ʻEke ki he Māmongá
Kali Kopaneni, Uasimā, Finilani
ʻOku fie maʻu e kau talavou kotoa pē ʻi Finilani ʻoku laka hake he taʻu 18 ke ngāue fakakautau he mahina ʻe 6 ki he 12. Ne u ʻilo he kamata e ngāue ne fie maʻu ke u faí, ne fepaki e ngaahi fakakaukau mo e ʻulungaanga ʻo e tokolahi ʻa hoku kaungā sōtiá mo ʻeku ngaahi tefitoʻi moʻoní. Ko hono olá, ne u matuʻaki tokanga ke ofi ki he Laumālié, ʻo u lotu tuʻo ua he ʻaho mo lau e folofolá.
Ne u kamata manavasiʻi koeʻuhí he naʻe ʻikai ke u ʻilo pe ko e hā haʻanau fakafeangai, ka naʻe hangē ne ʻikai ke nau tokanga kinautolu ki aí, pea ne u ongoʻi fiemālie pē. Hili ha taimi siʻi ne ʻeke mai ʻe he niʻihi ne mau kaungālokí pe ko e hā e meʻa ʻoku ou laú. Ne u tali hangatonu ange, “Ko e Tohi ʻa Molomoná.” Ko ʻenau fehuʻi hokó pe ko ha taha Siasi au. Ne u talaange ʻio, pea ne ʻikai ke nau toe fai mai ha fehuʻi.
Ne kamata ke toe ʻeke mai ʻe hoku kaungāsōtiá ʻa e Tohi ʻa Molomoná—hono tupuʻanga, meʻa ʻoku ʻi aí, mo ha ngaahi meʻa lahi. Ne toe hoko atu ʻenau ngaahi fehuʻí ki he taumuʻa ʻo e moʻuí mo e ngaahi tefitoʻi moʻoni ʻo e Siasí. Ne hoko ʻeku tui fakalotú ko ha konga fakanatula ia ʻo ʻemau fealeaʻakí, pea naʻe ʻohake ia he meimei tūkunga kotoa pē.
Ne kole mai ʻe ha taha ʻoku ofi mai hono mohengá pe ʻe lava ke ne lau ʻeku Tohi ʻa Molomoná. Ne u talaange ʻio. Ne toe hoko ha meʻa ʻe taha, ko e foki mai haku kaungāloki hili haʻane ʻalu ki ha putu ʻo hano kaungāmeʻa, peá ne talamai ne hanga ʻe he meʻa-fakaʻeikí ʻo ʻomi ha ngaahi fehuʻi lahi ki hono ʻatamaí kau ki he taumuʻa ʻo e moʻuí. Naʻá ne ʻeke mai ko e hā e tui ʻa e Siasí ki he ngaahi meʻa ko iá. Ne fuoloa ʻema talanoa kau ki he taumuʻa ʻo e moʻuí, Fakaleleí, Fakatupú, pea mo e ngaahi kaveinga kehe ʻi he ongoongoleleí. Hili iá, ne ʻi ai mo ha kaungāloki kehe ne nau tokanga ke ʻilo ki he ngaahi akonaki mo e tuʻunga moʻui ʻa e Siasí.
Ne lahi maʻu pē haʻamau talanoa he taimi ne mau fakataha aí ki he ngaahi akonaki ʻa e Siasí. Ne ui ʻe hoku kaungālokí e ngaahi talanoá ni ko e ngaahi fakataha ʻo e “Fehuʻi ʻo kau ki he Māmongá.” Hili ʻemau ʻosi mei he polokalama akó, ne talamai ʻe haku kaungāloki ʻe taha kuó ne fakakaukau ke tuku ʻene kapekapé.
Ne u fakatokangaʻi he taimi kotoa ne u ngāue fakakautau aí, ko ʻene lahi ange ko ia ʻeku talanoa tauʻatāina ʻo kau ki heʻeku kau ki he Siasí peá u faivelenga ange ʻi he talangofua ki he ngaahi akonaki ʻo e ongoongoleleí, ko e lahi ange ia e talanoa tauʻatāina mai e niʻihi kehé kiate aú pea toe lahi ange ai hoku faingamālie ke vahevahe atu e ongoongoleleí.
ʻOku ou fakamālō ko e ngaahi tāpuaki mo e faingamālie ne u maʻu ke talanoa ai ki he ongoongoleleí lolotonga ʻeku ngāue tokoni fakakautaú. ʻOku ou fakamoʻoni kapau te tau loto-toʻa ʻo taukapoʻi e meʻa ʻoku tau mahuʻingaʻia aí, ʻe tāpuekina kitautolu ʻaki ha ngaahi faingamālie ke fai ha ngāue fakafaifekau. Pea kapau te tau tuku e maama ʻo e ongoongoleleí ke ulo tauʻatāina heʻetau moʻuí, te tau lava ke maluʻi kitautolu mei he fakapoʻulí pea maʻu ha tākiekina lelei ki hotau māmaní.