Kāmení

Vakai Fakalūkufuá

ʻOku fakahoko ʻe he mēmipa kakai lalahi ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻoku maʻu honau ʻenitaumení ha ngaahi palōmesi toputapu ʻoku ʻiloa ko e ngaahi fuakava, ke muimui ki he ngaahi tuʻunga moʻui māʻolunga taha ʻo e angatonú mo e mateaki ki he ʻOtuá. Ko ha konga ia ʻo hono fakahoko ʻo e ngaahi fuakava ko ʻeni ʻi he temipalé, ʻa e maʻu ʻe he kāingalotú ha vala loto maʻamaʻa—ʻoku faʻa lau ki ai ko e “kāmeni temipale” pe “kāmeni ʻo e lakanga fakataulaʻeikí.” ʻOku tui ʻa e kāmení ʻi loto ʻi he teunga angamaheni ʻo e kāingalotú ʻi he toenga ʻo ʻenau moʻuí, ʻo kehe ia mei he ngaahi teunga ouau kehe ʻoku fakaʻaongaʻi lolotonga e ʻenitaumení, ʻo hoko ia ko ha fakamanatu fakatuʻasino ʻo honau vā fetuʻutaki fuakava mo e ʻOtuá.

ʻI he kuonga muʻá, naʻe fekau ʻe he ʻEikí ʻa e palōfita ko Mōsesé ke ngaohi ha teunga makehe maʻa hono tokoua ko ʻĒloné mo e niʻihi kehe te nau ngāue ʻi he tāpanekalé: “Pea te ke ngaohi ʻa e ngaahi kofu tapu ki ho taʻokete ko ʻĒloné ke fakaʻeiʻeiki mo matamatalelei … ke ne ngāue kiate au ʻi he ngāue fakataulaʻeikí” ( ʻEkesōtosi 28:2–3). Naʻe kau heni ha teunga naʻe lava ke mamata ki ai ha taha pea mo e teunga naʻe tui ʻi loto ʻi he ngaahi kofu ʻi tuʻá.

ʻI hotau kuongá ni, ʻoku poupouʻi ʻe he kāmení ʻa e teunga tāú, ka ʻoku loloto ange hono mahuʻingá. ʻOku fakamanatu ʻe he kāmení ki he kāingalotu ʻo e Siasí kuo nau maʻu e ʻenitaumení, ʻa ʻenau fehokotaki mo e ʻOtuá, ʻenau tukupā ke muimui ki Hono finangaló, pea mo e ngaahi tāpuaki mo e maluʻi kuo talaʻofa ʻe he ʻOtuá ki he kakai faivelengá. Kuo fakahaaʻi ʻe he Kau Palesitenisī ʻUluaki ʻo e Siasí ʻa e founga ʻoku tui ai e kāmení “ko hano fakahaaʻi ia ki tuʻa ʻo ha tukupā ʻi he lotó ke muimui ʻi he Fakamoʻuí” (First Presidency letter, Oct. 10, 1988).

ʻOku lava ke maʻu atu ha vitiō nounou ʻokú ne ʻoatu ha puipuituʻa lahi ange ki he kāmeni temipalé mo e teunga ouau fakatemipalé.

ʻE lava ke mamataʻi ha ngaahi akonaki lahi ange ʻa e kau palōfita mo e kau ʻaposetolo ʻi onopōní fekauʻaki mo e kāmeni temipalé ʻi he ChurchofJesusChrist.org/temples/prophetic-teachings-on-temples.

Lekooti e Ngaahi Ongo ʻOkú ke Maʻú