5–11 ʻAokosi.

Loma 1–6

“Ko e Mālohi ʻo e ʻOtuá ke Fakamoʻuí”

Ko e hā ha ngaahi ueʻi fakalaumālie ʻokú ke maʻu ʻi hoʻo lau e Loma 1–6? ʻE lava ʻe he ngaahi ueʻi fakalaumālie ko ʻení ʻo tokoniʻi koe ke ke fili mei he ngaahi fakakaukau akoʻi ko ʻení.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Fakaafeʻi e fānaú ke nau vahevahe e meʻa ne nau fai ha faʻahinga fakaafe naʻá ke ʻoange kiate kinautolu ʻi he lēsoni ʻo e uike kuo ʻosí. Hangē ko ʻení, ne nau talanoa nai ki honau ngaahi fāmilí fakafekauʻaki mo e fakaevaha naʻe fakamatalaʻi ʻi he Ngāue 27 pea pehē ki he muimui ʻi he palōfitá?

Akoʻi e Tokāteliné

Fānau Iiki Angé

Loma 1:16–17

Te u lava ʻo fakahaaʻi ʻeku ʻofa kia Sīsū Kalaisí ʻaki ʻeku muimui ʻiate Ia.

Naʻe akoʻi mai ʻe Paula, ʻoku maʻu ʻe he ongoongoleleí ʻa e mālohi ke ʻomi ʻa e fakamoʻuí ki he tokotaha kotoa pē ʻokú ne moʻuiʻaki ʻa e tui kia Sīsū Kalaisí. Te ke lava fēfē ʻo tokoniʻi e fānaú ke nau fakahaaʻi ʻenau tui kia Sīsū Kalaisí ʻaki ʻenau muimui kiate Iá?

Ngaahi ʻEkitivitī ʻe Ala Fakahokó

• Tokoniʻi e fānaú ke nau kumi ʻa Loma ʻi ha mape. Fakamatalaʻi ange ʻoku ʻi he tohi ʻa Lomá ha tohi ne fai ʻe Paula ki he Kāingalotu ʻi Lomá, ke tokoniʻi kinautolu ke mahino e ngaahi tefitoʻi moʻoni ʻo e ongoongoleleí hangē ko e tuí.

• Lau ki he fānaú e Loma 1:17, pea tokoniʻi kinautolu ke nau maʻuloto e kupuʻi lea “Ko e tonuhiá ʻe moʻui ʻi he tui.” Te ke lava ʻo vahe ki he fānau takitaha ha foʻi lea ʻi he kupuʻi leá, pea kole ange ke nau leaʻaki ia ʻi he taimi te ke tuhu ai kiate kinautolú. Fakamatalaʻi ange ʻoku ʻuhinga ʻa e kupuʻi lea ko ʻení, ʻoku totonu ke tau moʻui ʻi he ʻaho takitaha ʻi he tui kia Sīsū Kalaisi. ʻOku ʻiloʻi nai ʻe he fānaú ko e hā ʻa e tui? Fakaʻaliʻali ha fakatātā ʻo Sīsū Kalaisi pea fakamatalaʻi ange ʻoku tau tui ʻokú Ne ʻi ai moʻoni neongo kuo teʻeki ke tau mamata kiate Ia. Ko e tuí ʻeni—tui ki ha meʻa neongo kuo teʻeki ke tau mamata ki ai.

• Fakamatalaʻi ange ʻoku tau fakahā ʻetau tui kia Sīsū Kalaisí ʻaki ʻetau talangofua kiate Ia. Fufuuʻi takai ʻi he lokí ha fakatātā ʻo ha kakai ʻoku nau fai e meʻa kuo kole mai ʻe Sīsū ke tau faí. Tuku ki he fānaú ke nau taufetongi ʻi hono kumi mo fakamatalaʻi e ngaahi fakatātaá. Ko e hā te tau lava ʻo fai ke tau muimui ai kia Sīsū?

