ʻE Hoko mai e Ututaʻú
Kuo ako ʻe he fāmili Filiponí ko e fono ʻo e ututaʻú—ʻa e fakatuʻasino mo fakalaumālie fakatouʻosi—ʻoku fie maʻu ki ai e vilitaki, kātaki mo e lotu.
Naʻe ʻikai pē ke teitei faingofua kia ʻOsikā Filiponi mo hono fāmilí, ʻa hono ngoueʻi e kelekelé ke maʻu ai ha paʻanga ke tokoni ki he fāmilí. ʻOku hangē ne fakatahataha e matangí, laʻalaʻaá, maumau e meʻangāué, mo e ʻikai lelei hono fakatau e ngaahi fua mei he ngoué, mo e ngaahi faingataʻa kehé ke nau fakafepakiʻi e ngaahi ngāue lelei taha ʻa e fāmilí.
ʻOku pehē ʻe ʻOsikā, ʻokú ne ngoueʻi ha ʻeka ʻe 100 (hekitea ʻe 40) ʻi he Teleʻa Maʻulalo Hifo ʻo e Vaitafe Suputá, ʻoku tuʻu ʻi he fakatonga ʻo e Vahefonua Suputa ʻAsenitiná, “Kuo pau ke mau fekumi he ʻaho kotoa ʻi heni he chacra—ʻi homau kelekelé—ki ha tataki fakalaumālie mo ha fakahā kae lava ke mau moʻui he meʻa ʻoku ʻomi ʻe he kelekelé maʻamautolú. ʻOku hoko e faingataʻá he ʻaho kotoa pē.”
Ko e taha e faingataʻa lahi taha ki he fāmili Filiponí ko e ʻikai ke nau ʻiloʻi maʻu pē pe ko e fē e taimi ʻe maʻu ai ha fua mei heʻenau ngāue taʻe tukú. Neongo ia, kuo nau ako ko e ngāue mālohí pea kātaki fuoloá pea ʻe faifai pea maʻu ha ola lelei.
ʻOku fakamatalaʻi ʻe ʻOsikā, “ʻOku ʻikai maʻu fakaʻaho pe fakauike ʻa e pale ki hoʻo ngāue ʻi hono ngoueʻi e kelekelé. ʻOku mau ngāue he ʻaho kotoa tukukehe ʻe ʻaho Sāpaté—he uike kotoa pē, māhina kotoa pē—mo e teʻeki pē ke maʻu ha paʻanga, ko ia ai kuo pau ke mau fokotuʻu ha ngaahi palani fakaʻekonōmika. ʻOku ʻi ai e taimi ʻe niʻihi ʻe ʻosi ha ngaahi māhina pea aʻu pē ki ha taʻu kae toki fiefia he fua ʻo ʻemau ngāué. Kuo pau ke mau manatuʻi maʻu pē ko e ngāue ʻoku mau fai he taimi ní ʻe toki utu ʻa mui hono olá.”
ʻOku tō ʻe ʻOsikā mo hono uaifi ko Lilianá, mo e toko ua ʻo ʻena fānaú, ko Taniela mo Malia Silesitā, ʻa e musie maʻá e fanga manú mo tauhi ha fanga monumanu.
ʻOkú ne pehē, “ʻOku ʻi ai e taimi ʻe niʻihi ʻoku ʻi ai haʻamau paʻanga, pea taimi ʻe niʻihi ʻoku hala koeʻuhí he kuo ʻosi kotoa ia he fakamole ke fai ʻaki e ngāue ki he ngoué. ʻOku ʻi ai e taimi ʻe niʻihi ʻoku maumau ʻemau ʻū mīsiní. ʻOku ʻi ai e taimi ʻe niʻihi ʻoku ʻikai lava ke fakatau ʻemau fanga monumanú ʻi he taimi kuo nau maau ai ke fakatau atú. Ka ʻo kapau te mau fakalaulauloto mo lotu, mo kātaki pea ʻoua ʻe mole ʻemau ʻamanaki leleí, ʻoku hili pē ha ʻaho ʻe taha pe ua kuo maʻu ha vetekiʻanga ʻo e palopalemá. ʻOku haʻu ha taha ʻo pehē mai, ‘Che,1 ʻoku ʻi ai haʻo fanga monumanu ke fakatau?’ ʻOku lelei e meʻa kotoa, pea mau laka kimuʻa. ʻOku faingataʻa e ngāue he kelekelé, ka kuo tokoniʻi kimautolu ʻi heʻemau ngāue he ʻaho kotoa pē.”
