Lea ʻa e Kau Taki ʻo e Siasí ʻi he Tānaki Tuʻunga ʻi Hauaiʻi, ʻAitahō, ʻIutā
Naʻe folau ha kau taki ʻo e Siasí ki he ngaahi akoʻanga ʻo e Siasí ʻi Hauaiʻi, ʻAitahō, mo ʻIutā, USA, ʻi ʻEpelelí ke fai ha talatalaifale kiate kinautolu ne ʻosi mei he akó.
ʻI he ʻUnivēsiti Pilikihami ʻIongi–ʻAitahoó ʻi he ʻaho 7 ʻo ʻEpeleli 2012, naʻe faleʻi ai ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻa e fānau akó ke “fetongi e manavaheé ʻaki e tuí.”
Naʻá ne pehē, “ʻOku ou tui kuo tau ʻi ha kamataʻanga ʻo ha ʻēpoki foʻou ʻo e tupulakí, koloaʻiá mo e tuʻumālié. ʻOku ou tapou atu ke mou fai ha tukupā kiate kimoutolu pea ki he Tamai Hēvaní ke foaki hoʻomou moʻuí mo fakatapui homou taimí mo homou talēnití ki hono langa hake ʻo e Siasi ʻo Sīsū Kalaisí ʻi he nofo hanganaki atu ki he Hāʻele ʻAngaua Mai ʻa e Fakamoʻuí.”
Naʻe ʻaʻahi ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ki he Kolisi Pisinisi ʻa e Siasí [LDS Business College] ʻi Sōleki Siti, ʻIutā, ʻi he ʻaho 13 ʻo ʻEpeleli 2012, ke fakahoko e lea ʻi he tānaki tʻunga ʻa e fānau ako ne ʻosí mei he ngaahi siteiti kotoa ʻe 50 ʻo ʻAmelika mo ha ngaahi fonua ʻe 67.
Naʻá ne fakamamafaʻi ʻa e fie maʻu ke ngāue tokoni ʻa e fānau akó ʻi he kotoa ʻo ʻenau moʻuí. Naʻá ne pehē, “ʻE hoko e ngāue tokoní ko ho maluʻi mei he siokitá pea mo e ongoʻi ko ia ʻoku ʻi ai hoʻo totonu ki ha meʻá ʻa ia ʻoku fakaʻau ke uesia ʻo toe lahi ange e ngaahi sosaieti he māmaní. … ʻE faitāpuekina e niʻihi kehé ʻe hoʻo ngāue tokoní, pea te ne maluʻi foki koe.”
ʻI he ʻaho hono hokó, naʻe fai ʻe ʻElaine S. Tolotoni, ko e palesiteni lahi ʻo e Kau Finemuí, ʻa e faleʻi ko ʻení ki he fānau akó ʻi BYU–Hauaiʻi: “Manatuʻi ko hai koe.” “Ngāue mālohi.” “Teuteuʻi koe ki he faingataʻá.” “Fakaʻānaua ki ha meʻa lahi ange.” “ʻOku ʻikai ke ʻuluaki maʻu pē ʻa e niʻihi ʻoku ikuná.”
Naʻá ne pehē, “Ngāueʻi hoʻo tuí mo e moʻuí. ʻOua ʻe fakalotosiʻiʻi koe ʻe he ngaahi ʻahiʻahí, ka ke sio ki he faingamālie ʻoku maʻu he faingataʻá. ʻAlu mo ha loto falala mo ha ʻilo fakapapau ʻoku ʻikai ke ke teitei tuenoa. … ʻOku ou tui moʻoni ʻe lava ʻe ha talavou pe finemui angamaʻa ʻoku tataki ʻe he Laumālié ʻo liliu e māmaní.”
ʻI he ʻaho 19 ʻo ʻEpeleli 2012, naʻe fanongo ʻa e fānau ako ne nau ʻosi mei he akó ʻi BYU ʻi Polovó, kia ʻEletā Tālini H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá, naʻá ne lea ʻo kau ki he ngaahi faingataʻa ʻo e māmaní ka naʻá ne tala kiate kinautolu ne ʻosí ke nau vakai ki he kahaʻú ʻi he tuí.
Naʻe pehē ʻe ʻEletā ʻOakesi, “Neongo ʻoku lotosiʻi e kakaí, ka ʻoku totonu ke mou loto-toʻa. Kuo ʻi ai maʻu pē ha ngaahi taimi faingataʻa. Ko kitautolu ʻa e hako ʻo ʻetau ngaahi kui ʻa ia ne nau hao mai mei he ngaahi pole faingataʻá, pea te mou pehē pē. … ʻOku ʻi ai hotau Fakamoʻui, pea kuó Ne akoʻi kitautolu ki he meʻa ʻoku totonu ke tau faí.”
ʻOku fanongo ʻa e fānau ako tānaki tuʻunga mei he ʻUnivēsiti Pilikihami ʻIongi ʻi Polovo, ʻIutaá, USA, kia ʻEletā Tālini H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he ʻaho 19 ʻo ʻEpeleli 2012.
Fakaʻaongaʻi e Taá ʻi he Angalelei ʻa BYU–Provo