• Haʻi e mata ha taha ʻi he fānaú, pea taki hangatonu atu ia ʻi he lokí ki ha fakatātā ʻo Sīsū. Tuku ke taufetongi kotoa e fānaú. Tokoniʻi e fānaú ke mahino kiate kinautolu ʻoku totonu ke nau muimui ki he ngaahi akonaki ʻa Sīsuú ʻo hangē ko ʻenau muimui ki hoʻo fakahinohinó.

Loma 6:1–11

ʻOku hangē pē hono papitaiso kitá ko haʻate hoko ko ha taha foʻou.

ʻOku teuteu ʻa e fānau ʻokú ke akoʻí ke nau papitaiso. Ko e hā te nau lava ʻo ako kau ki he papitaisó, mei he fakahinohino ʻa Paula ke “felakaʻi ʻi he moʻui foʻou”?

Ngaahi ʻEkitivitī ʻe Ala Fakahokó

• Fakaafeʻi e fānaú ke nau toe leaʻaki e kupuʻi lea “felakaʻi ʻi he moʻui foʻoú” (Loma 6:4). Fakamatalaʻi ange ko e taimi ʻoku tau papitaiso aí, ʻoku fakamolemoleʻi ʻetau ngaahi angahalá. ʻOku tau maʻu e faingamālie ke tau tupulaki ʻaki ʻetau fai ha ngaahi fili ʻoku leleí, fakatomala ʻi he taimi ʻoku tau fai ai ha fehalaaki, pea fāifeinga ke hoko ʻo hangē ko Sīsuú. Fakaʻaongaʻi e peesi ʻekitivitī ʻo e uike ní ke akoʻi ki he fānaú, ʻoku tokoniʻi kitautolu ʻe he papitaisó ke tau hoko ko ha tokotaha foʻou.

• Tala ange ki he fānaú ʻa hoʻo ongo ʻi he taimi naʻe papitaiso ai koé, pea fakaafeʻi kinautolu ke nau vahevahe ʻenau ngaahi aʻusia ʻi he taimi ne nau kau atu ai ki ha papitaiso. Fakaafeʻi kinautolu ke nau tā ha ngaahi fakatātā ʻo kinautolu ʻi he ʻaho ʻe papitaiso ai kinautolu ʻi he kahaʻú, pea vahevahe e meʻa te nau lava ʻo fai ke nau teuteu ai ki heʻenau ngaahi papitaisó.

• Hivaʻi fakataha mo e fānaú ha hiva fekauʻaki mo e papitaisó, hangē ko e “ʻI heʻeku Papitaisó” (Tohi Hiva ʻa e Fānaú, 53). Ko e hā ʻoku tau ako mei he hiva ko ʻení fekauʻaki mo e papitaisó?

ʻOku fakataipe ʻa e papitaisó ki hono kamata ha moʻui foʻou ko ha ākonga ʻo Kalaisi.

Akoʻi e Tokāteliné

Fānau Lalahi Angé

Loma 1:16–17

Te u lava ʻo fakahaaʻi ʻeku ʻofa kia Sīsū Kalaisí ʻaki ʻeku muimui ʻiate Ia.

Naʻe akoʻi mai ʻe Paula, ʻoku maʻu ʻe he ongoongoleleí ʻa e mālohi ke ʻomi ʻa e fakamoʻuí ki he tokotaha kotoa pē ʻokú ne moʻuiʻaki ʻa e tui kia Sīsū Kalaisí. Ko e tuí ʻa e ʻuluaki tefitoʻi moʻoni ʻo e ongoongoleleí. ʻOkú ne ueʻi kitautolu ke tau talangofua ki he ngaahi fekaú. Te ke tokoniʻi fēfē ʻa e fānaú ke mahino lelei ange kiate kinautolu ʻa e tuí?

