ia e tokotaha kotoa ko ha fānau ʻa e ʻOtuá pea ʻokú Ne ʻofa ki Heʻene fānaú kotoa.

Ngaahi ʻEkitivitī ʻe Ala Fakahokó

• Fakaʻaliʻali e fakatātā Ko Kalaisi mo e Fānau mei he Funga ʻo e Māmaní (Tohi Fakatātā ʻo e Ongoongoleleí, fika 116) lolotonga hoʻo lau e Ngāue 10:34–35. Fakamatalaʻi ange, ʻi he taimi ʻo Pitá naʻe tui e kakai ʻe niʻihi naʻe ʻofa pē ʻa e ʻOtuá ki ha faʻahinga kakai pē ʻe niʻihi, ka naʻe ʻiloʻi ʻe Pita ʻoku ʻofa ʻa e ʻOtuá ki Heʻene fanaú kotoa, pea ʻokú Ne finangalo ke nau ako kotoa e ongoongoleleí.

• Fakaafeʻi e fānaú ke tā ha fakatātā ʻo kinautolu. Vahevahe hoʻo fakamoʻoni ʻoku ʻofa ʻa e Tamai Hēvaní ki he kotoa ʻo ʻEne fānaú takitaha, neongo honau fōtungá pe ko e feituʻu ʻoku nau omi mei aí.

• Hivaʻi fakataha mo e fānaú fekauʻaki mo e feʻofaʻakí—hangē ko e, “Te u ʻAʻeva Pea mo Koe” (Tohi Hiva ʻa e Fānaú, 78). Fakaafeʻi kinautolu ke nau vahevahe ha ngaahi founga te nau lava ai ʻo fakahaaʻi e ʻofá ki he taha kotoa—ʻo aʻu kiate kinautolu ʻoku kehe meiate kinautolú—hangē ko ia ne fai ʻe Sīsuú.

• Kole ki he ngaahi mātuʻa ʻo e fānau takitaha ʻi ha taimi kimuʻa, ke vahevahe ha ngaahi ʻulungaanga ʻo ʻenau fānaú ʻoku nau manako ai. Vahevahe ʻenau ngaahi talí ʻi he kalasí, pea fakamoʻoniʻi ange ʻoku ʻofa ʻa e Tamai Hēvaní ʻi he fānau kotoa pē.

• Tuhu ki he fānau takitaha pea leaʻaki e “ʻOku ʻofa ʻa e Tamai Hēvaní ʻia [hingoa].” Tuku ki he fānaú ke nau taufetongi ʻi he tuhu ki he niʻihi kehé pea leaʻaki e kupuʻi leá ni.

Ngāue 11:26

Ko ha Kalisitiane au he ʻoku ou tui mo muimui kia Sīsū Kalaisi.

Mahalo ʻe ʻilo ʻe he fānau ʻokú ke akoʻí, ko e kāingalotu ʻo e Siasí ʻoku faʻa ui ko e kau Māmonga koeʻuhi ʻoku tau tui ki he Tohi ʻa Molomoná, ka ʻoku nau ʻilo nai ʻoku tau toe Kalisitiane koeʻuhi ʻoku tau tui kia Sīsū Kalaisi?

Ngaahi ʻEkitivitī ʻe Ala Fakahokó

• Lau ki he fānaú ʻa e Ngāue 11:26. Fakamatalaʻi ange ʻoku ui ha tokotaha ʻoku tui mo muimui kia Sīsū Kalaisi ko e Kalisitiane, ko ia ai ʻoku ui kitautolu ko e Kalisitiane.

• Hivaʻi fakataha mo e fānaú e “Ko e Siasi ʻo Sīsū Kalaisí” (Tohi Hiva ʻa e Fānaú, 48) Ko e hā e founga ʻoku totonu ke tau ngāue ai ʻi he siasí, ʻi he akó, pea ʻi ʻapi koeʻuhi ko e kau muimui kitautolu ʻo Sīsū Kalaisi pea ʻoku tau kau ki Hono Siasí?

• Tuku ki he fānaú ke nau valivali e pine fakaʻilonga ʻi he peesi ʻekitivitī ʻo e uike ní pea tui ia ki ʻapi.

Ngāue 12:1–17

ʻOku fanongo ʻa e Tamai Hēvaní ki he ngaahi lotú mo tali ia.

ʻOku akoʻi mālohi mai ʻe he talanoa ko ia ʻo hono fakatauʻatāinaʻi ʻe he ʻāngeló ʻa Pita mei he fale fakapōpulá, ʻoku tali ʻe he Tamai Hēvaní e ngaahi lotú.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau fakatātaaʻi ʻa e talanoa ʻo hono fakatauʻatāinaʻi ʻa Pita mei he fale fakapōpulá ʻi he Ngāue 12:1–17 lolotonga hoʻo fakamatala fakanounouʻi iá. Naʻe tali fēfē ʻe he Tamai Hēvaní e ngaahi lotu ʻo kinautolu ne nau lotua ʻa Pitá?

