Ko Hono Fakaava ʻe he Polokalama Nima Fie Tokoní ha Hala ki he Ngāue Fakafaifekaú, Siteiki Foʻou ʻi ʻAmapā, Palāsilá
ʻI he ʻaho Tokonaki ʻaho 10 ʻo Māʻasi 2012, naʻe fou ʻi he vai ʻo e papitaisó ha kakai ʻe toko 21. Ko e kakai tokolahi taha ʻeni ke maʻu e ouau ʻo e papitaisó ʻi he ʻaho tatau ʻi he ngaahi taʻu kimuí ni maí pea ke hoko ko e “kaungākolo” mo e Kau Māʻoniʻoní (ʻEfesō 2:19) pea ʻaʻeva “ʻi he moʻui foʻoú” (Loma 6:4) ʻi he ongo siteiti Palāsila ʻo Pala mo ʻAmapaá, ko e konga fakatouʻosi kinaua ʻo e Misiona Palāsila Pelemí.
Naʻe fakahoko e papitaisó hili ha taimi nounou mei hono fanongonongo ʻe hoko ʻa e vahefonua Makapaá ko ha siteiki, ʻa ia naʻe fakahoko ʻi he ʻaho 14 mo e 15 ʻo ʻEpelelí.
Kuo ngāue fakataha e kau takí, kāingalotú, mo e kau faifekaú ʻo fakataumuʻa ki he faʻahinga tupulaki ko ʻení. Kuo tokoni ʻaupito kimuí ni mai ʻa e polokalama Nima Fie Tokoní ki he ngāue fakafaifekau.
Naʻe pehē ʻe Hosea Kalauta Futato Kamiposi, ko e palesiteni ʻo e Misiona Palāsila Pelemí ne toki tukuangé, “Kuo ʻomi ʻe he ngaahi ngāue ne fakahoko ʻe he Nima Fie Tokoní he taʻu ʻe ua kuo ʻosí ʻi he siteiti ʻo ʻAmapaá, ʻa e Siasí mei he taʻeʻiloá, pea fakaake ʻi he kau fakafofonga fakapuleʻangá, kautaha pākí, mo e sosaietí fakalūkufua, ha holi ke ʻilo lahi ange ki he polokalama fakaofó ni mo e Siasi ʻoku nau poupouʻi iá.
Ko hono moʻoní, kuo fuʻu tokoni lahi e ngāue ʻi he siteití pea kuo fokotuʻu ai ʻe he kau fakafofonga fakapuleʻangá ha ngaahi ʻaho mālōlō foʻou ʻe tolu ʻi he vahefonuá: ʻaho 6 ʻo ʻEpelelí, ko e ʻAho ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní; ʻaho 30 ʻo Siulaí, ko e ʻAho Ngāue Fakataha ʻa e Nima Fie Tokoní; mo e ʻaho 23 ʻo Sepitemá, ko e ʻAho fakamanatu “Ko e Fāmilí: Ko ha Fanongonongo ki Māmani”. Makehe mei aí, naʻe fai ha fakamālō ki he Siasí ʻo fakahoko kia ʻEletā Siaila Masakati ʻo e Kau Fitungofulú, ko e Tokoni Ua ʻi he Kau Palesitenisī Fakaʻēlia ʻo Palāsilá.
Naʻe hoko atu ʻa Palesiteni Kemiposi ʻo pehē, “Kuo tokoni lahi e ngaahi ngāue ʻa e Nima Fie Tokoní ke toe falala ange ai e kakai ʻo ʻAmapaá ki he Siasí. ʻI he taimi ʻoku fakafeʻiloaki ai ʻe heʻetau kau faifekaú kinautolú … , ʻoku talaange ʻe he kakaí kuo nau ʻosi fanongo kau ki he Siasí he kuo nau mamata ki he ngaahi fakamatala ʻi he televīsoné, letioó, mo e nusipepá. Kuo nau fanongo ʻi ha ngaahi meʻa maʻongoʻonga kau ki he Siasí, pea ʻoku faʻa fakatupulaki ai ʻenau tali lelei e ngāue fakafaifekaú.”
ʻI Makapā, Palāsilá, naʻe fou ʻi he vai ʻo e papitaisó ha kakai ʻe toko 21 ʻi he Tokonaki ʻaho 10 ʻo Māʻasi 2012, meimei māhina ʻe taha ia kimuʻa pea hoko ʻa e Vahefonua Makapā Palāsilá ko ha siteikí. ʻOku hā atu he taá ʻa e kāingalotu foʻou ko iá mo e kau faifekau mei he Misiona Palāsila Pelemí. ʻOku pehē ʻa e fakalea ʻo e ngaahi fakaʻilongá, “Estaca Macapá,” pe “siteiki Makapaá.” ʻOku pehē ʻe he kau taki fakalotofonuá mo e kau mēmipá ko e tupulaki mo e mālohi ʻo e Siasí ʻi he feituʻú ko e tupu mei he polokalama Nima Fie Tokoní.
Faitaaʻi ʻe Michelle Sá