Ngaahi ʻEkitivitī ʻe Ala Fakahokó

• Kole ki ha taha ʻi he fānaú ke ne kumi ʻa Loma ʻi ha mape. Tokoniʻi e fānaú ke mahino kiate kinautolu, ʻi he ngaahi uike ka hokó, te nau ako ai mei he ngaahi tohi ne fai ʻe Paula ki he kāingalotu ʻo e Siasí ʻi he ngaahi feituʻu kehekehe, ʻo kamataʻaki ʻene tohi ki he kakai Lomá.

• Hiki e veesi folofola mei he Loma 1:16 ʻi he palakipoé, ʻo fakaʻatā ha ngaahi foʻi lea ʻe niʻihi. Kole ki he fānaú ke nau fekumi ki he potufolofolá pea fakafonu e konga ʻataá. Fakamahinoʻi ange ʻa e kupuʻi lea “ʻOku ʻikai ke u maaʻi ʻa e ongoongolelei ʻo Kalaisí,” pea fakaafeʻi ʻa e fānaú ke nau vahevahe ʻa e ʻuhinga ʻo e kupuʻi leá ni kiate kinautolú.

• Fakaafeʻi ha taha ʻi he fānaú ke ne lau leʻo lahi e Loma 1:17, pea kole ki he toenga ʻo e fānaú ke nau fakafanongo ki ha foʻi lea ʻoku toutou leaʻaki. Ko e hā hono ʻuhinga ʻo e “moʻui ʻi he tui”? Tokoniʻi e fānaú ke nau kumi ha fakaʻuhinga ʻo e tuí ʻi ha maʻuʻanga tokoni hangē ko e Fakahinohino ki he Folofolá, “Tuí,” scriptures.lds.org. Naʻe mei kehe fēfē nai ʻetau moʻuí kapau ne ʻikai ke tau maʻu ha tui ʻia Sīsū Kalaisi?

• Fakaʻaliʻali ki he fānaú ha ʻakau mo ha tengaʻi ʻakau, pea fehuʻi ange pe ʻe fēfē haʻatau tokoni ki ha tengaʻi ʻakau ke hoko ko ha ʻakau. Fakamatalaʻi ange ko e taimi ʻoku tau tō mo fuʻifuʻi ai ʻa e tengaʻi ʻakaú, ʻoku tau fakahaaʻi ai ʻoku tau maʻu ha tui ʻe tupu. ʻOku tau fakahaaʻi fēfē nai ʻoku tau maʻu ha tui kia Sīsū Kalaisi? Fakakaukau ke hivaʻi ha hiva fekauʻaki mo e tuí, hangē ko e “Ko e Tuí” (Tohi Hiva ʻa e Fānaú, 50), ko ha konga ʻo e ʻekitivitī ko ʻení.

Loma 3:23–24

ʻOku tau fie maʻu kotoa ʻa Sīsū Kalaisi kae lava ke fakamolemoleʻi ʻa ʻetau ngaahi angahalá.

Naʻe fie maʻu ʻe Paula ke mahino ki he kakai Lomá, ʻoku toki maʻu pē ʻa e fakamoʻuí ʻia Sīsū Kalaisi mo ʻEne ʻaloʻofá. Fakalaulauloto ki he founga te ke lava ai ʻo akoʻi e moʻoni ko ʻení ki he fānaú.

Ngaahi ʻEkitivitī ʻe Ala Fakahokó

• Fakaafeʻi ha taha ʻi he fānaú ke ne lau e Loma 3:23–24. Ko e hā e fakakaukau ʻa e fānaú ki he ngaahi meʻa ʻoku akoʻi mai ʻe he ngaahi veesi ko ʻení kiate kitautolú? Fakamatalaʻi ange ʻoku ʻuhinga ʻa e “ʻaloʻofa” ʻi he veesi 24 ki he meʻafoaki ʻo e ʻofa mo e ʻaloʻofa ʻa e Fakamoʻuí, ʻa ia ʻokú ne ngaohi ke tau malava ai ʻo maʻu ʻa e fakamolemole ʻo ʻetau ngaahi angahalá.

