ʻOku faʻa ʻeke mai kiate au ʻe he kakaí he taimi ʻe niʻihi, ʻo kau ki he kāmeni temipalé ʻi ha ngaahi lea taʻe fakaʻapaʻapa. Ko e hā ʻoku totonu ke u tala kiate kinautolú?

ʻUluakí, ko e taimi ʻoku fakaʻaongaʻi ai ʻe he kakaí ha ngaahi lea taʻe fakaʻapaʻapa ki he kāmeni temipalé, ʻoku totonu ke ke kole fakalelei kiate kinautolu ke nau fakaʻapaʻapa lahi ange ki he kāmení koeʻuhí he ʻoku toputapu ia kiate kitautolu.

Te ke toe lava foki ʻo talaange kiate kinautolu ʻoku tui ʻe he kau mēmipa mo e kau faifekau ʻi he ngaahi tui fakalotu kehé ha ngaahi vala pau ke fakafofongaʻi ʻaki ʻenau tui fakatāutahá pe ko honau fatongia fakaʻofisialé, ko ia ai ʻoku ʻikai ko ha meʻa ngali kehe ia ke tau tui ha vala makehe ki heʻetau ouau fakalotú.

Te ke lava ʻo fakamatalaʻi e mahuʻinga ʻo e kāmeni temipalé ʻaki hono talaange ʻoku nau faingofua, ko ha valaloto taau ʻoku foaki ki he kāingalotu lalahi ʻo e Siasí ko ha konga ʻo e ngaahi ouau makehe ʻi hotau temipalé. ʻI he ngaahi ouaú ni ʻoku tau tukupā ai ke tau moʻui ʻo fakatatau mo e founga ʻoku fie maʻu ʻe Sīsū Kalaisi ke tau moʻui ʻakí, pea ʻoku hoko e kāmení ko ha meʻa fakatuʻasino ke ne toutou fakamanatu mai e tukupā fakatāutaha mo fakalaumālie ko iá. ʻOku tokoni e kāmení ʻi he foungá ni ke maluʻi kitautolu mei he ʻahiʻahí mo e koví.