• Hivaʻi ha foʻi hiva ʻo fekauʻaki mo e lotú—ʻo hangē ko e, “Punou Ho ʻUlu” (Tohi Hiva ʻa e Fānaú, 25)—pea faʻu ha ngaahi fakaʻilonga nima ke tokoniʻi e fānaú ki he founga ʻo e lotú. Fakaafeʻi e fānaú ke nau vahevahe ha ngaahi sīpinga ʻo e ngaahi meʻa te nau lava ʻo fakamālōʻia ai e Tamai Hēvaní mo kolea meiate Ia ʻi he lotú.

• Fakaʻaliʻali ha ngaahi fakatātā ʻo ha kakai ʻoku lotu (vakai, ki ha sīpinga, Tohi Fakatātā ʻo e Ongoongoleleí, fika 111 mo e 112) lolotonga hoʻo vahevahe ha aʻusia ʻi he taimi ne tali ai ʻe he Tamai Hēvaní hoʻo ngaahi lotú.

  

  ʻOku ʻofa ʻa e Tamai Hēvaní ʻiate kitautolu mo tali ʻetau ngaahi lotú.

Akoʻi e Tokāteliné

Fānau Lalahi Angé

Ngāue 10:34–35; 15:6–11

“ʻOku ʻikai filifilimānako ʻa e ʻOtuá ki he kakaí.”

ʻOku totonu ke mahino ki he fānau ʻokú ke akoʻí, ʻoku ʻofa ʻa e Tamai Hēvaní ki he kotoa ʻo ʻEne fānaú, neongo pe ʻoku fēfē honau fōtungá, feituʻu ʻoku nau omi mei aí, pe ko e hā e ngaahi fili ʻoku nau faí.

Ngaahi ʻEkitivitī ʻe Ala Fakahokó

• Kole ki he fānaú pe te nau lava ʻo tala ha ʻulungaanga ʻo ha taha, ʻo fai ʻaki pē ʻenau sió kiate kinautolú pe mateʻi e feituʻu ʻoku nau omi mei aí. Fakatatau mo e Ngāue 10:35, ʻoku ʻafioʻi fēfē ʻe he ʻOtuá ha taha ke “maʻu maʻana”?

• Lau fakataha mo e fānaú e Ngāue 10:34–35; 15:6–11. Fakamatalaʻi ange, ʻi he taimi ʻo Pitá naʻe tui e kakai Siú he ʻikai tali ʻe he ʻOtuá ha kakai ʻoku ʻikai ko ha kakai Siu (naʻe ui e kakai ko ʻení ko e kau Senitaile). Ka naʻe akoʻi ʻe he ʻOtuá kia Pita, ʻoku ʻofa ʻa e ʻOtuá ki he kotoa ʻo ʻEne fānaú, ʻa e Siú mo e Senitailé fakatouʻosi. Hiva fakataha “Fānau Au ʻa e ʻOtuá” (Tohi Hiva ʻa e Fānaú, 2–3). Fakaafeʻi e fānaú ke fakahū honau hingoá ʻi he ngaahi foʻi lea hangē ko e Au pe u.

• Fakaafeʻi e fānaú ke nau vahevahe ha meʻa makehe fekauʻaki mo ha taha kehe ʻi he kalasí. Fakamatalaʻi ange ʻoku ʻuhinga e lea “ʻoku ʻikai filifilimānako ʻa e ʻOtuá ki he kakaí” ʻoku ʻofa ʻa e Tamai Hēvaní ki he kotoa ʻo ʻEne fānaú pea koeʻuhi ʻokú Ne ʻofa ʻiate kinautolu, ʻokú Ne finangalo ke fanongoa ʻe he kotoa ʻo ʻEne fānaú ʻa e ongoongoleleí.

Ngāue 11:26

Ko e Kalisitiané ʻa e taha ʻoku tui mo muimui kia Sīsū Kalaisí.

Te ke tokoniʻi fēfē ʻa e fānaú ke mahino ʻoku fakahaaʻi ʻe heʻenau ngaahi leá mo e ngaahi ngāué, ko e Kalisitiane kinautolu?

Ngaahi ʻEkitivitī ʻe Ala Fakahokó

• Fakaafeʻi e fānaú ke nau lau e Ngāue 11:26; 3 Nīfai 27:3–8; mo e Tokāteline mo e Ngaahi Fuakava 115:4. Tohiʻi e Kalisitiane ʻi he palakipoé pea laineʻi e konga ʻoku pehē “[Kalaisi].” Kole ki he fānaú ke vahevahe ʻenau fakakaukau ki he ʻuhinga ʻo e hoko ko ha Kalisitiané.