• Tautau māʻolunga ha kiʻi fakaneifua pe fakatātā ʻi he holisí pe ʻi ha toe feituʻu ʻe taha he ʻikai lava ai ʻa e fānaú ʻo aʻu ki ai. Tuku ke nau feinga ki ai, pea fakahoa ʻeni ki he meʻa naʻe akoʻi ʻe Paula ʻi he Loma 3:23. Pea tokoniʻi kinautolu ke nau aʻu ki ai. Ko e hā kuo fai ʻe he Fakamoʻuí maʻatautolu ʻa ia he ʻikai ke tau lava fai? Fakaafeʻi e fānaú ke nau vahevahe e anga ʻo ʻenau ongo kau ki he Fakamoʻuí, ʻi heʻenau fakakaukau atu ki he meʻa kuó Ne fai maʻanautolú.

Loma 6:1–11

ʻOku hangē pē hono papitaiso kitá ko haʻate hoko ko ha taha foʻou.

Naʻe akoʻi ʻe Paula, ʻoku fakataipe ʻe he papitaisó ʻa e pekia mo e Toetuʻu ʻa Kalaisí. ʻOkú ne fakataipe ʻa e “pekia” ʻa hotau ngaahi angahalá, pea toe fokotuʻu hake ke “felakaʻi ʻi he moʻui foʻoú” (Loma 6:4). ʻOku tau fakafoʻou ʻetau ngaahi tukupā ke laka ʻi he moʻui foʻoú, ʻi he taimi kotoa pē ʻoku tau maʻu ai e sākalamēnití.

Ngaahi ʻEkitivitī ʻe Ala Fakahokó

• Fakaafeʻi ha taha ʻi he fānaú ke ne lau e Loma 6:3–6. Ko e hā ne pehē ʻe Paula ʻoku tatau mo e papitaisó?

• Aleaʻi e founga ʻoku fakataipe ai ʻe he papitaisó ʻa e pekiá mo e toetuʻú. Fakakaukau ki hono fakaʻaliʻali ʻa e vitioó “The Baptism of Jesus” (LDS.org). Ko e hā ʻoku hoko ai e pekiá mo e toetuʻú ko ha ongo fakataipe lelei ʻo e meʻa ʻe hoko ʻi he taimi ʻoku tau papitaiso aí?

• Lau fakataha e lotu ʻo e sākalamēnití (vakai T&F 20:77, 79). Fakamanatu ki he fānaú, ko e taimi ʻoku tau maʻu ai e sākalamēnití, ʻoku tau fakafoʻou ai ʻetau tukupā ke tau muimui kia Sīsū Kalaisi ʻi he taimi naʻa tau papitaiso aí. ʻOku tokoni fēfē ʻa e sākalamēnití ke tau “felakaʻi ʻi he moʻui foʻoú?

• Fakaafeʻi e fānaú ke nau faʻu ha ngaahi pousitā te ne fakaʻaliʻali ʻa e mahino kiate kinautolu ʻo e “felakaʻi ʻi he moʻui foʻoú.” ʻE lava ke tautau ʻeni ʻe he fānaú ʻi honau ngaahi lokí ke tokoni ke nau manatuʻi ke fai ha ngaahi fili ʻoku leleí.

Poupouʻi e Ako ʻi ʻApí

Poupouʻi e fānaú ke nau kole ki he ngaahi mēmipa ʻo e fāmilí ke fakahā ange ʻa e taimi te nau sio ai ki he fānaú ʻoku nau fai ha meʻa ʻokú ne fakahaaʻi e tuí.

Fakatupulaki ʻEtau Akoʻí

Langaki e loto falala ʻa e fānaú. Ke tokoniʻi e fānaú ke langaki e loto falala te nau lava ʻo ako ʻiate kinautolu pē ʻa e ongoongoleleí, fakahikihikiʻi kinautolu ʻi he taimi ʻoku nau kau mai ai ki he kalasí