Ngaahi Feituʻu ke Fakataumuʻa ki ai
ʻOku pehē ʻe Taniela ʻoku hanga ʻe he ngāue he kelekelé ʻo ʻoange kiate ia ha faingamālie he ʻaho takitaha ke ne vakai ai ki he ngaahi tāpuakí mo e faingataʻá mei he tafaʻaki ʻo e ongoongoleleí. ʻOkú ne fakamatalaʻi e ngāue he kelekelé ʻo pehē, “Ko ha tāpuaki ke fealeaʻaki mo e ʻEikí pea tokanga ki he tākiekina ʻa e Laumālié ʻo ʻikai hohaʻasi ʻe he longoaʻá pe mūsiká pe tuʻuakí.”
ʻOku pehē ʻe Liliana, “ʻOku faingofua ke hoko ko ha mēmipa ʻo e Siasí ʻi ha feituʻu hangē ko ʻení ʻoku ʻātakaiʻi ʻe natula mo e kakai ʻoku nau ʻofa ʻiate koé. ʻOku tokoni ia ke ne fakamanatu kiate au ʻoku tau fakafalala ki he ʻEikí pea ko e meʻa kotoa ke tau faí ko e fakamālō kiate Ia. ʻOku meimei ke hā mei he meʻa kotoa ʻoku tau fai ʻi hení e niʻihi ʻo e tefitoʻi moʻoni ʻo e ongoongoleleí. ʻOku haʻu maʻu pē ʻa ʻOsikā ki fale mo ha fakakaukau mei he ngoué pe ʻi heʻene ngāue mo e fanga monumanú.”
Hangē ko ʻení, ko e taimi ko ia ʻoku palau ai ʻe ʻOsikā ha konga kelekelé, ʻokú ne fili leva ha meʻa ke fakataumuʻa ki ai hangē ko ha fuʻu ʻakau pe ha fuʻu maka he mamaʻó ʻe tokoni ke hangatonu ai ʻene palaú. ʻOku pehē ʻe Liliana, “ʻOku tatau ai pē pe ʻoku ʻi ai ha meʻa ia te ne fakapuliki hono halá. He ʻikai pē ke ne lava ia ʻo afe ki toʻohema pe toʻomataʻu mei hono halá koeʻuhí he ʻokú ne loto ke hangatonu e ʻotú.”
ʻOku toe pehē ʻe ʻOsikā, “Kapau te u toe sio kimui ke ʻilo pe ʻoku hangatonu e ʻotú, ʻe hipa leva e palaú. Ko ia te u nofotaha pē ʻi he meʻa ne u fakataumuʻa ki aí pea ʻunu kimuʻa.”
ʻOkú ne pehē ʻoku founga tatau pē ʻa e chacra, mo e Siasí. “Kuo pau ke tau sio ki he ʻEikí, lau e folofolá, pea tauhi e ngaahi fekaú, kae nofo maʻu ʻetau moʻuí he hala ʻoku totonú. Kapau te tau fakaʻatā ha meʻa ke ne tohoakiʻi ʻetau tokangá, ʻoku mole leva e feituʻu ne tau fakataumuʻa ki aí pea pikopiko leva hotau halá.”
Ko ha Ututaʻu Fakalaumālie
ʻOku ʻalu e fāmili Filiponí ki ha kolo ʻo e Siasí ʻoku ofi mai ki Kaimani. ʻI he kolo ʻeni ʻoku ʻi ai ha toko 6,000 naʻe nofoʻi ʻe he kakai ne hiki mai mei Uelesi ʻi he ngaahi taʻu ʻo e 1870, ʻoku maʻu ʻe he kāingalotú ha faingamālie lahi ke nau hoko ko ha sīpinga lelei ki he niʻihi kehé. ʻOku pehē ʻe Liliana, “Kuo pau ke mau fai e lelei taha te mau ala lavá he ʻaho takitaha koeʻuhí he ʻoku siofi maʻu pē kimautolu ʻe he kakaí.”
ʻE lava ke hoko māmālie hono ʻai ke tokanga e kakaí ki he ongoongoleleí. ʻOku fie maʻu ʻe he fono fakalaumālie ʻo e ututaʻú e kātakí, ʻo hangē pē ko e fono fakatuʻasino ʻo e ututaʻú. Kuo lava e kakaí ʻo ʻiloʻi mo fakaʻapaʻapaʻi ʻenau tuʻunga moʻui ko e Kāingalotu ʻo e Siasí, ʻi hono hokohoko moʻui ʻaki ʻe he fāmilí e ngaahi tefitoʻi moʻoni ʻo e ongoongoleleí.