• Kole ki he fānaú ke nau fakahingoa e ngaahi kulupu kehekehe ʻoku nau kau ki aí, hangē ko honau ngaahi fāmilí pe kalasi Palaimelí. Fakaafeʻi kinautolu ke vahevahe ha ngaahi ʻuhinga ʻoku nau houngaʻia ai ʻi heʻenau hoko ko ha Kalisitiane pe kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Te tau fakahaaʻi fēfē ki he niʻihi kehé ko e kau Kalisitiane kitautolu?

• Fakaʻaliʻali ha ngaahi meʻa ʻe niʻihi pe ngaahi laʻi tā ʻoku nau fakafofongaʻi e ngaahi moʻoni ʻoku makehe ʻi he Siasi ʻo Sīsū Kalaisí, hangē ko ha fakatātā ʻo ha tāpuaki lakanga fakataulaʻeiki. Kole ki ha taha ʻo e fānaú ke toʻo ha taha ʻo e ngaahi meʻá pe ngaahi laʻitaá pea fakamatalaʻi pe ʻoku hoko fēfē nai ia ko ha tāpuaki ʻi hotau Siasí. Fakamatalaʻi ange neongo ʻoku kau e kau Kalisitiane ʻi he funga ʻo e māmaní ki ha ngaahi siasi kehekehe, ʻoku tau kau ki he Siasi tatau ʻa ia naʻe fokotuʻu ʻe Sīsū Kalaisi ʻi he māmaní.

• Fakaʻaliʻali ʻa e foʻi vitiō, “True Christianity” (LDS.org). Fakaafeʻi e fānaú ke nau tā e ngaahi meʻa te nau lava ʻo fai ke nau hoko ai ko ha kau Kalisitiane moʻoni.

Ngāue 12:1–17

ʻE tali mai ʻe he Tamai Hēvaní ʻi he taimi te u lotu ai ʻi he tuí.

Fakalaulauloto ki he ngaahi taimi ne tali mai ai ʻe he Tamai Hēvaní ho ngaahi lotú. Te ke lava fēfē ʻo fakaʻaongaʻi e ngaahi aʻusia ko ʻení ke akoʻi ki he fānaú, ʻe fanongoa mo tali mai ʻe he Tamai Hēvaní ʻa ʻenau ngaahi lotú, ʻi he taimi pē ʻOʻona?

Ngaahi ʻEkitivitī ʻe Ala Fakahokó

• Fakaafeʻi e fānaú ke nau fakatātaaʻi e talanoa ʻo hono fakatauʻatāinaʻi ʻe he ʻāngeló ʻa Pita mei he fale fakapōpulá, ʻi he Ngāue 12:1–17, lolotonga hoʻo toe fai e talanoá ʻi hoʻo lea pē ʻaʻau.

• Fehuʻi ki he fānaú pe ko e hā ʻenau fakakaukau ki hono ʻuhinga ʻo e “hūfia fakamātoato” (Ngāue 12:5). Naʻe tali fēfē e lotu ʻa e kakaí? Fakaafeʻi e fānaú ke vahevahe ʻenau ngaahi aʻusia ʻi hono tali ʻe he Tamai Hēvaní haʻanau lotu fakataautaha pe fakafāmili. Te ke lava foki ʻo vahevahe ha aʻusia ʻi Haʻane tali hoʻo lotú ʻi ha founga naʻe kehe mei he meʻa naʻá ke ʻamanaki atu pe fakaʻamu ki aí. Fakamoʻoniʻi ʻoku ʻofa ʻa e ʻOtuá ʻiate kitautolu, pea te Ne tali ʻetau ngaahi lotú ʻi he founga mo e taimi ʻoku lelei taha maʻatautolú.

Poupouʻi e Ako ʻi ʻApí

ʻOange ki he fānaú ha fakatātā pe meʻa ke fakaʻaliʻali ʻi honau ngaahi ʻapí, ko ha fakamanatu ki he ngaahi mēmipa ʻo e fāmilí ke nau lotu fakataha.

Fakatupulaki ʻEtau Akoʻí

Fakamoʻoni ki he ngaahi tāpuaki kuo talaʻofa maí. ʻI he taimi ʻokú ke fakaafeʻi ai e fānau Palaimelí ke nau moʻui ʻaki ha tefitoʻi moʻoni pau, vahevahe ha ngaahi talaʻofa kuo foaki ʻe he ʻOtuá maʻanautolu ʻoku nau moʻui ʻaki e tefitoʻi moʻoni ko iá. Hangē ko ʻení, te ke lava ʻo vahevahe hoʻo fakamoʻoni ki he ngaahi tāpuaki kuo talaʻofa ʻa ia kuó ke maʻu ʻi hoʻo fekumi ki ha ngaahi tali ʻaki haʻo lotu.