Feilaulaú

Vakai Fakalūkufuá

Ko e feilaulaú ko hono tukuange ha meʻa mahuʻinga, ʻo faʻa taumuʻa ki hono fakahoko ha taumuʻa lahi ange. Kuo hoko maʻu pē ʻa e feilaulaú ko ha konga ʻo e ongoongolelei ʻo Sīsū Kalaisí. Ko ha fakamanatu ia ʻo e feilaulau fakalelei maʻongoʻonga ʻa Sīsū Kalaisi maʻanautolu kotoa pē kuo moʻui pe ʻe moʻui ʻi he māmaní. Kimuʻa ʻi he ngāue fakafaifekau ʻa Kalaisí, naʻe feilaulauʻi ʻa e fanga monumanú ki he taumuʻá ni. Hili e Fakalelei ʻa Kalaisí, ne kamata e kau muimui ʻa Sīsū Kalaisí—ʻi Heʻene fakahinohinó—ke foaki ha “loto-mafesifesi mo e laumālie fakatomala” (3 Nīfai 9:20), ko ha loto-fiemālie ke fakatomala mei he ngaahi angahalá mo ha loto-holi ke muimui kia Sīsū Kalaisi mo fakafenāpasi e moʻuí mo ʻEne ngaahi fekaú.

Ko e Fakalelei ʻa Sīsū Kalaisí ko e feilaulau maʻongoʻonga mo taʻengata ia ʻi he uho ʻo e ongoongoleleí (vakai, ʻAlamā 34:8–16). Kimu‘a pea toki fakahoko ʻe he Fakamoʻuí ʻa e Fakaleleí, naʻe feilaulau ʻaki ʻe Heʻene kakai fuakavá ha fanga monumanu ko ha fakataipe ʻo ʻEne feilaulaú. Naʻe tokoni ʻeni ke nau hanganaki atu ki he Fakaleleí (vakai, Mōsese 5:4–8). Naʻe ngata ʻa e fekau ko ia ke feilaulau ʻaki e fanga monumanú ʻi he pekia ʻa Sīsū Kalaisí. ‘I he Siasí he ʻahó ni, ko e ouau ko ia ʻo e sākalamēnití ko ha fakamanatu ia ʻo e feilaulau fakalelei ʻa e Fakamoʻuí.

‘Ikai ngata pē ʻi he manatu ki he feilaulau fakalelei ʻa Sīsū Kalaisí, ka ʻoku fakahoko ʻe he kāingalotu ʻo e Siasí ʻenau feilaulau: ko ha loto mafesifesi mo ha laumālie fakatomala. Naʻe folofola ʻa e Fakamoʻuí: “ʻE ʻikai te mou toe feilaulau ʻaki kiate au ha toto kuo lilingi; ʻio, ʻe fakangata hoʻomou ngaahi feilaulaú mo hoʻomou ngaahi feilaulau tutú. … Pea te mou ʻoatu kiate au ʻa e feilaulau ko e loto-mafesifesi mo e laumālie fakatomala. Pea ko ia ia ʻe haʻu kiate au mo e loto-mafesifesi mo e laumālie fakatomalá, te u papitaiso ia ʻaki ʻa e afi mo e Laumālie Māʻoniʻoni” (3 Nīfai 9:19–20).

Ke maʻu ha loto mafesifesi mo ha laumālie fakatomalá, ko e loto-fakatōkilalo ia mo e fakaongoongo ki he finangalo ʻo e ʻOtuá pea mo e akonaki ʻa kinautolu kuó Ne ui ke tataki Hono Siasí. ʻOku toe ʻuhinga foki ia ke ongoʻi ha mamahi lahi koeʻuhí ko e angahalá mo ha holi fakamātoato ke fakatomala. Ne fakamamafaʻi ʻe he palōfita ko Līhaí e mahuʻinga hono fakahoko e feilaulaú ni ʻo pehē: “Vakai, ʻoku ʻoatu [ʻe Kalaisi] ia ke hoko ko ha feilaulau koeʻuhi ko e angahalá, ke fakakakato ʻa e ngaahi tuʻutuʻuni ʻo e fonó, maʻanautolu kotoa pē ʻoku maʻu ʻa e loto-mafesifesí mo e laumālie fakatomalá; pea ʻoku ʻikai lava ʻe ha tokotaha ʻo fakakakato ʻa e ngaahi tuʻutuʻuni ʻa e fonó” (2 Nīfai 2:7).

Ko kinautolu ‘oku fakahaaʻi ʻenau loto-fiemālie ke feilaulau ʻo hangē ko ia kuo fekau ʻe he ʻEikí, te Ne tali ia. Naʻá Ne akonaki ʻo pehē: “Ko kinautolu kotoa pē … ʻoku nau ʻilo ʻoku angatonu, mo mafesifesi ʻa honau lotó, pea fakatomala ʻa honau laumālié, pea nau loto-fiemālie ke tauhi ʻa ʻenau ngaahi fuakavá ʻi he feilaulaú—ʻio, ʻa e feilaulau kotoa pē ʻa ia ko au, ko e ʻEikí, te u fekaú—ʻoku ou tali ʻa kinautolu” (Tokāteline mo e Ngaahi Fuakava 97:8).

Lekooti e Ngaahi Ongo ʻOkú ke Maʻú