ʻI he taimi ne ngāue ai ʻa ʻOsikā kimuʻa he puleʻangá, naʻá ne toutou fakafisingaʻi hono ʻomi e kofí, tií, mo e ʻolokaholó. ʻOkú ne pehē, “Hili ha ngaahi taʻu, ne kamata ke tokanga mo poupou mai e kau ngāué ʻo nau ʻeke ange, ‘Ko e hā e faʻahinga inu ʻokú ke fie maʻú?’ ʻOku ʻi ai ha taimi ʻe niʻihi te nau tokanga mai ai ki he Siasí. Ko e ututaʻú ia.”
Ko e feituʻu ʻoku lahi taha ai e ututaʻu fakalaumālie ʻo e ʻiló mo hono moʻui ʻaki e ngaahi tefitoʻi moʻoni ʻo e ongoongoleleí ko e fāmilí.
Kuo maʻu e ututaʻú mei he ngaahi tāpuaki he ngāue ʻa ʻOsikā ko ha pēteliake ʻo e Siteiki Teleliu ʻĀsenitina Noaté, mo e ngāue ʻa Liliana ko ha palesiteni Fineʻofa he koló, pea mo e ngaahi ngāue tokoni ʻa e kau mēmipa ʻo e fāmilí ʻi ha ngaahi uiuiʻi lahi ne fakahoko he ngaahi taʻu lahi.
Kuo maʻu e ututaʻú mei hono tauhi ʻo e ʻaho Sāpaté ke māʻoniʻoní pea mo hono moʻui ʻaki e fono ʻo e vahehongofulú. ʻOku pehē ʻe ʻOsikā, “ʻOku fakaava moʻoni mai e ngaahi matapā ʻo e langí—kapau he ʻikai hoko he taimi pē ko iá, ʻe toki hoko mai ia ʻi he hokohoko atu ʻa e talangofuá.”
Kuo hoko mai e ututaʻú fakataha mo e ʻosi kotoa e fānau ʻa e fāmili Filiponí mei he ako māʻolungá pea mo e ʻosi e ngāue fakafaifekau ʻa e ngaahi foha ʻe toko fā. Kuo maʻu haʻanau ngāue mo e ngaahi faingamālie ki he tuʻunga fakatakimuʻa ne ʻikai ke nau mei lava ʻo maʻu ka ne taʻe ʻoua ʻenau akó mo e ngāue fakafaifekaú.
Kuo hoko e ututaʻú mei he ngaahi fehuʻi ne fai kia Malia Silesitā ʻe hono kaungā akó ne nau fie ʻilo ki he ngāue fakafaifekau taimi kakato ʻa hono tuongaʻané, ʻene tui fakalotú mo e ʻuhinga ʻoku ʻikai ai ke ne ʻalu ki he ngaahi fakafiefia ʻoku toki kamata kuo fuoloa e poʻulí he pō Tokonakí.
Pea hoko e ututaʻú mei he ngaahi fanafana mo e tākiekina fakafiemālie ʻa e Laumālie Māʻoniʻoní, ʻo tokoni ke hao e fāmilí mei ha fakatamaki ʻi he fuoloa ʻo e poʻulí ʻi heʻenau fakakaukau ne fai ha kaihaʻa ʻi honau ʻapí. Ne ʻā hake ʻa Taniela ʻi haʻane fanongo ki ha leʻo ʻo teuteu ke maluʻi honau ʻapí, ka ko e tokotaha ne pehē ko e hū fakapoʻulí ne toki ʻilo ia ko e kaungāʻapí ko haʻane haʻu ʻo kumi tokoni he naʻe maumau ʻene kaá.
ʻOku pehē ʻe Taniela, “Ne u fakatokangaʻi kuo fakafiemālieʻi au ʻe he Laumālié ʻo fakaleleiʻi e meʻa ne hokó ʻo ʻikai ke toe fai ha hohaʻa ki ai. Hili iá ne mau lotu ʻo fakamālō ki he Tamai Hēvaní ne ʻikai ke hoko ha fakatamaki.”
ʻOku pehē ʻe he kau mēmipa ʻo e fāmili Filiponí, ko e taimi ko ia ʻoku tau falala kakato ai ki he ʻOtuá, te Ne tāpuekina kitautolu ʻi hono ʻomi ʻetau ngaahi fie maʻú pea tau hoko ko e meʻangāue ʻi Hono toʻukupú. Ko ha founga ʻoku fie maʻu ki ai ha vilitaki, kātaki, mo e lotu. ʻOku toe fie maʻu foki ki ai ha tui lahi mo e ngāue. ʻE hoko mai e ututaʻú, ʻo fakatatau pē ki he taimi ʻa e ʻEikí.
Tā ʻo e fāmilí fai ʻe Michael R. Morris